Galeshians

4 A de tɔk se wans di pɔsin we fɔ gɛt di prɔpati na smɔl pikin, i nɔ difrɛn frɔm slev; pan ɔl we na in na di masta fɔ ɔl di tin dɛn, 2 i de ɔnda di wan dɛn we de kia fɔ am ɛn we de in chaj ɔf di os, te di tɛm rich we in papa bin dɔn pik. 3 Semweso, we wisɛf na bin pikin dɛn, wi na bin slev to dɛn pikin pikin tin dɛn na di wɔl.* 4 Bɔt we di tɛm dɔn, Gɔd sɛn in Pikin, we wan uman bɔn ɛn we bin de fala lɔ, 5 fɔ mek i go bay di wan dɛn we de fala lɔ fɔ fri dɛn, so dat Gɔd go adɔpt wi as in pikin dɛn.

6 Bikɔs una na Gɔd in pikin dɛn, i dɔn put in Pikin in spirit insay wi at, ɛn di spirit de ala se: “Aba,* Papa!” 7 So yu nɔto slev igen, yu na Gɔd in pikin; ɛn if yu na in pikin, yu go gɛt wetin i dɔn prɔmis.

8 Bɔt we una nɔ bin no Gɔd, una na bin slev to di wan dɛn we nɔto gɔd atɔl. 9 Bɔt naw we una dɔn no Gɔd ɔ, a go se, we Gɔd dɔn no una, wetin mek una de tɔn bak to di tin dɛn we nɔ gɛt valyu, to dɛn pikin pikin tin dɛn* we nɔ min natin ɛn want fɔ bi slev to dɛn igen? 10 Una de tek tɛm fɔ sɛlibret de dɛn, mɔnt dɛn, sizin dɛn, ɛn ia dɛn. 11 A de fred fɔ una, lɛ i nɔ bi se a dɔn west mi tɛm pan una.

12 Mi brɔda dɛn, a de beg una, una tan lɛk mi, bikɔs misɛf bin tan lɛk una. Una nɔ du mi ɛni bad tin. 13 Bɔt una no se na bikɔs a bin sik mek a gɛt mi fɔs chans fɔ prich di gud nyuz to una. 14 Ɛn pan ɔl we mi siknɛs na bin tɛst fɔ una, una nɔ tek mi lɛk se mi na natin ɔ mi na dɔti tin,* bɔt una wɛlkɔm mi lɛk Gɔd in enjɛl, lɛk Krays Jizɔs. 15 We di gladi-at we una bin gɛt? A shɔ se, if i bin pɔsibul, una fɔ dɔn pul una yay ɛn gi mi. 16 So fɔ se a dɔn tɔn una ɛnimi bikɔs a tɛl una di tru? 17 Dɛn gɛt zil fɔ mek una de fɔ dɛn, bɔt nɔto fɔ gud rizin; dɛn want fɔ pul una to mi, so dat una go rili want fɔ fala dɛn. 18 Bɔt i fayn ɔltɛm mek pɔsin gɛt zil fɔ de biɛn una fɔ gud rizin ɛn nɔto jɔs we a de wit una, 19 mi smɔl pikin dɛn, we a de fil pen fɔ bak; di kayn pen we uman kin fil we i want fɔ bɔn. A go fil dis pen te Krays de insay una. 20 A wish a de wit una rayt naw ɛn tɔk difrɛn we, bikɔs a nɔ no wetin fɔ du bɔt una.

21 Una tɛl mi, una we want fɔ de fala lɔ, Una nɔ de yɛri di Lɔ? 22 Fɔ ɛgzampul, dɛn bin rayt se Ebraam bin gɛt tu bɔypikin dɛn; di savant gal bɔn wan ɛn di uman we nɔto slev bɔn wan. 23 Bɔt di savant gal bɔn in pikin di nɔmal we, ɛn di uman we nɔto slev bɔn in pikin tru prɔmis. 24 Dɛn tin ya gɛt ɔda minin; dɛn uman ya min tu agrimɛnt, di wan we dɛn mek na Mawnt Saynay, we de bɔn pikin dɛn fɔ bi slev ɛn we na Ega. 25 Ega min Saynay, we na wan mawntin na Arebia, ɛn i tinap fɔ Jerusɛlɛm we de tide, bikɔs in ɛn in pikin dɛn na slev. 26 Bɔt di Jerusɛlɛm we de ɔp nɔto slev, ɛn na in na wi mama.

27 Dɛn bin rayt se: “Yu uman we nɔ ebul bɔn, fɔ gladi; yu uman we nɔ gɛt di pen we uman kin gɛt we i de bɔn, ala wit gladi-at; di uman we dɛn nɔ bisin bɔt gɛt bɔku pikin dɛn pas di uman we gɛt man.” 28 Mi brɔda dɛn, una na pikin dɛn we dɛn bɔn bikɔs ɔf di prɔmis jɔs lɛk Ayzak. 29 Bɔt jɔs lɛk aw di pikin we dɛn bɔn lɛk ɔda pikin dɛn bin de mek di wan we dɛn bɔn tru spirit sɔfa, na so bak i de apin naw. 30 Bɔt wetin di skripchɔ se? “Drɛb di savant gal ɛn in bɔypikin, bikɔs di savant gal in bɔypikin nɔ go gɛt di prɔpati wit di uman we nɔto slev, in bɔypikin.” 31 So mi brɔda dɛn, wi nɔto di savant gal in pikin dɛn, wi na di uman we nɔto slev, in pikin dɛn.