Romans

9 Na di tru a de tɔk as Krays in disaypul; a nɔ de lay, ɛn mi kɔnshɛns we di oli spirit de gayd, na mi witnɛs, 2 fɔ se mi at pwɛl bad bad wan, ɛn a gɛt pen na mi at ɔltɛm. 3 A wish na mi na bin di wan we nɔ de wit Krays ɛn di wan we gɛt di swɛ fɔ mi brɔda dɛn, we na mi fambul dɛn, 4 we na Izrɛlayt dɛn. Na dɛn Gɔd adɔpt as in bɔypikin dɛn, na dɛn gɛt di glori, na dɛn i mek di agrimɛnt wit, na dɛn gɛt di Lɔ, na dɛn de du di oli wok, ɛn na to dɛn i mek di prɔmis dɛn. 5 Dɛn na di gret gret granpa dɛn pikin dɛn, ɛn na frɔm dɛn Krays kɔmɔt we dɛn bɔn am as mɔtalman. Mek Gɔd we de pantap ɔlman gɛt di prez sote go. Emɛn.

6 Bɔt dat nɔ min se wetin Gɔd tɔk nɔ apin. Nɔto ɔl Izrɛl in pikin dɛn na “Izrɛlayt” fɔ tru. 7 Ɛn pan ɔl we dɛn ɔl kɔmɔt frɔm Ebraam, nɔto dɛn ɔl na Ebraam in rial pikin dɛn; bifo dat, Gɔd se, “Di wan dɛn we dɛn go se na yu pikin dɛn, na frɔm Ayzak dɛn go kɔmɔt.” 8 Dis min se nɔto ɔl Ebraam in pikin dɛn na Gɔd in rial pikin dɛn, na di wan dɛn we dɛn bɔn bikɔs ɔf di prɔmis na dɛn na Ebraam in rial pikin dɛn. 9 Gɔd bin prɔmis se: “A go kam dis sem tɛm ɛn Sera go gɛt bɔypikin.” 10 Bɔt nɔto da tɛm de nɔmɔ; di tɛm bak we wan man, we na Ayzak, wi gret gret granpa mek Ribɛka gɛt twin dɛn bɛlɛ. 11 We dɛn nɔ bɔn di pikin dɛn yet ɛn we di pikin dɛn nɔ du ɛnitin we gud ɔ bad yet, Gɔd tɔk bifo tɛm udat i go chuz, bikɔs Gɔd de chuz udat i want, nɔto bikɔs ɔf wetin pɔsin du. 12 Gɔd tɛl Ribɛka se: “Di big wan go bi slev to di smɔl wan.” 13 Jɔs lɛk aw dɛn rayt se: “A lɛk Jekɔp, bɔt a et Isɔ.”

14 Wetin wi go se naw? Fɔ se Gɔd nɔ de du wetin rayt? Nɔ-o! 15 I tɛl Mozis se: “A go sho lɔv to ɛnibɔdi we a want fɔ sho lɔv to, ɛn a go sho se a gɛt sɔri-at fɔ ɛnibɔdi we a want fɔ sho sɔri-at.” 16 So i lɛf to Gɔd we gɛt sɔri-at. Gɔd nɔ de pik pɔsin bikɔs na dat di pɔsin want ɔ bikɔs di pɔsin de rili du sɔntin.* 17 Di skripchɔ tɛl Fɛro se: “Na dis rizin mek a dɔn alaw yu fɔ de alayv, so dat tru yu, a go sho mi pawa ɛn mek pipul dɛn tɔk bɔt mi nem ɔlsay na di wɔl.” 18 So i de sho se i gɛt sɔri-at fɔ ɛnibɔdi we i want fɔ sho sɔri-at, bɔt i de alaw ɛnibɔdi we want fɔ mek trangayes, fɔ mek trangayes.

19 Yu go aks mi se: “Wetin mek i stil de fɛn fɔlt? Udat dɔn go agens wetin i want?” 20 Bɔt udat na yu, E mɔtalman, fɔ ansa Gɔd? Yu tink se di kle we dɛn dɔn mol de aks di wan we mol am se: “Wetin mek yu mek mi dis kayn we?” 21 Wetin? Fɔ se di pɔsin we de wok wit kle nɔ gɛt di rayt fɔ tek pan di sem kle ɛn mek wan tin we spɛshal, we dɛn nɔ de yuz so nɔmɔ ɛn mek ɔda tin we dɛn de yuz ɔltɛm? 22 If Gɔd bin want fɔ sho in vɛksteshɔn ɛn mek dɛn no in pawa, ɛn i bin bia ɛn peshɛnt wit pipul dɛn we i fɔ pul in vɛksteshɔn pan ɛn we fit fɔ dɔnawe wit, wetin naw wi go se? 23 Ɛn if i du dis fɔ sho di wan dɛn we i gɛt fɔ sɔri fɔ aw i rili gɛt glori, dat na di wan dɛn we i dɔn pripia bifo tɛm fɔ gɛt glori, 24 we na wi, we i pik pan di Ju dɛn ɛn frɔm ɔda neshɔn dɛn, wetin wi go se? 25 I jɔs tan lɛk wetin i tɔk na Osia se: “A go kɔl di wan dɛn we nɔto mi pipul dɛn ‘mi pipul dɛn,’ ɛn a go kɔl di uman we a nɔ bin lɛk, ‘di wan we a rili lɛk’; 26 ɛn di ples we a tɛl dɛn se, ‘Una nɔto mi pipul dɛn,’ na de a go kɔl dɛn ‘di Gɔd we de alayv in bɔypikin dɛn.’”

27 Pantap dat, Ayzaya bin tɔk lawd wan bɔt Izrɛl se: “Pan ɔl we Izrɛl in pikin dɛn bɔku lɛk di sansan na di si, na smɔl nɔmɔ* go sev. 28 Jiova* go jɔj di wɔl, i go dɔn fɔ jɔj am, ɛn i go du am kwik kwik wan.” 29 Ɛn jɔs lɛk aw Ayzaya bin se: “If Jiova* we gɛt bɔku bɔku sojaman dɛn nɔ bin lɛf sɔm pan wi, wi fɔ jɔs dɔn tan lɛk Sɔdɔm, ɛn wi fɔ dɔn fiba Gomɔra.”

30 So, wetin naw wi go se? Pan ɔl we di pipul dɛn na ɔda neshɔn dɛn nɔ bin de tray fɔ du wetin rayt, dɛn ebul du wetin rayt na Gɔd in yay bikɔs dɛn gɛt fet; 31 bɔt pan ɔl we Izrɛl bin de tray fɔ du wetin rayt lɛk aw di lɔ se, dɛn nɔ ebul fɔ du wetin di lɔ se. 32 Wetin mek? Na bikɔs dɛn fil se na di tin dɛn we dɛn de du na in go mek Gɔd tek dɛn as pipul dɛn we de du wetin rayt, nɔto bikɔs dɛn gɛt fet.” Dɛn bɔk dɛn fut pan di “ston we de mek pɔsin fɔdɔm”; 33 jɔs lɛk aw dɛn rayt se: “Luk! A de le wan ston na Zayɔn we de mek pɔsin bɔk in fut ɛn wan rɔk we de ɔfɛn pɔsin, bɔt di wan we put in fet pan am nɔ go disapɔynt.”