តើអ្នកពិតជាឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះឬទេ?
«សូមឲ្យព្រះយេហូវ៉ាប្រោសមេត្ដា ឲ្យឯងបានសេចក្ដីស្រាកស្រាន្ត នៅក្នុងផ្ទះរបស់ប្ដី១ទៀតរៀងខ្លួនចុះ»។—រស់. ១:៩
សូមរកចម្លើយចំពោះសំណួរទាំងនេះ:
ហេតុអ្វីយើងអាចនិយាយថាអ្នកបម្រើព្រះនៅអតីតកាលឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះ?
តើតាមរបៀបណាដែលយើងដឹងថាព្រះយេហូវ៉ាយកចិត្តទុកដាក់ចំពោះជម្រើសរបស់យើងអំពីគូអាពាហ៍ពិពាហ៍?
តើដំបូន្មានមួយណាក្នុងគម្ពីរស្តីអំពីអាពាហ៍ពិពាហ៍ដែលអ្នកចង់ធ្វើតាមក្នុងជីវិតរបស់អ្នក?
១. សូមរៀបរាប់អំពីប្រតិកម្មរបស់អាដាមពេលគាត់មានប្រពន្ធ។
«នេះហើយជាឆ្អឹងពីឆ្អឹងអញ ជាសាច់ពីសាច់អញ នឹងត្រូវហៅថា‹ស្ត្រី› ពីព្រោះបានយកចេញពីបុរសមក»។ (លោ. ២:២៣) អាដាមដែលជាបុរសទី១ពិតជារីករាយណាស់! នៅពេលដែលគាត់មានប្រពន្ធ។ មិនមែនជាការចម្លែកឡើយដែលគាត់បានលាន់មាត់ដូច្នេះ។ បន្ទាប់ពីព្រះយេហូវ៉ាបានធ្វើឲ្យអាដាមដេកលក់ស៊ប់ទៅ លោកបានបង្កើតស្ត្រីដ៏ស្រស់ស្អាតនេះពីឆ្អឹងជំនីររបស់អាដាម។ ក្រោយមកអាដាមបានដាក់ឈ្មោះនាងថា អេវ៉ា។ ព្រះបានផ្សំផ្គុំអ្នកទាំងពីរឲ្យទៅជាគូអាពាហ៍ពិពាហ៍ដ៏មានសុភមង្គល។ ដោយហេតុថាព្រះយេហូវ៉ាបានប្រើឆ្អឹងជំនីររបស់អាដាមដើម្បីបង្កើតនាងអេវ៉ា នោះពួកគេមានភាពជិតស្និទ្ធជាងប្ដីប្រពន្ធទាំងអស់នៅសព្វថ្ងៃនេះ។
២. ហេតុអ្វីបានជាបុរសនិងស្ត្រីចង់មានភាពស្និទ្ធស្នាលនឹងគ្នា?
២ ដោយសារព្រះយេហូវ៉ាមានប្រាជ្ញាដែលពុំអាចប្រៀបផ្ទឹមបាន លោកបានផ្ដល់ឲ្យមនុស្សនូវសមត្ថភាពបង្ហាញសេចក្ដីស្នេហា ជាគុណសម្បត្ដិមួយដែលធ្វើឲ្យបុរសនិងស្ត្រីចង់មានភាពស្និទ្ធស្នាលនឹងគ្នា។ សព្វវចនាធិប្បាយមួយចែងថា៖ «បុរសនិងស្ត្រីដែលរៀបការ សង្ឃឹមថាពួកគេអាចមានទំនាក់ទំនងផ្លូវភេទជាមួយគ្នា ហើយមានសេចក្ដីស្នេហារវាងគ្នាទៅវិញទៅមកជារៀងរហូត» (The World Book Encyclopedia) នេះជារឿងធម្មតាដែលធ្លាប់កើតឡើងច្រើនដងរាប់មិនអស់ក្នុងចំណោមរាស្ត្ររបស់ព្រះយេហូវ៉ា។
ពួកគេបានដឹងគុណព្រះចំពោះអាពាហ៍ពិពាហ៍ដែលជាអំណោយពីលោក
៣. តើអាប្រាហាំបានធ្វើអ្វីដើម្បីរកប្រពន្ធឲ្យអ៊ីសាក?
