1 Kɔrintians

5 Dɛn se wan pan una de du mami ɛn dadi biznɛs di we aw Gɔd nɔ want,* ɛn na di kayn we ivin ɔda neshɔn dɛn nɔ de du. Dɛn se wan man de liv wit* in papa in wɛf. 2 Una de blɔf wit am? Una nɔ tink se dis na sɔntin we fɔ mek una at pwɛl, so dat una go pul di man we de du dis bad tin kɔmɔt midul una? 3 Pan ɔl we a nɔ de de, mi spirit de wit una, ɛn a dɔn ɔlrɛdi jɔj di man we du dis, lɛk se a rili de wit una. 4 We una gɛda insay wi Masta Jizɔs in nem, ɛn una no se mi spirit de wit una wit wi Masta Jizɔs in pawa, 5 una fɔ an ova da man de to Setan fɔ dɔnawe wit di bɔdi, so dat di spirit go sev insay di Masta in de.

6 Di bost we una de bost nɔ fayn. Una nɔ no se na smɔl yist de mek flawa we dɛn dɔn miks rayz? 7 Una pul di ol yist so dat una go bi nyu flawa we dɛn dɔn miks, bikɔs una nɔ gɛt yist. Fɔ tru, dɛn dɔn sakrifays Krays we na wi yɔŋ Pasova ship. 8 So lɛ wi nɔ du di fɛstival wit ol yist, wit yist we min bad ɛn wikɛd tin, bɔt lɛ wi yuz bred we nɔ gɛt yist we min sɔntin we gud ɛn we na tru.

9 Insay di lɛta we a bin rayt to una, a tɛl una fɔ lɛf fɔ kip kɔmpin* wit pipul dɛn we de du mami ɛn dadi biznɛs di we aw Gɔd nɔ want,* 10 bɔt a nɔ min se una nɔ fɔ ɛva miks wit pipul dɛn na dis wɔl we de du mami ɛn dadi biznɛs di we aw Gɔd nɔ want,* we want ɔltin fɔ dɛnsɛf, we kruk, ɔ we de wɔship aydɔl. If na dat a bin min, pas una go gɛt fɔ kɔmɔt na di wɔl. 11 Bɔt naw a de rayt to una fɔ mek una nɔ kip kɔmpin* wit ɛnibɔdi we na brɔda we de du mami ɛn dadi biznɛs di we aw Gɔd nɔ want,* we want ɔltin fɔ insɛf, we de wɔship aydɔl, we de yuz bad wɔd,* we de drink te i chak, ɔ we kruk, ɛn una nɔ fɔ ivin it wit da kayn pɔsin de. 12 Uswan na mi yon de fɔ jɔj di wan dɛn we de na do? Una nɔ tink se una fɔ jɔj di wan dɛn we de insay, 13 as Gɔd de jɔj di wan dɛn we de na do? “Una pul di pɔsin we wikɛd kɔmɔt midul una.”