6. ಪ್ರವಾದಿಯು ಭಾವೀ ವಿಜೇತನೊಬ್ಬನನ್ನು ಹೇಗೆ ವರ್ಣಿಸುತ್ತಾನೆ?

⁶ ಯೆಶಾಯನ ಮೂಲಕ ಯೆಹೋವನು, ಬಾಬೆಲಿನಿಂದ ದೇವಜನರನ್ನು ರಕ್ಷಿಸುವ ಮತ್ತು ಅದೇ ಸಮಯದಲ್ಲಿ ಅವರ ವೈರಿಗಳಿಗೆ ನ್ಯಾಯತೀರ್ಪನ್ನು ವಿಧಿಸುವ ಒಬ್ಬ ವಿಜೇತ ಅರಸನ ಕುರಿತು ಮುಂತಿಳಿಸುತ್ತಾನೆ. ಯೆಹೋವನು ಕೇಳುವುದು: “ಮೂಡಲಲ್ಲಿ ಒಬ್ಬನನ್ನು ಎಬ್ಬಿಸಿ ನ್ಯಾಯದ [“ನೀತಿಯ,” NW] ಸಂಕಲ್ಪಾನುಸಾರವಾಗಿ ತನ್ನ ಪಾದಸನ್ನಿಧಿಗೆ ಕರೆದು ಜನಾಂಗಗಳನ್ನು ಅವನ ವಶಕ್ಕೆ ಕೊಟ್ಟು ಅವನನ್ನು ರಾಜರ ಮೇಲೆ ಆಳಗೊಡಿಸಿ ಅವರ ಕತ್ತಿಯನ್ನು ದೂಳನ್ನಾಗಿಯೂ ಬಿಲ್ಲನ್ನು ಗಾಳಿ ಬಡಿದುಕೊಂಡು ಹೋಗುವ ಒಣಹುಲ್ಲನ್ನಾಗಿಯೂ ಮಾಡಿ ಅವನು ಅವರನ್ನು ಹಿಂದಟ್ಟುತ್ತಾ ತಾನು ಎಂದೂ ಹೆಜ್ಜೆಯಿಡದ ಮಾರ್ಗದಲ್ಲಿ ಸುರಕ್ಷಿತವಾಗಿ [“ನೆಮ್ಮದಿಯಿಂದ,” NW] ಮುಂದೆ ಹಾದು ಹೋಗುವಂತೆ ಗೈದವನು ಯಾರು? ಇದನ್ನೆಲ್ಲಾ ನಡೆಯಿಸಿ ನೆರವೇರಿಸಿದವನು ಯಾರು? ಆದಿಯಿಂದ ಈಗಿನ ವರೆಗೂ ತಲತಲಾಂತರಗಳನ್ನು ಬರಮಾಡುವವನಾದ ಯೆಹೋವನೆಂಬ ನಾನೇ; ಹೌದು, ಆದಿಪುರುಷನೂ ಅಂತ್ಯಕಾಲದವರ ಸಂಗಡಿಗನೂ ಆಗಿರುವ ನಾನೊಬ್ಬನೇ.”​—⁠ಯೆಶಾಯ 41:​2-4.

8. ಯೆಹೋವನೊಬ್ಬನೇ ಏನನ್ನು ಮಾಡಬಲ್ಲನು?

⁸ ಹೀಗೆ, ಕೋರೆಷನು ಹುಟ್ಟುವುದಕ್ಕೆ ಮೊದಲೇ ಯೆಹೋವನು ಯೆಶಾಯನ ಮುಖಾಂತರ ಆ ರಾಜನ ಆಳ್ವಿಕೆಯನ್ನು ಮುಂತಿಳಿಸುತ್ತಾನೆ. ಇಂತಹ ಸಂಗತಿಯನ್ನು ಸತ್ಯ ದೇವರೊಬ್ಬನೇ ನಿಷ್ಕೃಷ್ಟವಾಗಿ ಪ್ರವಾದಿಸಬಲ್ಲನು. ಅನ್ಯಜನಾಂಗಗಳ ಸುಳ್ಳು ದೇವತೆಗಳಲ್ಲಿ ಯೆಹೋವನಿಗೆ ಸಮಾನರಾದವರು ಯಾರೂ ಇಲ್ಲ. ಸಕಾರಣದಿಂದಲೇ ಯೆಹೋವನು, “ನನ್ನ ಮಹಿಮೆಯನ್ನು ಮತ್ತೊಬ್ಬನಿಗೆ ಸಲ್ಲಗೊಡಿಸೆನು” ಎಂದು ಹೇಳುತ್ತಾನೆ. “ನಾನೇ ಆದಿ, ಅಂತವೂ ನಾನೇ; ನಾನು ಹೊರತು ಯಾವ ದೇವರೂ ಇಲ್ಲ,” ಎಂದು ಹಕ್ಕಿನಿಂದ ಹೇಳಬಲ್ಲವನು ಯೆಹೋವನೊಬ್ಬನೇ.​—⁠ಯೆಶಾಯ 42:8; 44:​6, 7.