Rɛvɛleshɔn

9 Di nɔmba fayv enjɛl blo in trɔmpɛt. Ɛn a si wan sta we bin dɔn kɔmɔt na ɛvin ɛn fɔdɔm na di wɔl, ɛn dɛn gi am di ki fɔ di ol we nɔ gɛt bɔtɔm. 2 I opin di ol we nɔ gɛt bɔtɔm, ɛn smok we tan lɛk di smok we kin kɔmɔt pan big faya we rili wam, kɔmɔt insay di ol. Di smok we kɔmɔt na di ol mek di san ɛn di briz dak. 3 Ɛn grasɔpa* dɛn kɔmɔt insay di smok ɛn kam na di wɔl, ɛn dɛn gi dɛn di sem pawa we di skɔpiɔn dɛn na di wɔl gɛt. 4 Dɛn tɛl dɛn mek dɛn nɔ du bad to di plant dɛn na di wɔl ɔ to di grin plant dɛn ɔ to ɛni tik, bɔt na to di pipul dɛn nɔmɔ we nɔ gɛt Gɔd in stamp na dɛn fɔɛd dɛn fɔ du bad to.

5 Ɛn dɛn nɔ alaw di grasɔpa* dɛn fɔ kil dɛn, bɔt dɛn alaw dɛn fɔ tɔmɛnt dɛn fɔ fayv mɔnt, ɛn di tɔmɛnt we dɛn tɔmɛnt dɛn bin tan lɛk we skɔpiɔn chuk pɔsin. 6 Dɛn tɛm dɛn de, pipul dɛn go de luk fɔ day, bɔt dɛn nɔ go si am; ɛn dɛn go rili want fɔ day, bɔt day go rɔnawe pan dɛn.

7 Ɛn di grasɔpa* dɛn tan lɛk ɔs dɛn we rɛdi fɔ fɛt wɔ; ɛn sɔntin we tan lɛk gold krawn bin de na dɛn ed, ɛn dɛn fes dɛn tan lɛk mɔtalman fes, 8 bɔt dɛn ia tan lɛk uman ia. Ɛn dɛn tit dɛn tan lɛk layɔn tit, 9 ɛn di tin we dɛn wɛr fɔ protɛkt dɛn chɛst tan lɛk ayɛn. Ɛn di sawnd we de kɔmɔt na dɛn wiŋ tan lɛk di sawnd we kin kɔmɔt pan chariɔt dɛn we ɔs dɛn de drɔ we dɛn de rɔn fɔ go fɛt wɔ. 10 Ɛn dɛn gɛt tel dɛn we gɛt tin dɛn we de chuk jɔs lɛk skɔpiɔn dɛn, ɛn na dɛn tel dɛn pawa de fɔ du di pipul dɛn bad fɔ fayv mɔnt. 11 Dɛn gɛt kiŋ we de oba dɛn, dat na, di enjɛl fɔ di ol we nɔ gɛt bɔtɔm. Insay Ibru in nem na Abadɔn,* bɔt insay Grik in nem na Apoliɔn.*

12 Wan trɔbul dɔn pas. Tu mɔ trɔbul de kam afta dɛn tin ya.

13 Di nɔmba siks enjɛl blo in trɔmpɛt. Ɛn a yɛri wan vɔys kɔmɔt na di ɔn dɛn we de na di ɔlta we dɛn mek wit gold, we de bifo Gɔd. 14 Di vɔys tɛl di nɔmba siks enjɛl we gɛt di trɔmpɛt se: “Lus di 4 enjɛl dɛn we dɛn tay na di big riva Yufretis.” 15 Ɛn dɛn lus di 4 enjɛl dɛn we dɔn rɛdi fɔ di awa, di de, di mɔnt, ɛn di ia fɔ kil wan pat pan di pipul dɛn we yu sheb di pipul dɛn to tri pat.

16 Di sojaman dɛn we de rayd ɔs dɛn nɔmba na twɛnti tawzin tayms tɛn tawzin;* A yɛri dɛn nɔmba. 17 Na so di ɔs dɛn ɛn di wan dɛn we bin sidɔm pan dɛn bin luk lɛk insay di vishɔn we a si: Di tin dɛn we dɛn bin wɛr fɔ protɛkt dɛn chɛst bin rɛd lɛk faya, blu lɛk ayasint, ɛn yɛlo lɛk sɔlfɔ; ɛn di ɔs dɛn ed bin tan lɛk layɔn ed; ɛn faya, smok, ɛn sɔlfɔ kɔmɔt insay dɛn mɔt. 18 Dɛn tri bad tin ya, dat na, di faya, di smok, ɛn di sɔlfɔ we kɔmɔt na dɛn mɔt, kil wan pat pan di pipul dɛn we yu sheb dɛn to tri pat. 19 Di ɔs dɛn pawa de na dɛn mɔt ɛn na dɛn tel, dɛn tel dɛn na lɛk snek ɛn dɛn gɛt ed, ɛn na in dɛn de yuz fɔ du bad.

20 Bɔt di ɔda pipul dɛn we dɛn bad tin ya nɔ kil, nɔ bin ripɛnt fɔ di bad tin dɛn we dɛn bin de du; dɛn nɔ lɛf fɔ wɔship di dimɔn dɛn ɛn di aydɔl dɛn we dɛn mek wit gold, silva, kɔpa, ston, ɛn wud, we nɔ de si, yɛri, ɔ waka. 21 Ɛn dɛn nɔ ripɛnt fɔ we dɛn de kil pɔsin, ɔ we dɛn de put an pan juju biznɛs, ɔ we dɛn de du mami ɛn dadi biznɛs di we aw Gɔd nɔ want,* ɔ we dɛn de tif.