Ibruz

7 Dis Mɛlkizidɛk, we na kiŋ na Selɛm ɛn prist fɔ Gɔd we De Pantap Ɔlman, mit Ebraam ɛn blɛs am we Ebraam bin de tɔn bak afta i dɔn kil di kiŋ dɛn, 2 ɛn Ebraam sheb ɔl wetin i gɛt to tɛn pat ɛn gi am wan pat. Fɔs, we dɛn translet in nem i min “Kiŋ we De Du Wetin Rayt,” ɛn in na kiŋ bak na Selɛm, we min “Kiŋ we De Briŋ Pis.” 3 Bikɔs i nɔ gɛt papa, i nɔ gɛt mama, dɛn nɔ sho in gret gret granpa dɛn nem, i nɔ gɛt tɛm we in layf bigin ɛn tɛm we in layf dɔn, so i tan lɛk Gɔd in Pikin, i de kɔntinyu fɔ bi prist te go.

4 Dis man bin rili gret bikɔs Ebraam, we de oba di famili, bin sheb di bɛst tin dɛn we i tek pan di wɔ to tɛn pat ɛn gi am wan pat. 5 Na tru se akɔdin to di Lɔ, Livay in bɔypikin dɛn we dɛn gi di prist wok gɛt lɔ se dɛn fɔ tek tayt frɔm di pipul dɛn, dat na, frɔm dɛn brɔda dɛn, pan ɔl we dɛn pipul ya na Ebraam in pikin dɛn.* 6 Bɔt dis man we nɔ kɔmɔt na Livay in famili tek tayt frɔm Ebraam ɛn blɛs di pɔsin we dɛn mek di prɔmis dɛn to. 7 I klia se di wan we gret na in blɛs di wan we i gret pas. 8 Di Livayt dɛn we dɛn bin de gi tayt to na pipul dɛn we de day, bɔt di ɔda man we dɛn bin gi tayt, di Skripchɔ dɛn sho se i de alayv. 9 Pɔsin kin tɔk se ivin Livay, we dɛn bin de gi tayt, dɔn pe tayt tru Ebraam, 10 bikɔs in gret gret granpa nɔ bin dɔn bɔn am yet we Mɛlkizidɛk mit am.

11 If di prist wok we di Livayt dɛn bin de du ebul fɔ mek pipul dɛn pafɛkt (bikɔs dat na sɔntin we bin de pan di Lɔ we Gɔd gi di pipul dɛn), us nid de fɔ mek ɔda prist kam we dɛn se go tan lɛk Mɛlkizidɛk ɛn nɔ go tan lɛk Erɔn? 12 If di prist wok de chenj, dat min se nid de bak fɔ lɛ di Lɔ chenj. 13 Di man we dɛn tɔk dɛn tin ya bɔt kɔmɔt na difrɛn trayb, nɔbɔdi na da trayb de nɔ ɛva wok na di ɔlta. 14 I klia se wi Masta kɔmɔt frɔm Juda, bɔt Mozis nɔ tɔk natin we de sho se prist dɛn go kɔmɔt na da trayb de.

15 Ɛn dis klia mɔ we wan ɔda prist kam we tan lɛk Mɛlkizidɛk, 16 we dɔn bi prist, nɔto bikɔs i kɔmɔt na Livay in trayb jɔs lɛk aw di Lɔ se, bɔt na bikɔs i gɛt di pawa we gi am layf we pɔsin nɔ ebul fɔ ɛnd. 17 Dɛn tɔk bɔt am se: “Yu na prist sote go jɔs lɛk Mɛlkizidɛk.”

18 So dɛn put di lɔ we bin de trade na kɔna bikɔs i wik ɛn i nɔ de wok. 19 Di Lɔ nɔ bin ebul fɔ mek ɛnitin pafɛkt, bɔt di fayn op we Gɔd gi wi ebul fɔ du dat, ɛn i dɔn mek wi de kam nia Gɔd. 20 Ɛn bikɔs Gɔd swɛ we i du dis 21 (fɔ tru, sɔm pipul dɛn dɔn bi prist ɛn Gɔd nɔ swɛ fɔ dɛn, bɔt dis pɔsin bi prist we Gɔd swɛ fɔ am se: “Jiova* dɔn swɛ, ɛn i nɔ go chenj in maynd,* ‘Yu na prist sote go’”), 22 Jizɔs dɔn bi di garanti* fɔ wan agrimɛnt we bɛtɛ. 23 Pantap dat, bɔku pipul dɛn dɔn bi prist afta ɔda pipul dɛn bikɔs day mek dɛn nɔ ebul kɔntinyu fɔ bi prist, 24 bɔt bikɔs i de kɔntinyu fɔ liv sote go, nɔbɔdi nɔ go bi prist afta am. 25 So i ebul bak fɔ sev di wan dɛn we de kam nia Gɔd tru am, pafɛkt wan, bikɔs i de alayv ɔltɛm fɔ beg fɔ dɛn.

26 I fayn fɔ mek wi gɛt da kayn ay prist de we nɔ de kɔmɔt biɛn Gɔd, we inosɛnt, we nɔ dɔti, we difrɛn frɔm sina dɛn, ɛn we de pantap ɛvin. 27 I difrɛn frɔm ɔda ay prist dɛn, bikɔs i nɔ nid fɔ de mek sakrifays ɛvride, fɔs fɔ in yon sin ɛn afta dat fɔ di pipul dɛn yon sin, bikɔs na wan tɛm nɔmɔ i du am we i bin gi insɛf as sakrifays. Ɛn da sakrifays de, de ɛp pipul dɛn sote go. 28 Di Lɔ de pik pipul dɛn we gɛt say dɛn we dɛn wik fɔ bi ay prist, bɔt di tin we dɛn tɔk pan di swɛ afta di Lɔ, pik wan Pikin, we dɔn pafɛkt sote go.