មេរៀនទី៥០

តើក្រុមគ្រួសាររបស់អ្នកអាចមានសុភមង្គលយ៉ាងដូចម្ដេច? (ភាគទី២)

ឯកសារជាសៀវភៅ

កូនជាអំណោយពីព្រះយេហូវ៉ា។ លោកតម្រូវឲ្យឪពុកម្ដាយថែរក្សាអំណោយនោះឲ្យបានល្អ។ ព្រះយេហូវ៉ាផ្ដល់ឱវាទល្អដែលអាចជួយឪពុកម្ដាយឲ្យធ្វើដូច្នោះ។ ឱវាទរបស់លោកក៏អាចជួយកូនឲ្យធ្វើអ្វីដែលនាំឲ្យក្រុមគ្រួសារមានសុភមង្គលដែរ។

១. តើព្រះយេហូវ៉ាផ្ដល់ឱវាទអ្វីដល់ឪពុកម្ដាយ?

ព្រះយេហូវ៉ាតម្រូវឲ្យឪពុកម្ដាយស្រឡាញ់កូន និងចំណាយពេលជាមួយនឹងកូនឲ្យបានច្រើនបំផុត។ ម្យ៉ាងទៀត លោកចង់ឲ្យឪពុកម្ដាយការពារកូនពីគ្រោះថ្នាក់ និងបង្ហាត់បង្រៀនកូនដោយប្រើគោលការណ៍គម្ពីរជាមូលដ្ឋាន។ (សុភាសិត ១:៨) លោកប្រាប់ឪពុកទាំងឡាយថា៖ «ចូរអប់រំកូនទៅតាម . . . ការណែនាំរបស់ព្រះយេហូវ៉ា»។ (សូមអាន អេភេសូរ ៦:៤) ពេលឪពុកម្ដាយធ្វើតាមការណែនាំរបស់ព្រះយេហូវ៉ាក្នុងការចិញ្ចឹមអប់រំកូន ហើយមិនប្រគល់ភារកិច្ចនេះដល់អ្នកផ្សេងទៀត នោះពួកគេធ្វើឲ្យលោកពេញចិត្ត។

២. តើព្រះយេហូវ៉ាផ្ដល់ឱវាទអ្វីដល់កូន?

ព្រះយេហូវ៉ាប្រាប់កូនទាំងឡាយថា៖ «ចូរស្ដាប់បង្គាប់ឪពុកម្ដាយ»។ (សូមអាន កូឡុស ៣:២០) ពេលកូនគោរពនិងស្ដាប់បង្គាប់ឪពុកម្ដាយ ពួកគេធ្វើឲ្យព្រះយេហូវ៉ានិងឪពុកម្ដាយសប្បាយរីករាយ។ (សុភាសិត ២៣:២២-២៥) លោកយេស៊ូទុកគំរូល្អពេលលោកនៅជាកុមារ។ ទោះជាលោកជាមនុស្សល្អឥតខ្ចោះក៏ដោយ លោកបានស្ដាប់បង្គាប់និងគោរពឪពុកម្ដាយរបស់លោក។—លូកា ២:៥១, ៥២

៣. តើក្រុមគ្រួសាររបស់អ្នកអាចចូលទៅជិតព្រះយ៉ាងដូចម្ដេច?

