ಯೋಹಾನ 1:1—“ಆದಿಯಲ್ಲಿ ವಾಕ್ಯವಿತ್ತು”

“ವಾಕ್ಯ ಅನ್ನೋನು ಮೊದಲಿಂದಾನೂ ಇದ್ದನು. ಆ ವಾಕ್ಯ ದೇವರ ಜೊತೆ ಇದ್ದನು. ದೇವರ ತರ ಇದ್ದನು [ದೇವರಾಗಿದ್ದನು, ಪಾದಟಿಪ್ಪಣಿ].”—ಯೋಹಾನ 1:1, ಹೊಸ ಲೋಕ ಭಾಷಾಂತರ.

“ಆದಿಯಲ್ಲಿ ವಾಕ್ಯವಿತ್ತು; ಆ ವಾಕ್ಯವು ದೇವರ ಬಳಿಯಲ್ಲಿತ್ತು; ಆ ವಾಕ್ಯವು ದೇವರಾಗಿತ್ತು.”—ಯೋಹಾನ 1:1, ಸತ್ಯವೇದವು.

ಒಬ್ಬ ಮನುಷ್ಯನಾಗಿ ಭೂಮಿಗೆ ಬರುವುದಕ್ಕೆ ಮುಂಚೆ ಯೇಸು ಕ್ರಿಸ್ತನ ಜೀವನ ಹೇಗಿತ್ತು ಅಂತ ಈ ವಚನ ವಿವರಿಸುತ್ತದೆ. (ಯೋಹಾನ 1:14-17) 14 ನೇ ವಚನದಲ್ಲಿ “ವಾಕ್ಯ” (ಅಥವಾ “ಲೊಗೋಸ್‌,” ಗ್ರೀಕ್‌ನಲ್ಲಿ ಹೊ ಲೊಗೋಸ್‌) ಅನ್ನುವುದನ್ನು ಬಿರುದಾಗಿ ಬಳಸಲಾಗಿದೆ. “ವಾಕ್ಯ” ಅನ್ನುವ ಬಿರುದು ಯೇಸುವಿನ ಪಾತ್ರವನ್ನು ವರ್ಣಿಸುತ್ತದೆ ಅಂದರೆ ದೇವರ ಆಜ್ಞೆ ನಿರ್ದೇಶನಗಳನ್ನು ಬೇರೆಯವರಿಗೆ ತಿಳಿಸುತ್ತಾನೆಂದು ತೋರಿಸುತ್ತದೆ. ಯೇಸು ಭೂಮಿಯಲ್ಲಿ ದೇವರ ಸೇವೆ ಮಾಡುತ್ತಿದ್ದಾಗಲೂ ಪುನಃ ಸ್ವರ್ಗಕ್ಕೆ ಹೋದ ಮೇಲೂ ದೇವರ ಸಂದೇಶವನ್ನು ಬೇರೆಯವರಿಗೆ ತಿಳಿಸುತ್ತಾ ಇದ್ದನು.—ಯೋಹಾನ 7:16; ಪ್ರಕಟನೆ 1:1.

‘ಮೊದಲಿಂದ’ ಅಥವಾ “ಆದಿಯಲ್ಲಿ” ಅನ್ನುವ ಪದ ದೇವರು ಸೃಷ್ಟಿಯನ್ನು ಶುರುಮಾಡಿದ ಮತ್ತು ವಾಕ್ಯವನ್ನು ಸೃಷ್ಟಿಮಾಡಿದ ಸಮಯಕ್ಕೆ ಸೂಚಿಸುತ್ತದೆ. ಆಮೇಲೆ ದೇವರು ಆ ವಾಕ್ಯದ ಜೊತೆಯಲ್ಲಿ ಕೆಲಸ ಮಾಡುತ್ತಾ ಬೇರೆಲ್ಲವನ್ನು ಸೃಷ್ಟಿ ಮಾಡಿದನು. (ಯೋಹಾನ 1:2, 3) ಯೇಸು “ಎಲ್ಲ ಸೃಷ್ಟಿಗಳಿಗಿಂತ ಮೊಟ್ಟಮೊದ್ಲು ಸೃಷ್ಟಿಯಾದವನು” ಮತ್ತು “ಎಲ್ಲ ಆತನಿಂದಾನೇ ಸೃಷ್ಟಿ ಆಯ್ತು” ಅಂತ ಬೈಬಲ್‌ ಹೇಳುತ್ತದೆ.—ಕೊಲೊಸ್ಸೆ 1:15, 16.

‘ಆ ವಾಕ್ಯ ದೇವರಾಗಿದ್ದನು’ ಅನ್ನುವುದು ದೇವರಲ್ಲಿ ಇರುವ ಗುಣಗಳು ಭೂಮಿಗೆ ಬರುವುದಕ್ಕೆ ಮುಂಚೆ ಯೇಸುವಿನಲ್ಲೂ ಇದ್ದವು ಎಂದು ತೋರಿಸುತ್ತದೆ. ಯೇಸು ದೇವರಾಗಿದ್ದನು ಎಂದು ಹೇಳುವುದರಲ್ಲಿ ತಪ್ಪಿಲ್ಲ. ಯಾಕೆಂದರೆ ದೇವರ ಪರವಾಗಿ ಮಾತಾಡುವುದು ಯೇಸುವೇ. ಅಲ್ಲದೆ, ದೇವರ ಜ್ಯೇಷ್ಠ ಮಗನಾಗಿ ಆತನಿಗೊಂದು ವಿಶೇಷ ಸ್ಥಾನ ಇದೆ. ಯೇಸುವಿನ ಮೂಲಕವೇ ದೇವರು ಎಲ್ಲವನ್ನು ಸೃಷ್ಟಿ ಮಾಡಿದನು.

