2 Kɔrintians

9 A nɔ rili nid fɔ rayt to una fɔ mek una no se una fɔ ɛp di oli wan dɛn, 2 bikɔs a no di we aw una rɛdi ɛn a de bost bɔt dat to di Masidonian dɛn. A de tɛl dɛn se una we de na Akeya dɔn rɛdi fɔ wan ia naw, ɛn una zil dɔn mek bɔku pan dɛn want fɔ ɛp. 3 Bɔt a de sɛn di brɔda dɛn, so dat di bost we wi de bost se una want fɔ ɛp nɔ go bi fɔ natin ɛn una go rɛdi, jɔs lɛk aw a bin se una go rɛdi. 4 If nɔto dat, if mi ɛn di Masidonian dɛn kam ɛn si se una nɔ rɛdi, wi go shem bikɔs ɔf di kɔnfidɛns we wi gɛt pan una, ɛn unasɛf go shem. 5 So a si am se a nid fɔ ɛnkɔrej di brɔda dɛn fɔ kam to una bifo tɛm ɛn fɔ rɛdi di gift we una bin dɔn prɔmis bifo tɛm, so dat di gift go rɛdi ɛn i go sho se una gɛt fri-an, nɔto bikɔs dɛn fos una.

6 Wetin a de tray fɔ se na dat ɛnibɔdi we plant smɔl go avɛst smɔl, ɛn ɛnibɔdi we plant bɔku go avɛst bɔku. 7 Lɛ ɔlman gi wetin i dɔn mekɔp na in maynd fɔ gi, lɛ i nɔ gi biɛn in at* ɔ gi bikɔs dɛn fos am, bikɔs Gɔd lɛk pɔsin we de gladi fɔ gi.

8 Pantap dat, Gɔd ebul mek ɔl in spɛshal gudnɛs* de pan una bɔku wan so dat una go gɛt ɔl wetin una nid ɔltɛm, ɛn una go gɛt plɛnti tin dɛn fɔ du ɔlkayn gud wok. 9 (Jɔs lɛk aw dɛn rayt se: “I dɔn sheb bɔku gift; i dɔn gi to di po wan dɛn. I go kɔntinyu fɔ du wetin rayt sote go.” 10 Di Wan we de gi bɔku bɔku sid to di wan we de plant ɛn gi bred fɔ it go gi una sid ɛn mek di sid bɔku fɔ lɛ una plant, ɛn i go mek una gɛt bɔku bɛnifit we una de du wetin rayt.) 11 Gɔd dɔn blɛs una so dat una go gɛt fri-an pan ɔltin, ɛn bikɔs ɔf wetin wi de du, pipul dɛn de tɛl Gɔd tɛnki; 12 bikɔs dis wok we wi de du fɔ bɛnifit ɔda pipul dɛn nɔto fɔ jɔs gi di oli wan dɛn wetin dɛn nid bɔt na fɔ mek pipul dɛn tɛl Gɔd plɛnti tɛnki. 13 Bikɔs ɔf wetin dis wok we wi de du fɔ ɛp de sho, dɛn de prez Gɔd bikɔs una de obe di gud nyuz bɔt di Krays, jɔs lɛk aw una bin dɔn tɔk opin wan, ɛn bikɔs una gɛt fri-an to dɛn ɛn to ɔlman. 14 Ɛn dɛn go rili beg Gɔd fɔ una fɔ sho se dɛn rili lɛk una bikɔs Gɔd in spɛshal gudnɛs* we pas ɔl de pan una.

15 Lɛ wi tɛl Gɔd tɛnki fɔ in fri gift we wi nɔ ebul fɔ ɛksplen.