Ɛzra

7 Afta dɛn tin ya apin, Ɛzra* tɔn bak insay di tɛm we Kiŋ Atazaksis na Pashia de rul. Ɛzra na Siraya in bɔypikin ɛn Siraya na Azaraya in bɔypikin, Azaraya na Ilkaya in bɔypikin, 2 Ilkaya na Shalɔm in bɔypikin, Shalɔm na Zedɔk in bɔypikin, Zedɔk na Aaytɔb in bɔypikin, 3 Aaytɔb na Amaraya in bɔypikin, Amaraya na Azaraya in bɔypikin, Azaraya na Mɛreyɔt in bɔypikin, 4 Mɛreyɔt na Zɛraaya in bɔypikin, Zɛraaya na Ɔzay in bɔypikin, Ɔzay na Bɔkay in bɔypikin, 5 Bɔkay na Abishua in bɔypikin, Abishua na Finias in bɔypikin, Finias na Ɛlieza in bɔypikin, ɛn Ɛlieza na Erɔn, we na di edman fɔ di prist dɛn, in bɔypikin. 6 So Ɛzra kɔmɔt na Babilɔn. Na bin pɔsin we de kɔpi ɛn i bin sabi* di Lɔ we Gɔd Gi Mozis gud gud wan, di wan we Jiova di Gɔd na Izrɛl gi dɛn. Di kiŋ gi am ɔl wetin i aks fɔ bikɔs in Gɔd Jiova bin de wit am.

7 Insay di ia we mek sɛvin we Kiŋ Atazaksis de rul, sɔm pan di Izrɛlayt dɛn, di prist dɛn, di Livayt dɛn, di wan dɛn we de siŋ, di getman dɛn, ɛn di tɛmpul savant dɛn,* bin go ɔp na Jerusɛlɛm. 8 Ɛn Ɛzra kam na Jerusɛlɛm insay di mɔnt we mek fayv, insay di ia we mek sɛvin we di kiŋ de rul. 9 I lɛf na Babilɔn di fɔs de insay di fɔs mɔnt, ɛn i rich na Jerusɛlɛm di fɔs de insay di mɔnt we mek fayv, bikɔs in Gɔd bin de wit am. 10 Ɛzra bin dɔn rɛdi in at* fɔ stɔdi Jiova in Lɔ ɛn fɔ du am, ɛn fɔ tich di lɔ ɛn di tin dɛn we Gɔd disayd na Izrɛl.

11 Dis na wan kɔpi ɔf di lɛta we Kiŋ Atazaksis gi to Ɛzra di prist ɛn we na man we de kɔpi; i rili sabi* Jiova in kɔmandmɛnt dɛn ɛn in lɔ dɛn we i gi to di Izrɛlayt dɛn:

12 * “Atazaksis, di kiŋ fɔ di kiŋ dɛn, de rayt to Ɛzra di prist, di man we de kɔpi Gɔd we de rul na ɛvin in Lɔ: Mek yu gɛt kolat. 13 A dɔn gi ɔda se na di say we a de rul, ɛni Izrɛlayt ɛn dɛn prist ɛn Livayt dɛn we want fɔ go wit yu na Jerusɛlɛm kin go. 14 Na di kiŋ ɛn in sɛvin advaysa dɛn de sɛn yu fɔ go si if di pipul dɛn na Juda ɛn Jerusɛlɛm de fala yu Gɔd in Lɔ we de wit yu,* 15 ɛn fɔ tek di silva ɛn di gold we di kiŋ ɛn in advaysa dɛn dɔn gi wit ɔl dɛn at to di Gɔd na Izrɛl, we de na Jerusɛlɛm; 16 ɛn ɔl di silva ɛn di gold we yu gɛt na di wan ol prɔvins na Babilɔn, wit di gift dɛn we di pipul dɛn ɛn di prist dɛn gi wit ɔl dɛn at fɔ dɛn Gɔd in os, we de na Jerusɛlɛm. 17 Ɛn yu fɔ yuz dis mɔni wantɛm wantɛm fɔ bay man kaw dɛn, man ship dɛn, yɔŋ ship dɛn, wit di fud ɔfrin dɛn ɛn drink ɔfrin dɛn we de go wit dɛn, ɛn yu fɔ sakrifays dɛn na di ɔlta na una Gɔd in os na Jerusɛlɛm.

18 “Yu ɛn yu brɔda dɛn kin du wetin fayn na una yay wit di balans silva ɛn gold, jɔs lɛk aw una Gɔd want. 19 Ɛn ɔl di kɔntena dɛn we dɛn dɔn gi yu fɔ di wok na yu Gɔd in os, yu fɔ go put am bifo Gɔd na Jerusɛlɛm. 20 Ɛn di balans tin dɛn we fɔ de na yu Gɔd in os we yu fɔ gi, yu go pul am na di say we dɛn de kip di kiŋ in valyu tin dɛn.

21 “Mi, Kiŋ Atazaksis, dɔn gi ɔda to ɔl di wan dɛn we de kip di kiŋ in valyu tin dɛn na di eria Biɛn di Riva. A dɔn gi ɔda se we Ɛzra di prist, di man we de kɔpi Gɔd we de rul na ɛvin in Lɔ, aks fɔ ɛnitin, una fɔ du am kwik kwik wan. 22 Una fɔ gi am ɔp to 100 silva talɛnt,* 100 kɔ* wit,* 100 bat* wayn, 100 bat ɔyl, ɛn ɛni amawnt ɔf sɔl we i want. 23 Ɛnitin we di Gɔd we de rul na ɛvin ɔda una, una fɔ du am wit zil fɔ in os, so dat i nɔ go vɛks pan di pipul dɛn we di kiŋ de rul ɛn di kiŋ in bɔypikin dɛn. 24 Ɛn una nɔ fɔ aks di prist dɛn, Livayt dɛn, myuzishian dɛn, getman dɛn, tɛmpul savant dɛn,* ɛn di wokman dɛn na Gɔd in os fɔ pe lokal taks, biznɛs taks, ɔ rod taks.

25 “Ɛn Ɛzra, yu fɔ yuz di sɛns we Gɔd dɔn gi yu fɔ pik majistret dɛn ɛn jɔj dɛn fɔ jɔj ɔl di pipul dɛn na di eria Biɛn di Riva, ɔl di wan dɛn we no yu Gɔd in lɔ dɛn; ɛn yu fɔ tich di wan dɛn we nɔ no. 26 Ɛn ɛnibɔdi we nɔ fala yu Gɔd in Lɔ ɛn di kiŋ in lɔ, dɛn fɔ pɔnish am wantɛm wantɛm, ilɛksɛf dɛn kil am, drɛb am, mek i pe fayn, ɔ dɛn put am na prizin.”

27 Mek Jiova, wi gret gret granpa dɛn Gɔd, gɛt prez, we dɔn tɔch di kiŋ in at fɔ mek Jiova in os na Jerusɛlɛm fayn fayn wan! 28 I dɔn sho mi lɔv we nɔ de chenj bifo di kiŋ ɛn di wan dɛn we de advays am ɛn ɔl in pawaful prins dɛn. So a gɛt maynd bikɔs Jiova mi Gɔd bin de wit mi, ɛn a gɛda sɔm pan di bigman dɛn na Izrɛl fɔ go ɔp wit mi.