Lyuk

11 Wan tɛm, Jizɔs bin de na wan ples de pre. We i dɔn fɔ pre, wan pan in disaypul dɛn tɛl am se: “Masta, sho wi aw fɔ pre, jɔs lɛk aw Jɔn bin sho in disaypul dɛn aw fɔ pre.”

2 So i tɛl dɛn se: “Ɛnitɛm we una de pre, una se: ‘Papa, lɛ ɔlman tek yu nem as sɔntin we oli.* Lɛ yu Kiŋdɔm kam. 3 Gi wi di it we wi nid ɛnide. 4 Ɛn fɔgiv wi fɔ wi sin dɛn bikɔs wisɛf de fɔgiv ɛnibɔdi we sin agens wi;* nɔ alaw tɛmteshɔn fɔ ebul wi.’”

5 Dɔn i tɛl dɛn se: “If wan pan una gɛt padi ɛn yu go mit am midulnɛt ɛn tɛl am se, ‘Padi, lɛnt mi tri bred, 6 bikɔs wan pan mi padi dɛn we kɔmɔt fa dɔn kam to mi ɛn a nɔ gɛt natin fɔ gi am.’ 7 Bɔt yu padi se: ‘Lɛf fɔ mɔna mi. A dɔn lɔk mi domɔt, ɛn mi ɛn mi smɔl pikin dɛn de na bed de slip. A nɔ ebul grap fɔ gi yu ɛnitin.’ 8 A de tɛl una se pan ɔl we i nɔ go grap fɔ gi am ɛnitin ilɛksɛf na in padi, bɔt bikɔs i kɔntinyu fɔ aks, i go grap ɛn gi am ɛnitin we i nid. 9 So a de tɛl una se una kɔntinyu fɔ aks, ɛn una go gɛt wetin una de aks fɔ; una kɔntinyu fɔ luk ɛn una go fɛn; una kɔntinyu fɔ nak, ɛn di domɔt go opin; 10 bikɔs ɛnibɔdi we de aks go gɛt wetin i de aks fɔ, ɛn ɛnibɔdi we de luk go fɛn, ɛn ɛnibɔdi we de nak, di domɔt go opin fɔ am. 11 Fɔ tru, uswan pan una we na papa go gi in bɔypikin snek if i aks am fɔ fish? 12 Ɔ if in pikin aks am fɔ eg, i go gi am skɔpiɔn? 13 So, if una we wikɛd, no aw fɔ gi fayn gift to una pikin dɛn, una nɔ tink se una Papa na ɛvin go gi oli spirit to di wan dɛn we de aks am?”

14 Leta i pul wan dimɔn pan wan man we nɔ ebul tɔk. We i pul di dimɔn pan di man, di man bigin tɔk, ɛn ɔl di pipul dɛn sɔprayz. 15 Bɔt sɔm pan dɛn tɔk se: “Na Biɛlzibɔb* we na di rula fɔ di dimɔn dɛn de gi am pawa fɔ pul dimɔn dɛn.” 16 Ɛn ɔda wan dɛn bin want fɔ tɛst am, so dɛn aks am lɛ i gi dɛn sayn fɔ sho se na Gɔd sɛn am. 17 Bɔt bikɔs Jizɔs bin no wetin dɛn de tink, i tɛl dɛn se: “Ɛni kiŋdɔm we nɔ gɛt wanwɔd nɔ go las, ɛn ɛni os we nɔ gɛt wanwɔd go skata. 18 Semweso, if Setan de fɛt insɛf, aw in kiŋdɔm go las? Una de se na Biɛlzibɔb de gi mi pawa fɔ pul dimɔn dɛn. 19 If na Biɛlzibɔb de gi mi pawa fɔ pul dimɔn dɛn, na udat de gi una pikin dɛn pawa fɔ pul dimɔn? Na dat mek na dɛn go jɔj una. 20 Bɔt if na Gɔd in finga de gi mi pawa fɔ pul dimɔn dɛn, dat min se Gɔd in Kiŋdɔm de na ya ɛn una nɔ ivin no. 21 We trɛnkman we gɛt wɛpɔn de gayd in os, in prɔpati dɛn kin sef. 22 Bɔt we pɔsin we gɛt trɛnk pas am kam fɛt am ɛn bit am, di pɔsin go tek ɔl in wɛpɔn dɛn we i bin abop pan ɛn sheb in prɔpati dɛn. 23 Ɛnibɔdi we nɔ de wit mi de agens mi, ɛn ɛnibɔdi we nɔ de gɛda wit mi de skata.

24 “We dimɔn kɔmɔt insay pɔsin, i kin go pas pas na say dɛn we wata nɔ de fɔ luk fɔ say fɔ blo. If i nɔ fɛn nosay, i de tɔk se, ‘A de go bak na mi os usay a kɔmɔt.’ 25 We i rich de, ɛn i mit di os klin ɛn fayn, 26 i de go tek sɛvin ɔda dimɔn dɛn we wikɛd pas am, ɛn we dɛn go insay di man, dɛn de de. Ɛn di man in kɔndishɔn wɔs pas aw i bin de.”

27 We Jizɔs de tɔk dɛn tin ya, wan uman na di krawd tɔk lawd wan se: “Di uman we bɔn yu ɛn we gi yu bɔbi gɛt gladi-at!” 28 Bɔt Jizɔs se: “Nɔ, na di wan dɛn we de yɛri Gɔd in wɔd ɛn du am na dɛn gɛt gladi-at!”

