Jɔn

5 Afta dat di Ju dɛn bin gɛt wan fɛstival, ɛn Jizɔs go ɔp na Jerusɛlɛm. 2 Na di Ship Get na Jerusɛlɛm, wan ples bin de de we gɛt wata we dɛn kɔl Bɛtzeta insay Ibru. I bin gɛt fayv lɔng viranda dɛn we gɛt pila dɛn. 3 Bɔku bɔku pipul dɛn we sik, we blayn, we nɔ ebul waka fayn, ɛn we dɛn an ɔ fut day* bin ledɔm de. 4 *—— 5 Bɔt wan man bin de de we dɔn sik fɔ 38 ia. 6 We Jizɔs si di man ledɔm de, ɛn i no se di man dɔn sik fɔ lɔng tɛm, i aks am se: “Yu want fɔ wɛl?” 7 Di man tɛl am se: “A nɔ gɛt ɛnibɔdi fɔ put mi insay di wata we i rɔf sa. We a de go, ɔda pɔsin de kɔt bifo mi ɛn go insay.” 8 Jizɔs tɛl am se: “Grap! Tek yu bed ɛn waka.” 9 Di man wɛl wantɛm wantɛm, ɛn i tek in bed ɛn bigin waka.

Da de de na bin di Sabat de. 10 So di Ju dɛn bigin fɔ tɛl di man se: “Tide na Sabat de, ɛn i nɔ rayt fɔ lɛ yu ol bed.” 11 Bɔt di man tɛl dɛn se: “Di sem pɔsin we mek a wɛl na in tɛl mi se, ‘Tek yu bed ɛn waka.’” 12 Dɛn aks am se: “Udat na di pɔsin we tɛl yu se, ‘Tek am ɛn waka’?” 13 Bɔt di man nɔ bin no udat mɛn am, bikɔs Jizɔs bin dɔn go saful wan midul di krawd we bin de de.

14 Leta Jizɔs si am na di tɛmpul ɛn tɛl am se: “Ɛnti yu dɔn wɛl naw, nɔ sin igen, so dat sɔntin we wɔs pas dis nɔ go apin to yu.” 15 Di man go tɛl di Ju dɛn se na Jizɔs bin mek i wɛl. 16 So di Ju dɛn bigin fɔ aras Jizɔs, bikɔs i bin de mɛn pipul dɛn di Sabat de. 17 Bɔt i tɛl dɛn se: “Mi Papa dɔn de wok te naw, ɛn misɛf de kɔntinyu fɔ wok.” 18 Dis mek di Ju dɛn bigin fɛn ɔlkayn we fɔ kil am, bikɔs i nɔ jɔs bin de brok di Sabat lɔ bɔt i bin de tɔk se Gɔd na in Papa, so i de mek insɛf ikwal to Gɔd.

19 So Jizɔs tɛl dɛn se: “Fɔ tru, a de tɛl una se di Pikin nɔ de du ɛnitin bay insɛf, na wetin nɔmɔ i si di Papa de du na in insɛf de du. Ɛnitin we di Papa de du, di Pikin de du am di sem we lɛk aw di Papa du am. 20 Di Papa rili lɛk di Pikin, ɛn i de sho am ɔl di tin dɛn we i de du, ɛn i go sho am tin dɛn we pas dis, so dat una go kɔle. 21 Jɔs lɛk aw di Papa de gi layf bak to di wan dɛn we dɔn day, na so di Pikin insɛf de gi layf bak to udat i want. 22 Di Papa nɔ de jɔj ɛnibɔdi, bɔt i dɔn lɛf di wok fɔ jɔj na di Pikin in an, 23 so dat ɔlman go ɔnɔ di Pikin jɔs lɛk aw dɛn de ɔnɔ di Papa. Ɛnibɔdi we nɔ ɔnɔ di Pikin nɔ de ɔnɔ di Papa we sɛn am. 24 Fɔ tru, a de tɛl una se ɛnibɔdi we yɛri mi wɔd ɛn biliv di Wan we sɛn mi, go gɛt layf we go de sote go, ɛn dɛn nɔ go jɔj am, bɔt i go tan lɛk pɔsin we bin dɔn day ɛn dɔn gɛt layf bak.