៣ អាប្រាហាំដែលជាបុរសស្មោះត្រង់បានឲ្យតម្លៃខ្ពស់ទៅលើចំណងអាពាហ៍ពិពាហ៍។ ដូច្នេះ គាត់បានចាត់អ្នកបម្រើដែលមានវ័យចាស់ជាងគេរបស់គាត់ឲ្យទៅស្រុកមេសូប៉ូតាមី ដើម្បីរកប្រពន្ធឲ្យអ៊ីសាក។ ការអធិដ្ឋានរបស់អ្នកបម្រើនោះនាំឲ្យមានលទ្ធផលដ៏ល្អ។ រេបិកាដែលជាអ្នកកោតខ្លាចព្រះបានក្លាយជាប្រពន្ធជាទីស្រឡាញ់របស់អ៊ីសាក ហើយមានតួនាទីក្នុងរបៀបរៀបចំរបស់ព្រះយេហូវ៉ាដើម្បីរក្សាពូជរបស់អាប្រាហាំ។ (លោ. ២២:១៨; ២៤:១២-១៤, ៦៧) តាមរយៈកំណត់ហេតុនេះ យើងមិនគួរសន្និដ្ឋានថាយើងគួរធ្វើជាអ្នកផ្គូផ្គងឲ្យគេទេ បើគេមិនបានសុំឲ្យយើងធ្វើនោះ ទោះបីយើងប្រហែលជាមានបំណងល្អក៏ដោយ។ នៅក្នុងសង្គមសព្វថ្ងៃនេះ មនុស្សជាច្រើនជ្រើសរើសគូអាពាហ៍ពិពាហ៍ដោយខ្លួនគេ។ ព្រះមិនបានរើសគូឲ្យយើងទេ ប៉ុន្តែលោកណែនាំគ្រិស្តសាសនិកចំពោះរឿងនេះ និងក្នុងកាលៈទេសៈផ្សេងទៀតក្នុងជីវិត បើពួកគេអធិដ្ឋានសុំការណែនាំពីលោក ហើយបើពួកគេឲ្យសកម្មពលរបស់លោកដឹកនាំពួកគេ។—កាឡ. ៥:១៨, ២៥
៤, ៥. តើអ្វីធ្វើឲ្យអ្នកជឿជាក់ថាស្ត្រីក្រមុំពីក្រុងស៊ូឡាមនិងគង្វាលនោះចាប់ចិត្តស្រឡាញ់គ្នាទៅវិញទៅមកយ៉ាងខ្លាំង?
៤ ស្ត្រីក្រមុំដ៏ស្រស់ស្អាតពីក្រុងស៊ូឡាមនៃស្រុកអ៊ីស្រាអែលសម័យបុរាណ មិនចង់ឲ្យមិត្តភក្ដិរបស់នាងបង្ខំនាងឲ្យធ្វើជាប្រពន្ធម្នាក់ក្នុងចំណោមប្រពន្ធជាច្រើនរបស់ស្តេចសាឡូម៉ូននោះទេ។ នាងបាននិយាយថា៖ «ឱពួកកូនស្រីក្រុងយេរូសាឡិមអើយ ខ្ញុំចាប់ឲ្យនាងរាល់គ្នាស្បថថា នាងទាំងឡាយនឹងមិនខំធ្វើឲ្យខ្ញុំមានចិត្តស្រឡាញ់ លុះត្រាតែសេចក្ដីស្រឡាញ់នោះផុសចេញពីចិត្តខ្ញុំវិញ»។ (បទ. ៨:៤; ព.ថ.) ស្ត្រីក្រមុំពីក្រុងស៊ូឡាមនិងគង្វាលម្នាក់ពិតជាបានចាប់ចិត្តស្រឡាញ់គ្នាទៅវិញទៅមក។ នាងបាននិយាយដោយចិត្តរាបទាបថា៖ «ខ្ញុំជាផ្កាកុលាបដែលដុះនៅវាលសារ៉ុន ជាផ្កាកំភ្លឹងដែលដុះនៅច្រកភ្នំ» ប៉ុន្តែគង្វាលបានតបវិញថា៖ «មាសសំឡាញ់របស់អញនៅកណ្ដាលពួកកូនស្រីៗ ប្រៀបដូចជាកំភ្លឹងដុះនៅកណ្ដាលគុម្ពបន្លា»។ (បទ. ២:១, ២) ពួកគេពិតជាស្រឡាញ់គ្នាទៅវិញទៅមក។
