Matyu

24 We Jizɔs bin de kɔmɔt na di tɛmpul, in disaypul dɛn kam mit am fɔ sho am di bildin dɛn na di tɛmpul. 2 I tɛl dɛn se: “Una de si ɔl dɛn tin ya, nɔto so? Fɔ tru, a de tɛl una se wan ston nɔ go lɛf pantap in kɔmpin ston we nɔ go fɔdɔm na grɔn.”

3 We i bin sidɔm na Mawnt Ɔliv, di disaypul dɛn kam mit am. Na dɛn nɔmɔ bin de de, ɛn dɛn aks am se: “Tɛl wi, ustɛm dɛn tin ya go bi, ɛn us sayn go sho se yu de wit wi* ɛn di tɛm want fɔ dɔn?”*

4 Jizɔs tɛl dɛn se: “Una tek tɛm mek nɔbɔdi nɔ ful una, 5 bikɔs bɔku pipul dɛn go yuz mi nem ɛn tɔk se, ‘Na mi na di Krays,’ ɛn dɛn go ful bɔku pipul dɛn. 6 Una go yɛri we dɛn de fɛt wɔ ɛn yɛri nyuz bɔt wɔ. Bɔt una nɔ fred bikɔs dɛn tin ya go mɔs apin bɔt di ɛnd nɔ kam yet.

7 “Wan neshɔn go fɛt ɔda neshɔn ɛn wan kiŋdɔm go fɛt ɔda kiŋdɔm, tin fɔ it go shɔtin ɛn at-kwek go apin na difrɛn ples dɛn. 8 Ɔl dɛn tin ya na lɛk we pen de bigin.*

9 “Dɔn pipul dɛn go mek una sɔfa ɛn kil una, ɛn dɛn go et una na ɔl di neshɔn dɛn bikɔs ɔf mi nem. 10 Ɛn bɔku pipul dɛn nɔ go gɛt fet pan Gɔd igen, dɛn go kɔmɔt biɛn dɛn kɔmpin, ɛn dɛn go et dɛn kɔmpin. 11 Bɔku lay lay prɔfɛt dɛn go kam ɛn ful plɛnti pipul dɛn; 12 ɛn bikɔs bɔku pipul dɛn go de brok lɔ, plɛnti pipul dɛn lɔv go ridyus. 13 Bɔt di wan we dɔn bia* te di ɛnd na in go sev. 14 Ɛn dɛn go prich dis gud nyuz bɔt di Kiŋdɔm na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.

15 “So we una si di dɔti tin we de pwɛl tin dɛn, we prɔfɛt Daniɛl bin tɔk bɔt, tinap na di oli ples (lɛ di wan we de rid tink gud wan fɔ ɔndastand dis), 16 lɛ di wan dɛn we de na Judia bigin rɔn go na di mawntin dɛn. 17 Lɛ di man we de ɔntɔp di os nɔ kam dɔŋ fɔ tek di prɔpati dɛn insay in os, 18 ɛn lɛ di man we de na fam nɔ tɔn bak fɔ tek in klos we i kin wɛr pantap. 19 Dɛn tɛm dɛn de, bad tin go apin to dɛn bɛlɛ-uman dɛn ɛn di uman dɛn we de gi pikin bɔbi! 20 Una go de pre mek di tɛm fɔ lɛ una rɔnawe nɔ bi kol sizin ɔ Sabat de; 21 bikɔs da tɛm de big big trɔbul we nɔ wande apin frɔm we Gɔd mek di wɔl te naw go apin, ɛn i nɔ go ɛva apin igen. 22 Infakt, if Gɔd nɔ ridyus di tɛm, nɔbɔdi nɔ go sev; bɔt Gɔd go ridyus di tɛm bikɔs ɔf di wan dɛn we i dɔn pik.

23 “Dɔn if ɛnibɔdi tɛl una se, ‘Luk di Krays na ya,’ ɔ, ‘Luk am yanda!’ una nɔ biliv am, 24 bikɔs lay lay Krays dɛn ɛn lay lay prɔfɛt dɛn go kam, ɛn dɛn go pafɔm pawaful sayn dɛn ɛn du wɔndaful tin dɛn so dat if i pɔsibul, dɛn go ivin ful di wan dɛn we Gɔd dɔn pik. 25 A dɔn wɔn una. 26 So if pipul dɛn tɛl una se, ‘I de na di wildanɛs,’* una nɔ go de; ɔ ‘I de rayt insay di os,’ una nɔ biliv. 27 Jɔs lɛk we laytin de flash frɔm di ist ɛn shayn na di wɛst, na so i go bi lɛk we mɔtalman Pikin de wit una.* 28 Ɛnisay we dedebɔdi* de, na de di igul dɛn kin gɛda.

