សេចក្ដីបញ្ចប់
«ចូរមានចិត្តក្លាហាន»
១. តើយើងអាចរៀនអ្វីទៀតពីគម្ពីរអំពីចិត្តក្លាហាន?
សៀវភៅនេះបានមកដល់ទីបញ្ចប់ហើយ! ប៉ុន្តែ តើនៅមានអ្វីថែមទៀតដែលយើងអាចរៀនអំពីចិត្តក្លាហានឬទេ? មាន។ ទី១ សូមចាំថា ក្នុងសៀវភៅនេះមិនបានលើកឡើងទាំងអស់អំពីគំរូរបស់បុគ្គលដែលមានចិត្តក្លាហានទេ។ ទី២ នៅមានអ្វីមួយចំនួនទៀតដែលយើងត្រូវធ្វើដើម្បីមានចិត្តក្លាហាន ហើយចំណុចនេះនឹងត្រូវលើកបញ្ជាក់ក្នុងជំពូកនេះ។
២. តើអ្នកបម្រើស្មោះត្រង់ណាខ្លះទៀតដែលបានបង្ហាញចិត្តក្លាហាន?
២ ក្រៅពីបុគ្គលដែលបានត្រូវលើកឡើងក្នុងសៀវភៅនេះ តើអ្នកអាចនឹកឃើញដល់បុគ្គលផ្សេងទៀតក្នុងគម្ពីរដែលបង្ហាញចិត្តក្លាហានឬទេ? អ្នកប្រហែលជានឹកឃើញពួកអ្នកប្រកាសទំនាយខ្លះក្នុងបទគម្ពីរភាសាហេប្រឺដូចជា អេសាយ យេរេមា អេសេគាល យ៉ូណាស ឬម៉ាឡាគីជាដើម។ ពិតណាស់ ពាក្យដែលប៉ូលបានសរសេរក្រោមការដឹកនាំរបស់ព្រះ ក៏បានសំដៅទៅលើបុរសទាំងនេះដែរ។ ប៉ូលបានសរសេរថា អ្នកខ្លះ«បានត្រូវល្បងលដោយការចំអកមើលងាយ ត្រូវគេវាយ ថែមទាំងត្រូវគេដាក់គុកដាក់ច្រវាក់ទៀតផង»។ គាត់ក៏បានប្រាប់បន្ថែមថា រីឯអ្នកខ្លះទៀតរងការ«ខ្វះខាត រងទុក្ខលំបាក និងត្រូវគេធ្វើបាប» ហើយខ្លះទៀតត្រូវគេសម្លាប់។ (ហេ. ១១:៣៦, ៣៧) យ៉ាងណាក៏ដោយ ពួកគាត់បានតាំងចិត្តក្លាហានបម្រើព្រះយេហូវ៉ាយ៉ាងស្មោះត្រង់។
៣-៤. តើតាមរបៀបណាស្ត្រីពីរនាក់ដែលគម្ពីរមិនបានប្រាប់ឈ្មោះបានជួយសង្គ្រោះស្ដេចដាវីឌក្នុងគ្រាដ៏គ្រោះថ្នាក់?
