Sɔnde, Sɛptɛmba 8
Pik layf so dat [una] jɛnareshɔn dɛn go kɔntinyu fɔ de.—Dit. 30:19.
Fɔ mek yu ebul ɛp yu pikin dɛn fɔ gɛt fet mɔ ɛn mɔ, i nɔ jɔs du fɔ de tɛl dɛn wetin rayt ɛn wetin rɔng. Yu go nid bak fɔ ɛp dɛn fɔ ebul ɛksplen kwɛstyɔn dɛn lɛk: ‘Wetin mek di Baybul se i bad fɔ du sɔm tin dɛn pan ɔl we i tan lɛk se natin nɔ rɔng wit dɛn? Aw a go mek shɔ se fɔ du wetin di Baybul se gud fɔ mi ɔltɛm?’ (Ayz. 48:17, 18) If yu pikin want fɔ baptayz, ɛp am fɔ tink siriɔs wan bɔt wetin-ɛn-wetin i fɔ du we i baptayz. Aw i fil bɔt dɛn? Aw dɛn go bɛnifit am? Us prɔblɛm dɛn i go gɛt? Wetin mek di bɛnifit we i go gɛt go pas di prɔblɛm dɛn fa fawe? (Mak 10:29, 30) I impɔtant fɔ tink bɔt dɛn tin dɛn ya bifo di pikin baptayz. We yu ɛp yu pikin fɔ tink bɔt dɛn tin dɛn ya gud gud wan,dat go mek i biliv tranga wan se fɔ du wetin di Baybul se gud fɔ am ɔltɛm. w17.12 18-19 ¶14-15
Mɔnde, Sɛptɛmba 9
I de kɔl dɛn ɔl bay nem.—Ayz. 40:26.
Bɔku pan wi brɔda ɛn sista dɛn de sɔfa bikɔs dɛn sik bad bad wan. Ɔda wan dɛn we dɔn big, de kia fɔ dɛn fambul dɛn we dɔn ol. Stil, ɔda wan dɛn de we de wok tranga wan fɔ lɛ dɛn famili gɛt di tin dɛn we dɛn nid pan ɔl we i nɔ izi. Ɛn wi no se nɔto wan pan dɛn prɔblɛm dɛn ya nɔmɔ bɔku pan una gɛt, una gɛt bɔku ɔda prɔblɛm dɛn we de mit una di sem tɛm! If Jiova kia fɔ di sta dɛn we nɔ gɛt layf, tink bɔt aw i kin fil bɔt yu! Yu de sav am, nɔto bikɔs yu fɔ sav am, bɔt na bikɔs yu lɛk am. Wi Papa na ɛvin no ɔltin bɔt yu. Di Baybul se Gɔd “insɛf no ɔmɔs ia de na una ed.” (Mat. 10:30) Jiova want wi fɔ no se i “bisin bɔt udat de du wetin in want.” (Sam 37:18) Fɔ tru, Jiova de si ɔl di prɔblɛm dɛn we yu gɛt, ɛn i de gi yu di trɛnk we yu nid fɔ ɛp yu fɔ bia dɛn ɔl. w18.01 3 ¶1; 4 ¶4
Tyusde, Sɛptɛmba 10
Tabita, grap!—Akt 9:40.
We Pita gi layf bak to Tabita, dat bin mek bɔku pipul dɛn na di tɔŋ “biliv pan di Masta.” Dɛn nyu disaypul dɛn ya go tɛl ɔda pipul dɛn di gud nyuz bɔt Jizɔs, ɛn dɛn go tɔk bak bɔt di pawa we Jiova gɛt fɔ gi layf bak to pɔsin we dɔn day. (Akt 9:36-42) Bɔku pipul dɛn bin si we wan ɔda pɔsin bin gɛt layf bak. Wan tɛm, di apɔsul Pɔl bin gɛt mitin na wan rum insay Troas we de naw na Tɔki. Pɔl bin prich te midul nɛt. Wan yɔŋ man we nem Yutikɔs bin sidɔm na wan winda de lisin. Bɔt slip pas wit am ɛn i bin kɔmɔt ɔp di tri stori bildin ɛn fɔdɔm. Sɔntɛm na Lyuk fɔs bin rich usay Yutikɔs bin ledɔm. Bikɔs Lyuk na dɔktɔ, i bin kam fɔ no se dis yɔŋ man nɔ bin jɔs wund ɛn fent nɔmɔ. Na day i dɔn day! Pɔl insɛf bin kam dɔn. I ɔg Yutikɔs ɛn ɔlman bin sɔprayz we i tɔk se: “I gɛt layf!” Dis mirekul we bin apin bin afɛkt ɔlman we bin si wetin bin apin. Dɛn bin no se dis yɔŋ man dɔn day, ɛn i dɔn gɛt layf bak ɛn dis bin gi dɛn kɔrej ɛn “dɛn ɔl gladi.”—Akt 20:7-12. w17.12 5-6 ¶10-11