៥ ដោយសារស្ត្រីក្រមុំពីក្រុងស៊ូឡាមនិងគង្វាលមានសេចក្ដីស្រឡាញ់ខ្លាំងចំពោះព្រះ ចំណងអាពាហ៍ពិពាហ៍របស់ពួកគេពិតជានឹងរឹងមាំមែន។ តាមការពិត ស្ត្រីក្រមុំពីក្រុងស៊ូឡាមបាននិយាយទៅអ្នកជាទីស្រឡាញ់របស់នាងថា៖ ‹សូមប្ដិតខ្ញុំនិត្យនៅចិត្តបងដូចជាត្រា គឺជាស្នាមត្រានៅលើដៃបងផង ដ្បិតសេចក្ដីស្រឡាញ់មានកំឡាំង ដូចជាសេចក្ដីស្លាប់ ហើយសេចក្ដីប្រច័ណ្ឌក៏សាហាវ ដូចជាស្ថានឃុំព្រលឹងមនុស្សស្លាប់ ហើយជំហួលនៃសេចក្ដីនោះក៏ជាជំហួលនៃភ្លើង ជាអណ្ដាតភ្លើងយ៉ាងសហ័សដែលមកពីព្រះ[ដោយសារសេចក្ដីស្រឡាញ់មកពីលោក] ទឹកជាច្រើនយ៉ាងណាក៏មិនអាចនឹងពន្លត់សេចក្ដីស្រឡាញ់បានឡើយ ទឹកជំនន់នឹងពន្លិចក៏មិនបានដែរ ទោះបើអ្នកណានឹងចំណាយទ្រព្យសម្បត្ដិនៅផ្ទះខ្លួនអស់រលីងឲ្យបានសេចក្ដីស្រឡាញ់ គង់តែអ្នកនោះនឹងត្រូវបានសេចក្ដីមើលងាយទទេៗវិញ›។ (បទ. ៨:៦, ៧) អ្នកបម្រើព្រះយេហូវ៉ាគួររំពឹងថាគូរបស់ខ្លួននឹងតាំងចិត្តរក្សាចិត្តស្មោះត្រង់ដូចរៀបរាប់ខាងលើនេះដែរ មែនទេ?
ជម្រើសមួយដែលសំខាន់ចំពោះព្រះ
៦, ៧. តើតាមរបៀបណាដែលយើងអាចដឹងថាព្រះយកចិត្តទុកដាក់ចំពោះជម្រើសរបស់យើងអំពីគូអាពាហ៍ពិពាហ៍?
៦ ព្រះយេហូវ៉ាយកចិត្តទុកដាក់ចំពោះជម្រើសរបស់អ្នកអំពីគូអាពាហ៍ពិពាហ៍។ ស្តីអំពីបណ្ដាជននៅស្រុកកាណាន ជនជាតិអ៊ីស្រាអែលបានទទួលបង្គាប់ថា៖ «មិនត្រូវរៀបការជាមួយនឹងគេ ឬឲ្យកូនស្រីឯងទៅកូនប្រុសគេ ហើយយកកូនស្រីគេមកឲ្យកូនប្រុសឯងនោះដែរ ដ្បិតគេនឹងបង្វែរកូនឯងពីអញចេញ ឲ្យទៅគោរពប្រតិបត្ដិតាមព្រះដទៃ យ៉ាងនោះសេចក្ដីខ្ញាល់នៃព្រះយេហូវ៉ានឹងត្រូវកាត់ឡើងទាស់នឹងឯងរាល់គ្នា ហើយទ្រង់នឹងបំផ្លាញឯងចេញជាឆាប់»។ (ចោ. ៧:៣, ៤) ប៉ុន្មានសតវត្សរ៍ក្រោយមក អែសរ៉ាដែលជាសង្ឃបានប្រកាសថា៖ «អ្នករាល់គ្នាបានប្រព្រឹត្តរំលង ដោយយកប្រពន្ធជាស្រីសាសន៍ដទៃ ជាការដែលចំរើនទោសដល់សាសន៍អ៊ីស្រាអែល»។ (អែស. ១០:១០) ហើយសាវ័កប៉ូលបានប្រាប់បងប្អូនរួមជំនឿថា៖ «ប្រពន្ធត្រូវនៅជាប់នឹងប្ដី ដរាបណាប្ដីនៅរស់។ ប៉ុន្តែប្រសិនបើប្ដីរបស់នាងដេកលក់ក្នុងសេចក្ដីស្លាប់ នោះនាងមានសេរីភាពអាចរៀបការជាមួយនឹងអ្នកណាក៏បាន ឲ្យតែអ្នកនោះជាអ្នកកាន់តាមលោកម្ចាស់»។—១កូ. ៧:៣៩