ប្រសិនបើអ្នកជាឪពុកម្ដាយ អ្នកច្បាស់ជាចង់ឲ្យកូនស្រឡាញ់ព្រះយេហូវ៉ាខ្លាំងដូចអ្នកដែរ។ តើអ្នកអាចធ្វើដូច្នេះតាមរបៀបណា? គឺដោយធ្វើតាមឱវាទពីគម្ពីរ។ គម្ពីរចែងថា៖ «អ្នករាល់គ្នាត្រូវបង្ហាត់បង្រៀន[បណ្ដាំព្រះយេហូវ៉ា]ដល់កូនចៅរបស់ខ្លួន ដោយនិយាយប្រាប់ពួកគេក្នុងកាលដែលអង្គុយនៅក្នុងផ្ទះ ក្នុងកាលដែលដើរតាមផ្លូវ»។ (ការបំភ្លឺច្បាប់ ៦:៧) ពាក្យ«បង្ហាត់បង្រៀន»មានន័យថា ប្រាប់អ្វីមួយម្ដងហើយម្ដងទៀត។ អ្នកទំនងជាដឹងហើយថា ជារឿយៗអ្នកត្រូវប្រាប់កូនម្ដងហើយម្ដងទៀតដើម្បីឲ្យកូនចងចាំ។ ដូចបទគម្ពីរនេះចែង អ្នកគួររកឱកាសនិយាយជាមួយនឹងកូនជាទៀងទាត់អំពីព្រះយេហូវ៉ា។ ជាការល្អដែលក្រុមគ្រួសារទាំងមូលលៃទុកពេលជារៀងរាល់សប្ដាហ៍ ដើម្បីគោរពប្រណិប័តន៍ព្រះជាមួយគ្នា។ ប្រសិនបើអ្នកមិនមានកូនទេ អ្នកនៅតែទទួលប្រយោជន៍ដោយលៃទុកពេលជារៀងរាល់សប្ដាហ៍ដើម្បីសិក្សាបណ្ដាំរបស់ព្រះ។

បង្កើនចំណេះ

សូមពិចារណាយោបល់ល្អៗដែលជួយក្រុមគ្រួសារឲ្យមានសុភមង្គលនិងសេចក្ដីសុខសាន្ត។

៤. ចូរបង្ហាត់បង្រៀនកូនរបស់អ្នកដោយសេចក្ដីស្រឡាញ់

ការបង្ហាត់បង្រៀនកូនគឺមិនងាយស្រួលទេ។ ប៉ុន្តែ គម្ពីរអាចជួយបាន។ តើតាមរបៀបណា? សូមអាន យ៉ាកុប ១:១៩, ២០ រួចពិភាក្សាសំណួរដូចតទៅ៖

ពេលឪពុកម្ដាយនិយាយជាមួយនឹងកូន តើពួកគាត់អាចបង្ហាញសេចក្ដីស្រឡាញ់យ៉ាងដូចម្ដេច?
ហេតុអ្វីឪពុកឬម្ដាយមិនគួរប្រៀនប្រដៅកូនពេលដែលខ្លួនខឹង?a

ឪពុកម្នាក់អង្គុយចោងហោងនិយាយជាមួយកូនប្រុសដែលកាន់បាល់មួយ។ ផើងផ្កាមួយបែកនៅលើឥដ្ឋ។

៥. ចូរការពារកូនរបស់អ្នក

ដើម្បីការពារកូនៗរបស់អ្នក ជាការសំខាន់ណាស់ដែលអ្នកនិយាយអប់រំកូនម្នាក់ៗអំពីការរួមភេទ។ អ្នកប្រហែលជាមានអារម្មណ៍ខ្មាសនិយាយជាមួយកូនអំពីរឿងនេះ។ លេងវីដេអូ រួចពិភាក្សាសំណួរដូចតទៅ៖

វីដេអូ: ចូរការពារកូនៗរបស់អ្នកពី«អ្វីដែលអាក្រក់» (២:៥៨)

ហេតុអ្វីឪពុកម្ដាយពិបាកនិយាយអប់រំកូនៗអំពីការរួមភេទ?
តើឪពុកម្ដាយខ្លះបានពន្យល់កូនយ៉ាងណាអំពីការរួមភេទ?

