Akt

5 Bɔt wan man we nem Ananayas, ɛn in wɛf Safayra, sɛl wan land. 2 Bɔt i ayd sɔm pan di mɔni we dɛn pe am, ɛn in wɛf bin no bɔt dat, ɛn i jɔs kɛr sɔm pan di mɔni ɛn put am na di apɔsul dɛn fut. 3 Bɔt Pita aks am se: “Ananayas, wetin mek Setan mek yu gɛt maynd fɔ lay to di oli spirit ɛn ayd sɔm pan di mɔni we dɛn pe yu fɔ di land? 4 Bifo yu sɛl di land, na yu bin gɛt am, nɔto so? Ɛn ivin afta yu sɛl am, na yu an di mɔni bin de, nɔto so? Wetin mek yu tink bɔt dis kayn tin na yu at? Na Gɔd yu lay to, nɔto to mɔtalman.” 5 We Ananayas yɛri dis, i fɔdɔm ɛn day. Ɛn ɔl di wan dɛn we yɛri bɔt dat, fred bad bad wan. 6 Dɔn di yɔŋman dɛn grap, rap am wit klos, ɛn kɛr am go ɛn bɛr am.

7 Afta lɛk tri awa so, in wɛf kam, bɔt i nɔ bin no wetin dɔn apin. 8 Pita aks am se: “Tɛl mi, na ɔl di mɔni dis we una sɛl di land fɔ?” Di uman tɛl am se: “Yɛs, na ɔl dis.” 9 So Pita tɛl am se: “Wetin mek una ɔl tu gri fɔ tɛst Jiova* in spirit? Luk! Di wan dɛn we go bɛr yu man de na di domɔt, ɛn dɛn go kɛr yu go.” 10 Na de di uman fɔdɔm bifo am wantɛm wantɛm ɛn day. We di yɔŋman dɛn kam, dɛn mit i dɔn day. So dɛn kɛr am go ɛn bɛr am nia in man. 11 So di wan ol kɔngrigeshɔn ɛn ɔl di wan dɛn we yɛri bɔt dis, fred bad bad wan.

12 Pantap dat, Gɔd bin kɔntinyu fɔ yuz di apɔsul dɛn fɔ pafɔm bɔku sayn ɛn du bɔku wɔndaful tin dɛn fɔ di pipul dɛn; ɛn dɛn ɔl bin de gɛda na Sɔlɔmɔn in Viranda. 13 Di ɔda wan dɛn nɔ bin gɛt maynd fɔ jɔyn dɛn; bɔt di pipul dɛn bin de tɔk fayn bɔt dɛn. 14 Pantap dat, bɔku bɔku man ɛn uman dɛn bin de ad pan di wan dɛn we bin biliv di Masta. 15 Dɛn ivin briŋ di wan dɛn we sik kam na di men strit dɛn ɛn le dɛn pan smɔl bed dɛn ɛn mata dɛn, so dat we Pita de pas, if na in shado sɛf, i go rich sɔm pan dɛn. 16 Ɛn bɔku pipul dɛn na di siti dɛn we de arawnd Jerusɛlɛm bin de kam wit pipul dɛn we sik ɛn di wan dɛn we gɛt dimɔn dɛn, ɛn di apɔsul dɛn mɛn dɛn ɔl.

17 Bɔt di ay prist ɛn ɔl di wan dɛn we de wit am, we de na di Sadyusi grup, grap; dɛn bin de jɛlɔs bad bad wan. 18 Dɛn ol* di apɔsul dɛn ɛn put dɛn na di siti jel. 19 Bɔt na nɛt, Jiova* in enjɛl opin di prizin domɔt dɛn ɛn pul dɛn kɔmɔt na do. Dɔn i tɛl dɛn se: 20 “Una go tinap na di tɛmpul ɛn kɔntinyu fɔ tɛl di pipul dɛn ɔl di tin dɛn bɔt dis layf.” 21 We dɛn yɛri dis, dɛn go na di tɛmpul na mɔnin ɛn bigin fɔ tich.