29 “Jɔs afta di trɔbul we go apin dɛn tɛm dɛn de, di san go dak, di mun nɔ go shayn igen, di sta dɛn go kɔmɔt na ɛvin ɛn fɔdɔm, ɛn di pawaful tin dɛn na ɛvin go shek. 30 Dɔn mɔtalman Pikin in sayn go apia na ɛvin, ɛn ɔl di trayb dɛn na di wɔl go sho se dɛn rili fil am,* ɛn dɛn go si mɔtalman Pikin de kam insay di klawd wit pawa ɛn gret glori. 31 Ɛn i go sɛn in enjɛl dɛn wit lawd trɔmpɛt sawnd, ɛn dɛn go gɛda di wan dɛn we Gɔd dɔn pik frɔm di ist, wɛst, nɔt, ɛn sawt,* frɔm wan ɛnd na ɛvin to di ɔda ɛnd.

32 “Una lan frɔm dis ɛgzampul bɔt di fig tik: As in branch dɛn bigin kɔmɔt ɛn yɔŋ lif dɛn bigin gro, una de no se di sizin we plant kin gro dɔn nia. 33 Semweso, we una si ɔl dɛn tin ya, una no se i de nia di domɔt. 34 Fɔ tru, a de tɛl una se dis jɛnɛreshɔn nɔ go day te ɔl dɛn tin ya apin. 35 Ɛvin ɛn di wɔl nɔ go de igen, bɔt wetin a tɔk go mɔs bi.

36 “Bɔt nɔbɔdi nɔ no di de ɛn di awa, di enjɛl dɛn na ɛvin nɔ no ɛn di Pikin nɔ no, na di Papa wangren no. 37 Jɔs lɛk aw tin bin tan lɛk insay Noa in tɛm, na so di tɛm we mɔtalman Pikin go de wit una* go tan lɛk. 38 Jɔs lɛk aw di pipul dɛn we bin de bifo di Flɔd kam bin de it ɛn drink, man dɛn bin de mared ɛn dɛn bin de gi uman dɛn to man dɛn fɔ mared, te di de we Noa go insay di ak,* 39 ɛn dɛn nɔ notis te di Flɔd kam kil dɛn ɔl, na so i go tan lɛk di tɛm we mɔtalman Pikin go de wit una. 40 Dɔn tu man dɛn go de na fam, dɛn go tek wan ɛn lɛf di ɔda wan. 41 Tu uman dɛn go de gren na grenin ston, dɛn go tek wan ɛn lɛf di ɔda wan. 42 So, una go de wach, bikɔs una nɔ no di de we una Masta de kam.

43 “Bɔt wan tin we una fɔ no na dat if di pɔsin we gɛt di os bin no di tɛm we di tifman de kam na nɛt, i nɔ bin fɔ dɔn slip ɛn alaw di tifman fɔ brok kam insay in os. 44 Bikɔs ɔf dis, unasɛf fɔ sho se una rɛdi, bikɔs mɔtalman Pikin de kam di tɛm we una nɔ tink se i go kam.

45 “Udat rili na di slev we fetful ɛn gɛt sɛns we in masta dɔn pik fɔ de oba in savant dɛn, fɔ gi dɛn, dɛn it di rayt tɛm? 46 Da slev de go gladi if in masta kam mit am de du dat! 47 Fɔ tru, a de tɛl una se i go mek i de oba ɔl wetin i gɛt.

48 “Bɔt if da wikɛd slev de tɔk na in at se, ‘Mi masta de westɛm,’ 49 ɛn i bigin fɔ bit in kɔmpin slev dɛn ɛn it ɛn drink wit di wan dɛn we de chak gud gud wan, 50 da slev de in masta go kam di de we i nɔ de tink se i go kam, ɛn i go kam di tɛm we i nɔ no, 51 ɛn i go pɔnish am bad bad wan ɛn put am usay di ipokrit dɛn de. Na de i go de kray ɛn gren in tit.