បណ្ណាល័យអ៊ីនធឺណិតរបស់ប៉មយាម

ចូរធ្វើឲ្យស្ថានភាពក្នុងចំណោមរាស្ត្រព្រះដែលប្រៀបដូចជាសួនឧទ្យានកាន់តែប្រសើរឡើង

ទស្សនាវដ្ដីប៉មយាម ២០១៥ | ១៥ កក្កដា
- ១, ២. តើពាក្យ«កំណល់កល់ជើង»ក្នុងបទគម្ពីរភាសាហេប្រឺអាចសំដៅលើអ្វីខ្លះ?
  
  ព្រះយេហូវ៉ាបានមានប្រសាសន៍ថា៖ «ផ្ទៃមេឃជាបល្ល័ង្ករបស់អញ ហើយផែនដីជាកំណល់កល់ជើងអញ»។ (អេសាយ ៦៦:១) ព្រះក៏បានមានប្រសាសន៍អំពី«កំណល់កល់ជើង»របស់លោកដែរ នៅពេលលោកមានប្រសាសន៍ថា៖ «អញនឹងធ្វើឲ្យទីនៃជើងអញបានរុងរឿងឧត្តម»។ (អេសាយ ៦០:១៣) តើតាមរបៀបណាលោកធ្វើឲ្យកំណល់កល់ជើងលោកបានរុងរឿង ឬធ្វើឲ្យប្រសើរឡើង? ម្យ៉ាងទៀត តើនេះមានន័យយ៉ាងណាសម្រាប់ពួកអ្នកដែលរស់នៅលើកំណល់កល់ជើងលោក ពោលគឺផែនដី?
  
  ^២ ក្នុងបទគម្ពីរភាសាហេប្រឺ ពាក្យ«កំណល់កល់ជើង»ក៏បានត្រូវប្រើដែរដើម្បីរៀបរាប់អំពីវិហារសម័យបុរាណរបស់ព្រះនៅអ៊ីស្រាអែល។ (របាក្សត្រទី១ ២៨:២; ទំនុកតម្កើង ១៣២:៧) វិហារនោះស្អាតណាស់ចំពោះព្រះយេហូវ៉ា ដោយសារនោះជាកន្លែងសំខាន់បំផុតនៅផែនដីសម្រាប់ការគោរពប្រណិប័តន៍ពិត។ ម្យ៉ាងទៀត វិហារនោះបានត្រូវប្រើដើម្បីលើកតម្កើងព្រះយេហូវ៉ា។
  
  ៣. តើយើងមានកន្លែងតែមួយដែលសំខាន់បំផុតសម្រាប់ការគោរពប្រណិប័តន៍ពិតនៅសព្វថ្ងៃនេះឬទេ? តើរបៀបរៀបចំនេះបានចាប់ផ្ដើមនៅពេលណា?
  
  ^៣ តើយើងមានកន្លែងតែមួយដែលសំខាន់បំផុតសម្រាប់ការគោរពប្រណិប័តន៍ពិតនៅសព្វថ្ងៃនេះឬទេ? យើងមិនមានវិហារដូចនៅសម័យបុរាណទេ។ ក៏ប៉ុន្តែ ព្រះយេហូវ៉ាមានរបៀបរៀបចំដើម្បីឲ្យមនុស្សគោរពប្រណិប័តន៍លោក ហើយទៅជាមិត្តរបស់លោក។ របៀបរៀបចំនេះប្រៀបដូចជាវិហាររបស់ព្រះយេហូវ៉ា ហើយនោះនាំឲ្យលោកទទួលការលើកតម្កើងច្រើនជាងអគារណាទាំងអស់។ របៀបរៀបចំនេះអាចធ្វើឡើងដោយសារតែថ្លៃលោះរបស់លោកយេស៊ូ។ តើរបៀបរៀបចំនេះបានចាប់ផ្ដើមនៅពេលណា? គឺនៅឆ្នាំ២៩ គ.ស. ពេលលោកយេស៊ូបានទទួលការជ្រមុជទឹក ហើយបានត្រូវរើសតាំងជាសម្ដេចសង្ឃនៃវិហារ ឬរបៀបរៀបចំរបស់ព្រះយេហូវ៉ា។—ហេប្រឺ ៩:១១, ១២
  
  រាស្ត្ររបស់ព្រះយេហូវ៉ាត្រូវសរសើរលោកនៅផែនដីនាពេលឥឡូវនេះ
  
  ៤, ៥. (ក) យោងទៅតាមទំនុកទី៩៩ តើអ្នកគោរពប្រណិប័តន៍ពិតរបស់ព្រះយេហូវ៉ាចង់ធ្វើអ្វី? (ខ) តើយើងគួរសួរខ្លួនយើងនូវសំណួរអ្វី?
  
