៧ យ៉ាកុប
គាត់ក្លាហានការពារក្រុមគ្រួសារ
នៅសម័យគម្ពីរ មានបុរសម្នាក់ឈ្មោះយ៉ាកុប។ កាលដែលគាត់មានវ័យកាន់តែចាស់ គាត់បាននិយាយពាក្យប៉ុន្មានម៉ាត់ដែលរៀបរាប់អំពីជីវិតគាត់ថា អាយុគាត់«មិនវែង» ហើយ«ឆ្លងកាត់ទុក្ខលំបាកច្រើនណាស់»។ (ដក. ៤៧:៩) គាត់ពិតជាជួបប្រទះឧបសគ្គច្រើនមែន! ពេលគាត់នៅក្មេង បងប្រុសរបស់គាត់ចង់សម្លាប់គាត់។ ដូច្នេះ យ៉ាកុបរត់ទៅយ៉ាងឆ្ងាយរហូតដល់ក្រុងហារ៉ាន។ នៅក្រុងហារ៉ាន យ៉ាកុបបានចាប់ចិត្តស្រឡាញ់នារីម្នាក់ឈ្មោះរ៉ាជែល។ ប៉ុន្តែ ឡាបាន់ដែលជាឪពុករបស់រ៉ាជែល បានបញ្ឆោតយ៉ាកុបឲ្យរៀបការជាមួយនឹងបងស្រីរបស់នាងវិញ។ ក្រោយមក ទើបឡាបាន់ឲ្យយ៉ាកុបរៀបការជាមួយនឹងរ៉ាជែល។ ម្ល៉ោះហើយ យ៉ាកុបមានប្រពន្ធពីរ ហើយប្រពន្ធទាំងពីរនាក់នោះមិនចុះសម្រុងនឹងគ្នាទេ។ អស់ជាច្រើនឆ្នាំ យ៉ាកុបធ្វើការឲ្យឡាបាន់ តែឡាបាន់កេងប្រវ័ញ្ចញើសឈាមរបស់គាត់ម្ដងហើយម្ដងទៀត។ យ៉ាងណាក៏ដោយ យ៉ាកុបបានបង្ហាញចិត្តក្លាហាន ជំនឿ និងការចេះស៊ូទ្រាំ។
នៅថ្ងៃមួយ ព្រះយេហូវ៉ាបានប្រាប់យ៉ាកុបថា ឥឡូវដល់ពេលគាត់ត្រូវចេញពីក្រុងហារ៉ានត្រឡប់ទៅផ្ទះដែលនៅស្រុកកាណានវិញ។ ប៉ុន្តែ បើយ៉ាកុបត្រូវចាកចេញមែន នោះគឺជារឿងពិបាកខ្លាំងណាស់ ពីព្រោះឡាបាន់ជាមនុស្សហួងហែងនិងលោភលន់។ ដូច្នេះ យ៉ាកុបបានទៅពិគ្រោះជាមួយរ៉ាជែលនិងលេអា។ រួចនាំប្រពន្ធកូនចាកចេញដោយមិនឲ្យឡាបាន់ដឹង។ លុះឡាបាន់ដឹង ក៏ប្រមូលគ្នាដេញតាម។ ពេលតាមទាន់ ឡាបាន់បាននិយាយរិះគន់យ៉ាកុបយ៉ាងចាស់ដៃ ដោយសារយ៉ាកុបចេញទៅមិនប្រាប់គាត់។ ឡាបាន់ថែមទាំងនិយាយគំរាមយ៉ាកុបថា៖ «តាមពិត ពុកអាចធ្វើបាបកូនបាន»។ ប៉ុន្តែ យ៉ាកុបមិនខ្លាចនិយាយការពារខ្លួនទេ។ គាត់បានរៀបរាប់ថា ឡាបាន់បានបោកបញ្ឆោតនិងស៊ីកម្លាំងពលកម្មគាត់អស់ជាច្រើនឆ្នាំ តែពេលនោះយ៉ាកុបក៏ព្យាយាមនិយាយដោយសន្តិវិធីជាមួយឡាបាន់ដែរ។ ដូច្នេះ មុននឹងបែកផ្លូវគ្នា ពួកគាត់ទាំងពីរនាក់បានសន្យាថានឹងមិនរករឿងគ្នាទៀតឡើយ។
សាច់ញាតិយ៉ាកុបខឹងគាត់យ៉ាងខ្លាំង តែគាត់ធ្វើឲ្យមានសន្តិភាពជាមួយពួកគេ។ គាត់ក៏បានបោកចំបាប់ជាមួយនឹងទេវតាដ៏ខ្លាំងក្លា។ ហេតុអ្វីគាត់អាចធ្វើដូច្នេះបាន?