៣ មានបុគ្គលដ៏អង់អាចជាច្រើននាក់ទៀតដែលគម្ពីរមិនបានប្រាប់ឈ្មោះទេ។ ឧទាហរណ៍អំពីគំរូរបស់ស្ត្រីពីរនាក់នៅសម័យដាវីឌ។ ពួកនាងបានជួយដាវីឌ ពេលអាប់សាឡំជាកូនរបស់គាត់ព្យាយាមសម្លាប់ឪពុកខ្លួន។ អាប់សាឡំជាមនុស្សមានអំណួត និងមានចិត្តកាចសាហាវ គាត់ប៉ុនប៉ងដណ្ដើមរាជ្យរបស់ឪពុក។ ដូច្នេះ ដាវីឌត្រូវបង្ខំចិត្តរត់គេចខ្លួនចេញពីក្រុងយេរូសាឡិម។ ក្រោយមក ដាវីឌបានសុំសេដុកជាសង្ឃដ៏អង់អាចម្នាក់ ឲ្យត្រឡប់ទៅក្រុងយេរូសាឡិមវិញដើម្បីស៊ើបការណ៍ពីគម្រោងបន្ទាប់របស់អាប់សាឡំ។ រួចមក សេដុកត្រូវរាយការណ៍ប្រាប់ដាវីឌវិញ។ សេដុកបានធ្វើដូច្នោះមែន ពេលគាត់បានស៊ើបដឹងអំពីគម្រោងការរបស់អាប់សាឡំ គាត់ក៏ចាត់«ស្ត្រីម្នាក់ដែលជាអ្នកបម្រើ»ឲ្យទៅប្រាប់ដំណឹងនោះដល់ដាវីឌ។ គម្ពីរមិនបានចែងអំពីឈ្មោះរបស់ស្ត្រីនេះទេ។ យ៉ាងណាមិញ នាងបានបង្ហាញចិត្តក្លាហានដោយប្រថុយជីវិតនាំដំណឹងទៅប្រាប់បុរសស្មោះត្រង់ពីរនាក់របស់ដាវីឌ។ រួចមក បុរសទាំងពីរនាក់នោះក៏នាំដំណឹងទៅប្រាប់ដាវីឌ។ ប៉ុន្តែ នៅតាមផ្លូវ យុវជនម្នាក់បានឃើញពួកគេ ហើយក៏ទៅប្រាប់អាប់សាឡំ។ ដូច្នេះ បុរសពីរនាក់នោះចុះទៅលាក់ខ្លួនក្នុងអណ្ដូងមួយ។ ពេលនោះ ស្ត្រីម្នាក់ទៀតដែលគម្ពីរមិនបានចែងឈ្មោះ នាងត្រូវជាប្រពន្ធរបស់ម្ចាស់អណ្ដូង បានយកក្រណាត់ទៅគ្របលើអណ្ដូងភ្លាមៗ ហើយរោយកម្ទេចអង្ករលើក្រណាត់ ដើម្បីកុំឲ្យអ្នកណាដឹងថាបុរសទាំងពីរនាក់នោះនៅក្នុងអណ្ដូង។ មិនត្រឹមតែប៉ុណ្ណោះ ពេលពួកបុរសរបស់អាប់សាឡំមកតាមរកបុរសពីរនាក់នោះ នាងក៏បានជួយបង្វែរដានពួកគេទៀតផង។ ស្ត្រីដ៏ក្លាហានទាំងពីរនាក់នេះ បានជួយការពារជីវិតរបស់ដាវីឌ ជាស្ដេចដែលព្រះយេហូវ៉ាបានជ្រើសរើស។—២សាំ. ១៥:២៣-៣៧; ១៧:៨-២២
ស្ត្រីបម្រើដែលមានចិត្តក្លាហាន និងស្ត្រីអង់អាចដែលមានប្ដីជាម្ចាស់អណ្ដូង
៤ ក្នុងគម្ពីរលើកឡើងអំពីបុគ្គលជាច្រើនដែលមានចិត្តក្លាហាន មានទាំងបុរស ស្ត្រី អ្នកមាន អ្នកក្រ អ្នកមានមុខមាត់ អ្នកមានទេពកោសល្យ អ្នកដែលគម្ពីរប្រាប់ឈ្មោះ និងអ្នកដែលគម្ពីរមិនបានប្រាប់ឈ្មោះ។ ទោះជាយ៉ាងណាក្ដី ពួកគាត់ម្នាក់ៗបានបង្ហាញចិត្តក្លាហានគាំទ្រព្រះយេហូវ៉ា។ កំណត់ហេតុអំពីពួកគាត់អាចផ្ដល់ប្រយោជន៍ច្រើនណាស់ដល់យើង។
សារៈសំខាន់នៃការអធិដ្ឋាន
៥-៧. ពេលប៉ូលរងការបៀតបៀនយ៉ាងខ្លាំង តើអ្វីបានជួយគាត់ឲ្យមានចិត្តក្លាហាន?
