2 Kɔrintians

2 A dɔn mekɔp mi maynd nɔ fɔ kam to una igen fɔ mek una at pwɛl. 2 If a mek una at pwɛl, udat go de we go mek a gladi pas di wan we a dɔn mek in at pwɛl? 3 A bin rayt to una so dat we a kam di wan dɛn we fɔ mek a gladi nɔ go mek mi at pwɛl, bikɔs a biliv se di tin we de gi mi gladi-at de gi una ɔl di sem gladi-at. 4 We a bin de rayt to una, i nɔ bin rili izi fɔ mi, mi at bin rili pwɛl, ɛn a bin de kray, bɔt nɔto fɔ mek una at pwɛl, na fɔ mek una no se a rili lɛk una.

5 If ɛnibɔdi dɔn mek pɔsin in at pwɛl, nɔto mi at i dɔn pwɛl, na una ɔl at i dɔn pwɛl; sɔm dɛn at nɔ pwɛl bɛtɛ, bɔt sɔm dɛn at pwɛl bad bad wan—a nɔ go want fɔ yuz ash wɔd dɛn. 6 Di we aw bɔku pipul dɛn dɔn kɔrɛkt am dɔn du fɔ da kayn man de; 7 naw una fɔ fɔgiv am wit ɔl una at ɛn kɔrej am, so dat in at nɔ go pwɛl pasmak te i giv-ɔp. 8 So a de ɛnkɔrej una fɔ sho se una lɛk am. 9 Na dis mek bak a bin rayt to una: fɔ no if una go pruv se una de obe pan ɔltin. 10 If una fɔgiv ɛnibɔdi fɔ ɛnitin, misɛf dɔn fɔgiv am. Infakt, ɛnitin we a dɔn fɔgiv pɔsin fɔ (if a dɔn fɔgiv pɔsin fɔ ɛnitin) na fɔ una sek bifo Krays, 11 so dat Setan nɔ go ebul wi, bikɔs wi no in tatiks* dɛn.

12 We a bin rich na Troas fɔ tɔk bɔt di gud nyuz bɔt di Krays ɛn wan domɔt bin opin fɔ mi fɔ du di Masta in wok, 13 a nɔ bin fil fayn we a nɔ si mi brɔda, Taytɔs. So a tɛl dɛn baybay ɛn lɛf de fɔ go na Masidonia.

14 Bɔt wi tɛl Gɔd tɛnki we de lid wi ɔltɛm lɛk sojaman dɛn we de mach afta dɛn dɔn win, bikɔs wi na Krays in disaypul dɛn. Di tin dɛn we wi no bɔt Gɔd tan lɛk fayn sɛnt, ɛn i de yuz wi fɔ mek pipul dɛn ɔlsay smɛl da fayn sɛnt de! 15 To Gɔd, wi na Krays in fayn sɛnt midul di wan dɛn we de sev ɛn midul di wan dɛn we de day; 16 to di wan dɛn we de day wi na day in smɛl we go mek pɔsin ɛnd-ɔp fɔ day, to di wan dɛn we de sev wi na layf in sɛnt we go mek pɔsin ɛnd-ɔp fɔ gɛt layf. Ɛn udat rili fit fɔ du dɛn tin ya? 17 Na wi, bikɔs wi nɔ de du biznɛs wit* Gɔd in wɔd lɛk aw bɔku pipul dɛn de du, bɔt wi de tɔk fɔ di rayt rizin lɛk pipul dɛn we Gɔd sɛn; wi de du dat bifo Gɔd bikɔs wi na Krays in disaypul dɛn.