  ^៤ យើងដឹងគុណយ៉ាងខ្លាំងចំពោះរបៀបរៀបចំរបស់ព្រះសម្រាប់ការគោរពប្រណិប័តន៍ពិត។ យើងបង្ហាញថាយើងដឹងគុណព្រះយេហូវ៉ាដោយប្រាប់អ្នកឯទៀតអំពីនាមរបស់លោក និងអំពីថ្លៃលោះដែលជាអំណោយដ៏អស្ចារ្យពីលោក។ យើងរំភើបចិត្តដែលគ្រិស្តសាសនិកពិតជាង៨លាននាក់កំពុងសរសើរព្រះយេហូវ៉ាជារៀងរាល់ថ្ងៃ! ទោះជាមនុស្សជាច្រើនដែលមានជំនឿសាសនា យល់ខុសថាពួកគេនឹងសរសើរព្រះនៅស្ថានសួគ៌ក្រោយពីពួកគេបានស្លាប់ក្ដី រាស្ត្ររបស់ព្រះយេហូវ៉ាដឹងថាគឺសំខាន់ណាស់ដែលពួកគេសរសើរលោកនៅផែនដីនាពេលឥឡូវនេះ។
  
  ^៥ ពេលយើងសរសើរព្រះយេហូវ៉ា យើងធ្វើតាមគំរូនៃអ្នកបម្រើដ៏ស្មោះត្រង់របស់ព្រះដែលបានរៀបរាប់នៅទំនុកតម្កើង ៩៩:១-៣, ៥ (សូមអាន)។ ម៉ូសេ អេរ៉ុន និងសាំយូអែលដែលជាបុរសស្មោះត្រង់បានគាំទ្រទាំងស្រុងនូវរបៀបរៀបចំរបស់ព្រះសម្រាប់ការគោរពប្រណិប័តន៍ពិតនៅសម័យមុន។ (ទំនុកតម្កើង ៩៩:៦, ៧) សព្វថ្ងៃនេះ ពួកអ្នកដែលព្រះយេហូវ៉ាបានរើសតាំងដែលនៅផែនដីនៅឡើយ បម្រើលោកយ៉ាងស្មោះត្រង់ស្របតាមរបៀបរៀបចំរបស់លោកសម្រាប់ការគោរពប្រណិប័តន៍ពិត។ នេះប្រៀបដូចជាពួកគាត់បម្រើព្រះនៅផ្នែកនៅផែនដីនៃវិហារ។ ក្រោយពីពួកគាត់ឡើងទៅស្ថានសួគ៌ ពួកគាត់នឹងបម្រើជាសង្ឃជាមួយនឹងលោកយេស៊ូ។ «ចៀមឯទៀត»រាប់លាននាក់ជួយពួកគាត់យ៉ាងស្មោះត្រង់។ (យ៉ូហាន ១០:១៦) ក្រុមទាំងពីរគោរពប្រណិប័តន៍ព្រះយេហូវ៉ាជាមួយគ្នាដោយសាមគ្គីភាព។ ប៉ុន្តែ យើងគួរសួរខ្លួនយើងថា ‹តើខ្ញុំគាំទ្រទាំងស្រុងនូវរបៀបរៀបចំរបស់ព្រះយេហូវ៉ាសម្រាប់ការគោរពប្រណិប័តន៍ពិតឬទេ?›។

ចូរធ្វើឲ្យស្ថានភាពក្នុងចំណោមរាស្ត្រព្រះដែលប្រៀបដូចជាសួនឧទ្យានកាន់តែប្រសើរឡើង

ទស្សនាវដ្ដីប៉មយាម ២០១៥ | ១៥ កក្កដា
- ^៧ មកដល់ឆ្នាំ១៩១៩ លោកយេស៊ូបានបញ្ជាក់យ៉ាងច្បាស់ថាអ្នកណាជាពួកអ្នកដែលបានទទួលការពេញចិត្តពីព្រះ ហើយដែលបម្រើនៅវិហាររបស់ព្រះ។ ពួកគាត់បានធ្វើការផ្លាស់ប្ដូរផ្សេងៗដើម្បីឲ្យពួកគាត់គោរពប្រណិប័តន៍ព្រះយេហូវ៉ាតាមរបៀបដែលធ្វើឲ្យលោកកាន់តែពេញចិត្ត។ (អេសាយ ៤:២, ៣; ម៉ាឡាគី ៣:១-៤) ហេតុនេះ អ្វីដែលសាវ័កប៉ូលបានឃើញក្នុងគំនិតរាប់រយឆ្នាំមុន បានចាប់ផ្ដើមក្លាយទៅជាការពិត។
  
  ៨, ៩. តើ«សួនឧទ្យាន»ដែលប៉ូលបានឃើញក្នុងគំនិតគឺជាអ្វី?
  
