Decembari

Jehovap ‘Killeqan­ngitsumik Pissaaneqarami’ toqusimasut makitis­sinnaavai. (Saqq 1:8) Ima pissaaneqartigaaq akeraq sunaluunniit – allaat toqu – ajugaaf­figisin­naallugu. (Kor 1. 15:26) Guutip toqusunit makititsisin­naaneranut uppernarsaat alla tassaavoq killeqan­ngitsumik eqqaaman­nissinnaanera. Ullorissat tamaasa atiisigut taasarpai. (Es 40:26) Aamma toqusimasut eqqaamal­luinnarpai. (Job 14:13; Luk 20:38) Annikitsualuttortai tamaasa – ilaatigut eqqaamasin­naasaat, isikkuat, kinaassusiat inuunermilu misigisimasaat – eqqaamasinnaavai. Jehova siunissami toqusimasunik makititsinis­saminut kissaateqarlunilu pissaaneqarmat neriorsuutaa upperil­luinnarsin­naavarput. Neriorsuutip upperinissaanut aamma allamik uppernarsaateqarpoq. Jehova toqusimasunik makititsisareer­nikuuvoq. Itsaq angutit aalajaatsut amerlan­ngitsut, ilaatigut Jiisusi, toqusimasunik makititsinissaanut pissaaneqalersippai. w23.04 9-10 § 7-9

Pissuserissumik saamasumillu oqaloriaaseqarutta inuit tusarnaarumanerusin­naavaatigut oqaloqatigalutalu. Soorunami oqqanniaan­narlutik upperisarpul­luunniit pillugu illaruaatiginiaan­narluta oqaaseqartut oqaloqatigiin­narnissaat pisariaqanngilaq. (Uss 26:4) Inuilli amerlanerit taamaanneq ajorput, ilaat tusarnaarumasarput. Ersarippoq saamasuunissarput ilinniarutsigu iluaqutaangaarsinnaasoq. Akiuminaatsunik isornar­torsiuerpalaar­tunilluunniit aperineqaruit periaaserillutit akissuteqarfiginias­sagakkit Jehovamut nukissannik tuneqqullutit qinusarit. Eqqaamajuk saamasuuguit oqannin­nguussinnaasut pinngitsoor­tissinnaagakkit. Saamasumik ataqqin­nittumillu akissuteqarnerit killitsis­sutigalugu tusarnaartivit Biibilimi ilumoortut pillugit isummani allanngor­tissinnaavaa. Upperisat pillugu ‘kikkulluunniit tunngavilersueq­qusisut saamallutit ataqqin­ningaarlutillu nassuiaan­nissaannut piareersimajuarit’. (Pet 1. 3:15) Aap, saamasuunerit nukittoq­qutigiuk! w23.09 19 § 18-19

Naammagit­tartuunissamik sisamatigut qanoq ersersitsisin­naanersugut sammeriartigu. Siullertut, inuk naammagittartoq kamajaatsuusarpoq. Kamassaar­neqaraangami tatineqaraangamilu eqqissisimaniartarpoq akiniaasarnanilu. (Mos 2. 34:6) Aappaattut, inuk naammagittartoq utaqqisin­naassuseqarpoq. Ilimagin­ngisamik sivisunerusumik utaqqisin­neqaraangami eqqissiveerunnanilu uumitsan­naveersaartarpoq. (Mat 18:26, 27) Pingajuattut, inuk naammagittartoq eqqarsaq­qaarani iliuuseqapallanneq ajorpoq. Inuk naammagittartoq pingaarutilimmik suliassaqaraangami pipallan­niaannar­tanngilaq naammasiniapal­laannar­tarnanilu. Qanorli iliornissani pilersaarusioq­qaartarpaa. Taava piffissaqarfigil­luarlugu suliarisarpaa. Sisamaattut, inuup naammagittartup naammagit­taallioq­qajaanani atukkani naammagalugit atortarpai. Inuunermini nuannersut eqqarsaatigisarpai sapinngisaminillu nuannaarluni Jehova kiffartorfigisarlugu. (Kol 1:11) Naammagit­tartuuneq sammeriik­katsitut assigiin­ngitsutigut ersersit­tassavarput. w23.08 20-21 § 3-6

Uummatitta assersuutaasup illersornissaa pingaaruteqarluinnarpoq. Sooq? Jehova uummatinik misissuisarmat. Tassa inuit takusin­naasaat isigiin­narnagit qamuuna inuttut qanorpiaq ittuunerput takusin­naasarpaa. (Nal 1. 28:9) Siunnersuutai naassaan­ngitsumik inuussutaasinnaasut eqqarsaatigiuarutsigit asajumaarpaatigut. (Joh 4:14) Taava Saatanip inuillu pissaaneqarfigisaasa atoqatigiinnermut tunngatillugu salloqit­taaniutaannik eqqarsalaar­navianngilagul­luunniit. (Joh 1. 5:18, 19) Jehova qanilliar­torutsigu asanerulerlugulu ataqqinerulis­savarput. Ataatarput aliasutsik­kusunngin­natsigu ajortuliornissaq uumigingaaratsigu eqqarsaatigis­sanngilarpul­luunniit. Marta, qatanngut arnaq Kroatiami najugalik atoqatigiinnikkut eqqunngitsulior­nissamut ussernar­torsiorsimasoq, ima allappoq: “Eqqarsarluaq­qissaar­nissara ajortuliorusus­suseqar­nermalu akiornissaa sapernar­tippara. Jehovali mianerigakku tamanna illersuutigaara.” Qanoq illersuutigigamiuk? Marta oqarpoq ajortumik aalajangiinerup qanoq kinguneqarlutitsisin­naanera eqqarsaatigisimallugu. Aamma uagut taamaaliorsin­naavugut. w23.06 20-21 § 3-4

