2 Pita

3 Di wan dɛn we a rili lɛk, dis na di sɛkɔn lɛta naw we a de rayt to una. Jɔs lɛk di fɔs wan, a want mek una tink klia wan bay we a de mɛmba una 2 se una fɔ mɛmba di tin dɛn we di oli prɔfɛt dɛn bin dɔn tɔk trade* ɛn di lɔ we di Masta ɛn Seviɔ bin dɔn gi tru una apɔsul dɛn. 3 Fɔst-ɔf-ɔl, una no se insay di las dez pipul dɛn go kam we lɛk fɔ provok ɛn dɛn go de provok, dɛn go de du wetin dɛn want 4 ɛn tɔk se: “I bin prɔmis se i go kam bak fɔ de wit wi, we am naw? Bikɔs frɔm di tɛm we wi gret gret granpa dɛn day, ɔltin de kɔntinyu fɔ apin di sem we lɛk aw dɛn bin de apin frɔm di tɛm we Gɔd mek di wɔl.”

5 Na bay wilful dɛn nɔ gri fɔ notis se trade trade ɛvin ɛn wan wɔl bin tinap tranga wan we i kɔmɔt insay wata ɛn we bin de midul wata, tru Gɔd in wɔd; 6 ɛn na dɛn we dɛn de dɛn bin dɔnawe wit di pipul dɛn na di wɔl we flɔd kam. 7 Bɔt tru Gɔd in wɔd bak, dɛn dɔn kip di ɛvin ɛn di wɔl we de naw fɔ faya ɛn dɛn dɔn kip am te di de we Gɔd go jɔj ɛn dɔnawe wit di pipul dɛn we nɔ lɛk am.

8 Bɔt di wan dɛn we a rili lɛk, una nɔ fɔgɛt se to Jiova* wan de tan lɛk wan tawzin ia ɛn wan tawzin ia tan lɛk wan de. 9 Jiova* nɔ slo fɔ du di tin dɛn we i dɔn prɔmis, lɛk aw sɔm pipul dɛn de tink, bɔt i de peshɛnt wit una bikɔs i nɔ want fɔ dɔnawe wit ɛnibɔdi, i want mek ɔlman ripɛnt. 10 Bɔt Jiova* in de go kam lɛk tifman. Da tɛm de, di ɛvin go lɔs wit lawd lawd nɔys, bɔt di tin dɛn we rili ɔt go mɛlt, ɛn di wɔl ɛn di tin dɛn we de insay de go kɔmɔt na do.

11 Bikɔs ɔl dɛn tin ya gɛt fɔ mɛlt dis kayn we, una tink bɔt uskayn pipul dɛn una fɔ bi. Una fɔ bi pipul dɛn we de biev oli we ɛn we de du tin dɛn we de sho se una fetful to Gɔd, 12 as una de wet ɛn tink ɔltɛm bɔt* di tɛm we Jiova* in de go kam, we go mek di ɛvin bɔn na faya ɛn di tin dɛn go mɛlt na di it we rili wam! 13 Bɔt nyu ɛvin ɛn nyu wɔl de we wi de wet fɔ we i bin dɔn prɔmis, ɛn na wetin rayt go de apin insay de.

14 So, di wan dɛn we a rili lɛk, bikɔs una de wet fɔ dɛn tin ya, una du una bɛst so dat we ɔltin dɔn, i go si una as pipul dɛn we nɔ gɛt sten, we nɔ gɛt wan bɔt, ɛn we gɛt pis. 15 Pantap dat, una tek di peshɛnt we wi Masta de peshɛnt as sɔntin we go mek una sev, jɔs lɛk aw wi brɔda, Pɔl, we wi rili lɛk bin rayt to una akɔdin to di sɛns we Gɔd gi am. 16 Infakt, i tɔk bɔt dɛn tin ya na ɔl in lɛta dɛn. Bɔt sɔm tin dɛn insay in lɛta dɛn at fɔ ɔndastand, ɛn na dɛn tin ya di wan dɛn we nɔ no* ɛn di wan dɛn we de chenj chenj kin twis, jɔs lɛk aw dɛn kin du to di ɔda pat dɛn na di Skripchɔ dɛn, we go mek dɛn dɔnawe wit dɛn.

17 So, di wan dɛn we a rili lɛk, bikɔs una dɔn no dis bifo tɛm, una tek tɛm so dat dɛn pipul we nɔ de obe lɔ nɔ go ful una fɔ go di rɔng we ɛn mek una nɔ tinap tranga wan. 18 Bɔt una kɔntinyu fɔ gɛt wi Masta ɛn Seviɔ Jizɔs Krays in spɛshal gudnɛs* mɔ ɛn mɔ ɛn kɔntinyu fɔ no mɔ bɔt am. Mek i gɛt di glori naw ɛn sote go. Emɛn.