25 “Fɔ tru, a de tɛl una se di tɛm de kam, ɛn na naw, we di wan dɛn we dɔn day go yɛri Gɔd in Pikin in vɔys, ɛn di wan dɛn we dɔn pe atɛnshɔn go liv. 26 Jɔs lɛk aw di Papa gɛt layf insay insɛf, na so i dɔn mek di Pikin insɛf gɛt layf insay insɛf. 27 Ɛn i dɔn gi am di rayt fɔ jɔj, bikɔs in na mɔtalman Pikin. 28 Lɛ dis nɔ mek una sɔprayz, bikɔs di tɛm de kam we ɔl di wan dɛn we de na di grev dɛn we Gɔd de mɛmba go yɛri di Pikin in vɔys 29 ɛn kɔmɔt na do; di wan dɛn we bin du gud tin dɛn go gɛt layf bak fɔ liv, ɛn di wan dɛn we bin de du wikɛd tin dɛn go gɛt layf bak fɔ mek dɛn jɔj dɛn. 30 A nɔ ebul du ɛnitin bay misɛf. Jɔs lɛk aw a yɛri na so a de jɔj, ɛn a de jɔj di rayt we, bikɔs nɔto wetin a want a de du, bɔt na wetin di Wan we sɛn mi want na in a de du.

31 “If na mi nɔmɔ de tɔk bɔt misɛf, dat min se wetin a de tɔk nɔto tru. 32 Ɔda pɔsin de we de tɔk bɔt mi, ɛn a no se wetin i de tɔk bɔt mi na tru. 33 Una dɔn sɛn pipul dɛn to Jɔn, ɛn i dɔn tɛl una di tru. 34 Bɔt a nɔ nid mɔtalman fɔ tɛl pipul dɛn bɔt mi, bɔt a de tɔk dɛn tin ya so dat una go sev. 35 Da man de na bin lamp we layt ɛn we de shayn, ɛn fɔ shɔt tɛm una bin rɛdi fɔ gladi pasmak fɔ in layt. 36 Bɔt a gɛt sɔntin we impɔtant pas wetin Jɔn tɔk; di wok dɛn we mi Papa gi mi fɔ du na dɛn a de du, ɛn dɛn de sho se na di Papa sɛn mi. 37 Di Papa we sɛn mi insɛf dɔn tɔk bɔt mi. Una nɔ wande yɛri in vɔys ɔ si aw i tan, 38 ɛn in wɔd nɔ de insay una, bikɔs una nɔ biliv di wan we i sɛn.

39 “Una de tek tɛm wach di Skripchɔ dɛn bikɔs una de tink se na dat go mek una gɛt layf we go de sote go; ɛn na dɛn Skripchɔ dɛn de tɔk bɔt mi. 40 Bɔt stil, una nɔ want fɔ kam to mi fɔ mek una go gɛt layf. 41 A nɔ want mek mɔtalman prez mi, 42 bɔt a rili no se una nɔ lɛk Gɔd. 43 Na mi Papa sɛn mi,* bɔt una nɔ wɛlkɔm mi. If ɔda pɔsin bin kam bay insɛf, una go wɛlkɔm am. 44 Aw una go biliv, we una de prez una kɔmpin dɛn ɛn gri mek una kɔmpin dɛn prez una, bɔt una nɔ de tray fɔ du wetin go mek una gɛt di prez we de kɔmɔt to di wangren Gɔd? 45 Una nɔ fɔ tink se a go tɛl di Papa se una dɔn du bad; na Mozis, we una abop pan, na in go tɛl di Papa se una dɔn du bad. 46 Infakt, if una bin biliv Mozis, una go biliv mi, bikɔs i rayt bɔt mi. 47 Bɔt if una nɔ biliv wetin i rayt, aw una go biliv wetin a se?”