Jehovap siunertarivaa atini illernarsisin­neqassasoq salluliuutaasut tamaasa ilumuun­nginnerisa uppernarsar­nerisigut. Jiisusip tamanna nalunnginnamiuk malinnitsini ima qinusassasut ilinniartippai: “Ataatarput qilammiittutit, atit illernar­tinneqarli.” (Mat 6:9) Jiisusip paasisimavaa taamaaliorneq inngilinut inunnullu pingaar­nerpaasoq. Jiisusi Jehovap atia illernarsisin­niarlugu kikkunnit tamanit iliuuseqar­nerpaavoq. Jiisusili tigusarineqarami akeqqaminit qanoq unnerluun­neqarpa? Guutimik mitaatigin­nittutut! Qularnan­ngitsumik Jiisusi misigivoq Ataatami atiata illernartup atornerlunnissaa salluliuutiginis­saaluunniit ajortulianit tamanit ajornerpaasoq. Taamatut pinerluttutut unnerluun­neqarluni eqqartuun­neqarnissani nikallungas­sutigingaarpaa. Ilimanarpoq tigusaangajaler­nermini ‘isumatsaq­qangaar­neranut’ tamanna pissutaasoq. – Luk 22:41-44. w24.02 11 § 11

Inuunivimmut arpannitsinni Jehova Jiisusilu ilaquttatsinnit asanerus­savagut. (Mat 10:37) Tamannali isumaqanngilaq Guutimit Jiisusimillu iluarisaanis­satsinnut akornutaasoralugit ilaquttatsinnut pisussaaffipput sumigin­nassagipput. Tassami Guutimit Jiisusimillu iluarisaas­sagutta ilaquttatsinnut pisussaaffipput eqqortit­tariaqarparput. (Tim 1. 5:4, 8) Taamaalioruttalu pilluaatigis­savarput. Jehovammi nalunngilaa aappariit asaqatigiil­lutillu ataqqeqatigiikkunik, angajoqqaat meeqqaminnik asannillutik perorsaagunik aamma meeqqat angajoq­qaaminnut naalakkunik ilaqutariittut pilluarlutik inuusinnaasut. (Ef 5:33; 6:1, 4) Eqqortuusorisannut, kulturinni nalingin­naasunut ilisimatuul­luunniit siunnersuutaannut maleruutiinnarnak ilaqutariinni uiuguit, nuliaaguit qitornaaguil­luunniit Biibilimi siunnersuutitsialaat tutsuigikkit. Biibililersaarutaatigut atorluartakkit. Taakkunani najoqqutassianik Biibilimeersunik maleruaasin­naanermut atoriaan­naasunik siunnersuuteqarpoq. w23.08 28 § 6-7

Arnaq kristumiu assigiin­ngitsunik pikkorif­feqartariaqarpoq. Meeraanermi ilikkakkami ilaat inuunini naallugu iluaqutigisin­naasarpai. Assersuutigalugu atuarneq allannerlu pikkorif­figilersin­naavatit. Kulturit ilaanni arnat atuarnermik allannermillu ilinniar­nissaat pingaar­tinneqanngilaq. Piginnaanerilli taakku kristumiunut tamanut pingaar­tuupput. (Tes 1. 4:11) Taamaattumik atuarnermik allannermillu ilinniar­nissannut sunaluunniit unissutigis­sanngilat. Sutigut iluaqutigissaviuk? Suliffis­sarsinissamut suliffivillu annaanngin­nissaanut iluaqutigissavat. Aamma Guutip oqaasianik misissuineq ilinniar­titsinerlu pikkorif­figinerulis­savatit. Pingaar­nertullu, Biibilimik atuarnikkut eqqarsaatigin­neqqissaar­nikkullu Jehovamut qaninnerulissaatit. – Tim 1. 4:15. w23.12 20 § 10-11

Ussernar­torsioraangavit ikioqqullutit Jehova qinnuigisaruk. Naammal­luinnan­ngitsuugatta eqqunngitsulior­nissamut ussernar­torsiorneq akiortuar­tariaqarparput. Saatanillu akiuunnerput oqimaan­nerulersin­niartarpaa. Ilaatigut taamaalior­niartarpoq aliikkusersuutit aserorsaataasut atorlugit. Aliikkusersuutit taamaattut minguttuunik eqqarsalersitsisin­naapput. Taamaat­tunillu eqqarsaateqar­tarutta ingasattumik ajortuliornermik kinguneqarsinnaavoq. (Mak 7:21-23; Jaak 1:14, 15) Eqqunngitsulior­nissamik ussernar­torsiut qaangis­sagutsigu Jehovamit ikiorneqar­tariaqarpugut. Jiisusip qinnummi najoqqutas­saasumi tamanna ilannguppaa ima oqarami: “Ussernartumut nakkaan­naqqunata ikiortigut, Diaavulumillu annaatsigut.” (Mat 6:13) Jehova ikiuinis­saminut piareeqqavoq, ikiorneqar­nissarpulli qinnutigisariaqarparput. Qinnutigullu naapertorlugit iliuuseqar­tariaqarpugut. w23.05 6-7 § 15-17

