1, 2. (ಎ) ಕ್ರಿ.ಶ. 29 ರಲ್ಲಿ ಯೇಸು ಯೂದಾಯದ ಬರಡು ಪ್ರದೇಶಕ್ಕೆ ಹೇಗೆ ಬಂದನು? (ಬಿ) ಅಲ್ಲಿ ಏನಾಯ್ತು? (ಆರಂಭದ ಚಿತ್ರ ನೋಡಿ.)

ಕ್ರಿಸ್ತ ಶಕ 29 ರ ಶರತ್ಕಾಲ (ಅಕ್ಟೋಬರ್‌-ನವೆಂಬರ್‌). ಈಗಾಗ್ಲೇ ಯೇಸುವಿನ ದೀಕ್ಷಾಸ್ನಾನ ಮತ್ತು ಅಭಿಷೇಕ ಆಗಿತ್ತು. ಪವಿತ್ರ ಶಕ್ತಿಯ ಪ್ರೇರಣೆಯಿಂದ ಆತನು ಯೂದಾಯದ ಬರಡು ಪ್ರದೇಶಕ್ಕೆ ಹೋಗಿದ್ದನು. ಅದು ಮೃತ ಸಮುದ್ರದ ಉತ್ತರ ದಿಕ್ಕಿನಲ್ಲಿ ಇತ್ತು. ವಿಸ್ತಾರವಾದ ಈ ಬಂಜರು ಭೂಮಿ ಬಂಡೆ ಮತ್ತು ಕಣಿವೆಗಳಿಂದ ಕೂಡಿತ್ತು. ಇಲ್ಲಿ ಯೇಸು ನಲ್ವತ್ತು ದಿನಗಳನ್ನ ಕಳೆದನು. ಈ ನಿಶ್ಶಬ್ದ ವಾತಾವರಣದಲ್ಲಿ ಯೇಸು ಉಪವಾಸ, ಪ್ರಾರ್ಥನೆ ಮಾಡ್ತಾ ಧ್ಯಾನಿಸುತ್ತಿದ್ದನು. ಬಹುಶಃ ಈ ಸಮಯದಲ್ಲಿ ಯೆಹೋವನು ಯೇಸು ಜೊತೆ ಮಾತಾಡುತ್ತಿದ್ದನು. ಹೀಗೆ ಮುಂದೆ ಆತನು ನಿರ್ವಹಿಸಬೇಕಾಗಿರೋ ಜವಾಬ್ದಾರಿಗಾಗಿ ಯೆಹೋವನು ಆತನನ್ನ ಸಿದ್ಧಮಾಡಿದನು.

3, 4. (ಎ) ಸೈತಾನ ಮೊದಲ ಎರಡು ಪರೀಕ್ಷೆಯ ಆರಂಭದಲ್ಲಿ ಏನು ಹೇಳ್ದ? (ಬಿ) ಹೀಗೆ ಹೇಳೋ ಮೂಲಕ ಅವನು ಯೇಸುವಿನ ಮನಸ್ಸಿನಲ್ಲಿ ಯಾವ ಸಂಶಯದ ಬೀಜವನ್ನು ಬಿತ್ತೋಕೆ ಪ್ರಯತ್ನಿಸಿದ? (ಸಿ) ಈ ರೀತಿಯ ಕುತಂತ್ರಗಳನ್ನ ಸೈತಾನ ಇವತ್ತೂ ಬಳಸುತ್ತಿದ್ದಾನಾ?

³ ಮತ್ತಾಯ 4:1-7 ಓದಿ. ಸೈತಾನನು ಮೊದಲ ಎರಡು ಪರೀಕ್ಷೆಗಳನ್ನು ತಂದಾಗ ಕುತಂತ್ರದಿಂದ ಆರಂಭದಲ್ಲಿ “ನೀನು ದೇವರ ಮಗನಾಗಿದ್ರೆ” ಅಂತ ಹೇಳಿದನು. ಅಂದ್ರೆ ಯೇಸು ನಿಜವಾಗಿಯೂ ದೇವರ ಮಗನಾ ಅನ್ನೋ ಸಂಶಯ ಸೈತಾನನಿಗಿತ್ತಾ? ಇಲ್ಲ. ದೇವರ ವಿರುದ್ಧ ದಂಗೆ ಎದ್ದ ಈ ದೇವದೂತನಿಗೆ ಯೇಸು ಕ್ರಿಸ್ತನು ದೇವರ ಮೊದಲನೇ ಮಗ ಅಂತ ಚೆನ್ನಾಗಿ ಗೊತ್ತಿತ್ತು. (ಕೊಲೊ. 1:15) ಅಷ್ಟೇ ಅಲ್ಲ, ಯೇಸುವಿನ ದೀಕ್ಷಾಸ್ನಾನದ ಸಮಯದಲ್ಲಿ ಸ್ವರ್ಗದಿಂದ ಯೆಹೋವ ದೇವರು ಹೇಳಿದ ಈ ಮಾತುಗಳ ಬಗ್ಗೆನೂ ಅವನಿಗೆ ಗೊತ್ತಿತ್ತು: “ಇವನು ನನ್ನ ಪ್ರೀತಿಯ ಮಗ. ಇವನು ಮಾಡೋದೆಲ್ಲ ನನಗೆ ತುಂಬ ಖುಷಿ ತರುತ್ತೆ.” (ಮತ್ತಾ. 3:17) ‘ತಂದೆ ಮೇಲೆ ಭರವಸೆ ಇಡಬಹುದಾ ಮತ್ತು ಆತನು ನಿಜವಾಗಿಯೂ ನನ್ನ ಕಾಳಜಿವಹಿಸ್ತಾನಾ’ ಅನ್ನೋ ಸಂಶಯವನ್ನ ಯೇಸುವಿನ ಮನಸ್ಸಲ್ಲಿ ತರೋದೇ ಸೈತಾನನ ಉದ್ದೇಶ ಆಗಿರಬೇಕು. ಉದಾಹರಣೆಗೆ, ಮೊದಲನೇ ಪರೀಕ್ಷೆಯಲ್ಲಿ ಸೈತಾನನು ಕಲ್ಲುಗಳನ್ನ ರೊಟ್ಟಿಗಳನ್ನಾಗಿ ಮಾಡೋಕೆ ಹೇಳಿದಾಗ ಒಂದರ್ಥದಲ್ಲಿ ಈ ರೀತಿ ಹೇಳಿದನು: ‘ನೀನು ದೇವರ ಮಗನಲ್ವಾ? ಹಾಗಿದ್ರೆ ಈ ಬರಡು ಭೂಮಿಯಲ್ಲಿ ದೇವರು ನಿನಗೆ ಯಾಕೆ ಊಟ ಕೊಟ್ಟಿಲ್ಲ?’ ಎರಡನೇ ಪರೀಕ್ಷೆಯಲ್ಲಿ ದೇವಾಲಯದ ಗೋಡೆಯಿಂದ ಹಾರೋಕೆ ಹೇಳಿದಾಗ ಸೈತಾನ ಒಂದರ್ಥದಲ್ಲಿ ಈ ರೀತಿ ಹೇಳಿದನು: ‘ನೀನು ದೇವರ ಮಗನಲ್ವಾ? ನಿನ್ನ ತಂದೆ ನಿಜವಾಗ್ಲೂ ನಿನ್ನನ್ನ ಕಾಪಾಡ್ತಾನೆ ಅನ್ನೋ ಭರವಸೆ ಇದ್ಯಾ?’