Baat boos badyaakal teng bumvw mooy. Haakady Mukaleng Sawul muteet bwa kulondakany Davih, uyiil lubil ku Kat cibunj cya Baafilisiteh. Akish mukaleng a cibunj cya Kat umanyikil musang umw ney Davih waakady cilobw cizuhil baafilisiteh “binun diikumy.” Davih ‘umvwiil mooy i mwiin.’ (1 Sam. 21:10-12, NWT) Umvwiil mooy bwa cyaakady Akish mwa kwiiy kumulongel. I biny byaakady byambulwiish Davih bwa kuhetey mucim mukasakan? Mu Musambw 56, Davih uleeleej mwaakadyey mwiiyumvw haakadyey muy ku Kat. Mu Musambw oow, Davih uleeleeb hatook bwaabiny umvwiil mooy ni uleeleej cikwaabw cyaakady cimukwanjok bwa kuman mooy. Haakady Davih mumvw mooy, uteekel Yehow micim. (Mis. 56:1-3, 11, NWT.) Davih waakady ni kabingil ka kuteekel Yehow micim. Kudyambulwiish dya Yehow Davih wangaciil dihangadik dya meej bwa kulongey bwaal kaahand bukeekemesh bikasakan. Umb waatang kulong myand bu mubeel a lubangul! Akish umutadil bu ciluby hamut a kumutaley bu mulwiish, nook Davih uhetel mushind a kuyey lubil.​—1 Sam. 21:13–22:1. w24.01 diib. 2 cik. 1-3

I bangany badyobw baleeb mu verseh a leeloow? I bashing diisaby biiyiiyobw kusangul! Nook, hiikal bashaadil bashing diisaby mwa kuy mu diiwul habwiih ni bulekel bwa mal miimiin meeh, mudimw wiikalobw nend wa kuuhal, i wa kul diivit. Kuunyim kwa bab baman kuy mu diiwul, biiyiiy kulong mudimw haakaabumw ni Krist ni banjel bindiy bajilang mu diivit dya bulekel bwa kulwiish balwiish ba Mawej. Langil ha bwaal oobw! Biin Krist bashing diisaby bakwaabw ha bulab aah bakaady banun ni kabaciish ni makand ma nyeet mavul. Ki musang umw hadyobw basanguk bwa kwiikal ni buumy mu diiwul, biiyiiy kwiikal ni makand mavul, baat ba mu spirit bakiish bafw, ni biiyiiy kwiibaakish mudimw a kulwiish haakaabumw ni Mukaleng aababw Yeez Krist udy cilobw cyaababw cya diivit. Kuunyim kwa diivit dya Armakedon, biiyiiy kukal mudimw haakaabumw ni Yeez Krist bwa kwambulwiish baat bwa kushaalobw bawaakan. Kakuy kulandul, biiyiiy kwambulwiish biin Krist naab bady ha bulab bwa kwiibalongel myand yivul diib diikalobw mu diiwul bishiilangan ni mwaakadyobw mwa kwiibalongel hacyaakadyobw baat bakiish bawaakan ha bulab! w24.02 diib. 6-7 cik. 15-16

Baat bakwaabw bakaady habwiih bwa kwiilambul ni kuhet baatiisumw bacyeeleelakan. Bamw bady mwa kumvw mooy wa ney, bab baman kuhet baatiisumw, bady mwa kwiiy kulong mpeekaat mutam ni biibaful mu cisumbw. Uw mwiikal ni mooy wa naak, iikal mutwiishiibw ney: Yehow wiiyiiy kukwaakish byoos biwukaakaam bwa “kulong myand bu mudy lukat lwa Mawej ni kulong mafuk moos myand yimuleelengeleel.” (Kol. 1:10) Wiiyiiy cikwaabw kukwaakish bukash bwiibuh kulong myand yijaalal. Ukaady mwambulwiishoh baat bakwaabw bavul bwa kulongobw myand yilengel. (1 Kor. 10:13) Ki bwaabiny teng baat bakeeh i bab bafuufulobw mu cisumbw cya biin Krist. Yehow wambambulwiish baat bindiy bwa kushaalobw ni lulamat. Muut woos ukiish muwaakan oow, bady mwa kumuteet bwa kulong myand yibiih. (Jak 1:14) Ning naak, bikaam usungul ciwiikal mwa kulong bab bakuteet. Cya kumanyik i cya ney, i uw kaayeeb wiikal mwa kusungul mushind iibuh kuhit ni shikacil aay. Baat bakwaabw balaalang ney, katwiish mwa kwiikand ku meej matulaalang eecy ku myand yituloolong. w24.03 diib. 5 cik. 11-12