ថ្ងៃពុធ ទី៥ ខែធ្នូ
គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ហើយមានប្រយោជន៍។—២ធី. ៣:១៦
ផ្នែកខ្លះនៃគម្ពីរបានត្រូវសរសេរសម្រាប់បុគ្គលម្នាក់ឬក្រុមមនុស្សណាមួយ។ នេះជាមូលហេតុដែលមុនយើងអានគម្ពីរ យើងគួរសុំព្រះយេហូវ៉ាឲ្យជួយយើងមានទស្សនៈទូលំទូលាយ និងប្រាជ្ញាដើម្បីយល់មេរៀនដែលលោកចង់ឲ្យយើងរៀន។ (អែស. ៧:១០; យ៉ា. ១:៥) ពេលអ្នកអានគម្ពីរ ចូរផ្អាកនិងសួរខ្លួនអ្នកនូវសំណួរទាំងនេះថា ‹តើនេះបង្រៀនខ្ញុំអ្វីអំពីព្រះយេហូវ៉ា? តើខ្ញុំអាចប្រើព័ត៌មាននេះយ៉ាងដូចម្ដេចក្នុងជីវិតរបស់ខ្ញុំ? តើខ្ញុំអាចប្រើព័ត៌មាននេះយ៉ាងដូចម្ដេចដើម្បីជួយអ្នកឯទៀត?›។ កាលដែលយើងរំពឹងគិតអំពីសំណួរទាំងនេះ យើងនឹងទទួលប្រយោជន៍ច្រើនជាងពីការអានគម្ពីរ។ សូមយើងពិនិត្យមើលឧទាហរណ៍មួយ។ គម្ពីររៀបរាប់អំពីគុណសម្បត្តិផ្សេងៗសម្រាប់ពួកអ្នកចាស់ទុំ។ (១ធី. ៣:២-៧) យើងភាគច្រើនមិនមែនជាអ្នកចាស់ទុំ ដូច្នេះយើងប្រហែលជាគិតថាព័ត៌មាននេះមិនអាចជួយយើងបានទេ។ ប៉ុន្តែ បញ្ជីនៃគុណសម្បត្តិទាំងនេះអាចជួយយើងទាំងអស់គ្នា។ w១៦.០៥ ៥:៧, ៨
ថ្ងៃព្រហស្បតិ៍ ទី៦ ខែធ្នូ
មើល! . . . ដីឥដ្ឋនៅក្នុងដៃរបស់ជាងស្មូនយ៉ាងណា នោះឯងរាល់គ្នាក៏នៅក្នុងដៃអញយ៉ាងនោះដែរ។—យេ. ១៨:៦
នៅពេលដែលជនជាតិយូដាបានត្រូវចាប់យកទៅក្រុងបាប៊ីឡូន ពួកគេបានចូលទៅក្នុងក្រុងដែលពេញទៅដោយរូបព្រះនិងមនុស្សដែលគោរពប្រណិប័តន៍ពួកវិញ្ញាណកំណាច។ ប៉ុន្តែ ជនជាតិយូដាដ៏ស្មោះត្រង់ដូចជាដានីយ៉ែលនិងមិត្តភក្ដិបីនាក់របស់គាត់ មិនព្រមឲ្យមនុស្សនៅក្រុងបាប៊ីឡូនមានឥទ្ធិពលលើពួកគាត់ឡើយ។ (ដាន. ១:៦, ៨, ១២; ៣:១៦-១៨) ដានីយ៉ែលនិងមិត្តភក្ដិរបស់គាត់ព្រមទទួលព្រះយេហូវ៉ាជាជាងស្មូនរបស់ពួកគេ ហើយបន្តគោរពប្រណិប័តន៍តែលោកប៉ុណ្ណោះ។ ទោះបីជាដានីយ៉ែលបានរស់នៅក្នុងស្ថានភាពដ៏អាក្រក់ស្ទើរតែពេញមួយជីវិតរបស់គាត់ក៏ដោយ ទេវតារបស់ព្រះបាននិយាយថាគាត់គឺជា«អ្នកសំណប់យ៉ាងសំខាន់»។ (ដាន. ១០:១១, ១៩) នៅសម័យគម្ពីរ ជាងស្មូនអាចសង្កត់ដីឥដ្ឋចូលក្នុងពុម្ពដើម្បីចេញជារូបរាងណាមួយ។ សព្វថ្ងៃនេះ អ្នកគោរពប្រណិប័តន៍ពិតដឹងថាព្រះយេហូវ៉ាជាអ្នកគ្រប់គ្រងសកលលោក ហើយលោកមានសិទ្ធិអំណាចដើម្បីកែតម្រង់ប្រជាជាតិនានា។ (យេ. ១៨:៦) ព្រះក៏មានសិទ្ធិអំណាចដើម្បីកែតម្រង់យើងម្នាក់ៗដែរ។ ប៉ុន្តែ ព្រះយេហូវ៉ាមិនបង្ខំអ្នកណាម្នាក់ឲ្យកែប្រែទេ។ ផ្ទុយទៅវិញ លោកចង់ឲ្យយើងសុខចិត្តឲ្យលោកអប់រំយើង។ w១៦.០៦ ២:១, ២
ថ្ងៃសុក្រ ទី៧ ខែធ្នូ
ចូរមានរបៀបរស់នៅដែលប្រាសចាកការស្រឡាញ់ប្រាក់។—ហេ. ១៣:៥
សាថានចង់ឲ្យយើងជឿថាយើងអាចសប្បាយនឹងជីវិតបាន លុះត្រាតែយើងមានវត្ថុទ្រព្យជាច្រើន។ ដូច្នេះវាប្រើពិភពលោករបស់វា និង«ការចង់បានអ្វីដែលទាក់ទាញភ្នែក»ដើម្បីព្យាយាមធ្វើឲ្យយើងតែងតែចង់បានថែមទៀត។ (១យ៉ូន. ២:១៥-១៧; លោ. ៣:៦; សុភ. ២៧:២០) យើងច្រើនតែឃើញនិងឮការផ្សាយពាណិជ្ជកម្មដែលព្យាយាមបញ្ចុះបញ្ចូលយើងឲ្យទិញផលិតផលថ្មីៗ។ តើអ្នកធ្លាប់ទិញអ្វីមួយដោយសារតែនៅក្នុងហាង វាមើលទៅគួរឲ្យចាប់អារម្មណ៍ ឬដោយសារអ្នកបានឃើញវាតាមការផ្សាយពាណិជ្ជកម្មឬទេ? បើដូច្នេះ ប្រហែលជាក្រោយមកអ្នកទទួលស្គាល់ថាអ្នកមិនត្រូវការវាទេ។ ពេលយើងចេះតែទិញអ្វីដែលយើងមិនត្រូវការ យើងធ្វើឲ្យជីវិតរបស់យើងស្មុគស្មាញ។ អ្វីៗទាំងនោះអាចបំបែរអារម្មណ៍យើងពីការបម្រើព្រះយេហូវ៉ា។ ជាឧទាហរណ៍ យើងប្រហែលជាមិនមានពេលគ្រប់គ្រាន់ដើម្បីសិក្សាគម្ពីរ រៀបចំនិងចូលរួមកិច្ចប្រជុំ និងទៅផ្សព្វផ្សាយជាទៀងទាត់។ សូមចាំថា សាវ័កយ៉ូហានបានព្រមានថា៖ «ពិភពលោកនេះ និងសេចក្ដីប៉ងប្រាថ្នារបស់វា កំពុងឈានទៅរកការសាបសូន្យ»។ w១៦.០៧ ១:៣, ៤