  ^៨ ប៉ូលបានរៀបរាប់អំពីអ្វីដែលគាត់បានឃើញក្នុងគំនិតនៅកូរិនថូសទី២ ១២:១-៤ (សូមអាន)។ អ្វីដែលព្រះយេហូវ៉ាបានបង្ហាញឲ្យប៉ូលឃើញក្នុងគំនិតនោះ គឺជាអ្វីមួយដែលនឹងកើតឡើងនៅពេលអនាគត។ តើ«សួនឧទ្យាន»ដែលប៉ូលបានឃើញគឺជាអ្វី? ទី១ ពាក្យ«សួនឧទ្យាន»នេះអាចសំដៅលើសួនឧទ្យានពិតប្រាកដដែលមិនយូរទៀតនឹងមាននៅផែនដី។ (លូកា ២៣:៤៣) ទី២ នេះអាចសំដៅលើស្ថានភាពដ៏ល្អឥតខ្ចោះដែលពោរពេញទៅដោយសេចក្ដីសុខសាន្តក្នុងចំណោមរាស្ត្រព្រះដែលយើងនឹងមាននៅពិភពលោកថ្មី។ ទីបី នេះអាចសំដៅលើស្ថានភាពដ៏អស្ចារ្យនៅស្ថានសួគ៌ក្នុង«សួនឧទ្យានរបស់ព្រះ»។—ការបើកបង្ហាញ ២:៧
  
  ^៩ ប៉ុន្តែ ហេតុអ្វីប៉ូលបាននិយាយថាគាត់«បានឮពាក្យដែលគាត់មិនត្រូវប្រាប់ ជាពាក្យដែលមនុស្សមិនមានច្បាប់និយាយ»? គឺដោយសារនោះមិនមែនជាពេលដែលគាត់ត្រូវពន្យល់យ៉ាងល្អិតល្អន់អំពីអ្វីដ៏អស្ចារ្យដែលគាត់បានឃើញក្នុងគំនិតទេ។ ប៉ុន្តែសព្វថ្ងៃនេះ ព្រះយេហូវ៉ាអនុញ្ញាតឲ្យយើងប្រាប់អ្នកឯទៀតអំពីពរដែលរាស្ត្រលោកកំពុងទទួលនៅឥឡូវនេះ!
  
  ១០, ១១. នៅសព្វថ្ងៃនេះ តើយើងមានឯកសិទ្ធិអ្វី?
  
  ^១០ ក្នុងចំណោមរាស្ត្រព្រះមានស្ថានភាពដ៏ពិសេសដែលប្រៀបដូចជាសួនឧទ្យាន។ តើស្ថានភាពដ៏ពិសេសនេះគឺជាអ្វី? គឺជាសេចក្ដីសុខសាន្តដែលព្រះផ្ដល់ឲ្យរាស្ត្រលោក។ ស្ថានភាពដែលពោរពេញទៅដោយសេចក្ដីសុខសាន្តក្នុងចំណោមរាស្ត្រព្រះ បង្ហាញយ៉ាងច្បាស់ថាអ្នកណាជាអ្នកដែលបានទទួលការពេញចិត្តពីព្រះ ហើយដែលគោរពប្រណិប័តន៍លោកសមស្របតាមរបៀបរៀបចំរបស់លោក។—ម៉ាឡាគី ៣:១៨
  
  ^១១ យើងរំភើបចិត្តដោយដឹងថា តាំងពីឆ្នាំ១៩១៩ព្រះយេហូវ៉ាបានអនុញ្ញាតឲ្យអ្នកគោរពប្រណិប័តន៍លោកដែលជាមនុស្សមិនល្អឥតខ្ចោះ មានឯកសិទ្ធិជួយធ្វើឲ្យស្ថានភាពក្នុងចំណោមរាស្ត្ររបស់លោកកាន់តែសុខសាន្តដូចនៅសួនឧទ្យាន។ តើអ្នកកំពុងជួយធ្វើកិច្ចការដ៏អស្ចារ្យនេះឬទេ? តើអ្នកឲ្យតម្លៃទៅលើឯកសិទ្ធិជាអ្នកធ្វើការជាមួយនឹងព្រះយេហូវ៉ាដើម្បីលើកតម្កើងលោកនៅផែនដីឬទេ?