៧ ប្រសិនបើអ្នកបម្រើរបស់ព្រះយេហូវ៉ារៀបការជាមួយអ្នកដែលមិនជឿ នេះជាទង្វើដែលបង្ហាញអំពីការមិនស្ដាប់បង្គាប់ព្រះ។ ជនជាតិអ៊ីស្រាអែលនៅសម័យអែសរ៉ាបានប្រព្រឹត្តមិនស្មោះត្រង់ដោយ«យកប្រពន្ធជាស្រីសាសន៍ដទៃ» ហើយការមើលស្រាលបណ្ដាំរបស់ព្រះបែបនេះជាទង្វើខុសឆ្គង។ (អែស. ១០:១០; ២កូ. ៦:១៤, ១៥) គ្រិស្តសាសនិកម្នាក់ដែលរៀបការជាមួយអ្នកដែលមិនជឿ មិនមែនជាគំរូល្អ ហើយពិតជាមិនឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះ។ ដូច្នេះ គ្រិស្តសាសនិកដែលបានទទួលការជ្រមុជទឹកហើយ តែបែរជារៀបការជាមួយអ្នកដែលមិនជឿ អាចបាត់បង់ឯកសិទ្ធិក្នុងក្រុមជំនុំ។ ម្យ៉ាងទៀត គឺមិនសមហេតុផលសោះបើគ្រិស្តសាសនិកម្នាក់សង្ឃឹមថានឹងបានពរពីព្រះកាលដែលគាត់សារភាពដោយអធិដ្ឋានថា៖ ‹ឱព្រះយេហូវ៉ា! ខ្ញុំមិនបានស្ដាប់បង្គាប់លោកដោយចេតនា ប៉ុន្តែទោះជាយ៉ាងនេះក្ដីសូមលោកឲ្យពរខ្ញុំផង›។
បិតារបស់យើងនៅស្ថានសួគ៌ជ្រាបអំពីអ្វីដែលល្អបំផុតសម្រាប់អាពាហ៍ពិពាហ៍
៨. សូមពន្យល់អំពីមូលហេតុដែលយើងគួរធ្វើតាមការណែនាំរបស់ព្រះអំពីអាពាហ៍ពិពាហ៍។
៨ អ្នកដែលបង្កើតម៉ាស៊ីនដឹងយ៉ាងច្បាស់អំពីដំណើរការរបស់ម៉ាស៊ីន។ ប្រសិនបើយើងត្រូវដំឡើងវា គាត់អាចផ្ដល់ព័ត៌មានល្អិតល្អន់ដែលចាំបាច់អំពីម៉ាស៊ីននោះ។ ចុះយ៉ាងណា បើយើងមិនអើពើនឹងការណែនាំរបស់គាត់ ហើយដំឡើងគ្រឿងខ្ចៅតាមការគិតឃើញរបស់យើងវិញ? នេះទំនងជានាំឲ្យមានលទ្ធផលអាក្រក់ ឬម៉ាស៊ីននោះនឹងមិនដំណើរការតែម្ដង។ បើយើងចង់បានអាពាហ៍ពិពាហ៍ដែលមានសុភមង្គល យើងត្រូវធ្វើតាមការណែនាំរបស់ព្រះយេហូវ៉ាដែលជាអ្នកបង្កើតឲ្យមានអាពាហ៍ពិពាហ៍។
៩. ហេតុអ្វីយើងអាចនិយាយថាព្រះយេហូវ៉ាយល់អំពីអារម្មណ៍កណ្ដោចកណ្ដែង ព្រមទាំងសុភមង្គលដែលគេអាចមានក្នុងចំណងអាពាហ៍ពិពាហ៍?
៩ ព្រះយេហូវ៉ាជ្រាបអំពីអ្វីៗទាំងអស់អំពីមនុស្សជាតិនិងអាពាហ៍ពិពាហ៍។ លោកបានធ្វើឲ្យមនុស្សមានសេចក្ដីត្រូវការខាងការរួមដំណេក ដើម្បីពួកគេ«បង្កើតកូនឲ្យចំរើនជាច្រើនឡើង»។ (លោ. ១:២៨) ព្រះយល់យ៉ាងច្បាស់អំពីអារម្មណ៍កណ្ដោចកណ្ដែង ពីព្រោះមុនលោកបង្កើតស្ត្រីដំបូងលោកបានមានប្រសាសន៍ថា៖ «មនុស្សនេះនៅតែម្នាក់ឯង នោះមិនស្រួលទេ អញនឹងធ្វើឲ្យមានម្នាក់ជាជំនួយសំរាប់ជួយវា»។ (លោ. ២:១៨) ព្រះយេហូវ៉ាក៏បានជ្រាបយ៉ាងច្បាស់ដែរអំពីអំណរដែលគេអាចមានក្នុងចំណងអាពាហ៍ពិពាហ៍។—សូមអាន សុភាសិត ៥:១៥-១៨
១០. តើកត្ដាអ្វីខ្លះគួរមានឥទ្ធិពលទៅលើទំនាក់ទំនងផ្លូវភេទរបស់គូអាពាហ៍ពិពាហ៍ដែលជាគ្រិស្តសាសនិក?
