Matyu

12 Da tɛm de, Jizɔs ɛn in disaypul dɛn pas insay wan fam we dɛn plant wit.* Na bin Sabat de. In disaypul dɛn bin angri, so dɛn bigin fɔ pul sɔm pan di wit* ɛn it am. 2 We di Faresi dɛn si dis, dɛn tɛl am se: “Luk! Yu disaypul dɛn de du wetin pɔsin nɔ gɛt rayt fɔ du di Sabat de.” 3 I tɛl dɛn se: “Una nɔ rid bɔt wetin Devid bin du we in ɛn di man dɛn we de wit am bin angri, 4 we i go insay Gɔd in os ɛn it di bred we dɛn put bifo Gɔd, we i bi se in ɛn di man dɛn we de wit am nɔ gɛt rayt fɔ it am, pas di prist dɛn nɔmɔ? 5 Ɔ una nɔ rid na di Lɔ se Sabat de di prist dɛn na di tɛmpul kin brok di Sabat lɔ ɛn stil nɔ du ɛnitin bad? 6 Bɔt a de tɛl una se sɔmbɔdi de ya we pas di tɛmpul. 7 Bɔt if una bin ɔndastand wetin dis min, ‘A nɔ want sakrifays, na sɔri-at a want,’ una nɔ fɔ dɔn kɔndɛm di wan dɛn we nɔ du ɛnitin bad. 8 Mɔtalman Pikin na Masta fɔ di Sabat.”

9 We i kɔmɔt de, i go na dɛn sinagɔg.* 10 Wan man we in an bin day* bin de de! So dɛn aks Jizɔs se: “I rayt fɔ mɛn pɔsin di Sabat de?” Dɛn du dis fɔ fɛn fɔlt pan am. 11 I tɛl dɛn se: “Uswan pan una we gɛt wan ship ɛn da ship de fɔdɔm insay ol Sabat de, we nɔ go pul am kɔmɔt? 12 Mɔtalman valyu pas ship fa fawe! So pɔsin gɛt rayt fɔ du fayn tin di Sabat de.” 13 So i tɛl di man se: “Stret yu an.” Ɛn i stret in an, ɛn in an wɛl jɔs lɛk di ɔda wan. 14 Bɔt di Faresi dɛn go ɛng ed fɔ fɛn we fɔ kil am. 15 We Jizɔs no dis, i kɔmɔt de. Plɛnti pipul dɛn fala am, ɛn i mɛn dɛn ɔl, 16 bɔt i tɛl dɛn strikt wan se lɛ dɛn nɔ mek pipul dɛn no bɔt am, 17 fɔ mek wetin di prɔfɛt Ayzaya bin dɔn tɔk kam tru, we i se:

18 “Mi savant we a chuz, di wan we a rili lɛk, we a* gladi fɔ! A go put mi spirit pan am, ɛn i go mek di neshɔn dɛn no wetin rayt. 19 I nɔ go mek plaba ɔ ala lawd wan, ɛn nɔbɔdi nɔ go yɛri in vɔys na dɛn men strit dɛn. 20 I nɔ go mas ɛni gras we dɔn lɛf smɔl fɔ wida, ɛn i nɔ go ɔt ɛni wik we dɔn lɛf smɔl fɔ ɔt, te i ebul fɔ kɔrɛkt ɔltin we de apin di rɔng we. 21 Fɔ tru, na pan in nem neshɔn dɛn go abop.”

22 Dɔn dɛn kam wit wan man to am we gɛt dimɔn. Di man bin blayn ɛn na bin mumu, ɛn i mɛn am, so di man bin ebul fɔ tɔk ɛn si. 23 So ɔl di pipul dɛn sɔprayz ɛn bigin fɔ aks se: “Nɔto Devid in Pikin dis?” 24 We di Faresi dɛn yɛri dis, dɛn se: “Na Biɛlzibɔb* we na di rula fɔ dimɔn dɛn de gi am pawa fɔ pul dimɔn dɛn.” 25 Bikɔs i no wetin dɛn de tink, i tɛl dɛn se: “Ɛni kiŋdɔm we nɔ gɛt wanwɔd nɔ go las, ɛn ɛni siti ɔ os we nɔ gɛt wanwɔd nɔ go las. 26 Semweso, if Setan de pul Setan, dat min se i de fɛt insɛf, so aw in kiŋdɔm go las? 27 Pantap dat, if na Biɛlzibɔb de gi mi pawa fɔ pul dimɔn dɛn, na udat de gi una pikin dɛn pawa fɔ pul dimɔn dɛn? Na dat mek na dɛn go jɔj una. 28 Bɔt if na Gɔd in spirit de gi mi pawa fɔ pul dimɔn dɛn, dat min se Gɔd in Kiŋdɔm de na ya ɛn una nɔ ivin no. 29 Ɔ aw pɔsin go go insay trɛnkman in os ɛn tek in prɔpati dɛn if i nɔ tay am fɔs? Na dat nɔmɔ go mek i ebul tek di prɔpati dɛn na in os. 30 Ɛnibɔdi we nɔ de wit mi de agens mi, ɛn ɛnibɔdi we nɔ de gɛda wit mi de skata.

