Ɛkliziastis

12 So mɛmba yu Gret Gɔd We Mek Ɔltin di tɛm we yu yɔŋ, bifo di tɛm we trɔbul go kam ɛn di tɛm we yu go se: “A nɔ de ɛnjɔy dɛn”; 2 bifo di san, di layt, di mun, ɛn di sta dɛn dak, ɛn di klawd gɛda bak afta ren dɔn kɔt;* 3 di tɛm we di sikyɔriti dɛn na di os de shek,* ɛn di strɔng man dɛn dɔn bɛn ɛn di uman dɛn lɛf fɔ gren bikɔs dɛn dɔn ridyus, ɛn di ledi dɛn we de luk na di winda si se i dɔn dak; 4 we di domɔt dɛn fɔ go na strit dɔn lɔk, we di sawnd we di grenin ston de pul dɔn lo, we pɔsin de wek bikɔs i yɛri bɔd sawnd, ɛn ɔl di galpikin dɛn we de siŋ nɔ de siŋ lawd wan igen. 5 Dɔn bak, pɔsin de fred ay ples, ɛn denja de na strit. Di almɔn tik pul flawa, di grasɔpa de drɛg insɛf, ɛn di kapa bɛri frut bɔs, bikɔs mɔtalman de waka go na di os usay i gɛt fɔ las, ɛn di wan dɛn we dɛn at pwɛl de waka na strit; 6 bifo dɛn pul di silva rop, ɛn dɛn nyamanyama di gold bol, ɛn dɛn brok di kɔntena we de na di spriŋ,* ɛn dɛn nyamanyama di puli we de na di wɛl. 7 Dɔn di dɔst go bak na grɔn, jɔs lɛk aw i bin de, ɛn di spirit go bak to di tru Gɔd we gi am to mɔtalman.

8 Di ticha se: “Di vaniti we pas ɔl vaniti! Ɔltin na vaniti.”

9 Di ticha nɔ bin jɔs gɛt sɛns bɔt i kɔntinyu fɔ tich di pipul dɛn wetin i sabi, ɛn i tink gud gud wan ɛn faynd awt gud gud wan so dat i go gɛda* bɔku parebul dɛn. 10 Di ticha tray fɔ fɛn fayn wɔd dɛn ɛn rayt kɔrɛkt wɔd dɛn we na tru.

11 Pɔsin we gɛt sɛns in wɔd dɛn tan lɛk shap ayɛn,* ɛn ɔl di tin dɛn we dɛn de tɔk tan lɛk nel we go rayt insay bod; na wan shɛpad tɔk dɛn. 12 Mi pikin, apat frɔm dɛn tin ya, na fɔ tek tɛm: Fɔ mek bɔku buk dɛn nɔ de dɔn ɛn we yu gi bɔku tɛm to dɛn, i de mek di bɔdi taya.

13 Afta ɔl dis, di las wɔd na dat: Fred di tru Gɔd ɛn obe in kɔmandmɛnt dɛn, bikɔs dis na ɔl wetin mɔtalman fɔ du. 14 Di tru Gɔd go jɔj ɔltin we mɔtalman du, ivin ɔl di tin dɛn we ayd, fɔ no if i gud ɔ i bad.