Job

 2 “Udat dis we de kwɛstyɔn di tin dɛn we a dɔn disayd

Ɛn de tɔk we i nɔ no natin?

 3 Duya, rɛdi yusɛf lɛk man;

A go aks yu kwɛstyɔn dɛn, ɛn yu go ansa mi.

 5 Udat tek in mɛzhɔmɛnt, in kes yu sabi,

Ɔ udat strɛch di rop pan am fɔ mɛzhɔ am?

 6 Wetin in pila dɛn tinap pan,

Ɔ udat le di men ston na di kɔna,

 7 We di mɔnin sta dɛn bin de gladi togɛda,

Ɛn Gɔd in bɔypikin* dɛn ɔl bigin fɔ ala wit gladi-at?

 8 Ɛn udat blɔk di si

We i bɔs kɔmɔt usay i de,*

 9 We a kɔba am wit klawd

Ɛn rap am insay tik daknɛs,

10 We a mak usay i fɔ stɔp

Ɛn fiks domɔt ɛn ba dɛn fɔ am,

11 Dɔn a tɔk se, ‘Yu kin rich ya, bɔt yu nɔ fɔ pas;

Na ya yu big big swɛlin fɔ stɔp’?

12 Yu dɔn ɛva tɛl mɔnintɛm fɔ kam ilɛksɛf na wantɛm na yu layf

Ɔ mek ali mɔnin no usay fɔ apia,

13 So dat i go de ɔlsay na di wɔl

Ɛn mek di wikɛd wan dɛn kɔmɔt de?

14 Layt de chenj di wɔl lɛk we sil de chenj kle,

Ɛn in dizayn de sho klia wan lɛk di dizayn we de pan klos.

15 Bɔt wikɛd pipul dɛn layt nɔ go shayn,

Ɛn dɛn an we dɛn es ɔp go brok.

16 Yu dɔn go dɔŋ na di say usay wata de kɔmɔt na di si

Ɔ go waka na di say usay di wata rili dip?

17 Ɛnibɔdi dɔn sho yu di domɔt fɔ go usay dayman dɛn de,

Ɔ yu dɔn si di get fɔ go usay tik daknɛs de?

Ɛn usay daknɛs de,

20 So dat yu go kɛr am go na in eria

Ɛn ɔndastand di rod fɔ go na in os?

21 Yu sabi dis bikɔs dɛn bin dɔn ɔlrɛdi bɔn yu

Ɛn bikɔs yu dɔn te na di wɔl?

22 Yu bin dɔn ɛnta na di stɔ usay dɛn de kip sno,

Ɔ yu dɔn si di stɔ usay dɛn de kip aysblɔk,

23 We a bin dɔn kip fɔ di tɛm we trɔbul go de,

Ɛn fɔ di tɛm we fɛt-fɛt ɛn wɔ go de?

24 Na us pat layt de kɔmɔt,

Ɛn na usay di briz we de kɔmɔt na di ist de blo na di wɔl?

25 Udat mek rod fɔ di flɔd,

Ɛn udat tɛl di tɛnda usay fɔ pas,

26 Fɔ mek ren kam usay nɔbɔdi nɔ de liv,

Na di wildanɛs* usay no mɔtalman nɔ de,

27 Fɔ mek land we dray gɛt wata

Ɛn fɔ mek gras gro de?

28 Yu tink se ren gɛt papa,

Ɔ udat na dyu in papa?

29 Udat in bɛlɛ ays kɔmɔt,

Ɛn udat bɔn di kol we de na di skay

30 We i tan lɛk se di wata kɔba wit ston,

Ɛn pantap di dip wata dɛn dɔn tɔn aysblɔk?

31 Yu ebul tay di rop dɛn na di Kayma sta* dɛn

Ɔ yu ebul lus di rop dɛn na di Kisil sta* dɛn?

32 Yu ebul pul wan sta grup* kɔmɔt na in sizin

Ɔ yu ebul gayd di Ash sta* dɛn togɛda wit in pikin dɛn?

33 Yu sabi di lɔ dɛn we de kɔntrol di tin dɛn we de na di skay,

Ɔ yu ebul mek di lɔ dɛn we de kɔntrol di tin dɛn we de na di skay kɔntrol wetin de apin na di wɔl?

34 Yu ebul ala pan di klawd

Fɔ mek bɔku bɔku wata kɔba yu?

36 Udat gi sɛns to di klawd

Ɔ udat gi ɔndastandin to di tin dɛn we de na di skay?*

37 Udat gɛt sɛns fɔ kɔnt di klawd dɛn,

Ɔ udat ebul fɔ tɔn di wata dɛn we de na di wata ja dɛn na ɛvin

38 We di dɔst tɔn pɔtɔpɔtɔ

Ɛn di dɔti na di wɔl stik togɛda?

39 Yu ebul fɔ fɛn it fɔ layɔn

Ɔ mek yɔŋ layɔn dɛn bɛlful

40 We dɛn ledɔm na dɛn ol

Ɔ we dɛn sɛt ambush na di say usay dɛn de?

41 Udat de fɛn it fɔ di revin bɔd

We in pikin de kray to Gɔd fɔ ɛp

Ɛn de pas pas bikɔs natin nɔ de fɔ it?