ប៉ុន្តែ ឧបសគ្គរបស់យ៉ាកុបមិនទាន់អស់ទេ។ គាត់ត្រូវប្រឈមមុខនឹងអេសាវដែលជាបងប្រុសភ្លោះរបស់គាត់។ ជាច្រើនឆ្នាំមុននោះ រេបិកាដែលជាម្ដាយរបស់ពួកគាត់បានព្រមានយ៉ាកុបថាអេសាវចង់សម្លាប់យ៉ាកុប ព្រោះអេសាវគិតថាយ៉ាកុបបានបោកបញ្ឆោតគាត់ដើម្បីទទួលពរពីឪពុក។ ឥឡូវ យ៉ាកុបកំពុងរកវិធីដើម្បីធ្វើឲ្យមានសន្តិភាពជាមួយនឹងអេសាវ។ ប៉ុន្តែ គាត់បានទទួលដំណឹងថា អេសាវកំពុងនាំបុរស៤០០នាក់សំដៅមករកគាត់និងក្រុមគ្រួសារ។ គម្ពីរចែងថា ពេលនោះ«យ៉ាកុបភ័យខ្លាចណាស់ ហើយខ្វល់ចិត្តជាខ្លាំង»។ ហេតុនេះ យ៉ាកុបបានចាត់អ្នកបម្រើឲ្យធ្វើដំណើរទៅមុនគាត់ ដោយនាំយកអំណោយដ៏មានតម្លៃទៅជូនអេសាវផង។ ទោះជាយ៉ាងណាក្ដី យ៉ាកុបប្រហែលជាបារម្ភថាអំណោយរបស់គាត់មិនអាចរម្ងាប់កំហឹងបងប្រុសបានឡើយ។ បន្ទាប់មក ក៏មានហេតុការណ៍អស្ចារ្យមួយកើតឡើង។
នៅយប់នោះឯង កាលដែលយ៉ាកុបនៅម្នាក់ឯង គាត់បានឃើញបុរសប្លែកមុខម្នាក់។ បុរសនោះគឺទេវតារបស់ព្រះយេហូវ៉ា ហើយទេវតាក៏ចាប់ផ្ដើមបោកចំបាប់ជាមួយយ៉ាកុប។ ពេលយ៉ាកុបដឹងថាបុរសនោះជាទេវតា គាត់បន្តបោកចំបាប់ជាមួយទេវតានោះយ៉ាងក្លាហានដើម្បីទទួលពរ។ ទោះជាយ៉ាកុបអាយុ៩៧ឆ្នាំ ហើយគ្មានសង្ឃឹមនឹងឈ្នះក៏ដោយ គាត់នៅតែតស៊ូបោកចំបាប់ជាមួយទេវតាអស់រាប់ម៉ោង។ គាត់ខំប្រឹងយ៉ាងខ្លាំង រហូតដល់ស្រក់ទឹកភ្នែក។ (ហូ. ១២:៤) មិនថាយ៉ាងណាទេ យ៉ាកុបប្ដេជ្ញាចិត្តយកឈ្នះទេវតានោះឲ្យបាន ពីព្រោះគាត់ជឿជាក់ថាពរពីព្រះយេហូវ៉ាមានតម្លៃណាស់។ ពួកគាត់បោកចំបាប់គ្នាទាល់តែមេឃទាបភ្លឺ រួចទេវតាបានលូកដៃទៅប៉ះសន្លាក់ឆ្អឹងត្រគាករបស់យ៉ាកុប ហើយធ្វើឲ្យគាត់ថ្លោះត្រគាក។ ប៉ុន្តែ យ៉ាកុបមិនព្រមឈប់ទេ គាត់នៅតែបោកចំបាប់រហូតដល់បានទទួលពរ។ តើជាពរអ្វី? ទេវតាប្រាប់គាត់ថា ឥឡូវគាត់នឹងត្រូវហៅថាអ៊ីស្រាអែល ដែលមានន័យថា«អ្នកតស៊ូនឹងព្រះ»។ នេះជាឈ្មោះដ៏ស័ក្ដិសមមែន ពីព្រោះយ៉ាកុបមិនដែលបោះបង់ឡើយ គាត់ខំព្យាយាមអស់ពីសមត្ថភាពដើម្បីទទួលពរពីព្រះយេហូវ៉ា។
