1 Kɔrintians

10 Mi brɔda dɛn, naw a want mek una no se wi gret gret granpa dɛn ɔl bin de ɔnda di klawd, ɛn dɛn ɔl pas midul di si, 2 dɛn ɔl baptayz insay Mozis we dɛn bin de ɔnda di klawd ɛn we dɛn pas midul di si, 3 dɛn ɔl it di sem fud we Gɔd gi dɛn, 4 ɛn dɛn ɔl drink di sem drink we Gɔd gi dɛn. Dɛn bin de drink frɔm di rɔk we Gɔd gi dɛn, we bin de fala dɛn, ɛn da rɔk bin min* di Krays. 5 Bɔt pan ɔl dat, Gɔd nɔ bin gladi wit bɔku pan dɛn, so i kil dɛn na di wildanɛs.*

6 Dɛn tin ya dɔn bi ɛgzampul fɔ wi, so dat wi nɔ go want bad tin dɛn, jɔs lɛk aw dɛn bin want bad tin dɛn. 7 Ɛn lɛ wi nɔ bi pipul dɛn we de wɔship aydɔl, lɛk aw sɔm pan dɛn bin du; jɔs lɛk aw dɛn rayt se: “Di pipul dɛn sidɔm fɔ it ɛn drink. Dɔn dɛn grap fɔ ɛnjɔy dɛnsɛf.” 8 Ɛn lɛ wi nɔ du mami ɛn dadi biznɛs di we aw Gɔd nɔ want,* lɛk aw sɔm pan dɛn bin du we mek dɛn day. Na 23,000 bin day insay wan de. 9 Ɛn lɛ wi nɔ tɛst Jiova,* lɛk aw sɔm pan dɛn bin tɛst am we mek snek dɛn kil dɛn. 10 Ɛn lɛ wi nɔ de grɔmbul, lɛk aw sɔm pan dɛn bin de grɔmbul we mek di wan we de kil, kil dɛn. 11 Dɛn tin ya apin to dɛn as ɛgzampul fɔ wi, ɛn dɛn rayt dɛn fɔ wɔn wi we de liv naw we di tɛm* de dɔn.

12 So mek di wan we tink se i tinap tek tɛm mek i nɔ fɔdɔm. 13 No tɛmteshɔn nɔ mit una yet we nɔ dɔn mit ɔda pipul dɛn. Bɔt Gɔd fetful, i nɔ go alaw tɛmteshɔn we una nɔ ebul fɔ bia fɔ mit una; bɔt we tɛmteshɔn mit una, i go mek we bak so dat una go ebul fɔ bia am.

14 So mi brɔda dɛn we a rili lɛk, una rɔnawe pan aydɔl wɔship. 15 A de tɔk lɛk se a de tɔk to man dɛn we rili ɔndastand; una jɔj fɔ unasɛf wetin a de se. 16 Di kɔp we gɛt blɛsin we wi pre pan, nɔto fɔ lɛ wi bɛnifit frɔm Krays in blɔd? Di bred we wi brok, nɔto fɔ lɛ wi bɛnifit frɔm Krays in bɔdi? 17 Bikɔs na wan bred de, pan ɔl we wi bɔku, wi na wan bɔdi, bikɔs wi ɔl de it da wan bred de.

18 Tink bɔt di Izrɛlayt dɛn: Fɔ se di wan dɛn we de it di sakrifays dɛn nɔ de jɔyn fɔ wɔship na di ɔlta? 19 Wetin a de tray fɔ tɔk bɔt? Fɔ se di tin dɛn we dɛn de sakrifays to aydɔl min ɛnitin, ɔ aydɔl min ɛnitin? 20 Nɔ-o; di tin dɛn we di neshɔn dɛn de sakrifays, nɔto to Gɔd dɛn de sakrifays am, na to dimɔn dɛn; ɛn a nɔ want mek una jɔyn di dimɔn dɛn. 21 Una nɔ go de drink na Jiova* in kɔp ɛn de drink bak na di dimɔn dɛn kɔp; una nɔ go de it na “Jiova* in tebul” ɛn de it bak na di dimɔn dɛn tebul. 22 Ɔ ‘fɔ se wi de tray fɔ mek Jiova* jɛlɔs’? Wi nɔ strɔng pas am, nɔto so?

23 I rayt fɔ du ɔltin, bɔt nɔto ɔltin gɛt bɛnifit. I rayt fɔ du ɔltin, bɔt nɔto ɔltin de ɛp pɔsin fɔ tinap tranga wan. 24 Lɛ ɔlman tray fɔ du tin we go bɛnifit ɔda pɔsin, nɔto wetin go bɛnifit am.

25 It ɛnitin we dɛn de sɛl na bif makit, nɔ aks bikɔs ɔf yu kɔnshɛns, 26 bikɔs “na Jiova* gɛt di wɔl ɛn ɔltin we de insay de.” 27 If pɔsin we nɔ biliv di Masta invayt yu ɛn yu want fɔ go, it ɛnitin we dɛn put bifo yu, nɔ aks bikɔs ɔf yu kɔnshɛns. 28 Bɔt if ɛnibɔdi tɛl yu se, “Dis na tin we dɛn dɔn sakrifays,” nɔ it am bikɔs ɔf di pɔsin we dɔn tɛl yu ɛn bikɔs ɔf di kɔnshɛns. 29 A nɔ min yu yon kɔnshɛns, bɔt a min di ɔda pɔsin in kɔnshɛns. Wetin mek ɔda pɔsin in kɔnshɛns fɔ jɔj mi bikɔs ɔf di fridɔm we a gɛt? 30 If a tɛl tɛnki fɔ di tin we a de it, wetin mek dɛn fɔ tɔk bad bɔt mi fɔ di tin we a tɛl tɛnki fɔ?

31 So ilɛksɛf una de it ɔ drink ɔ una de du ɛni ɔda tin, una du ɔltin fɔ briŋ prez to Gɔd. 32 Una nɔ du ɛnitin we go mek una tan lɛk ston we go mek di Ju dɛn, di Grik dɛn, ɛn Gɔd in kɔngrigeshɔn fɔdɔm, 33 jɔs lɛk aw a de tray pan ɔltin, fɔ du wetin go mek ɔlman gladi, a nɔ de du wetin go bɛnifit mi, bɔt a de du wetin go bɛnifit bɔku pipul dɛn, so dat dɛn go sev.