ចូររីករាយនឹងផលល្អដែលកើតពីការខំប្រឹងផ្សព្វផ្សាយ
១. តើអ្វីអាចធ្វើឲ្យចិត្តខ្នះខ្នែងរបស់យើងចុះថយក្នុងកិច្ចបម្រើផ្សាយ?
១ មនុស្សបានត្រូវបង្កើតដើម្បីឲ្យមាន‹ចិត្តរីករាយសប្បាយ ដោយផលនៃការដែលខ្លួនបានធ្វើ›។ (សាស្ដ. ២:២៤) ក៏ប៉ុន្តែ ពេលកិច្ចបម្រើផ្សាយរបស់យើងមិនសូវមានលទ្ធផលល្អ នោះនាំឲ្យយើងធ្លាក់ទឹកចិត្ត បាត់បង់អំណរនិងធ្វើឲ្យចិត្តខ្នះខ្នែងរបស់យើងចុះថយ។ តើអ្វីអាចជួយយើងរក្សាឲ្យមានទស្សនៈត្រឹមត្រូវ?
២. ទោះជាមិនសូវមានមនុស្សស្ដាប់ដំណឹងអំពីរាជាណាចក្រក៏ដោយ ហេតុអ្វីយើងគួរមានគំនិតសមហេតុផល?
២ មានគំនិតសមហេតុផល: សូមចាំថា ទោះជាមិនសូវមានមនុស្សស្ដាប់លោកយេស៊ូក៏ដោយ តែកិច្ចបម្រើរបស់លោកបានជោគជ័យ។ (យ៉ូន. ១៧:៤) ក្នុងឧទាហរណ៍របស់លោកយេស៊ូអំពីការសាបព្រោះ លោកបានប្រាប់ទុកជាមុនថា មនុស្សភាគច្រើននឹងមិនស្ដាប់ដំណឹងអំពីរាជាណាចក្រដែលប្រៀបដូចជាគ្រាប់ពូជទេ។ (ម៉ាថ. ១៣:៣-៨, ១៨-២២) យ៉ាងណាក៏ដោយ បើយើងខំព្យាយាមអស់ពីសមត្ថភាព យើងនៅតែសម្រេចកិច្ចការជាច្រើន។
៣. ទោះជាមិនសូវមានមនុស្សចាប់អារម្មណ៍ចំពោះកិច្ចផ្សព្វផ្សាយរបស់យើងក្ដី តើយើងអាច«បង្កើតផល»យ៉ាងដូចម្ដេច?
៣ របៀបដែលយើងបង្កើតផលច្រើនបំផុត: យោងតាមឧទាហរណ៍របស់លោកយេស៊ូ អស់អ្នកដែលស្ដាប់លោកនឹង«បង្កើតផល»។ (ម៉ាថ. ១៣:២៣) ក្រោយពីទងស្រូវសាលីដុះពន្លកហើយទុំ នោះវាបង្កើតផលផ្លែ មិនមែនបង្កើតឲ្យមានទងស្រូវសាលីថ្មីមួយទៀតឡើយ ប៉ុន្តែបង្កើតគ្រាប់ពូជថ្មី។ ដូច្នេះ ផលផ្លែដែលគ្រិស្តសាសនិកបានបង្កើតមិនចាំបាច់ជាសិស្សថ្មីនោះទេ តែជាការសាបព្រោះគ្រាប់ពូជម្ដងហើយម្ដងទៀតតាមរយៈការផ្សាយអំពីរាជាណាចក្រព្រះ។ ការសាបព្រោះនេះនាំឲ្យមានលទ្ធផល«ល្អ»ជាច្រើនដែលធ្វើឲ្យយើងស្កប់ចិត្ត មិនថាមនុស្សមានឬក៏មិនមានចំណាប់អារម្មណ៍ក្ដី។ លទ្ធផលនោះមានដូចជា យើងកំពុងជួយធ្វើឲ្យនាមរបស់ព្រះយេហូវ៉ាបានបរិសុទ្ធ។ (អេ. ៤៣:១០-១២; ម៉ាថ. ៦:៩) យើងមានឯកសិទ្ធិជាអ្នករួមការងារជាមួយនឹងព្រះ។ (១កូ. ៣:៩) ហើយ«ផលនៃបបូរមាត់»ក៏ធ្វើឲ្យព្រះយេហូវ៉ាមានចិត្តរីករាយដែរ។—ហេ. ១៣:១៥, ១៦
៤. តើកិច្ចបម្រើរបស់យើងអាចនាំឲ្យមានលទ្ធផលអ្វីដែលយើងមិនដឹង?
៤ បន្ថែមទៀត ការខំប្រឹងរបស់យើងប្រហែលជាមានលទ្ធផលដែលយើងមិនដឹង។ ដូចជាអ្នកខ្លះដែលបានឮលោកយេស៊ូផ្សព្វផ្សាយមិនបានក្លាយទៅជាអ្នកកាន់តាមលោកទេ រហូតដល់លោកបានបញ្ចប់កិច្ចបម្រើរបស់លោកនៅផែនដី។ ស្រដៀងគ្នាដែរ គ្រាប់ពូជនៃរាជាណាចក្រដែលយើងបានសាបព្រោះប្រហែលជាមិនទាន់ចាក់ឫស និងដុះឡើងក្នុងចិត្តរបស់មនុស្សរហូតដល់ក្រោយមក ហើយគាត់អាចចូលក្នុងសេចក្ដីពិតដោយយើងមិនដឹង។ តាមពិត កិច្ចបម្រើរបស់យើងនាំឲ្យមានប្រយោជន៍ជាច្រើន។ ដូច្នេះ សូមយើងបង្កើតឲ្យ«មានផលផ្លែជាច្រើនជានិច្ច» ហើយបង្ហាញថា យើងជាអ្នកកាន់តាមលោកយេស៊ូ។—យ៉ូន. ១៥:៨