រួចមក យ៉ាកុបដើរខ្ញើចៗទៅជួបក្រុមគ្រួសារវិញ។ បន្ទាប់ពីគាត់និងក្រុមគ្រួសារបន្តដំណើរទៅមុខទៀត គាត់បានឃើញអេសាវនិងបុរស៤០០នាក់ពីចម្ងាយកំពុងឆ្ពោះមករកគាត់។ ដូច្នេះ យ៉ាកុបបានដើរខាងមុខក្រុមគ្រួសារ ដើម្បីទៅរកអេសាវនិងពួកបុរសរបស់អេសាវ។ គាត់ដើរបណ្ដើរនិងក្រាបគោរពអេសាវបណ្ដើររហូតដល់៧ដង។ ពេលអេសាវឃើញយ៉ាកុបធ្វើដូច្នេះ អេសាវមិនបានហូតអាវុធទេ តែគាត់រត់ទៅឱបប្អូនតែម្ដង ហើយពួកគាត់ទាំងពីរនាក់ក៏យំជាមួយគ្នា។ នេះបញ្ជាក់ថាចិត្តទូលាយនិងចិត្តរាបទាបរបស់យ៉ាកុប បានធ្វើឲ្យអេសាវលែងខឹងទៀត។ ម្យ៉ាងទៀត អេសាវប្រហែលជាកោតស្ងើចយ៉ាកុប ដោយសារយ៉ាកុបមានចិត្តអង់អាចហ៊ានមកជួបគាត់។ នៅទីបំផុត យ៉ាកុបបានធ្វើឲ្យមានសន្តិភាពជាមួយនឹងបងប្រុសរបស់គាត់។
យ៉ាកុបដើរខ្ញើចៗអស់មួយជីវិតដោយសាររបួសត្រគាក ហើយនេះធ្វើឲ្យការរស់នៅរបស់គាត់កាន់តែពិបាក។ ប៉ុន្តែ គាត់មិនដែលស្ដាយក្រោយដែលសម្រេចចិត្តស្ដាប់បង្គាប់ព្រះយេហូវ៉ា ឬបោកចំបាប់ជាមួយទេវតាឡើយ។ ជាច្រើនឆ្នាំក្រោយមក សេចក្ដីសន្យាដ៏អស្ចារ្យដែលព្រះយេហូវ៉ាធ្វើជាមួយយ៉ាកុបបានកើតឡើងមែន គឺអ៊ីស្រាអែលក្លាយជាប្រជាជាតិដ៏ធំមួយ។ (ដក. ២៨:១៤) ក្នុងគម្ពីរ ព្រះយេហូវ៉ាច្រើនតែបានត្រូវហៅថា«ព្រះនៃយ៉ាកុប»។ (ដច. ៣:៦) លោកយេស៊ូក៏បានប្រើពាក្យនោះដែរ។ លោកយេស៊ូមានប្រសាសន៍បន្ថែមទៀតថា ព្រះយេហូវ៉ា«មិនមែនជាព្រះរបស់មនុស្សស្លាប់ទេ តែជាព្រះរបស់មនុស្សរស់វិញ ព្រោះលោកចាត់ទុកថាពួកគេទាំងអស់គ្នាកំពុងរស់នៅ»។ (លូក. ២០:៣៧, ៣៨) ដូច្នេះ នៅក្នុងពិភពលោកថ្មី យ៉ាកុបនឹងមានអាយុវែងរាប់មិនបាន ហើយរស់នៅដោយសប្បាយរីករាយ និងគ្មានទុក្ខលំបាកទាល់តែសោះ។
សូមអានកំណត់ហេតុគម្ពីរ
សម្រាប់ការពិគ្រោះ
តើយ៉ាកុបបានបង្ហាញចិត្តក្លាហានយ៉ាងដូចម្ដេច?
