Sam

2 Wetin mek di neshɔn dɛn tɔmɛnt

Ɛn di pipul dɛn de tɔk* ɛmti tɔk dɛn?

 2 Di kiŋ dɛn na di wɔl de mek trangayes

Ɛn di bigman dɛn gɛda togɛda as wan grup

Agens Jiova ɛn agens di wan we i dɔn anɔynt.*

 3 Dɛn tɔk se: “Lɛ wi pwɛl dɛn chen dɛn

Ɛn lus dɛn rop dɛn!”

 4 Di Wan we sidɔm na di tron na ɛvin go laf;

Jiova go provok dɛn.

 5 Da tɛm de, i go tɔk to dɛn wit wamat;

I go mek dɛn fred bikɔs in at wam bad bad wan.

 6 I se: “Na misɛf sɛf pik mi kiŋ

Na Zayɔn, we na mi oli mawntin.”

 7 Lɛ a tɔk bɔt wetin Jiova bin dɔn se.

I tɛl mi se: “Yu na mi bɔypikin,

Ɛn tide, a dɔn bi yu papa.

 8 Aks mi, ɛn a go gi di neshɔn dɛn to yu.

A go mek di wan ol wɔl bi yu prɔpati.

 9 Yu go yuz ayɛn staf fɔ dɔnawe wit dɛn,

Ɛn yu go smash dɛn lɛk kɔntri pɔt.”

10 So naw, una dɛn kiŋ dɛn, una sho se una gɛt sɛns;

Una di jɔj dɛn na di wɔl, una gri fɔ tek kɔrɛkshɔn.

11 Fred Jiova we yu de wɔship am,

Sho rɛspɛkt we yu de gladi.

12 Ɔnɔ* Gɔd in bɔypikin. If nɔto dat, Gɔd go vɛks bad bad wan;

I go dɔnawe wit yu,

Bikɔs I de vɛks kwik kwik wan.