Tudyok ni kabingil kalengel bwiitut kwiikal bajaadik ney hady Yehow ulumbulwiish baat udyaakal wangat teng mahangadik malengel eeny? Ing! Teng mwaakady Abraham mumvw bilengel, Yehow i muwaakan, udy ni meej mahit, cikwaabw i “Zuj a ha bulab butuutul” udy ni lus. I mulongweesh mwaan indiy ni mumwaakish mudimw woos wa kulumbulwiish. (Jah 5:22) Yehow ni Yeez i bamanyik myand yoos yidy mu micim mwa muut woos. (Mat. 9:4) Mu mishind yoos biiyiiy kulong teng “cidy ciwaakan”! Twiikalaay biiswiik bwa kuteekel Yehow micim ni mahangadik mindiy moos. Tudy bamanyik ney tut katwiishoh bend bakumban bwa kulumbulwiish, ki yiy i mukumban! (Ye. 55:8, 9) Ki bwabiny tudy bateekel Yehow ni mwaan indiy micim bwa kulongobw midimw yoos ya kulumbulwiish. Cikwaabw tudy bamanyik ney Mukaleng iitut Yeez wiiyiiy kwiidikij buwaakan ni lus lwa Taat indiy tok-tok.​—Ye. 11:3, 4. w24.05 diib. 7 cik. 18-19

Kusambakeen kwa kuuhal kwa Yeez ni Natanayel kwiituloolongweesh buseeb budy naabw kwiikal ni mucim mutook. Haakady Filipw mwiiy ni Natanayel kudy Yeez, bwaal kaahand bukeekemesh bulongekel. Ning mwaakady Yeez kay mwanj kutaloh Natanayel, uleebel ney: “Talaay mwiin Izaleel a biin-biin ukiish ni makos mund mwindiy.” (Jah 1:47) Yeez utadil ney Natanayel waakady mwiin myand yijaalal a habwaah. Teng bu batut, Natanayel kaakadyoh bend muwaakan. Ki kaakadyoh bend mwiin myand ya muush-muush, ni waakady mwiin bujaalal mu myand yoos. Yeez ukemen bwa bwaal aabw ni kufwaakijey Natanayel. Myand yiituloolombobw bwa kulong bwiitut kusangeej Yehow mu Misambw 15, yitaatal mushind utuloolongel baat bakwaabw myand. Misambw 15:3 uleeleeb ney mweeny mu mutand a Yehow ‘ kiish udingilanganomw myand ni ludimy lwindiy, kiish ulongel mwaanaabw bibiih, kiish unyangil mwiikaj nend luumw.’ Tut tudingilomw bakwaabw myand, bidy mwa kwiibatah ku micim bikasakan.​—Jak 1:26. w24.06 diib. 10 cik. 7, 9; diib. 11 cik. 10

Uw mwiilongolol bilengel bwa mudimw a bukajaady, wiiyiiy kwiiyumvw mwiilekelel bwa kwiisamb ni bakwaabw. Yeez wambulwiishil biiyij bindiy bwa kwiilongololobw bilengel kuuhal kwa kwiibatumey mu mudimw a bukajaady. (Luuk 10:1-11) Bu mwaakadyobw bakooyel ku byaakady Yeez mwiibalongweesh, biiyij bumvwiil musangal iimwiin weeh bwa myand yaakadyobw mwa kuman bwa kulong. I mushind kaay utudy mwa kwiilongolol bwa mudimw a bukajaady? Bikaam tulangil ha bitukaakaam kuleeb ni twiibileeb mu mushind utudyaakal twiisamb koosook ni mu may miitut. Bidy cikwaabw ni buseeb bwa kulangiloh kuuhal kwa diib ha mishind yibidy eecy yisat yidyaakal biin mu Teritwaar iitut biitwaalabul ni mushind utudy mwa kwiibaalabul. Nook, hatwiisaasamb ni baat tudy mwa kuteet bwa kwiikal biilekelel, tumweemweetok, ni twiibangat bu balund neet. w24.04 diib. 16 cik. 6-7