Koloshians

4 Una dɛn masta dɛn, una trit una slev dɛn di rayt we ɛn fia wan, bikɔs una no se unasɛf gɛt Masta na ɛvin.

2 Una nɔ taya fɔ pre, una nɔ fɔ slip we i kam pan prea, ɛn una fɔ de tɛl Gɔd tɛnki. 3 As una de du dat, una pre bak fɔ wi, so dat Gɔd go mek we fɔ lɛ wi prich di wɔd ɛn tɔk bɔt di oli sikrit bɔt Krays we a de na prizin fɔ, 4 ɛn fɔ mek a tɔk bɔt am klia wan lɛk aw a fɔ tɔk bɔt am.

5 Una go de du tin* wit sɛns we una de dil wit di wan dɛn we de na do, ɛn una yuz una tɛm di bɛst we.* 6 Una fɔ de tɔk gud wɔd dɛn ɔltɛm; lɛ una wɔd dɛn tan lɛk sɔntin we dɛn sizin wit sɔl, so dat una go no aw fɔ ansa ɔlman.

7 Tikikɔs, we na brɔda we a rili lɛk, we na fetful savant ɛn mi kɔmpin slev we wi ɔl de wok fɔ di Masta, go tɛl una ɔltin bɔt mi. 8 A de sɛn am to una so dat una go no aw wi de du ɛn fɔ lɛ i go kɔrej una. 9 I de kam wit Onɛsimɔs, we na mi fetful brɔda we a rili lɛk, we bin de wit una; dɛn go tɛl una ɔl wetin de apin na ya.

10 Aristakɔs, we na mi kɔmpin prizina, de grit una, ɛn Banabas in kɔzin, we na Mak (di wan we wi tɛl una fɔ wɛlkɔm if i kam to una) insɛf de grit una, 11 ɛn Jizɔs we dɛn de kɔl Jɔstɔs, insɛf de grit una. Dɛn wan ya na sɔm pan di wan dɛn we sakɔmsayz ɛn na dɛn nɔmɔ na mi kɔmpin wokman dɛn fɔ Gɔd in Kiŋdɔm, ɛn dɛn dɔn rili kɔrej mi. 12 Ɛpafras, we na Krays Jizɔs in slev we bin de wit una, de grit una. I de pre siriɔs wan fɔ una ɔltɛm, so dat una go kɔntinyu fɔ tinap tranga wan ɛn rili biliv ɔl di tin dɛn we Gɔd go du. 13 Misɛf sɛf de tɔk fɔ am se i de tray tranga wan fɔ una sek ɛn fɔ di wan dɛn we de na Laodisia ɛn Ayrapolis.

14 Lyuk, we na di dɔktɔ we wi rili lɛk, ɛn Dimas de grit una. 15 Una grit di brɔda dɛn na Laodisia, ɛn una grit Nimfa ɛn di kɔngrigeshɔn we de na in os. 16 Ɛn we una dɔn rid dis lɛta, una arenj fɔ mek dɛn rid am bak na di kɔngrigeshɔn na Laodisia ɛn unasɛf fɔ rid di wan we de kɔmɔt Laodisia. 17 Dɔn una tɛl Akipɔs se: “Pe atɛnshɔn to di wok we di Masta dɔn gi yu, so dat yu go du am.”

18 Mi, Pɔl, de rayt mi gritin wit mi yon an. Una go de mɛmba se a de na prizin. Lɛ Gɔd in spɛshal gudnɛs* de pan una.