We di ay prist ɛn di wan dɛn we de wit am kam, dɛn kɔl ɔl di Sanɛndrin ɛn di Ju lida dɛn na Izrɛl fɔ kam togɛda, ɛn dɛn sɛn na di jel mek dɛn briŋ di apɔsul dɛn bifo dɛn. 22 Bɔt we di ɔfisa dɛn go na di prizin, dɛn nɔ mit dɛn de. So dɛn tɔn bak ɛn tɛl dɛn 23 se: “Wi mit di jel lɔk gud gud wan, ɛn di gaydman dɛn bin tinap na di domɔt dɛn, bɔt we wi opin am, wi nɔ si ɛnibɔdi insay de.” 24 We di kaptin na di tɛmpul ɛn di edman dɛn fɔ di prist dɛn yɛri dis, dɛn kɔnfyus bikɔs dɛn nɔ bin no wetin go apin nɛks. 25 Bɔt sɔmbɔdi kam tɛl dɛn se: “Una luk! Di man dɛn we una put na prizin, tinap na di tɛmpul de tich di pipul dɛn.” 26 Na de di kaptin go wit in ɔfisa dɛn ɛn kam wit di apɔsul dɛn, bɔt dɛn nɔ fos dɛn, bikɔs dɛn bin de fred mek di pipul dɛn nɔ ston dɛn.

27 So dɛn briŋ dɛn kam ɛn mek dɛn tinap bifo di Sanɛndrin. Dɔn di ay prist aks dɛn kwɛstyɔn 28 ɛn se: “Wi dɔn wɔn una strikt wan mek una nɔ tich pipul dɛn bɔt dis nem, bɔt una dɔn mek una tichin de ɔlsay na Jerusɛlɛm, ɛn una rili want fɔ mek dis man in blɔd de na wi ed.” 29 Na de Pita ɛn di ɔda apɔsul dɛn tɛl dɛn se: “Na Gɔd wi fɔ obe as rula, nɔto mɔtalman. 30 Wi gret gret granpa dɛn Gɔd gi layf bak to Jizɔs, we una ɛng pan tik ɛn kil. 31 Gɔd ɔnɔ am bay we i put am na in raytan ɛn mek am Chif Lida ɛn Seviɔ, fɔ mek Izrɛl ripɛnt ɛn fɔ mek Gɔd fɔgiv dɛn sin. 32 Wi si dɛn tin ya, ɛn di oli spirit we Gɔd dɔn gi di wan dɛn we de obe am as rula dɔn ɛp wi fɔ tɔk bɔt dɛn tin ya.”

33 We dɛn yɛri dis, dɛn vɛks bad bad wan ɛn want fɔ kil dɛn. 34 Bɔt wan Faresi na di Sanɛndrin we nem Gameliɛl tinap; in na bin Lɔ ticha we ɔl di pipul dɛn rili rɛspɛkt. I se mek dɛn pul di man dɛn na do fɔ smɔl tɛm. 35 Dɔn i tɛl dɛn se: “Man dɛn na Izrɛl, una tink gud wan bifo una du ɛnitin to dɛn man ya. 36 Fɔ ɛgzampul, bifo dis tɛm, Tiudas grap ɛn tɔk se in na sɔmbɔdi, ɛn na bin lɛk 400 man dɛn so jɔyn in grup. Bɔt sɔm pipul dɛn kil am, ɛn ɔl di wan dɛn we bin de fala am skata, ɛn dɛn nɔ si dɛn igen. 37 Afta am, Judas di Galilian grap di tɛm we dɛn de rɛjista, ɛn i mek pipul dɛn fala am. Da man de sɛf day, ɛn ɔl di wan dɛn we bin de fala am skata. 38 So fɔ dis tin we de apin naw, a de tɛl una mek una nɔ put an pan dɛn man ya dɛn biznɛs; una lɛf dɛn. If dis plan ɔ wok na frɔm mɔtalman, i go stɔp, 39 bɔt if na frɔm Gɔd, una nɔ go ebul fɔ stɔp dɛn. Ɛn i go bi se na Gɔd insɛf sɛf una go de fɛt.” 40 So dɛn lisin to in advays. Dɛn kɔl di apɔsul dɛn ɛn bit dɛn. Dɔn dɛn tɛl dɛn mek dɛn lɛf fɔ tɔk bɔt Jizɔs in nem, ɛn dɛn lɛf dɛn mek dɛn go.

41 So dɛn kɔmɔt bifo di Sanɛndrin; dɛn bin de go ɛn gladi bikɔs na ɔnɔ fɔ sɔfa fɔ in nem. 42 Ɛn dɛn kɔntinyu fɔ tich ɛn tɔk bɔt di gud nyuz bɔt Krays Jizɔs ɛvride na di tɛmpul ɛn frɔm os to os.