Lyuk

22 Di Bred we Nɔ Gɛt Yist Fɛstival we dɛn kɔl Pasova, bin dɔn de kam nia. 2 Di edman dɛn fɔ di prist dɛn ɛn di Lɔ ticha dɛn bin de luk fɔ fayn we fɔ kil Jizɔs, bikɔs dɛn bin de fred di pipul dɛn. 3 Dɔn Setan go insay Judas, di wan we dɛn de kɔl Iskariɔt, we na bin wan pan di 12 apɔsul dɛn, 4 ɛn i go tɔk to di edman dɛn fɔ di prist dɛn ɛn di kaptin dɛn na di tɛmpul bɔt aw i go ɛp dɛn fɔ arɛst Jizɔs. 5 Dɛn gladi fɔ dat ɛn gri fɔ gi am silva mɔni. 6 So i gri ɛn bigin luk fɔ fayn chans fɔ ɛp dɛn fɔ arɛst Jizɔs usay bɔku pipul dɛn nɔ de.

7 Di fɔs de fɔ it di Bred we Nɔ Gɛt Yist kam, dat na di de fɔ mek di Pasova sakrifays; 8 so Jizɔs tɛl Pita ɛn Jɔn se: “Una go rɛdi di Pasova fɔ lɛ wi it.” 9 Dɛn aks am se: “Usay yu go want lɛ wi rɛdi di Pasova?” 10 I tɛl dɛn se: “We una go na di siti, wan man we de go wit kɔntri pɔt we dɛn kin put wata insay go mit una. Una fala am go insay di os we i de go. 11 Una tɛl di lanlɔd we gɛt di os se, ‘Di Ticha se lɛ wi aks yu se: “We di strenja rum usay a go it di Pasova wit mi disaypul dɛn?”’ 12 Ɛn di man go sho una wan big rum we de ɔp, we i dɔn mek fayn. Una rɛdi di Pasova it de.” 13 So dɛn go ɛn si se ɔltin apin jɔs lɛk aw i bin tɛl dɛn, ɛn dɛn rɛdi fɔ di Pasova.

14 So we di tɛm rich, i sidɔm na* di tebul wit di apɔsul dɛn. 15 Ɛn i tɛl dɛn se: “A rili want fɔ it dis Pasova it wit una bifo a sɔfa; 16 a de tɛl una se a nɔ go it am igen pas te i apin na Gɔd in Kiŋdɔm.” 17 Dɔn i tek wan kɔp we dɛn gi am, i tɛl Gɔd tɛnki ɛn tɔk se: “Tek dis ɛn pas am to unasɛf. 18 A de tɛl una se frɔm naw, a nɔ go drink wayn igen pas te Gɔd in Kiŋdɔm kam.”

19 Dɔn i tek wan bred, tɛl Gɔd tɛnki ɛn brok am. Afta dat, i gi dɛn ɛn tɔk se: “Dis min mi bɔdi, we a go gi fɔ una sek. Una go de du dis fɔ mɛmba mi.” 20 I du di sem tin wit di kɔp afta dɛn it di ivintɛm it ɛn tɔk se: “Dis kɔp min di nyu agrimɛnt we mi blɔd go mek ol wata, we a gɛt fɔ gi fɔ una sek.

21 “Di wan we go ɛp pipul dɛn fɔ arɛst mi de na dis tebul wit mi. 22 Fɔ tru, mɔtalman Pikin de go ɛn ɔl wetin dɛn rayt bɔt am go apin, bɔt bad tin go apin to di pɔsin we go ɛp pipul dɛn fɔ arɛst am!” 23 So dɛn bigin tɔk bɔt uswan pan dɛn go rili du dat.