ដូចគម្ពីរបានប្រាប់ទុកជាមុន ពិភពលោកសាថានកាន់តែអាក្រក់ខ្លាំងឡើងៗ។ សូមអាន ធីម៉ូថេទី២ ៣:១, ១៣ រួចពិភាក្សាសំណួរនេះ៖

មនុស្សទុច្ចរិតខ្លះដែលបានត្រូវរៀបរាប់ក្នុងខ១៣ គឺសំដៅលើមនុស្សដែលបៀតបៀនកេរ្តិ៍ខ្មាសកុមារ។ ដូច្នេះ ហេតុអ្វីជាការសំខាន់ដែលឪពុកម្ដាយពន្យល់កូនអំពីការរួមភេទ និងបង្រៀនកូនឲ្យចេះការពារខ្លួនពីអ្នកដែលបៀតបៀនកេរ្តិ៍ខ្មាស?

តើអ្នកដឹងទេ?

សាក្សីព្រះយេហូវ៉ាមានសៀវភៅនិងវីដេអូជាច្រើនដែលជួយឪពុកម្ដាយឲ្យអប់រំកូនអំពីការរួមភេទ និងជួយការពារកូនពីអ្នកដែលបៀតបៀនកេរ្តិ៍ខ្មាស។ ជាឧទាហរណ៍ សូមមើល៖

ចូរការពារកូនៗរបស់អ្នក (វីដេអូ)
សូមស្ដាប់គ្រូដ៏ល្អប្រសើរ ជំពូកទី១០ និង៣២
«ចូរអប់រំកូនរបស់អ្នកអំពីការរួមភេទ» (ទស្សនាវដ្ដីភ្ញាក់រឭក! លេខ៥ ឆ្នាំ២០១៦)

៦. ចូរគោរពឪពុកម្ដាយរបស់អ្នក

កុមារនិងក្មេងជំទង់អាចនិយាយទៅកាន់ឪពុកម្ដាយតាមរបៀបដែលបង្ហាញការគោរពចំពោះពួកគាត់។ លេងវីដេអូ រួចពិភាក្សាសំណួរដូចតទៅ៖

វីដេអូ: តើខ្ញុំអាចនិយាយយ៉ាងណាឲ្យឪពុកម្ដាយយល់ចិត្តខ្ញុំ? (២:១៩)

ពេលមនុស្សវ័យក្មេងនិយាយដោយគោរពចំពោះឪពុកម្ដាយ តើនេះមានប្រយោជន៍អ្វីសម្រាប់គាត់?
តើមនុស្សវ័យក្មេងអាចនិយាយទៅកាន់ឪពុកម្ដាយតាមរបៀបដែលបង្ហាញការគោរពយ៉ាងដូចម្ដេច?

សូមអាន សុភាសិត ១:៨ រួចពិភាក្សាសំណួរនេះ៖

តើមនុស្សវ័យក្មេងគួរមានប្រតិកម្មយ៉ាងណា ពេលឪពុកម្ដាយប្រាប់គាត់ឲ្យធ្វើអ្វីមួយ?

៧. ចូរគោរពប្រណិប័តន៍ព្រះយេហូវ៉ាជាក្រុមគ្រួសារ

ជារៀងរាល់សប្ដាហ៍ ក្រុមគ្រួសារដែលជាសាក្សីព្រះយេហូវ៉ាលៃទុកពេលជាក់លាក់ដើម្បីគោរពប្រណិប័តន៍ព្រះជាមួយគ្នា។ តើការគោរពប្រណិប័តន៍ជាក្រុមគ្រួសារអាចធ្វើឡើងតាមរបៀបណាខ្លះ? លេងវីដេអូ រួចពិភាក្សាសំណួរដូចតទៅ៖

វីដេអូ: ការគោរពប្រណិប័តន៍ព្រះជាក្រុមគ្រួសារ ពោលគឺការពិបាកនិងរង្វាន់ (៨:០៤)

តើក្រុមគ្រួសារអាចធ្វើអ្វីដើម្បីគោរពប្រណិប័តន៍ជាក្រុមគ្រួសារយ៉ាងទៀងទាត់?
តើឪពុកម្ដាយអាចធ្វើអ្វីខ្លះដើម្បីឲ្យការគោរពប្រណិប័តន៍ជាក្រុមគ្រួសារមានប្រយោជន៍និងសប្បាយរីករាយ? (សូមមើលរូបភាពនៅទំព័រដំបូងក្នុងមេរៀននេះ)
តើអ្វីប្រហែលជាធ្វើឲ្យក្រុមគ្រួសាររបស់អ្នកពិបាកគោរពប្រណិប័តន៍ព្រះជាមួយគ្នា?