Aappariit Ataataminnik qilammiusumik ikinnguteqarnertik pingaar­tikkunikku siunnersuutai maleruarusun­nerussavaat. Taamaalior­tarunik asaqatigiin­nerminnik nillertun­ngortitsisin­naasunik ajornar­torsiutaalersinnaasut eqqumaf­figissavaat ajornar­torsiutiminnillu qaangiil­luarnerusin­naassallutik. Inuit anersaakkut ittunik pingaar­titsisut Jehova ilaarniar­tarpaat pissusiilu – soorlu inussiar­nersuuneq, naammagit­tartuuneq isumakkeerfigin­nittarnerlu – ineriar­tortittarlugit. (Ef 4:32–5:1) Aappariit taamaattunik pissusillit asannin­nerusarput. Qatanngut Lenamik atilik ukiuni 25-ni aappaqarsimasoq ima oqarpoq: “Inuk anersaakkut ittunik pingaar­titsisoq asajuminar­nerullunilu ataqqiuminar­nerusarpoq.” Biibilimeersumik assersuuteqariarta. Jehova Missiarsiusussap angajoq­qaassaanik toqqaavoq. Daavip kinguaarpassuanit Juuserfi Mariialu Jehovap toqqarpai. Sooq? Jehovap nalunnginnamiuk marluullutik imminik asannittuusut taamatullu asanninnertik aappariin­nerminnut tunngaviutissagaat. w23.05 21 § 3-4

Siulersuisorsuarput, Jiisusi, naammal­luinnartuuvoq, qatanngutilli angutit siulersuisussatut toqqagai naammal­luinnan­ngitsuupput. Imaassinnaavoq naalannissaat ajornakusoor­tikkipput, pingaartumik nangaas­sutigisatsinnik iliuuseqaq­qugaangatigut. Apustilip Petrusip peqqussummut aalajangersimasumut naalannissani aallaqqaammut nangaas­sutigaa. Moorsisip inatsisai naapertorlugit uumasunik minguttuunik inngilimit nereqquneqarami nerinissani ataasiaannarani pingasoriarlunili itigartippaa! (ApS 10:9-16) Sooq? Peqqussut nutaaq sungiusimasaminit allaanerungaartoq paasinnginnamiuk. Apustilili Paulusi naalappoq kristumiut utoqqaanertat Jerusalem­mimiittut oqarfigimmanni angutit sisamat ilagalugit guutisiorfimmut ileqqulersuutit malillugit minguersariar­tussasoq. Paulusip nalunngilaa Moorsisip inatsisai kristumiunit maleruar­neqartariaqarun­naartut aammalu nammineq kukkussuteqarsimanani. Kisianni “aqaguani Paulusip angutit taakku ileqqulersuutit malillugit minguersaqatigai”. (ApS 21:23, 24, 26) Paulusip naalannera qatanngutit ataasioqatigiin­nerannut iluaqutaavoq. – Rom 14:19, 21. w23.10 10 § 15-16

Qanimut ikinnguteqarusukkuit pissuserineqartussat suut pingaaruteqarsoraagit? Mianerinninneq immaqa eqqarsaatiginngilat. Jehovamilli ikinnguteqarusuttut taanna mianerisariaqarpaat. Qanorluunniit sivisutigisumik Jehovamut kiffartorsimagaluarutta tamatta taassuminnga mianerin­nittuusariaqarpugut. Guutimilli mianerinninneq qanoq isumaqarpa? Inuup Guutimik mianerinnittup taanna asavaa, taassuminngalu ikinnguteqar­nerminut aseruisin­naasumik iliuuseqarusun­navianngilaq. Jiisusi Guutimik mianerin­nittuuvoq. (Hebr 5:7) Jiisusip Jehova ersiginngilaa. (Es 11:2, 3) Qamanngali pisumik asangaarpaa naalakkusullugulu. (Joh 14:21, 31) Jehova asannit­tuummat, ilisimas­suseqarmat, naapertuil­luartuummat pissaaneqangaarmallu Jiisusi ilaarlugu ataqqingaarparput. Aamma nalunngilarput Jehovap asangaaramisigut siunnersuutiminut qisuariar­tarnerput sunnerneqaatigisaraa. Jehovamut naalanngikkutta aliasutsit­tarparput naalakkaangattali nuannaar­tittarlugu. – Tuss 78:41; Uss 27:11. w23.06 14 § 1-2; 15 § 5