24 Dɔn dɛn bigin fɔ agyu bak bita bita wan bɔt uswan pan dɛn fil se i impɔtant pas dɛn ɔl. 25 Bɔt Jizɔs tɛl dɛn se: “Di kiŋ dɛn na di neshɔn dɛn de mek lɛk se dɛn na di pipul dɛn masta, ɛn pipul dɛn de kɔl di wan dɛn we de sho se dɛn gɛt pawa oba dɛn Gud Pipul Dɛn. 26 Bɔt una nɔ fɔ tan so. Mek di wan pan una we impɔtant pas una ɔl, bi lɛk di wan we yɔŋ pas ɔl, ɛn mek di wan we de bifo, bi lɛk savant. 27 Di wan we sidɔm na tebul fɔ it* ɛn di wan we de sav, uswan impɔtant pas in kɔmpin? Nɔto di wan we sidɔm na tebul fɔ it?* Bɔt a de na ya wit una as di wan we de sav.

28 “Bɔt, na una dɔn de wit mi we a de sɔfa; 29 ɛn a de mek agrimɛnt wit una, jɔs lɛk aw mi Papa dɔn mek agrimɛnt wit mi fɔ wan kiŋdɔm, 30 so dat una go it ɛn drink na mi tebul insay mi Kiŋdɔm ɛn sidɔm na tron dɛn fɔ jɔj di 12 trayb dɛn na Izrɛl.

31 “Saymɔn, Saymɔn! Setan dɔn pin se i want fɔ fana una lɛk wit.* 32 Bɔt a dɔn rili beg Gɔd so dat yu nɔ go lɛf fɔ gɛt fet; ɛn we yu kam bak, ɛnkɔrej yu brɔda dɛn.” 33 Dɔn Pita tɛl am se: “Masta, a rɛdi fɔ go wit yu na prizin ɛn fɔ day wit yu.” 34 Bɔt i tɛl am se: “Pita, a de tɛl yu se fɔl* nɔ go kro tide pas te yu dinay tri tɛm se yu nɔ no mi.”

35 I tɛl dɛn bak se: “We a bin sɛn una ɛn tɛl una se mek una nɔ kɛr bag fɔ put mɔni, bag fɔ put it, ɛn sandal, ɛnitin de we una bin nid, we una nɔ bin gɛt?” Dɛn se: “Nɔ!” 36 Dɔn i tɛl dɛn se: “Bɔt naw lɛ di wan we gɛt bag fɔ put mɔni tek am, lɛ di wan we gɛt bag fɔ put it tek am, ɛn lɛ di wan we nɔ gɛt sɔd sɛl in klos we i kin wɛr pantap ɛn bay wan. 37 A de tɛl una se wetin dɛn bin rayt go mɔs apin to mi. Dɛn bin rayt se, ‘Dɛn trit am lɛk pɔsin we nɔ de obe lɔ.’ Dis tin de apin to mi.” 38 Dɔn dɛn tɛl am se: “Masta, luk! wi gɛt tu sɔd.” I tɛl dɛn se: “I du so.”

39 We i kɔmɔt de, i go na Mawnt Ɔliv jɔs lɛk aw i dɔn yus fɔ du ɛn di disaypul dɛn fala am. 40 We dɛn rich de, i tɛl dɛn se: “Una go de pre so dat una nɔ go du bad we sɔntin tɛmt una.” 41 I lɛf dɛn ɛn go fa say smɔl.* Dɔn i nil dɔŋ ɛn bigin fɔ pre 42 se: “Papa, if yu want, nɔ mek a drink pan dis kɔp. Bɔt nɔ mek wetin mi want apin, mek wetin yu want apin.” 43 Dɔn wan enjɛl we kɔmɔt na ɛvin apia to am ɛn kɔrej am. 44 Bɔt in at bin so pwɛl dat i kɔntinyu fɔ pre mɔ wit ɔl in at; ɛn in swɛt bin tan lɛk blɔd we i de fɔdɔm na grɔn. 45 We i dɔn fɔ pre, i go to di disaypul dɛn, bɔt i mit dɛn de slip; di pwɛlat mek dɛn taya. 46 I aks dɛn se: “Wetin mek una de slip? Una grap ɛn go de pre, so dat una nɔ go du bad we sɔntin tɛmt una.”