៥ តើយើងត្រូវធ្វើអ្វីខ្លះដើម្បីមានចិត្តក្លាហានដូចបុរសស្ត្រីក្នុងគម្ពីរ? យើងត្រូវដឹងថា ពួកគាត់មិនមែនអង់អាចដោយស្វ័យប្រវត្តិឡើយ។ ពួកគាត់មានចិត្តក្លាហានហើយបម្រើព្រះយេហូវ៉ាយ៉ាងស្មោះត្រង់ ក៏មិនមែនដោយសារពួកគាត់មានសមត្ថភាពពិសេសនោះដែរ។ តាមពិតទៅ មានអ្វីដែលលើសពីនោះបានជួយពួកគាត់ឲ្យមានចិត្តក្លាហាន។ តើនោះជាអ្វី?
៦ សូមគិតអំពីគំរូរបស់សាវ័កប៉ូល។ កាលដែលគាត់និងស៊ីឡាសនៅក្រុងភីលីព មនុស្សមួយក្រុមបានវាយប្រហារពួកគាត់។ ពួកគេចាប់ហែកសម្លៀកបំពាក់របស់ពួកគាត់ ហើយវាយពួកគាត់ជាច្រើនដំបង រួចចាប់ពួកគាត់បោះទៅក្នុងគុកងងឹត ហើយដាក់ខ្នោះជើងពួកគាត់។ (សកម្ម. ១៦:១២, ១៩-២៤) ក្រោយពីប៉ូលបានត្រូវដោះលែងពីគុក តើគាត់ភ័យខ្លាចលែងហ៊ានផ្សព្វផ្សាយទៀតឬទេ? ទោះជាគាត់អាចមានអារម្មណ៍បែបនោះ ក៏មិនចម្លែកដែរ ព្រោះគាត់ជាមនុស្សដូចយើង។ ប៉ុន្តែ គាត់ដឹងថាព្រះយេហូវ៉ាចង់ឲ្យគាត់បន្តផ្សព្វផ្សាយ។ ដូច្នេះ គាត់បានធ្វើដំណើរទៅកាន់ទិសដៅបន្ទាប់ គឺក្រុងថែស្សាឡូនិចដើម្បីផ្សព្វផ្សាយនៅទីនោះ។ តើអ្វីបានជួយគាត់ឲ្យមានកម្លាំងនិងចិត្តក្លាហានដែលគាត់ត្រូវការ?
៧ ក្រោយមក ប៉ូលបានសរសេរថា៖ «ដូចអ្នករាល់គ្នាដឹងហើយ ទោះជានៅពេលដំបូងយើងបានរងទុក្ខលំបាក និងត្រូវគេប្រព្រឹត្តដោយគ្មានការគោរពមកលើយើងនៅក្រុងភីលីពក៏ដោយ យើងបានតាំងចិត្តក្លាហានដោយសារព្រះរបស់យើង ដើម្បីប្រាប់ដំណឹងល្អរបស់ព្រះដល់អ្នករាល់គ្នា ទាំងត្រូវប្រឈមមុខនឹងការបៀតបៀនយ៉ាងខ្លាំង»។ (១ថែ. ២:២) ប៉ូលដឹងថា គាត់ត្រូវការចិត្តក្លាហានដើម្បីធ្វើអ្វីដែលព្រះសុំគាត់ឲ្យធ្វើ។ ប៉ុន្តែ តើអ្វីបានជួយប៉ូលឲ្យមានចិត្តមោះមុត? ប្រាកដណាស់ គឺព្រះយេហូវ៉ាជាអ្នកជួយគាត់ មិនមែនដោយសារប៉ូលមានសមត្ថភាពពិសេសណាមួយដែលនាំឲ្យគាត់មានចិត្តក្លាហាននោះទេ។ ព្រះបានធ្វើតាមសេចក្ដីអធិដ្ឋានរបស់ប៉ូល ដោយសារគាត់បង្ហាញចិត្តរាបទាបសុំលោកជួយគាត់ឲ្យមានចិត្តក្លាហាន។
៨. ដូចប៉ូល តើយើងអាចធ្វើអ្វីដើម្បីមានចិត្តក្លាហាន?