Kunngi Uzziia pissaaneqalerami Jehovamit ikiorneqar­taraluarluni taassumunnga qujamasuk­kunnaarpoq. Sumik ilinniutigisin­naavarput? Eqqaamas­savarput inuunitsinni kiffartor­nitsinnilu ajunngitsut tamarmik Jehovameersuusut. Taamaattumik naammas­sisagut pillugit oqarataarnata Jehovamut qujamasut­tariaqarpugut. (Kor 1. 4:7) Maniguulluta eqqaamasariaqarparput kukkusarluta naqqinneqar­tariaqar­tarlutalu. Qatanngut angut 60-it missaannik ukiulik ima allappoq: “Kukkussutikka allanit maluginiar­neqaraangata nikallor­nangalu ajuallan­naveersaar­nissara ilikkarsimavara. Naqqinneqaraangama aaqqitassakka aaqqinniar­tarpakka Jehovamullu sapinngisannik pitsaanerpaamik kiffartorlunga.” Jehovamut naalakkutta maniguut­tuujuaruttalu pilluarluta inuussaagut. – Uss 22:4. w23.09 10 § 10-11

Paulusip nalaani kristumiut pinertusaar­tariaqarput. Ajornar­torsiutit inuit allat atortagaasa saniatigut aamma allatigut misilin­neqartarput. Amerlanersaat juutit upperisarsiornikkut siuttuinit, Romamiut oqartus­saasuinit allaallu ilaquttaminnit akerlilersor­neqarput. (Mat 10:21) Aamma tunussisut ilinniar­titsissutaasa eqqunngitsut ilagiinnik avissaar­tuutsitsin­nginnissaat qulakkeer­tariaqarpaat. (ApS 20:29, 30) Taamaattunik nalaataqaraluarlutik aalajaat­tuarput. (Saqq 2:3) Qanoq ilillutik? Biibilimi pinertusaarnikkut maligas­siuisut, soorlu Juubi, eqqarsaatigeq­qissaar­tarpaat. (Jaak 5:10, 11) Nakussatseq­qullutik qinusarput. (ApS 4:29-31) Pinertusaarunillu Jehovap akissarsisis­sagaatik puiunngilaat. (ApS 5:41) Uagut aamma Guutip oqaasiani Biibililersaarutitsinnilu pinertusaarnikkut maligas­siuisut pillugit misissuinikkut eqqarsaatigin­neqqissaar­nikkullu pinertusaarsin­naavugut. w23.07 3 § 5-6

Jehovap Jiisusillu imminiigin­narnavian­ngilaatigut. Petrusip Jiisusi nalunerareerlugu pingaarutilimmik aalajangigas­saqalerpoq. Tunniutiin­nassava imaluunniit Kristusimut malinnit­tuassava? Petrusi upperun­naaqqunagu Jiisusip qamannga pisumik qinnussimallugu oqaluttuuppaa. Oqarfigaalu qularinagu kingusin­nerusukkut qatanngutini nakussatsik­kumaarai. (Luk 22:31, 32) Petrusip taama oqarfigineqarnini eqqarsaatigigaangamiuk tunniutiin­nanngin­nissaminut nakussatsis­sutigisarsimassavaa! Inuunitsinni pingaarutilinnik aalajangigas­saqartilluta Jehovap utoqqaanertat asannittut aqqutigalugit aalajaaq­qulluta ikiorsin­naavaatigut. (Ef 4:8, 11) Soorlu Petrusip apustilillu allat pisariaqartitaat Jehovap matussusersimagai, uaguttaaq kiffartornerput salliuk­kutsigu Jehovap pisariaqar­titatsinnik isumagiumaarpaatigut. w23.09 24-25 § 14-15

Jehovap allanut ikiuiniarnigut tamaasa, qanorluunniit annikitsigigaluarpata, maluginiaq­qissaartarpai. Pilliutitut nalilittut aamma akiligassatut nammineq taarsigas­samisut isigisarpai. Siornatigut ilagiinni kiffartor­tuusimaguit imaluunniit utoqqaaner­taasimaguit asanninnerit tunngavigalugu tamaviaarlutit suliarisimasatit Jehovap eqqaamavai. (Kor 1. 15:58) Aamma asanninneq ersersit­tuakkat maluginiartarpaa. Jehovap kissaatigaa imminut allanullu asannin­nerujar­tussasugut. Jehova asanerulersin­naavarput oqaasianik atuartarnikkut, eqqarsaatigin­neqqissaar­tarnikkut aalajangersimasumillu qinusarnikkut. Qatanngutigut asanerulersin­naavagut assigiin­ngitsutigut ikiortar­nerisigut. Asanninnerput alliartor­tillugu Jehovamut anersaakkullu ilaquttatsinnut qaninneruler­tarpugut. Taakkulu naassaan­ngitsumik ikinngutigiuaan­narsinnaavagut! w23.07 10 § 11; 11 § 13; 13 § 18