47 We i bin stil de tɔk, bɔku pipul dɛn kam, ɛn na Judas, we na wan pan di 12 apɔsul dɛn, bin de bifo; i kam nia Jizɔs fɔ kis am. 48 Bɔt Jizɔs aks am se: “Judas, na kis yu de yuz fɔ ɛp pipul dɛn fɔ arɛst mɔtalman Pikin?” 49 We di wan dɛn we de nia am si wetin de kam apin, dɛn aks am se: “Masta, lɛ wi yuz wi sɔd?” 50 Wan pan dɛn ivin kɔt di ay prist in slev in rayt yes kɔmɔt. 51 Bɔt Jizɔs se: “I du so.” Ɛn i tɔch di slev in yes ɛn mɛn am. 52 Dɔn Jizɔs aks di edman dɛn fɔ di prist dɛn, di kaptin dɛn na di tɛmpul, ɛn di lida dɛn se: “Una kam wit sɔd ɛn tik dɛn lɛk se na tifman una kam fɔ? 53 A bin de wit una na di tɛmpul ɛvride, bɔt una nɔ ol mi. Bɔt na una tɛm dis, ɛn na tɛm fɔ di pawa we de na dak ples.”

54 Dɔn dɛn arɛst am ɛn kɛr am go na di ay prist in os; bɔt Pita bin de fa de fala dɛn. 55 We dɛn layt faya midul di kɔmpawnd ɛn sidɔm togɛda, Pita bin sidɔm wit dɛn. 56 Bɔt we wan savant gal si am sidɔm nia di faya, i luk am piŋ ɛn tɔk se: “Dis man insɛf bin de wit am.” 57 Bɔt i dinay se: “Uman, a nɔ no am.” 58 I nɔ tu te, wan ɔda pɔsin si am ɛn tɔk se: “Yusɛf na wan pan dɛn.” Bɔt Pita tɛl am se: “Padi, mi nɔto wan pan dɛn.” 59 Afta lɛk wan awa so, wan ɔda man bigin fɔ pin se: “Fɔ tru, dis man insɛf bin de wit am. Infakt, in na Galilian!” 60 Bɔt Pita se: “Padi, a nɔ no wetin yu de tɔk.” As i de tɔk so, fɔl* kro. 61 Na de di Masta tɔn ɛn luk Pita na in yay, dɔn Pita mɛmba we di Masta bin tɛl am se: “Bifo fɔl* kro tide, yu go dinay tri tɛm se yu nɔ no mi.” 62 Ɛn i go na do ɛn kray bita bita wan.

63 Dɔn di man dɛn we bin de gayd Jizɔs bigin fɔ provok am ɛn bɔks am. 64 Dɛn bin de kɔba in fes ɛn aks am se: “If yu na prɔfɛt, tɛl wi, udat nak yu?” 65 Ɛn dɛn tɔk bɔku ɔda bad tin dɛn agens am.

66 We doklin, di lida dɛn fɔ di pipul dɛn, dat na, di edman dɛn fɔ di prist dɛn ɛn Lɔ ticha dɛn, gɛda togɛda ɛn kɛr am go na dɛn Sanɛndrin ɔl ɛn tɔk se: 67 “Tɛl wi if yu na di Krays.” Bɔt i tɛl dɛn se: “Ilɛksɛf a tɛl una, una nɔ go biliv. 68 Pantap dat, if a aks una kwɛstyɔn, una nɔ go ansa. 69 Bɔt frɔm naw, mɔtalman Pikin go sidɔm na Gɔd in pawaful raytan.” 70 Na de dɛn ɔl aks am se: “So, yu na Gɔd in Pikin?” I tɛl dɛn se: “Unasɛf sɛf dɔn tɔk am.” 71 Dɛn se: “Wetin mek wi de luk fɔ ɔda witnɛs dɛn igen? Wisɛf sɛf dɔn yɛri am na in mɔt.”