៨ អ្នកក៏អាចធ្វើដូចប៉ូលដែរ។ ទោះជាអ្នកជាមនុស្សអៀនខ្មាស ខ្វះចិត្តមោះមុត ឬខ្វះសមត្ថភាពក្ដី សូមកុំបារម្ភឡើយ។ សំខាន់សូមអធិដ្ឋានទៅព្រះយេហូវ៉ា អង្វរសុំលោកឲ្យជួយអ្នកមានចិត្តអង់អាចក្លាហានតាមដែលអ្នកត្រូវការ។—សកម្ម. ៤:២៩
៩. ហេតុអ្វីយើងត្រូវអធិដ្ឋានសុំព្រះយេហូវ៉ាជួយយើងឲ្យមានជំនឿថែមទៀត?
៩ ម្យ៉ាងទៀត អ្នកអាចអធិដ្ឋានសុំព្រះយេហូវ៉ាផ្ដល់ឲ្យអ្នកមានជំនឿថែមទៀត។ ជំនឿជាផលមួយដែលបង្កើតដោយឫទ្ធានុភាពបរិសុទ្ធរបស់ព្រះយេហូវ៉ា។ (កាឡ. ៥:២២, ២៣) ជំនឿក៏នឹងជួយអ្នកឲ្យយកឈ្នះសាថាន ហើយបន្តស្មោះត្រង់ចំពោះលោកតទៅទៀតដែរ។ (អេភ. ៦:១៦) ជំនឿមានឥទ្ធិពលខ្លាំងដល់ម្ល៉េះ បានជាគម្ពីរចែងថា យើងអាចឈ្នះពិភពលោកនេះដោយសារជំនឿ។ (១យ៉ូន. ៥:៤) អ្នកអាចមានចិត្តក្លាហាន បើអ្នកមានជំនឿលើព្រះយេហូវ៉ា។ ពេលអ្នកទុកចិត្តទាំងស្រុងថា ព្រះយេហូវ៉ានឹងជួយអ្នកពេលអ្នកត្រូវការជំនួយ នោះអ្នកនឹងមានចិត្តក្លាហានកាន់តែខ្លាំង។ ដូចពួកសាវ័ករបស់លោកយេស៊ូដែរ យើងត្រូវបន្ដអធិដ្ឋានសុំព្រះយេហូវ៉ាជួយយើងឲ្យ«មានជំនឿថែមទៀត»។—លូក. ១៧:៥
«ចូរមានចិត្តក្លាហានឡើង!»
១០-១១. ហេតុអ្វីពាក្យសម្ដីរបស់ប៉ូលបានជួយគ្រិស្តសាសនិកដែលនៅក្នុងក្រុងនិងនៅជិតៗក្រុងយេរូសាឡិមឲ្យមានចិត្តក្លាហាន?