ಯೋಹಾನ ಪುಸ್ತಕ ಭೂಮಿಯ ಮೇಲೆ ಯೇಸುವಿನ ಜೀವನ, ಸೇವೆ ಹೇಗಿತ್ತು ಎಂಬ ವಿವರ ಕೊಡುತ್ತದೆ. ಮೊದಲನೇ ಅಧ್ಯಾಯದ ಮೊದಲ ಕೆಲವು ವಚನಗಳು ಯೇಸು ಭೂಮಿಗೆ ಬರುವುದಕ್ಕೆ ಮುಂಚೆಯೇ ಸ್ವರ್ಗದಲ್ಲಿ ಇದ್ದನು, ಆತನಿಗೆ ದೇವರ ಜೊತೆ ವಿಶೇಷವಾದ ಸಂಬಂಧ ಇತ್ತು, ದೇವರು ಮನುಷ್ಯರೊಟ್ಟಿಗೆ ವ್ಯವಹರಿಸುವಾಗ ಯೇಸು ಪ್ರಾಮುಖ್ಯ ಪಾತ್ರ ವಹಿಸಿದನು ಎಂದು ತಿಳಿಸುತ್ತದೆ. (ಯೋಹಾನ 1:1-18) ಈ ವಿವರಗಳು ಯೇಸು ಸೇವೆಯಲ್ಲಿ ಏನು ಹೇಳಿದನೋ ಏನು ಮಾಡಿದನೋ ಅದನ್ನೆಲ್ಲ ಅರ್ಥಮಾಡಿಕೊಳ್ಳಲು ನಮಗೆ ಸಹಾಯ ಮಾಡುತ್ತದೆ.—ಯೋಹಾನ 3:16; 6:38; 12:49, 50; 14:28; 17:5.

ಅನೇಕ ದೇವರುಗಳನ್ನು ಆರಾಧಿಸಬೇಕೆಂದು ಬೈಬಲ್‌ ಹೇಳುವುದಿಲ್ಲ. “ನಿನ್ನ ದೇವರಾಗಿರೋ ಯೆಹೋವನನ್ನೇ ಆರಾಧಿಸಬೇಕು ಮತ್ತು ಆತನೊಬ್ಬನಿಗೇ ನೀನು ಪವಿತ್ರ ಸೇವೆ ಮಾಡಬೇಕು” ಎಂದು ಯೇಸು ಕ್ರಿಸ್ತ ಹೇಳಿದನು. (ಮತ್ತಾಯ 4:10) “ಸ್ವರ್ಗ ಮತ್ತು ಭೂಮಿಯಲ್ಲಿ ಎಷ್ಟೋ ದೇವರುಗಳು ಇದ್ದಾರೆ ಅಂತ ಜನ ಹೇಳ್ತಾರೆ. ಹಾಗಾದ್ರೆ ಜನ್ರಿಗೆ ತುಂಬ ದೇವರು, ಪ್ರಭುಗಳು ಇದ್ದಾರೆ. ಆದ್ರೆ ನಮಗೆ ಒಬ್ಬನೇ ದೇವರು. ಆತನು ನಮ್ಮ ತಂದೆ. ಆತನು ಎಲ್ಲವನ್ನ ಸೃಷ್ಟಿ ಮಾಡಿದನು. ನಾವು ಆತನಿಗಾಗಿ ಇದ್ದೀವಿ. ನಮಗೆ ಒಬ್ಬನೇ ಪ್ರಭು, ಆತನು ಯೇಸು ಕ್ರಿಸ್ತ. ಆತನ ಮೂಲಕ ಎಲ್ಲ ಸೃಷ್ಟಿ ಆಯ್ತು, ಆತನ ಮೂಲಕ ನಾವೂ ಸೃಷ್ಟಿ ಆದ್ವಿ” ಅನ್ನುತ್ತದೆ ಬೈಬಲ್‌.—1 ಕೊರಿಂಥ 8:5, 6.

“ಆದಿಯಲ್ಲಿ ವಾಕ್ಯವಿತ್ತು. ಆ ವಾಕ್ಯವು ದೇವರ ಬಳಿಯಲ್ಲಿತ್ತು. ಆ ವಾಕ್ಯವು ದೇವರಾಗಿತ್ತು.”—ಪವಿತ್ರ ಬೈಬಲ್‌.

“ಜಗತ್ತು ಸೃಷ್ಟಿಯಾಗುವುದಕ್ಕಿಂತ ಮೊದಲೇ ವಾಕ್ಯ ಎಂಬಾತನಿದ್ದನು. ಆ ವಾಕ್ಯ ಎಂಬಾತನು ದೇವರೊಂದಿಗೆ ಇದ್ದನು. ಆ ವಾಕ್ಯ ಎಂಬಾತನೇ ಸ್ವತಃ ದೇವರಾಗಿದ್ದನು.—ಪರಿಶುದ್ಧ ಬೈಬಲ್‌.