Kristumiut tamarmik immikkut peqqissusertik qanoq paarissanerlugu namminneq aalajangigassaraat. Nakorsaariaatsimik toqqaaniar­nerminni aap anersaarsior­nerullu ingalas­simanissaat pillugit Guutip inatsisai naalattus­saavaat. (ApS 15:20; Gal 5:19, 20) Allatigulli nakorsaariaatsit suut atussanerlugit namminneq aalajangigassaraat. Katsorsaariaatsip aalajangersimasup iluaqutaanera ajoqutaaneraluunniit aalajangiusimasin­naavarput, uppeqatittali allaanerusumik toqqaasin­naatitaanerat ataqqisariaqarparput. Tamatumunngali tunngatillugu uku sisamat eqqaamas­savagut: (1) Guutip kunngeqarfia kisimi ajorunnaarsitsil­luinnarsinnaavoq. (Es 33:24) (2) Peqqissutsiminut tunngatillugu aalajangiiniaraangami Kristumiup suna imminut pitsaanerusoq ‘qularin­ngilluin­nartariaqarpaa’. (Rom 14:5) (3) Allat aalajangigaannik isornar­torsiuinatalu naakkius­sutaasin­naasumik iliuuseqar­tanngilagut. (Rom 14:13) (4) Kristumiup ilagiit ataasius­suseqarnerat nammineq isummaminit pingaar­nerutikkamiuk asanninnini ersersittarpaa. – Rom 14:15, 19, 20. w23.07 24 § 15

Jehovamut attaveqarnerit pingaar­tippiuk? Qularnanngilaq pingaartikkit. Itsarli inuppassuit ilittut Jehova asallugu kiffartorfigisimavaat. (Tuss 104:33, 34) Imminut pilliutigeriaan­naallutik Jehovamut kiffartorsimapput. Taakkua ilagaat itsaq Israalimi nasiræerit, tassa tunniul­luinnarsimasut. Nasiræerit tassaapput Israalikkut Jehovamut kiffartor­niarlutik immikkuul­larissumik imminut pilliutigeriaannaasut. Moorsisip inatsisai naapertorlugit angut arnarluunniit immikkuul­larissumik Jehovamut neriorsuisinnaavoq piffissap ilaani nasiræeritut inuuniarluni. (Mos 4. 6:1, 2) Taama neriorsuisup Israalikkut allat maleruar­tariaqan­ngisaat maleruar­tariaqalissavai. Taavami sooq Israalikkuusoq taama aalajangerusussava? Ilimanarpoq Jehovamut asanningaarnini kajumis­sissutigalugu taassumalu tunissutai qujamasuutigalugit taama aalajangerumasinnaasoq. – Mos 5. 6:5; 16:17. w24.02 14 § 1-2

Oqaaseq hebræerisooq “ilumoorfiginninneq” imaluunniit “ilumoorfigin­nilluni asanninneq” Biibilimi eqqaaneqartoq Guutip qamannga pisumik kissalaar­tumillu kiffaminut asannin­neranut atorneqarajuttarpoq. Aamma Guutip kiffaasa asaqatigiin­nerannut oqaatsit taakku atorneqartarput. (Sam 2. 9:6, 7) Ilumoorfigin­ninnerput piffissap ingerlanerani sakkortunerulersinnaavoq. Daanialip ilumoorfigin­ninnini qanoq ineriar­tortikkaa eqqarsaatigiuk. Daanialip Jehovamut ilumoorfigin­ninnera arlalitsigut misilin­neqartarpoq. Misilin­neqarnerali annerpaaq 90-it sinnerlugit ukioqarluni pivoq. Naalagaanertat ilaasa Daaniali nuannarin­ngilaat Guutialu ataqqinagu. Taamaattumik toqunniarlugu pilersaarusiorput. Daaniali Guutiminut kunngimul­luunniit ilumoorfigin­ninnera misilin­neqartus­sanngor­tillugu peqqussummik kunngimut atsioqqusipput. Daanialip kunngimut ilumoorfigin­ninnini ersersit­tussanngorpaa ulluni 30-ni Jehovamut qinunngil­luinnar­nermigut. Daanialili Jehovamut ilumoorfigin­nittuarpoq. – Dan 6:13-16, 21-23. w23.08 5 § 10-12

Jehovap kissaatigaa qatanngutigiittut asaqatigiit­tuassasugut. Uppeqatitta kristumiutut pissuserineqartussat ersersin­ngitsoorpatigit isummis­sanngilagut ajuallatsin­niarluta taama pissusilersortut, Biibilimimi najoqqutassiat uagutsitulli maleruarusuppaat. (Uss 12:18) Guutip kiffani aalajaatsut kukkusaraluartut asavai. Kukkusaraluartugut ikinngutaajuarpoq kamassimajuaan­narnanilu. (Tuss 103:9) Jehovap uagutsinnik isumakkeerfigin­ninnera qujamasuutigeqaarput, allallu isumakkeerfiginerisigut ilaarusupparput. (Ef 4:32–5:1) Eqqaamajuk naggatissaq qanilliar­tortillugu qatanngutigut qanimut attavigiuar­tariaqarigut. Malersugaaneruler­nissarput ilimagisin­naavarput, immaqalu allaat uppernerput pissutigalugu parnaarus­saassalluta. Taamatut pisoqarpat qatanngutigut aatsaat taama pisariaqar­titsigis­savagut. – Uss 17:17. w24.03 15-16 § 6-7

