Long Diiy dya Mawej ni langiloh. Teng mudy mutond mwa kwiikal mukasakan hady mij yindiy yishimat mu bulab bikasakan, tudy mwa kushimacish diitabij diitut bikasakaan mu Diiy dya Mawej. Hady mutond wend ni kukasakan, mij yikaakasakan byaay bikasakan ni yivuuvulangan. Hatubaabal ni tulangil ha bitubaabal, tukaakashish diitabij diitut ni tukashish cikwaabw menmen kwiitabij kwa ney njil ya Mawej i yilengel menmen. (Kol. 2:6, 7) Langil ha mushind waakady may ma kulond ma Yehow ni mibel bilam ni byambulwiish biin mudimw bindiy ba hakal. Cileejel, Ezekiyeel ukunyin mat kudy mwanjel waakady umumvwiij mwaakady mwa kwiikal tempel wa mu ciifwaany. Bwaal butal bu mu cilot oobw bukashishil Ezekiyeel, ni bwiitwambambulwiish ni malongweesh ma mushind utudy mwa kut kuhambidil kwa Yehow kujilang nyam ku mikon. (Ezek. 40:1-4; 43:10-12) Tuheehet byeet musangal hatubaabal ni tulangil ha myand yikasakan ya mu Diiy dya Mawej. Tudy mwa kuhet micim yikasakan teng tut beeyeleel Yehow ni mucim iitut woos.​—Mis. 112:7. w23.07 diib. 18 cik. 15-16

Mu Bibl mudy bileejel bya baat bavul balengel bady baasand baan-balum mwa kwiidikij. Baan-balum ba kal aab baakady bakat Yehow ni baakady bakal midimw yishiil-shiilangan hakutabaleel baat bindiy. Udy mwa kuhet cikwaabw bileejel bilengel mu baan-balum biin Krist bashimat mu diitabij bady mu cisak ciinun ni mu cisumbw. (Ebr. 13:7) Ni udy ni cileejel ciwaakan cya Yeez Krist. (1 Py. 2:21) Hawuloolong bilengel bileejel eeby, langil ha biikadil biwanyanyish bidy naaby baan-balum aab. (Ebr. 12:1, 2) Kuunyim angat diihangadik bwa muwudy mwa kwiidikij baan-balum aab. Muut ulaalang meej wanjanj ukontonon myand bilengel kuuhal kwa kulongey bwaal. Nook, iikashishomw bwa bwiibuh kwiikal ulang meej bilengel ni tungunuk ni kulong teng naak. Cyaakuuhal, long may matam ma mu Bibl bwa kumanyik mudy Yehow ulang ni utal myand, ni langil cikwaabw ha kabingil kaleeleej ney i bilengel bwa kulong cidyey uleeb. Kuunyim, kal mudimw ni may matam aam bwa akwambulwiish bwiibuh kwangat mahangadik miikal mwa kumusangeej. (Mis. 119:9) I bubw bwaal budy mwa kukwambulwiish bwiibuh kushaal mwiin Krist mushimat mu diitabij.​—Tus. 2:11, 12; Ebr. 5:14. w23.12 diib. 24-25 cik. 4-5

Balel bady mwa kulongweesh bilengel baan baababw mushind udyobw mwa kwaalabulobw ni diiy dilengel ciisang cidyobw baleeb bibiih bwa myand yidyobw biitabij. (Jak 3:13) Balel bakwaabw badyaakal baleej baan baababw mushind a kulong nook mu kuhambidil kwa mu cisak. Bakookontonon biin bwaal bidyobw mwa kujuul mu kalaas ni biisambiloh, ni baleej baan baababw mushind a kutwaal dyaalabul ni balongweesh biibalongweesh mushind mulengel a kwiisamb. Kwiisambil ha biin-bwaal bidy baa bijoojooj kudy mwa kwambulwiish biin Krist bwa kwanj kwiikalobw batwiishiibw bab kaayaabw ni bwa kwiikalobw bakumban bwa kumvwiij baat bakwaabw malongweesh madyobw biitabij. Mu biin-bwaal bilondangan bya ha cyaab cya neey “Majooj mady baasand biyihanguj” mu jw.org mudy fiish ya kulong naay yidyobw balongolweel baasand. Fiish eey i biiyilong bwa kwambulwiish baasand bwa kwiikalobw batwiishiibw bwa malongweesh madyobw biitabij ni bwa kwiikalobw balongolol maalabul mu may maababw kaayaabw. Hatuloolong biin-bwaal eeby mu cisak, tut boos tudy mwa kumanyik mutudy mwa kuleebel diitabij diitut mu mushind mulengel. w23.09 diib. 17 cik. 10; diib. 18 cik. 15-16