បង្កើនចំណេះ
១. ហេតុអ្វីព្រះយេហូវ៉ាធ្វើឲ្យប្រាកដថាយ៉ាកុបទទួលសិទ្ធិជាកូនច្បង មិនមែនអេសាវ? (w០៣ ១៥/១០ ទំ.២៩ វ.២)
២.តើព្រះយេហូវ៉ាបានឲ្យយ៉ាកុបសុបិនឃើញអ្វី? ហើយតើនោះបានពង្រឹងទំនុកចិត្តគាត់យ៉ាងណា? (w០៣ ១៥/១០ ទំ.២៨ វ.៣–ទំ.២៩ វ.១) ក
រូបភាព ក
៣.ហេតុអ្វីយ៉ាកុបជឿជាក់ថាគាត់អាចទទួលពរពីទេវតា? (w០៣ ១៥/១០ ទំ.៣១ វ.១) ខ
រូបភាព ខ
៤. តើយ៉ាកុបបានចាត់វិធានការយ៉ាងណាខ្លះដើម្បីការពារក្រុមគ្រួសារគាត់ពីឥទ្ធិពលអាក្រក់របស់ពួកកាណាន? (w៩៥ ១៥/៩ ទំ.២១ វ.៤)
រំពឹងគិតដើម្បីទាញមេរៀន
យ៉ាកុបតាំងចិត្តថែរក្សាចៀមទាំងអស់របស់ឡាបាន់ឲ្យបានល្អ។ (ដក. ៣១:៣៨-៤០) តើតាមរបៀបណាគ្រិស្តសាសនិកដែលជាគង្វាលនៅសព្វថ្ងៃ អាចបង្ហាញការយកចិត្តទុកដាក់កាន់តែខ្លាំងចំពោះបងប្អូនរួមជំនឿដែលជាចៀមរបស់ព្រះយេហូវ៉ា? គ
រូបភាព គ
ពេលយ៉ាកុបភ័យខ្លាច គាត់បានអធិដ្ឋានទៅព្រះយេហូវ៉ា។ (ដក. ៣២:៦-១២) ស្ដីអំពីការអធិដ្ឋានរបស់យ៉ាកុប តើអ្នកទាញមេរៀនអ្វី?
តើតាមរបៀបណាអ្នកអាចបង្ហាញចិត្តក្លាហានដូចយ៉ាកុប?
រំពឹងគិតអំពីព្រះយេហូវ៉ានិងគោលបំណងលោក
តើកំណត់ហេតុនេះបង្រៀនខ្ញុំអ្វីខ្លះអំពីព្រះយេហូវ៉ា?
តើកំណត់ហេតុនេះទាក់ទងយ៉ាងណានឹងគោលបំណងរបស់ព្រះយេហូវ៉ា?
ពេលយ៉ាកុបបានត្រូវប្រោសឲ្យរស់ឡើងវិញ តើខ្ញុំចង់សួរគាត់អំពីរឿងអ្វីខ្លះ?
រៀនថែមទៀត
ពេលដឹងថាយើងបានធ្វើឲ្យបងប្អូនរួមជំនឿឈឺចិត្ត តើយើងអាចធ្វើតាមគំរូយ៉ាកុបយ៉ាងដូចម្ដេច?
«ចូរបន្ត‹ស្ដាប់បង្គាប់លោក›» (w២១.១២ ទំ.២៥-២៧ វ.១០-១៨)