Biibilimi inuusuttut Jehovamik qanimut ikinnguteqartut oqaluttuarineqarput. Jehovamillu iluarisaagamik pilluarput. Daavi taakkua ilagaat. Inuusut­tuulluni aalajangerpoq Jehova ikinngutigiler­niarlugu, kunngiul­lualerporlu. (Kng 1. 3:6; 9:4, 5; 14:8) Daavip kiffartornera inuuneralu pillugit misissuinerit Jehovamut aalajaallutit kiffartor­nissamut kajumis­sissutigissavat. Aamma Makkorsi Timuutiusiluunniit pillugu atuarlutit misissuisin­naavutit. Suli inersimasun­ngornatik Jehova kiffartorfigilerpaat aalajaaf­figiuarlugulu. Maannakkut inuunerit qanoq atornerit siunissannut sunniuteqassaaq. Imminut tatiginak Jehova tatigigukku silatusaartumik aalajangiinissannut ikiussavaatit. Pilluarlutit imaqarluartumik inuuneqarsin­naavutit. Eqqaamajuk kiffartornermi iliuutsitit Jehovap pingaartikkai. Jehova Guuterput asannittoq kiffartorfigigukku inuuninni nuannaar­nerpaassaatit. Allamik pitsaanerusoqarnerpa? w23.09 13 § 18-19

Paulusip nalunngilaa kristumioqatini kukkusartut. Assersuutigalugu ilagiinnut ilanngummat Jerusalemmimi kristumiut ilaasa naliler­nerluppaat upperinagulu. (ApS 9:26) Kingusin­nerusukkut ilaasa tusaamanerlugaalersin­niarlugu oqaatis­suaatigaat. (Kor 2. 10:10) Utoqqaanertaq allat naakkius­sutigisin­naasaannik aalajangertoq Paulusip takuaa. (Gal 2:11, 12) Paulusilu qanimut suleqatiminit, Makkorsimit, pakatsisin­neqangaarpoq. (ApS 15:37, 38) Paulusi isummersin­naagaluarpoq ajuallatsitsisut taakku ilagisarun­naarniarlugit. Qatanngutinili ajunngitsumik isiginnit­taaseqarfigigamigit Jehovamut aalajaalluni kiffartor­tuarpoq. Paulusip suna iluaqutigaa? Paulusip uppeqatini asavai. Asanninnini pissutigalugu qatanngutimi pissusaat nuannersut, imaanngitsoq kukkussutaat, isiginiarneruai. Paulusi asannikkami isumakkeerfigin­nittarpoq. w24.03 15 § 4-5

Biibilimi oqaluttuarpas­suaqarpoq saamanerup pingaaruteqas­susianik ersersitsisunik. Iisaaq eqqarsaatigeriartigu. Filisterit najugaqarfiannut Gerarimut nuummat tassani najugaqartut sinngagigamikku puilasuliat Aaperaap kiffaasa assassimasaat issumik immerlugit milippaat. Akiuunnani Iisaaq inoqutinilu ungasin­nerulaartumut nuupput puilasulianillu allanik assaallutik. (Mos 1. 26:12-18) Puilasulialli taakku aamma filisterit piginerarpaat. Taamaak­kaluartoq Iisaaq eqqissisimasumik pivoq. (Mos 1. 26:19-25) Arlaleriarluni kamassaar­neqaraluarluni saamasuunis­saminut suna iluaqutigaa? Angajoqqaami maligassiaat, Aaperaap eqqissinermik nuannarisaqarnera Saarallu ‘eqqissisimajuarlunilu saamajuarnera’, maluginiarlugillu ilinniarfigil­luarsimassavai. – Pet 1. 3:4-6; Mos 1. 21:22-34. w23.09 15 § 4

Jehovap ernini angajul­liliani nunarsuarmukartippaa inuit Kunngeqarfik pillugu ilinniar­tinnias­sammagit inuuninilu akigalugu ajortimit toqumillu aniguisin­niassam­matigut. Taava Jiisusi makitin­neqarluni qilaliar­tinneqarpoq Guutip kunngeqarfiani kunngitut naalakkersuisus­saagami. Jehovap aqqata illernarsisin­neqarnissaa Biibilimi pingaarnertut sammineqarpoq. Atialu illernarsisin­neqassaaq nunarsuarmut siunertani Kunngeqarfik Kristusimit kunngiuf­figineqartoq aqqutigalugu naammas­sippagu. Jehovap siunertaa allanngor­tinneqarsin­naanngilaq. Neriorsuinikuuvormi oqarnermisut iliorumaarluni. (Es 46:10; Hebr 6:17, 18) Nunarsuaq paratiisin­ngussaaq tassanilu Adamip Evallu kinguaavi naapertuil­luartut naammal­luinnar­tunngorlutik naassaan­ngitsumik inuussapput. (Tuss 37:29) Jehovalli naammas­sisassai taakkuin­naanngillat, aamma siunertarivaa kiffani qilammiittut nunarsuarmiittullu tamarmik ataasioqatigiilissasut. Taava kikkut tamarmik ilumoorfigin­nillutik Jehova kisimi oqartus­saasutut naalassavaat. (Ef 1:8-11) Jehovap siunertani nuannersumik naammas­siumaaraa ilisimallugu ilaa nuanneq? w23.10 20 § 7-8

