Teng bu Yehow, tudy mwa kwaakish bakwaabw biit bikaakaamobw bwaal tudy biibakat. Cileejel, udy mumanyikok mwiin-kweet mwaan-mulum eecy mwaan-mukaj ukaakaam byaakudy eecy bizang eeny? Yehow udy mwa kukal neeb mudimw bwa kumwambulwiish. Ibamanyik baat ba Yehow bikasakan bwa mudyaakalobw baakishangan biit hady cihuh cilongek. Cileejel, mu cihuh cya KOVID-19, biin-kweet baan-balum ni baan-bakaj batwaadil byaakudy, bizang, ni biit bikwaabw bwa kwambulwiish baakady naaby diikeng. Baat bakwaabw bavul batwaadil bya bukish bwa kut mudimw iitut a ha bulab butuutul nyam ku mikon. Biineeby byambulwiishil bwiitut kwambulwiish biin-kweet ba ha bulab butuutul baakady mu diikeng bwa cihuh eecy. Bakookooyel ni mucim aakaabumw ku may mady mu Biin Ebreh 13:16 uleeleeb ney: “Kanulong nwaavulaminok bwa kulong myand yilengel ni kukwanjanganok, bwaal i milambw ya bwiin nook yileelengeleel Mawej.” w24.09 diib. 27 cik. 6-7

Langil ket ha bwaal oobw. Wendend ni kukaam mudimw bwa kwambulwiish biin mu cisak ciibuh. Kudy midimw yibidy, hawukonkontonon myand yoos bwa kumanyik mudy mudimw, program ni diib diwiikal ulong bwa kufik ku mudimw ni myand yikwaabw, usangan ney midimw yoos yibidy eey kayiishoh bend yibiih bilondeshel Bibl. Misang yikwaabw, udy mwa kwiitab mudimw umw bwaal udy mukat mushind udy mudimw aaw, eecy bwaal mudimw aaw udy ni fwalang yivul. Ki kudy myand yikwaabw yitudy mwa kulangil kuuhal kwa kwangat diihangadik. Cileejel, mudimw aaw udy mwa kukukaakeeshok diib diibuh kutweel mu bisangil bya cisumbw eeny? Wiiyiiy kukukaakeeshok bwiibuh kwambulwiish biin mu cisak ciibuh ni biit bikaakaamobw bya ku nyeet ni bya mu spirit eeny? Kwiiyiihanguj kwa majooj ma nook kwiiyiiy kukwambulwiish bwiibuh kuteek “myand yidy yilengel,” ha cyaab cyaakuuhal kuhitok biit bya ku nyeet bumudy, kuhambidil kwiibuh ni bikaakaam biin mu cisak ciibuh. Nook, udy mwa kwangat diihangadik diikal Yehow mwa kubenesh. w25.01 diib. 17 cik. 11-13

Ning bakwaabw bakulongel myand mu mushind mubiih, iikal mutwiishiibw ney Yehow i mukukat ni ukwangangat ni buseeb. Uw mwiiyumvw muman “kukooyel ku micim,” vuluk ney, Yehow waakady muman kutal myand kaahand mu micim yiibuh, ni waakady mukukok kudyey yiy kaayend. (Jah 6:44) Udy teng habwiih bwa kukwambulwiish bwaal udy ni buseeb ku mees kwindiy. Tudy mwa kumanyik mushind udyaakal Yehow ulang ha kukontonon cileejel cya Yeez. Haakady Yeez ha bulab, waakady ulongel baat baakadyobw kabay bangat ni buseeb myand ni lus. (Mat. 9:9-12) Haakady mwaan-mukaj mutwiishiibw ney waakady mwa kukasakan ku lubeel lukasakan lwaakadyey naalw yiy mwiikal muteng cizang cindiy, Yeez umukashishil ni waamufwiijok bwa diitabij dindiy. (Mark 5:25-34) Yeez uleeleej buumuut bwa Taat indiy biin-biin. (Jah 14:9) Nook, iikal mutwiishiibw ney, Yehow ukwangangat ni buseeb ni iimutal biikadil bilengel, diitabij diibuh, ni lukat luwudy naalw bwindiy. w24.10 diib. 7 cik. 4-5