១០ លោកយេស៊ូបានប្រាប់ទុកជាមុនថា ក្រុងយេរូសាឡិមនឹងរងការហិនវិនាសយ៉ាងធ្ងន់ធ្ងរក្រៃលែង។ ប៉ុន្មានឆ្នាំមុនដែលរឿងនោះកើតឡើង ប៉ូលបានសរសេរសំបុត្រទៅកាន់បងប្អូនគ្រិស្តសាសនិកដែលរស់នៅក្នុងក្រុងនិងនៅជិតៗក្រុងយេរូសាឡិម ឲ្យពួកគេត្រៀមខ្លួនសម្រាប់គ្រាដ៏លំបាកបំផុត ដែលនឹងកើតឡើងមិនយូរទៀត។ (លូក. ១៩:៤១-៤៤; ២១:២០-២៤) តើប៉ូលបាននិយាយអ្វីដើម្បីជួយពួកគេឲ្យមានចិត្តក្លាហាន? គាត់បានរំលឹកពួកគេអំពីពាក្យសន្យារបស់ព្រះយេហូវ៉ា។ ពាក្យសន្យានោះបានត្រូវលើកឡើងនៅក្នុងសេចក្ដីផ្ដើមនៃសៀវភៅនេះថា៖ «ខ្ញុំប្រាកដជាមិនចាកចេញពីអ្នកឡើយ ហើយខ្ញុំក៏ប្រាកដជាមិនបោះបង់ចោលអ្នកដែរ»។ តើពាក្យសន្យារបស់លោកបានជួយពួកគេយ៉ាងដូចម្ដេច? ប៉ូលបានបន្ថែមថា៖ «ហេតុនេះហើយបានជាយើងអាចមានទំនុកចិត្តទាំងស្រុងថា៖ ‹ព្រះយេហូវ៉ាជាអ្នកជួយខ្ញុំ ខ្ញុំនឹងមិនខ្លាចឡើយ។ តើមនុស្សអាចធ្វើអ្វីដល់ខ្ញុំ?›»។—ហេ. ១៣:៥, ៦
១១ ទោះជាគម្ពីរមិនបានរៀបរាប់យ៉ាងចំៗអំពីអ្វីដែលនឹងកើតឡើង ពេលពួករ៉ូមមកបំផ្លាញក្រុងយេរូសាឡិមនាឆ្នាំ៧០ គ.ស.ក្ដី យើងអាចប្រាកដថា គ្រិស្តសាសនិកដែលស្មោះត្រង់នឹងធ្វើតាមអ្វីដែលប៉ូលបានប្រាប់។ ពិតមែន ពួកគេបានបង្ហាញចិត្តអង់អាចធ្វើតាមបង្គាប់របស់លោកយេស៊ូ ដោយ«ចាប់ផ្ដើមរត់ទៅតំបន់ភ្នំ»ចំពេលត្រឹមត្រូវតែម្ដង។—លូក. ២១:២០, ២១
១២. (ក) ពេលប្រឈមមុខនឹងទុក្ខលំបាក តើអ្នកអាចមានចិត្តក្លាហានដោយរបៀបណា? (ខ) នៅសព្វថ្ងៃ តើបងប្អូនខ្លះបានបង្ហាញចិត្តក្លាហានយ៉ាងដូចម្ដេច? (សូមមើលប្រអប់ចំណងជើងថា «ចូរយកតម្រាប់ចិត្តក្លាហានរបស់ពួកគាត់»)
១២ ដូចពួកគេដែរ ព្រះយេហូវ៉ាអាចផ្ដល់ចិត្តក្លាហានឲ្យអ្នកពេលដែលអ្នកត្រូវការ មិនថានៅឥឡូវឬនៅពេលខាងមុខទេ។ (អេគ. ៣៨:១, ២, ១០-១២; ម៉ាថ. ២៤:២១) សូមចាំមិនភ្លេចថា ព្រះយេហូវ៉ាបានសន្យាការពារយើងពីសាថាន និងពីអស់អ្នកដែលគាំទ្រវា។ (អេគ. ៣៨:១៩-២៣; ២ថែ. ៣:៣) ព្រះនឹងមិនបោះបង់អស់អ្នកដែលស្រឡាញ់និងស្មោះត្រង់ចំពោះលោកឡើយ។ អ្វីដែលលោកបានប្រាប់យ៉ូស្វេ ក៏ដូចជាប្រាប់អ្នកដែរ គឺថាអ្នកត្រូវ«មានចិត្តក្លាហានហើយរឹងមាំខ្លាំងក្លា»! (យ៉ូស. ១:៧, ៩, ១៨) ម្យ៉ាងទៀត សូមចាំជានិច្ចអំពីពាក្យសម្ដីរបស់លោកយេស៊ូទៅកាន់ពួកអ្នកកាន់តាមលោកថា៖ «ចូរមានចិត្តក្លាហានឡើង!»។ លោកយេស៊ូបានសន្យាចាត់ឫទ្ធានុភាពបរិសុទ្ធរបស់បិតាលោកឲ្យជួយ និងពង្រឹងចិត្តក្លាហានរបស់អ្នក ដើម្បីអ្នកអាចយកឈ្នះបញ្ហាណាក៏ដោយដែលអ្នកជួប។ (យ៉ូន. ១៤:២៦; ១៥:២៦, ២៧; ១៦:៣៣) អ្នកប្រាកដជាអាចមានចិត្តក្លាហាន!