១០ ដោយសារមនុស្សជាតិបានឆ្លងភាពខុសឆ្គងនិងភាពមិនល្អឥតខ្ចោះពីអាដាមដែលមានភាពខុសឆ្គង នោះគ្មានអាពាហ៍ពិពាហ៍ណានៅសព្វថ្ងៃនេះដែលល្អឥតខ្ចោះនោះទេ។ ក៏ប៉ុន្តែ ក្នុងចំណោមអ្នកបម្រើរបស់ព្រះយេហូវ៉ា អាពាហ៍ពិពាហ៍របស់ពួកគេអាចនាំឲ្យមានសុភមង្គលពិត ប្រសិនបើពួកគេធ្វើតាមបណ្ដាំរបស់ព្រះ។ ជាឧទាហរណ៍ សូមពិចារណាអំពីដំបូន្មានដ៏ច្បាស់របស់ប៉ូលអំពីទំនាក់ទំនងផ្លូវភេទក្នុងអាពាហ៍ពិពាហ៍។ (សូមអាន កូរិនថូសទី១ ៧:១-៥) បណ្ដាំរបស់ព្រះមិនបានតម្រូវថា គូអាពាហ៍ពិពាហ៍ត្រូវមានទំនាក់ទំនងផ្លូវភេទដើម្បីគ្រាន់តែបង្កើតកូនចៅប៉ុណ្ណោះទេ។ ទំនាក់ទំនងស្និទ្ធស្នាលបំផុតគឺត្រឹមត្រូវក្នុងការបំពេញនូវសេចក្ដីត្រូវការខាងរូបកាយនិងខាងផ្លូវចិត្ត។ ប៉ុន្តែការប្រព្រឹត្តដែលខុសធម្មតាប្រាកដជាមិនធ្វើឲ្យព្រះពេញចិត្តទេ។ ប្ដីប្រពន្ធដែលជាគ្រិស្តសាសនិកប្រាកដជានឹងបំពេញសេចក្ដីត្រូវការនេះ ដែលជាលក្ខណៈសំខាន់នៃជីវិតរបស់ពួកគេដោយថ្នាក់ថ្នមគ្នា នេះនាំឲ្យពួកគេអាចបង្ហាញសេចក្ដីស្រឡាញ់ដ៏ពិតចំពោះគ្នាទៅវិញទៅមក។ ពួកគាត់ពិតជាគួរជៀសវាងការប្រព្រឹត្តណាដែលធ្វើឲ្យព្រះយេហូវ៉ាមិនពេញចិត្ត។
១១. ដោយសារនាងរូថបានធ្វើតាមការណែនាំរបស់ព្រះយេហូវ៉ា តើនាងបានពរអ្វីខ្លះ?
១១ ជីវិតអាពាហ៍ពិពាហ៍គួរតែពោរពេញទៅដោយអំណរ មិនមែនគួរឲ្យធុញទ្រាន់ ហើយគ្មានសុភមង្គលនោះទេ។ ជាពិសេស គេហដ្ឋានរបស់គ្រិស្តសាសនិកគួរជាកន្លែងសម្រាកនិងជាកន្លែងដ៏សុខសាន្ត។ សូមពិចារណាអំពីអ្វីដែលបានកើតឡើងកាលពី៣.០០០ឆ្នាំមុន នៅពេលដែលស្ត្រីមេម៉ាយវ័យចាស់ឈ្មោះន៉ាអូមីនិងកូនប្រសាស្រីឈ្មោះរូថនិងអ័រប៉ា កំពុងធ្វើដំណើរចេញពីស្រុកម៉ូអាប់ទៅស្រុកយូដាវិញ។ ន៉ាអូមីបានដាស់តឿនស្ត្រីវ័យក្មេងទាំងពីរនាក់នោះឲ្យត្រឡប់ទៅឯជនជាតិរបស់នាងវិញ។ នាងរូថជាស្ត្រីជនជាតិម៉ូអាប់បាននៅជាប់នឹងន៉ាអូមី។ នាងស្មោះត្រង់នឹងព្រះពិត ហើយបានទទួល‹បំណាច់ដ៏ពោរពេញពីព្រះយេហូវ៉ា ដែលនាងបានជ្រកក្រោមស្លាបលោក›។ (រស់. ១:៩; ២:១២) ដោយសារនាងរូថបានចាត់ទុកអាពាហ៍ពិពាហ៍ជាអំណោយដ៏មានតម្លៃពីព្រះ នាងបានក្លាយទៅជាប្រពន្ធរបស់បុរសវ័យចាស់ឈ្មោះបូអូសដែលជាអ្នកគោរពប្រណិប័តន៍ព្រះយេហូវ៉ាពិតប្រាកដ។ ពេលដែលព្រះប្រោសនាងឲ្យរស់ឡើងវិញនៅពិភពលោកថ្មីរបស់លោក នោះនាងនឹងមានចិត្តរីករាយដោយដឹងថា នាងបានក្លាយទៅជាជីដូនរបស់លោកយេស៊ូគ្រិស្ត។ (ម៉ាថ. ១:១, ៥, ៦; លូក. ៣:២៣, ៣២) ដោយសារនាងបានធ្វើតាមការណែនាំរបស់ព្រះយេហូវ៉ា នាងបានពរដ៏វិសេសវិសាលមែន!