Juutit Babylonnimiit Jerusalemmimut tikereerlutik sivitsun­ngitsoq aningaasatigut ajornar­torsiuteqalerput inuiaqatigiinnillu allanit akerlilersor­neqarlutik. Aamma Persiamiut naalagaaf­fissuanni eqqissiviil­liortoqarnera pissutigalugu ajornar­torsiorput. Taamaattumik juutit ilaasa guutisiorfiup sanaqqin­neqarnissaata aallunnissaa sapernar­tippaat. Taamaattumik Jehovap pruffiitini Haggaji Zakkarialu aallartippai inuit sanaartor­nissaannut piumassuseqalerseq­qinniarlugit, qiimmas­saanerallu sunniuteqarluarpoq. (Hagg 1:1; Zak 1:1) Ukiulli 50-it tamatuma kingorna juutit qiimmas­sarneqaq­qittariaqarput. Ezra, allakkanik allaqqiisartoq, Babylonnimiit Jerusalem­miliarpoq Guutip innuttai qiimmas­sarniarlugit guutisiorneq ilumoortoq salliuteq­qinnias­sammassuk. (Ezra 7:1, 6) Soorlu itsaq juutit akerlilersor­neqarnermi Haggajip Zakkariallu siulittuutaat Jehovamik tatigin­nittuar­nissaminnut iluaqutigigaat, uaguttaaq pissutsini erloqinartuni Jehovap tatigiuar­nissaanut iluaqutigisin­naavagut. – Uss 22:19, tastamantitoĸaĸ. w23.11 14-15 § 2-3

Qanoq immitsinnut asannit­tuliorfigisin­naavugut? Ilaatigut tuppallersaanikkut. Misigin­neqatigin­nikkutta ‘tuppallersaqatigiit­tuarsin­naassaagut’. (Tes 1. 4:18) Qanoq asaqatigiit­tuarsin­naavugut? Uppeqatitta kukkussutaannik sapinngisatsinnik isumakkeerfigin­ninniar­tarnikkut. Sooq nalitsinni asaqatigiinneq pingaaruteqarpa? Petrusip ima nassuiarpaa: “[Suut] tamarmik naggatissaat qanillivoq. Taamaattumik … qamannga pisumik asaqatigiigitsi.” (Pet 1. 4:7, 8) Naggatissap qanilliar­tornerani suna ilimagis­savarput? Jiisusi malinnitsiminut ima oqarpoq: “[Atera] pissutigalugu inuiaqatigiinnit tamanit uumissor­neqarumaarpusi.” (Mat 24:9) Taamatut uumissor­neqarnermi pinertusaas­sagutta ataasioqatigiit­tuartariaqarpugut. Taamaaliorutta Saatanip avissaar­tuutsis­sinnaas­sanngilaatigut. – Flp 2:1, 2. w23.11 13 § 18-19

Guutip oqaasiani ilumoortut sunniuteqangaartarput. Jehova taassumalu qanorpiaq ittuunera pillugit inunnut ilinniar­titsissutigigaangatsigit nuanningaartumik misigisaqar­tarpugut. Saatanip salluliuutai sunniutaaruk­kiartortarput Ataatattalu pissusii nuannersut takusin­naalertarpaat. Killeqan­ngitsumik pissaaneqarmat mianeringaaler­tarpaat. (Es 40:26) Naapertuil­luaqqis­saartuunera pissutigalugu tatigiler­tarpaat. (Mos 5. 32:4) Ilisimas­suseqangaarnera ilinniarfigisarpaat. (Es 55:9; Rom 11:33) Aamma Guuti asanningaartuusoq paasigaangamikku tuppallis­sutigisarpaat. (Joh 1. 4:8) Jehovamut qanilliar­tortillutik taassuma qitornaatut naassaan­ngitsumik inuunissamik neriuutertik qularutigiun­naariar­tortarpaat. Inuit Jehovamut qanillinissamut ikiorsin­naagatsigit immikkut pisinnaatitaaf­fiungaarpoq! Taamaalioraangatta Jehovap ‘suleqatimisut’ isigisarpaatigut. – Kor 1. 3:5. w24.02 12 § 15

Angajoqqaatit Nalunaajaasuuppata Nalunaajaasunil­luunniit ilinniar­tinneqaruit imermut morsutsitaanissat anguniagaraajuk? Tamanna anguniagassaavoq pitsaasoq. Imermulli morsutsitaan­nginninni Jehovamut tunniul­luinnaq­qaartariaqarputit. Qanoq Jehovamut tunniul­luinnarsinnaavit? Jehova qinunikkut neriorsussavat taanna kisiat guutisiorfiginiarlugu taassumalu piumasaatut iliornissat inuuninni salliut­tuassallugu. Tassa Jehova neriorsussavat ‘uummatit tamakkerlugu, tarnit tamakkerlugu, isumat tamakkerlugu nukitillu tamakkerlugit asajuas­sallugu’. (Mak 12:30) Allat tusaatinnagit Jehovamut tunniul­luinnassaatit. Imermulli morsutsitaaneq allat isigitillugit pisarpoq, morsutsitaanikkummi ersersissavat tunniul­luinnarsimallutit. Tunniul­luinnarneq neriorsuutaavoq pimoorussassaq. Eqqortin­nissaalu sulissutigiuassavat, Jehovallu aamma tamanna piumasaraa. – Oqal 5:3. w24.03 2 § 2; 3 § 5