មិនថាយើងជួបទុក្ខវេទនាបែបណាទេ ព្រះយេហូវ៉ាសន្យាថានឹងប្រើឫទ្ធានុភាពបរិសុទ្ធដើម្បីពង្រឹងចិត្តក្លាហានរបស់យើង។ ដូច្នេះ យើងអាចប្រឈមមុខនឹងទុក្ខលំបាកទាំងនោះបាន
១៣. តើអ្វីជំរុញអ្នកឲ្យបង្ហាញចិត្តក្លាហាន?
១៣ សូមស្រមៃគិត តើស្ថានភាពនឹងទៅជាយ៉ាងណា ពេលដែលគ្រប់កន្លែងនៅផែនដីពេញដោយសេចក្ដីសុខសាន្ត? តើយើងនឹងសប្បាយចិត្តខ្លាំងយ៉ាងណា ពេលជួបអស់អ្នកដែលព្រះយេហូវ៉ាបានប្រោសឲ្យរស់ឡើងវិញ? នៅពេលនោះ យើងអាចជួបបុរសស្ត្រីដែលយើងបានអានក្នុងសៀវភៅនេះ និងមនុស្សក្លាហានជាច្រើននាក់ទៀត! ក្នុងពិភពលោកសាថាន ពួកគេប្រហែលជារងទុក្ខវេទនាច្រើនណាស់ រហូតដល់ត្រូវស្លាប់ដើម្បីរក្សាភក្ដីភាពចំពោះព្រះ។ ប៉ុន្តែ ពេលពួកគេភ្ញាក់ឡើងឃើញខ្លួនក្នុងពិភពលោកថ្មី តើអ្នកគិតថាពួកគេនឹងស្ដាយក្រោយដែលបានសម្រេចចិត្តបម្រើព្រះយេហូវ៉ាឬទេ? ប្រាកដជាមិនស្ដាយក្រោយទាល់តែសោះ! ចុះអ្នកវិញ? អ្នកនឹងត្រេកអរឥតឧបមាដែលអាចរួមសហការជាមួយពួកគេ ក្នុងការធ្វើឲ្យផែនដីទាំងមូលក្លាយជាសួនឧទ្យាន។ ពេលអ្នកនៅក្នុងសួនឧទ្យាន តើអ្នកគិតថាខ្លួននឹងស្ដាយក្រោយដែលបានសម្រេចចិត្តបម្រើព្រះយេហូវ៉ាឬទេ? មិនស្ដាយក្រោយឡើយ! សូមតាំងចិត្តបម្រើព្រះយេហូវ៉ាដោយចិត្តក្លាហានពេញមួយជីវិត។ យ៉ាងនេះ អ្នកនឹងមានជីវិតសប្បាយរីករាយមិនគ្រាន់តែនៅឥឡូវនេះ តែជារៀងរហូត!