ដំបូន្មានដ៏ល្អដែលនាំឲ្យទទួលជោគជ័យក្នុងជីវិតអាពាហ៍ពិពាហ៍
១២. តើគេអាចរកឃើញដំបូន្មានដ៏ល្អសម្រាប់អាពាហ៍ពិពាហ៍ពីកន្លែងណា?
១២ ព្រះដែលជាអ្នកបង្កើតឲ្យមានអាពាហ៍ពិពាហ៍ ប្រាប់យើងអំពីរបៀបដែលយើងអាចទទួលជោគជ័យក្នុងចំណងអាពាហ៍ពិពាហ៍។ គ្មានមនុស្សណាម្នាក់មានការយល់ដឹងច្រើនអំពីរឿងនេះដូចលោកទេ។ អ្វីដែលគម្ពីរចែងតែងតែត្រឹមត្រូវ ដូច្នេះអ្នកដែលផ្ដល់ឱវាទក្នុងរឿងអាពាហ៍ពិពាហ៍គួរតែផ្អែកលើបណ្ដាំរបស់ព្រះ។ ជាឧទាហរណ៍ ក្រោមការដឹកនាំរបស់ព្រះ សាវ័កប៉ូលបានសរសេរថា៖ «ចូរអ្នករាល់គ្នាម្នាក់ៗស្រឡាញ់ប្រពន្ធរបស់ខ្លួន ដូចស្រឡាញ់ខ្លួនអ្នក ឯប្រពន្ធត្រូវគោរពប្ដីយ៉ាងជ្រាលជ្រៅ»។ (អេភ. ៥:៣៣) គ្រិស្តសាសនិកដែលមានភាពចាស់ទុំពិតជាយល់អំពីដំបូន្មាននេះ។ សំណួរគឺថា តើពួកគាត់នឹងធ្វើតាមបណ្ដាំរបស់ព្រះយេហូវ៉ាឬទេ? ពួកគាត់នឹងធ្វើតាម ប្រសិនបើពួកគាត់ពិតជាឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះ។a
១៣. តើការមិនធ្វើតាមដំបូន្មាននៅពេត្រុសទី១ ៣:៧ អាចនាំឲ្យមានលទ្ធផលអ្វី?
១៣ ប្ដីម្នាក់ដែលជាគ្រិស្តសាសនិកត្រូវប្រព្រឹត្តដោយសេចក្ដីស្រឡាញ់ចំពោះប្រពន្ធរបស់គាត់។ សាវ័កពេត្រុសបានសរសេរថា៖ «តាមរបៀបដូចគ្នាដែរ ចូរអ្នករាល់គ្នាដែលជាប្ដី បន្តរួមរស់ជាមួយនឹងប្រពន្ធដោយស្គាល់ចិត្តនាងច្បាស់ ហើយដោយឲ្យកិត្ដិយសដល់នាងជាភាជនៈខ្សោយជាង ជាស្ត្រីភេទ ពីព្រោះអ្នករាល់គ្នាក៏ជាអ្នកទទួលជីវិតជាមត៌ករួមជាមួយនឹងនាង ដោយសារគុណដ៏វិសេសលើសលប់របស់ព្រះ។ ពុំនោះសោត សេចក្ដីអធិដ្ឋានរបស់អ្នករាល់គ្នានឹងត្រូវរារាំង»។ (១ពេ. ៣:៧) ប្រសិនបើប្ដីម្នាក់មិនធ្វើតាមដំបូន្មានរបស់ព្រះ នោះសេចក្ដីអធិដ្ឋានរបស់គាត់អាចត្រូវរារាំង។ ទំនាក់ទំនងរបស់ប្ដីប្រពន្ធជាមួយព្រះយេហូវ៉ាអាចល្អក់កករ ហើយនេះអាចបណ្ដាលឲ្យពួកគេតានតឹងចិត្តជាខ្លាំង ឈ្លោះប្រកែកគ្នា និងប្រព្រឹត្តយ៉ាងសាហាវចំពោះគ្នា។
១៤. តើប្រពន្ធដែលមានសេចក្ដីស្រឡាញ់អាចមានឥទ្ធិពលយ៉ាងណាទៅលើក្រុមគ្រួសាររបស់នាង?