31 “Na dis mek a de tɛl una se, Gɔd go fɔgiv ɛnikayn sin ɔ bad tin we pɔsin tɔk agens wetin oli, bɔt i nɔ go fɔgiv ɛnibɔdi we tɔk bad tin agens di spirit. 32 Fɔ ɛgzampul, if ɛnibɔdi tɔk bad bɔt mɔtalman Pikin, Gɔd go fɔgiv am, bɔt if ɛnibɔdi tɔk bad bɔt di oli spirit, Gɔd nɔ go fɔgiv am naw* ɔ tumara bambay.

33 “I lɛf to una fɔ mek di tik fayn ɛn in frut fayn ɔ fɔ mek di tik rɔtin ɛn in frut rɔtin, bikɔs na di frut de sho if di tik fayn ɔ i nɔ fayn. 34 Una dɛn vaypa* pikin dɛn, aw una go tɔk gud tin we una wikɛd? Na wetin ful-ɔp na pɔsin in at na in i de tɔk. 35 Di gud man de tɔk gud tin dɛn, bikɔs i gɛt gud tin dɛn na in at, di bad man de tɔk bad tin dɛn, bikɔs na bad tin dɛn i gɛt na in at. 36 A de tɛl una se Jɔjmɛnt De mɔtalman gɛt fɔ ansa fɔ ɛni tɔk we dɛn tɔk we nɔ gɛt wan bɛnifit; 37 bikɔs na bay wetin yu de tɔk na in go mek Gɔd tɔk se yu de du wetin rayt, ɛn na bay wetin yu de tɔk na in go mek Gɔd kɔndɛm yu.”

38 Fɔ ansa am, sɔm Lɔ ticha ɛn Faresi dɛn tɛl am se: “Ticha, wi want fɔ mek yu sho wi sayn.” 39 I ansa dɛn se: “Jɛnɛreshɔn we wikɛd ɛn we nɔ fetful to Gɔd de kɔntinyu fɔ luk fɔ sayn, bɔt dɛn nɔ go si no sayn pas prɔfɛt Jona in sayn. 40 Jɔs lɛk aw Jona bin de na di big fish in bɛlɛ fɔ tri dez ɛn tri nɛt, na so mɔtalman Pikin go de na di grev fɔ tri dez ɛn tri nɛt. 41 Di tɛm we Gɔd go jɔj ɔlman, di pipul dɛn na dis jɛnɛreshɔn ɛn di pipul dɛn na Ninivɛ go gɛt layf bak, ɛn di pipul dɛn na Ninivɛ go sho se dɛn pipul ya dɔn du bad, bikɔs di pipul dɛn na Ninivɛ bin ripɛnt we Jona prich to dɛn. Bɔt una luk! pɔsin we pas Jona de ya. 42 Di tɛm we Gɔd go jɔj ɔlman, di kwin na di sawt go gɛt layf bak wit di pipul dɛn na dis jɛnɛreshɔn, ɛn i go sho se dɛn pipul ya dɔn du bad, bikɔs i bin kɔmɔt na fa fa ples fɔ kam yɛri di sɛns we Sɔlɔmɔn gɛt. Bɔt una luk! pɔsin we pas Sɔlɔmɔn de na ya.

43 “We dimɔn kɔmɔt insay pɔsin, i kin go pas pas na say dɛn we wata nɔ de fɔ luk fɔ say fɔ blo. If i nɔ fɛn nosay, 44 i de tɔk se: ‘A de go bak na mi os usay a kɔmɔt.’ We i rich de, ɛn i nɔ mit natin insay di os, di os klin ɛn fayn, 45 i de go tek sɛvin difrɛn dimɔn dɛn we wikɛd pas am, ɛn we dɛn go insay di man, dɛn de de, ɛn di man in kɔndishɔn wɔs pas aw i bin de. Na so i go tan lɛk fɔ dis wikɛd jɛnɛreshɔn.”

46 We i de tɔk to di pipul dɛn, in mama ɛn in brɔda dɛn bin tinap na do de fɛn we fɔ tɔk to am. 47 So sɔmbɔdi tɛl am se: “Yu mama ɛn yu brɔda dɛn tinap na do de fɛn we fɔ tɔk to yu.” 48 Jizɔs tɛl di wan we tɔk to am se: “Udat na mi mama, ɛn udat na mi brɔda dɛn?” 49 Ɛn i pɔynt in an to in disaypul dɛn ɛn tɔk se: “Na dɛn wan ya na mi mama ɛn brɔda dɛn! 50 Ɛnibɔdi we de du wetin mi Papa we de na ɛvin want, na in na mi brɔda, mi sista, ɛn mi mama.”