Тьштед кӧ Кʹьтеба Пирозда һатьбун пʹехәмбәртикьрьне, иро бәр чʹәʹве мә тенә сери. Мәсәлә, әм дьвиньн ԝәки «Пʹадше Бакӧр» у «Пʹадше Башур» ча бона сәрԝертийа дьне һәврʹа дькʹәвьнә ләще (Данийел 11:40). Әм дьвиньн ԝәки мьзгинийа дәрһәԛа Пʹадшатийа Хԝәде сәр тʹәмамийа дьнйайе те бәлакьрьне у бь милйона мәрьв ԝе йәке ԛәбул дькьн (Ишайа 60:22; Мәтта 24:14). Ӧса жи, әм «ԝәʹдәда» тʹер у тʹьжә хԝарьна рʹӧһʹани дьстиньн (Мәтта 24:45-47). Йаһоԝа али мә дькә, ԝәки әм тьштед кӧ ԝе зутьрәке бьԛәԝьмьн, гав бь гав дьһа баш фәʹм бькьн (Мәтʹәлок 4:18). Әм дькарьн баԝәр бьн, кӧ гава тәнгасийа мәзьн дәстпебә, әме һәр тьшти бьзаньбьн, чь кӧ ԝе мәрʹа лазьм бә, ԝәки тәйах кьн, амьн бьминьн у йәктийе хԝәй кьн. Ле әм гәрәке фәʹм бькьн, кӧ әм дәрһәԛа ахьрийе һьнә тьшта ньзаньн. ԝ24.05 8 ¶1-2

Зәбурбеж хәбәра бӧхдан да хәбате, чь кӧ те һʹәсабе дәрәԝи, йа кӧ наве кәсәки рʹәш дькә. Ӧса жи, Зәбур 15:3 те готьне, кӧ меване Йаһоԝа «хьрабийе тʹӧ кәси накә, щинаре хԝә беһӧрмәт накә» (Зәбур 15:1). Гәло әв чь те һʹәсабе? Һәрге әм фәсал нибьн, әм дькарьн бе һʹәмде хԝә наве кәсәки рʹәш кьн. Мәсәлә, бьдә бәр чʹәʹв хԝә кӧ 1) хушкәк хьзмәтийа пешәнгтийе дьһелә, 2) жьн-мерәк ида Бәйтʹәледа хьзмәт накьн, 3) бьрак ида рʹуспи йан жи аликʹарчийе щьвате нинә. Дьбәкә әм мәʹнийа ван дәрәща ньзаньн. Гәло ԝе рʹаст бә, ԝәки һʹәзар фькьр бенә сәре мә, кӧ чьрʹа әв йәк ԛәԝьми у дәстпекьн дәрһәԛа ньһерʹандьна хԝә кәсед дьнрʹа жи бежьн? Һәмьки на. Гәрәке әм бир нәкьн, ԝәки меване коне Йаһоԝа «хьрабийе тʹӧ кәси накә», у «щинаре хԝә беһӧрмәт накә». ԝ24.06 11 ¶11-13

Сәва кӧ әм хофа бәр Йаһоԝа дьле хԝәда дьһа ԛәԝи кьн, әм гәрәке рʹьнд бьфькьрьн, кӧ кʹижан сафикьрьнед мә ԝе дьле Йаһоԝа ша кьн. Гава тӧ сәрһатийед Кʹьтеба Пироз дьхуни, жь хԝә бьпьрсә: «Һәрге әз ве дәрәщеда бума, мьне чь сафи кьра?» Мәсәлә, бьдә бәр чʹәʹве хԝә, гава дәһ сәрокед Исраеле сәрик ви әʹрди хьстьн, кʹижан кӧ Йаһоԝа ԝанрʹа соз дабу у әʹламәтийа хьраб анин, тӧ жи ԝедәре буйи. Гәло тәйе жь тьрса бәр мәрьва баԝәрийа хԝә гьлийед ԝан бьанийа, йан һʹәзкьрьна тә һьндава Йаһоԝа у хԝәстьна тә кӧ дьле Ԝи ша ки, ԝе дьһа ԛәԝи буйа, нә кӧ тьрса тә? Һʹәчʹи зәʹф жь Исраелийа баԝәр нәкьрьн, кӧ гьлийед Йешу у Кʹаләб рʹаст ьн. Ахьрийеда Йаһоԝа изьн нәда ван Исраелийа кӧ бькʹәвьнә Әʹрде Создайи (Жьмар 14:10, 22, 23). ԝ24.07 10 ¶7