១៤ ប្រពន្ធដែលធ្វើតាមការណែនាំនៃបណ្ដាំរបស់ព្រះនិងសកម្មពលបរិសុទ្ធរបស់លោក អាចធ្វើអ្វីៗជាច្រើនដើម្បីឲ្យផ្ទះរបស់នាងជាកន្លែងដែលនាំឲ្យមានចិត្តស្ងប់និងមានសុភមង្គល។ ជាការធម្មតាទេ ប្ដីដែលជាអ្នកកោតខ្លាចព្រះនឹងស្រឡាញ់ប្រពន្ធរបស់គាត់ ហើយការពារនាងខាងរូបកាយនិងចំណងមិត្តភាពរបស់នាងជាមួយព្រះ។ បើនាងចង់ឲ្យប្ដីស្រឡាញ់នាង នោះនាងក៏គួរធ្វើជាប្រពន្ធដែលគួរឲ្យស្រឡាញ់ដែរ។ សុភាសិត ១៤:១ ចែងថា៖ «គ្រប់ទាំងស្រីៗដែលមានប្រាជ្ញារមែងសង់ផ្ទះរបស់ខ្លួនឡើង តែស្ត្រីល្ងីល្ងើគេរំលំផ្ទះដោយដៃខ្លួនវិញ»។ ប្រពន្ធដែលមានប្រាជ្ញានិងមានសេចក្ដីស្រឡាញ់ជួយក្រុមគ្រួសាររបស់នាងឲ្យបានជោគជ័យ និងមានសុភមង្គល។ នាងក៏បង្ហាញដែរថានាងពិតជាឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះ។
១៥. តើមានដំបូន្មានអ្វីនៅអេភេសូរ ៥:២២-២៥?
១៥ ប្ដីប្រពន្ធដែលធ្វើតាមគំរូរបស់លោកយេស៊ូស្តីអំពីរបៀបដែលលោកប្រព្រឹត្តចំពោះក្រុមជំនុំ បង្ហាញចិត្តដឹងគុណចំពោះអាពាហ៍ពិពាហ៍ដែលជាអំណោយពីព្រះ។ (សូមអាន អេភេសូរ ៥:២២-២៥) ប្ដីប្រពន្ធដែលពិតជាស្រឡាញ់គ្នាមានចិត្តរាបទាប ជៀសវាងពីការមិននិយាយរកគ្នា ហើយមិនឲ្យលក្ខណៈមិនល្អឯទៀតបំផ្លាញចំណងអាពាហ៍ពិពាហ៍របស់ពួកគេឡើយ។ ព្រះយេហូវ៉ាពិតជាឲ្យពរគូអាពាហ៍ពិពាហ៍បែបនោះមែន!
កុំឲ្យអ្នកណាពង្រាត់ពួកគេឡើយ
១៦. ហេតុអ្វីបងប្អូនគ្រិស្តសាសនិកខ្លះបន្តនៅលីវ?
១៦ ទោះជាមនុស្សភាគច្រើនមានគម្រោងចង់រៀបការនៅដំណាក់កាលណាមួយនៃជីវិតរបស់ពួកគេក៏ដោយ អ្នកបម្រើព្រះយេហូវ៉ាមួយចំនួនសុខចិត្តបន្តនៅលីវ ពីព្រោះពួកគាត់មិនអាចរកគូដែលពួកគាត់ពេញចិត្តនិងដែលព្រះពេញចិត្តបានទេ។ បងប្អូនផ្សេងទៀតទទួលអំណោយពីព្រះជាភាពនៅលីវ ដែលអនុញ្ញាតឲ្យពួកគាត់ប្រមូលអារម្មណ៍ទៅលើកិច្ចបម្រើព្រះដោយមិនឲ្យរឿងអាពាហ៍ពិពាហ៍មកបំបែរអារម្មណ៍ពួកគាត់ឡើយ។ គ្រិស្តសាសនិកដែលនៅលីវអាចចំណាយពេលច្រើនជាងក្នុងកិច្ចបម្រើព្រះយេហូវ៉ា ហើយនេះធ្វើឲ្យពួកគាត់មានជីវិតគាប់ចិត្តក្នុងអំឡុងពេលនៅលីវ។—ម៉ាថ. ១៩:១០-១២; ១កូ. ៧:១, ៦, ៧, ១៧
១៧. (ក) តើប្រសាសន៍មួយណារបស់លោកយេស៊ូស្តីអំពីអាពាហ៍ពិពាហ៍ដែលយើងគួរចាំជានិច្ច? (ខ) បើគ្រិស្តសាសនិកណាចាប់ផ្ដើមមានចិត្តចង់បានគូរបស់អ្នកឯទៀត តើគាត់គួរធ្វើអ្វីដោយឥតបង្អង់?