នៅសម័យបុរាណ ព្រះយេហូវ៉ាបង្គាប់ឲ្យជនជាតិអ៊ីស្រាអែលនិយាយជាមួយក្រុមគ្រួសាររបស់ខ្លួនជាទៀងទាត់អំពីបទគម្ពីរ។ សូមអាន ការបំភ្លឺច្បាប់ ៦:៦, ៧ រួចពិភាក្សាសំណួរដូចតទៅ៖

តើអ្នកអាចធ្វើតាមគោលការណ៍នេះយ៉ាងដូចម្ដេច?

យោបល់ខ្លះសម្រាប់ការគោរពប្រណិប័តន៍ជាក្រុមគ្រួសារ៖

រៀបចំកិច្ចប្រជុំមុនចូលរួមជាមួយក្រុមជំនុំ។
អាននិងពិគ្រោះអំពីកំណត់ហេតុមួយក្នុងគម្ពីរដែលជួយឲ្យក្រុមគ្រួសារសប្បាយរីករាយ។
បើអ្នកមានកូនតូច សូមថតចម្លងឬបោះពុម្ពលំហាត់ណាមួយពីjw.org។
បើអ្នកមានកូនជំទង់ សូមពិគ្រោះអំពីអត្ថបទណាមួយសម្រាប់យុវវ័យក្នុងjw.org។
ធ្វើការសម្ដែងអំពីកំណត់ហេតុណាមួយក្នុងគម្ពីរជាមួយនឹងកូនរបស់អ្នក។
មើលនិងពិគ្រោះអំពីវីដេអូណាមួយក្នុងjw.org។

មនុស្សខ្លះនិយាយថា៖ «គម្ពីរជាសៀវភៅដែលជ្រៅពេកសម្រាប់កូនក្មេង»។

តើអ្នកនឹងនិយាយយ៉ាងណា?

សេចក្ដីសង្ខេប

ព្រះយេហូវ៉ាចង់ឲ្យឪពុកម្ដាយស្រឡាញ់កូន ហើយបង្ហាត់បង្រៀនកូន និងការពារកូនរបស់ពួកគេ។ លោកចង់ឲ្យកូនគោរពនិងស្ដាប់បង្គាប់ឪពុកម្ដាយ ហើយលោកក៏ចង់ឲ្យក្រុមគ្រួសារគោរពប្រណិប័តន៍លោកជាមួយគ្នាដែរ។

រៀនសាឡើងវិញ

តើឪពុកម្ដាយអាចបង្ហាត់បង្រៀនកូននិងការពារកូនយ៉ាងដូចម្ដេច?
តើកូនអាចបង្ហាញការគោរពចំពោះឪពុកម្ដាយតាមរបៀបណាខ្លះ?
បើក្រុមគ្រួសារលៃទុកពេលរាល់សប្ដាហ៍ដើម្បីគោរពប្រណិប័តន៍ព្រះជាមួយគ្នា តើពួកគេទទួលប្រយោជន៍អ្វីខ្លះ?

រៀនចប់នៅថ្ងៃទី:

គោលដៅ

សួរអ្នកឯទៀតក្នុងក្រុមជំនុំដើម្បីបានគំនិតសម្រាប់ការគោរពប្រណិប័តន៍ជាក្រុមគ្រួសារ។

គោលដៅផ្សេងទៀត:

Your other goal