Гава әм итʹбарийа хԝә Йаһоԝа тиньн, әм нишан дькьн, кӧ әм ԝи ча Зьнаре хԝә һʹәсаб дькьн. Әм баԝәр ьн, кӧ гава әм чәтьнайада жи гӧһ дьдьнә Ԝи, әв йәк тʹьме бона кʹара мә йә (Ишайа 48:17, 18). Чахе әм дьвиньн, кӧ Йаһоԝа ча али мә дькә, баԝәрийа мә дьһа ԛәԝи дьбә, у әв йәк али мә дькә һьмбәри чәтьнайед мәзьн жи сәбьр кьн. Йаһоԝа мина зьнар ә, ләма жи хәйсәт-һʹӧнӧред ԝи тʹӧ щар найенә гӧһастьне (Малахи 3:6). Мәсәлә, паши мьԛабьлибуна бахче Еденеда, Йаһоԝа ԛьрара хԝә бона инсанәте нәгӧһаст. Паԝлосе шанди ньвиси, кӧ Йаһоԝа «нькарә хԝә инкʹар кә» (2 Тимотʹейо 2:13). Әв те һʹәсабе, ԝәки тʹӧ тьшт у тʹӧ кәс нькарә сәр һʹӧнӧр, нет йан жи принсипед Ԝи һʹӧкӧм кә. Йаһоԝа найе гӧһастьне, ләма жи әм баԝәр ьн, кӧ Әԝе мә хьлаз кә у чәтьнайада али мә бькә (Зәбур 62:6, 7). ԝ24.06 27-28 ¶7-8

Һәрге тӧ бь нета зәԝаще тʹәви кәсәки һәвалтийе дьки, гәло чь дькарә али тә бькә тедәрхи, һәла һун һәв тен йан на? Һәвдӧ рʹьнд нас кьн. Һәмьки, пешийа кӧ ԝә дәстпекьра рʹасти һәв бен, һун ида пешда һьнә тьшт дәрһәԛа һәв пеһʹәсийа бун. Ле ньһа мәщала ԝә һәрда һәйә, кӧ «мәрьве һьндӧрʹе дьлда» рʹьнд нас кьн. Демәк тӧ гәрәке тедәрхи кӧ һәләԛәтийа ԝи мәрьви тʹәви Йаһоԝа чьԛас незик ә у ӧса жи фькьр у ньһерʹандьнед ԝи пебьһʹәси. Ԝәʹдә шунда, тӧ гәрәке ида щабед ван пьрса бьзаньби: ‹Гәло әԝе бона мьн бьбә һәвалзәԝащәки баш?› (Мәтʹәлок 31:26, 27, 30; Әфәси 5:33; 1 Тимотʹейо 5:8). ‹Гәло әме һәвдӧ рʹьнд фәʹм бькьн? Гәло әм һазьр ьн кемасийед һәв бьбахшиньн?› (Рʹомайи 3:23). Ԝәʹде һәвдӧнаскьрьне, бир нәкьн, ԝәки йа лапә фәрз әв нинә кӧ һун чьԛас мина һәв ьн, ле әв ә, кӧ һун һазьр ьн щӧдәбуна ортʹа һәвда ԛәбул кьн, йан на. ԝ24.05 27 ¶5

Чаԝа мә дит, Даԝьд Пʹадша щарәке шашикә мәзьн кьр. Ле гава Натʹан пʹехәмбәр һат у гӧне ԝи да рʹуйе ԝи, Даԝьд бь мьлукти тʹобә кьр. (Зәбур 51:3, 4, 17, пешготьн). Һьзԛийа Пʹадша жи һьмбәри Йаһоԝа гӧнә кьр (2 Дирок 32:25). Ле мина Даԝьд Пʹадша, Һьзԛийа Пʹадша жи бь мьлукти тʹобә кьр (2 Дирок 32:26). Ахьрийеда Йаһоԝа әԝ ча пʹадшаки амьн у баш һʹәсаб кьр, чьмки әԝи бәрдәԝам дькьр тьштед рʹаст бькә (2 Пʹадшати 18:3). Әм чь һин дьбьн? Әм гәрәке гӧнед хԝә тʹобә кьн у хирәт бькьн, ԝәки диса ԝан шашийа нәкьн. Һәрге рʹуспийед щьвате һәла һе бона тьштәки бьчʹук жи ширәте бьдьнә мә, әм гәрәке чь бькьн? Гәрәке әм нәфькьрьн, кӧ Йаһоԝа мә һʹәз накә, йан жи рʹуспи мьԛабьли мә нә. Чаԝа мә дит, пʹадшед баш йед Исраеле жи щарна ширәт дьстандьн (Ибрани 12:6). Гава әм ширәте дьстиньн, ԝәрә әм 1) бь мьлукти ԛәбул кьн, 2) сәр хԝә бьхәбьтьн кӧ гӧһастьна бькьн у 3) бәрдәԝам кьн бь тʹәмамийа дьле хԝә Йаһоԝарʹа хьзмәт кьн. Һәрге әм гӧнед хԝә тʹобә кьн, Йаһоԝа ԝе бьбахшинә мә (2 Корьнтʹи 7:9, 11). ԝ24.07 21 ¶8; 22 ¶9, 11