១៧ ទោះជាយើងនៅលីវឬរៀបការហើយក៏ដោយ យើងទាំងអស់គ្នាត្រូវចាំជានិច្ចនូវប្រសាសន៍របស់លោកយេស៊ូដែលថា៖ «តើអ្នករាល់គ្នាមិនធ្លាប់អានទេថា លោក[ព្រះ]ដែលបានបង្កើតមនុស្សជាតិដំបូង បានបង្កើតពួកគេជាប្រុសនិងស្រី ហើយមានប្រសាសន៍ថា៖ ‹ហេតុនេះហើយ បុរសនឹងចាកចេញពីឪពុកនិងម្ដាយខ្លួន ហើយនឹងនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ›នោះ? ដូច្នេះ ពួកគេលែងជាពីរទៀតហើយ ប៉ុន្តែជាសាច់ឈាមតែមួយវិញ។ ម្ល៉ោះហើយ កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។ (ម៉ាថ. ១៩:៤-៦) ការចង់បានគូរបស់អ្នកឯទៀតជាអំពើខុសឆ្គង (ចោ. ៥:២១) ប្រសិនបើគ្រិស្តសាសនិកណាចាប់ផ្ដើមមានសេចក្ដីប៉ងប្រាថ្នាបែបនេះ គាត់គួរចាត់វិធានការភ្លាមៗដើម្បីបំបាត់ចោលចិត្តគំនិតស្មោកគ្រោកនេះ ទោះជាត្រូវឈឺចាប់យ៉ាងខ្លាំងក្នុងចិត្តក៏ដោយ ពីព្រោះគាត់បានអនុញ្ញាតឲ្យសេចក្ដីប៉ងប្រាថ្នាដែលបម្រើប្រយោជន៍ផ្ទាល់ខ្លួនកើតមានឡើង។ (ម៉ាថ. ៥:២៧-៣០) ជាការសំខាន់ណាស់ដែលយើងត្រូវកែតម្រង់ចិត្តគំនិតបែបនេះ ហើយបំបាត់ចោលសេចក្ដីប៉ងប្រាថ្នាខុសឆ្គងដែលបណ្ដាលមកពីចិត្តដែលបញ្ឆោតយើង។—យេ. ១៧:៩
១៨. តើយើងគួរមានអារម្មណ៍យ៉ាងណាចំពោះអាពាហ៍ពិពាហ៍ដែលជាអំណោយពីព្រះ?
១៨ សូម្បីតែមនុស្សជាច្រើនដែលមិនសូវស្គាល់ឬមិនស្គាល់សោះអំពីព្រះយេហូវ៉ានិងអំណោយដ៏អស្ចារ្យនៃអាពាហ៍ពិពាហ៍ដែលមកពីលោកក៏ដោយ ក៏ពួកគេបានបង្ហាញចិត្តដឹងគុណមួយកម្រិតចំពោះចំណងអាពាហ៍ពិពាហ៍ដែរ។ ទម្រាំតែយើងដែលបានប្រគល់ខ្លួនជូនព្រះយេហូវ៉ាជា«ព្រះដែលមានសេចក្ដីសប្បាយ» យើងច្បាស់ជាគួររីករាយចំពោះការរៀបចំទាំងអស់របស់លោក ហើយយើងក៏បង្ហាញថាយើងពិតជាឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះយ៉ាងណាទៅ!—១ធី. ១:១១
[កំណត់សម្គាល់]
a ដើម្បីបានព័ត៌មានថែមទៀតអំពីអាពាហ៍ពិពាហ៍ សូមមើលសៀវភៅ«ចូររក្សាខ្លួនជាមនុស្សដែលព្រះស្រឡាញ់» ជំពូកទី១០និង១១។
[ឃ្លាអក្សរធំនៅទំព័រ៦]
ចំណងអាពាហ៍ពិពាហ៍ដ៏រឹងមាំ លើកតម្កើងព្រះយេហូវ៉ានិងធ្វើឲ្យសមាជិកទាំងអស់ក្នុងក្រុមគ្រួសារមានសុភមង្គលខ្លាំងក្រៃលែង
[រូបភាពនៅទំព័រ៥]
នាងរូថបានបង្ហាញថានាងឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះ
[រូបភាពនៅទំព័រ៧]
តើអ្នកបង្ហាញថាអ្នកពិតជាឲ្យតម្លៃចំពោះអាពាហ៍ពិពាហ៍ដែលជាអំណោយពីព្រះឬទេ?