29 We bɔku pipul dɛn de gɛda, Jizɔs tɔk se: “Dis jɛnɛreshɔn na wikɛd jɛnɛreshɔn, bikɔs dɛn de luk fɔ sayn, bɔt dɛn nɔ go si no sayn pas Jona in sayn. 30 Mɔtalman Pikin go bi sayn fɔ dis jɛnɛreshɔn, jɔs lɛk aw Jona na bin sayn fɔ di pipul dɛn na Ninivɛ. 31 Di tɛm we Gɔd go jɔj ɔlman, di kwin na di sawt go gɛt layf bak wit di pipul dɛn na dis jɛnɛreshɔn, ɛn i go sho se dɛn pipul ya dɔn du bad, bikɔs i bin kɔmɔt na fa fa ples fɔ kam yɛri di sɛns we Sɔlɔmɔn gɛt. Bɔt una luk! pɔsin we pas Sɔlɔmɔn de na ya. 32 Di tɛm we Gɔd go jɔj ɔlman, di pipul dɛn na dis jɛnɛreshɔn ɛn di pipul dɛn na Ninivɛ go gɛt layf bak, ɛn di pipul dɛn na Ninivɛ go sho se dɛn pipul ya dɔn du bad, bikɔs di pipul dɛn na Ninivɛ bin ripɛnt we Jona prich to dɛn. Bɔt una luk! pɔsin we pas Jona de ya. 33 We pɔsin layt lamp, i nɔ de put am ɔnda baskɛt ɔ say we dɛn nɔ de si am; i de put am pan di stand fɔ put lamp, so dat di wan dɛn we de kam insay go si di layt. 34 Di bɔdi in lamp na di yay. We yu yay de pan wan tin,* yu wan ol bɔdi de brayt; bɔt if yu yay milɛ,* yu bɔdi go dak. 35 So na fɔ tek tɛm mek di layt we de insay yu nɔ bi daknɛs. 36 If yu wan ol bɔdi brayt ɛn no pat nɔ de we dak, yu bɔdi go brayt lɛk lamp we de shayn.”

37 We i dɔn tɔk dɛn tin ya, wan Faresi tɛl am fɔ mek i go it wit am. So i go ɛn sidɔm na* di tebul. 38 Bɔt di Faresi bin sɔprayz fɔ si se i nɔ was* bifo i bigin it. 39 Bɔt di Masta tɛl am se: “Una dɛn Faresi dɛn, una de klin di biɛn pat pan kɔp ɛn plet, bɔt na soso wikɛd tin dɛn ɛn want want de insay una at. 40 Una nɔ de tink! Nɔto di sem pɔsin we mek di biɛn pat, mek di insay bak? 41 Una go de gi gift dɛn to po pipul dɛn wit ɔl una at. Ɛn ɔltin bɔt una go klin. 42 Bɔt bad tin go apin to una, dɛn Faresi dɛn, bikɔs una de sheb di mint, ru,* ɛn ɔda vɛjitebul dɛn to tɛn pat ɛn gi di wan pat, bɔt una nɔ de du tin tret ɛn una nɔ lɛk Gɔd! Na tru se una fɔ gi una kɔntribyushɔn, bɔt una nɔ fɔ lɛf fɔ du dɛn ɔda tin dɛn. 43 Bad tin go apin to una dɛn Faresi dɛn, bikɔs una lɛk di frɔnt* sit dɛn na di sinagɔg* dɛn ɛn we pipul dɛn de grit una na makit! 44 Bad tin go apin to una, bikɔs una tan lɛk dɛn grev we pipul dɛn nɔ de si. Dɛn go waka de ɛn nɔ ivin no!”

45 We i tɔk dɛn tin ya, wan pan di wan dɛn we sabi di Lɔ gud gud wan tɛl am se: “Ticha, we yu de tɔk dɛn tin ya, yu de fityay wisɛf.” 46 Na de Jizɔs tɔk se: “Bad tin go apin to una bak we sabi di Lɔ gud gud wan, bikɔs na lod we ebi fɔ tot na in una de put pan pipul dɛn, bɔt una nɔ de tɔch am wit wan pan una finga!

47 “Bad tin go apin to una, bikɔs una de mek grev fɔ di prɔfɛt dɛn, bɔt na una gret gret granpa dɛn kil dɛn! 48 Fɔ tru, una de sho se una no wetin una gret gret granpa dɛn du, ɛn una lɛk wetin dɛn du, bikɔs dɛn kil di prɔfɛt dɛn, bɔt una de mek dɛn grev dɛn. 49 Na dat mek Gɔd we gɛt sɛns tɔk se: ‘A go sɛn prɔfɛt dɛn ɛn apɔsul dɛn to dɛn, bɔt dɛn go kil dɛn ɛn mek sɔm pan dɛn sɔfa, 50 so dat ɔl di prɔfɛt dɛn we dɔn day frɔm we di wɔl bigin, dɛn blɔd go de na dis jɛnɛreshɔn in ed, 51 frɔm Ebɛl in blɔd te to Zakaraya we dɛn kil bitwin di ɔlta ɛn di os.’* Fɔ tru, a de tɛl una se dɛn blɔd go de na dis jɛnɛreshɔn in ed.

52 “Bad tin go apin to una we sabi di Lɔ gud gud wan, bikɔs una ol di ki we fɔ opin di domɔt usay pipul dɛn fɔ lan bɔt Gɔd. Una nɔ de go insay, ɛn una de tray fɔ stɔp di wan dɛn we want fɔ go insay!”

53 We i kɔmɔt de, di Lɔ ticha dɛn ɛn di Faresi dɛn bigin fɔ mɔna am ɛn aks am bɔku bɔku kwɛstyɔn dɛn; 54 dɛn bin de wet fɔ kech am pan wetin i go tɔk.