2 Kɔrintians

4 So, ɛnti wi gɛt dis wok bikɔs dɛn sɔri fɔ wi, wi nɔ de giv-ɔp. 2 Wi nɔ de du dɛn shemful tin dɛn, dɛn ɔnda-an tin dɛn, wi nɔ miks pan dɛn kɔni kɔni tin dɛn, ɛn wi nɔ de twis Gɔd in wɔd; bɔt we wi de mek pipul dɛn no di trut, wi de sho se wi de du wetin rayt bifo Gɔd to ɔlman in kɔnshɛns. 3 Infakt, if vel kɔba di gud nyuz we wi de tɔk bɔt, na to di wan dɛn we de day, 4 di wan dɛn we nɔ biliv di Masta, we di gɔd insay dis tɛm* dɔn blayn dɛn maynd, so dat di layt we de kɔmɔt pan di wɔndaful gud nyuz bɔt di Krays, we tan lɛk Gɔd, nɔ go shayn. 5 Wi nɔ de prich bɔt wisɛf, bɔt wi de prich se Jizɔs Krays na Masta ɛn wi na una slev dɛn fɔ Jizɔs in sek. 6 Na Gɔd na di wan we se: “Lɛ di layt kɔmɔt insay daknɛs ɛn shayn,” ɛn i dɔn pɔynt layt na wi at dɛn fɔ mek dɛn brayt wit di wɔndaful tin dɛn we wi no bɔt Gɔd tru Krays in fes.

7 Bɔt wi gɛt dis valyu tin insay kɔntri pɔt* dɛn, we de sho se di pawa we pas mɔtalman in yon na to Gɔd i kɔmɔt, nɔto wi yon pawa. 8 Dɛn de rili prɛs wi ɔlkayn we, bɔt stil wi ebul fɔ muv; wi nɔ no wetin fɔ du, bɔt nɔto fɔ se no we nɔ de;* 9 dɛn de mek wi sɔfa, bɔt wi nɔ jɔs lɛf to wisɛf; dɛn de ib wi dɔŋ, bɔt wi nɔ de lɛf na grɔn.* 10 Ɔltɛm wi bɔdi de bia we wi de sɔfa di sem we aw Jizɔs bin de sɔfa we in layf de pan denja, we de sho se wi de liv lɛk Jizɔs. 11 Wi we de liv, day de kam wi we ɔltɛm fɔ Jizɔs in sek, we de sho se wi de liv lɛk Jizɔs. 12 So day de kam wi we ɔltɛm, bɔt una gɛt layf.

13 Bikɔs wi gɛt di sem fet jɔs lɛk di wan we dɛn rayt bɔt se: “A sho se a gɛt fet, so a tɔk”; wisɛf sho se wi gɛt fet so wi tɔk, 14 bikɔs wi no se di Wan we gi Jizɔs layf bak go gi wisɛf layf bak wit Jizɔs, ɛn i go briŋ wi ɛn una togɛda bifo am. 15 Ɔl dɛn tin ya na fɔ una sek, so dat Gɔd in spɛshal gudnɛs* we de bɔku go bɔku mɔ ɛn mɔ bikɔs mɔ ɛn mɔ pipul dɛn de tɛl Gɔd tɛnki we de mek i gɛt glori.

16 So, wi nɔ de giv-ɔp, bɔt ivin if wi bɔdi de west, di pɔsin we wi bi insay de nyu ɛvride. 17 Pan ɔl we di prɔblɛm* na fɔ shɔt tɛm ɛn i smɔl, i de mek wi gɛt glori mɔ ɛn mɔ ɛn da glori de go de sote go; 18 so wi yay nɔ de pan di tin dɛn we wi de si, bɔt i de pan di tin dɛn we wi nɔ de si. Di tin dɛn we wi de si nɔ de te, bɔt di tin dɛn we wi nɔ de si go de sote go.