1 Kɔrintians

2 So, mi brɔda dɛn, we a bin kam to una fɔ tɔk bɔt Gɔd in oli sikrit, a nɔ yuz big big wɔd dɛn ɔ sɛns. 2 A disayd nɔ fɔ no bɔt ɛnitin we a de wit una pas Jizɔs Krays ɛn di kil we dɛn kil am pan di tik. 3 Ɛn we a bin kam to una, a bin wik ɛn a bin de fred ɛn rili trimbul; 4 ɛn we a de tɔk ɛn prich, a nɔ yuz swit-mɔt ɛn sɛns, bɔt wetin a tɔk sho di spirit ɛn pawa we Gɔd gɛt, 5 so dat una nɔ go gɛt fet pan mɔtalman sɛns, bɔt una go gɛt fet pan Gɔd in pawa.

6 Wi de tɔk sɛns to di wan dɛn we machɔ, bɔt nɔto di sɛns we de insay dis tɛm* ɛn nɔto di sɛns we di rula dɛn we nɔ go de igen ɛn we de insay dis tɛm, gɛt. 7 Bɔt wi de tɔk Gɔd in sɛns we de insay wan oli sikrit, dat na di sɛns we ayd, we Gɔd bin dɔn ɔlrɛdi disayd bifo di difrɛn tɛm dɛn bigin so dat wi go gɛt glori. 8 Nɔn pan di rula dɛn we de insay dis tɛm* nɔ no bɔt dis sɛns, bikɔs if dɛn bin no am, dɛn nɔ fɔ kil* di Masta we gɛt glori. 9 Bɔt jɔs lɛk aw dɛn rayt: “Yay nɔ si yet, yes nɔ yɛri yet, ɛn mɔtalman nɔ imajin yet di tin dɛn we Gɔd dɔn pripia fɔ di wan dɛn we lɛk am.” 10 Gɔd dɔn yuz in spirit fɔ sho wi dɛn, bikɔs di spirit de luk insay ɔltin, ivin di dip tin dɛn bɔt Gɔd.

11 Us mɔtalman de we no di tin dɛn bɔt pɔsin pas di spirit we de insay di pɔsin? Na so bak, nɔbɔdi nɔ no di tin dɛn bɔt Gɔd pas Gɔd in spirit. 12 Nɔto di spirit na di wɔl wi gɛt, na di spirit we kɔmɔt to Gɔd na in wi gɛt, so dat wi go no di tin dɛn we Gɔd dɔn gi wi bikɔs i gud. 13 Wi de tɔk bɔt dɛn tin ya bak, bɔt wi nɔ de yuz di wɔd dɛn we sɛnsman dɛn de tich, bɔt wi de yuz di wɔd dɛn we di spirit de tich, we wi de ɛksplen* tin dɛn bɔt Gɔd wit wɔd dɛn we gɛt fɔ du wit Gɔd.

14 Bɔt pɔsin we de du wetin in bɔdi want nɔ de gri wit di tin dɛn we gɛt fɔ du wit Gɔd in spirit, bikɔs dɛn nɔ mek sɛns to am; ɛn i nɔ go ebul fɔ no dɛn, bikɔs pɔsin fɔ gɛt Gɔd in spirit fɔ ebul fɔ ɔndastand dɛn. 15 Bɔt pɔsin we de du wetin di spirit want de chɛk ɔltin, bɔt nɔbɔdi nɔ ebul fɔ jɔj am. 16 “Udat no aw Jiova* de tink so dat i go tich am?” Bɔt wi no aw Krays de tink.