Aappariit tamarmik ajornar­torsiortarput. Biibilimi paatsuugas­saanngitsumik allassimavoq ‘katittut ajornar­torsiuteqar­tarumaartut’. (Kor 1. 7:28) Sooq taamaappa? Inuit naammal­luinnan­ngitsut aappariiler­tarmata. Pissusilersoriaasii assigiin­ngitsuusin­naapput, aamma assigiingitsunik nuannarin­ngisaqarlutillu nuannarisaqarsin­naapput. Aappariit kulturii tunuliaqutaallu assigiin­ngitsuusin­naapput. Imaassinnaavoq katinngin­nerminni aappaasup malugisiman­ngisaanik aappaa pissuseqarluniluunniit ileqqoqartoq. Piffissallu ingerlanerani taakku ajornar­torsior­titsilersin­naapput. Allaat aamma namminneq kukkussuteqaraluarlutik aappartik pisuutis­sinnaavaat. Ajornar­torsiutimillu aaqqinnissaat sulissutiginagu immaqa isumaqalersin­naapput averuser­nissartik avinnis­sartilluunniit aaqqiis­sutaasoq. Aaqqiis­sutaavali? Naamik. Jehovap uiusoq nuliaasorlu aappariit­tuassasut kissaatigaa, aamma aappaasoq inooqatigiuminaak­kaluartoq. w24.03 16 § 8; 17 § 11

Imermut morsutsitaanerpit kingorna ilikkagaqar­nerullutillu anersaakkut inersimal­luarnerujar­toravit naassaan­ngitsumik nunarsuarmi paratiisiusumi inuunissamik neriuutip piviusun­ngornissaa suli upperinerulerpat. (Hebr 5:13–6:1) Romamiut 5:2-4 allaatigineqartut misigisimagunarpatit. Assigiin­ngitsutigut misilin­neqarnerni pinertusaarputit Guutimillu iluarisaanerit misigalugu. Guutimit asaneqarlutillu iluarineqartutit nalunnginnakku neriorsuutigineqartut piviusun­ngornissaasa upperinis­saannut pissutis­saqarluar­neruvutit. Maannalu neriuut qularin­ngivillugu qujamasuutiginerulersimavat inuuninnilu sunnerneqaatigingaar­tarlugu. Sutigut tamatigut, soorlu ilaquttannut pissusilersorninnut, aalajangiiniarninnut piffissamillu atuisarninnut, sunniuteqartarpoq. Paulusi neriorsuivoq Guutimit iluarisaasut neriuutaat piviusun­ngorumaartoq. – Rom 15:13. w23.12 12-13 § 16-19

Anigoruminaatsumik misilin­neqaraangatta misigis­sutsigut, eqqarsaatigut qisuariaatsigullu pissusis­samisoorun­naarsin­naapput. Umiarsuartut anorersuarsiortutut mallit qaararnerannit eqqoqat­taarneqartutut misigis­sutsigut sakkortuumik allanngorarsin­naapput. Misigis­sutsinit taamaattunit nanertisimaliin­navikkaangatta Jehovap qanoq ikiortarpaatigut? Neriorsor­neqarpugut Jehovap patajaal­lisissagaatigut, tassa misigis­sutsikkut eqqissisimanissamut ikiussagaatigut. Umiarsuaq anorersuarsioraangami navianar­torsiorluni orraalersinnaavoq. Umiarsuit amerlasuut patajaal­lisaatinik orraaval­laarnaveeq­quteqartarput. Tamannalu pissutigalugu ilaasut malissiorpal­laarnatik toqqissisimanerusin­naapput. Umiarsuarli aatsaat siumut ingerlagaangat patajaal­lisaatit iluaqutaal­luarnerusarput. Taamatuttaaq misilin­neqarnermi aalajaalluta Jehova kiffartorfigiuarutsigu patajaal­lisissavaatigut. w24.01 22 § 7-8

Annilaangagaangavit Jehovap iliuuserisimasai eqqarsaatigisakkit. Pinngortitai eqqarsaatigeq­qissaartakkit. Assersuutigalugu timmissat naasullu, Jehova assilillugu pinngor­titaanngik­kaluartut taassumunngalu guutisiorsin­naanngik­kaluartut, Jehovap qanoq isumagisarnerai ‘qimerloorsinnaavat’. (Mat 6:25-32) Taamaalillutit Jehovamit isumassor­neqarnissat upperinerulersinnaavat. Aamma Jehovap kiffani qanoq ikiortarsimagai eqqarsaatigisarsinnaavat. Immaqa Biibilimi inuk oqaluttuarineqartoq upperluarnermik ersersitsisimasoq pillugu misissuinikuuvutit imaluunniit nalitsinni Jehovap kiffaasa ilaat pillugu atuarnikuullutit. Aamma Jehovap ilinnik isumassuisareernera eqqarsaatigisaruk. Ilisarisimaler­niassagakku qanoq ikiorsimavaatit? (Joh 6:44) Qinnutitit qanoq akisarsimavai? (Joh 1. 5:14) Aamma ernerata asasaata pilliutaa ullut tamaasa qanoq iluaqutigisarpiuk? – Ef 1:7; Hebr 4:14-16. w24.01 4 § 6; 7 § 17