Sam

103 Lɛ a prez Jiova;

Lɛ ɔltin we de insay mi, prez in oli nem.

 2 Lɛ a prez Jiova;

Lɛ a nɔ ɛva fɔgɛt ɔl wetin i dɔn du.

 3 I de fɔgiv ɔl yu sin dɛn,

Ɛn i de mɛn ɔl yu sik dɛn.

 4 I pul yu kɔmɔt na di ol.*

In lɔv we nɔ de chenj ɛn in sɔri-at de pan yu lɛk krawn.

 5 Ɔl yu layf, i go satisfay yu wit gud tin dɛn,

So dat yu go kɔntinyu fɔ yɔŋ ɛn strɔng lɛk igul.

 6 Jiova de du tin di rayt we ɛn fia wan

Fɔ ɔl di pipul dɛn we dɛn de sɔprɛs.

 7 I mek Mozis no in we dɛn;

I mek Izrɛl in bɔypikin dɛn no wetin i de du.

 8 Jiova de sho masi ɛn sɔri-at,

I nɔ de vɛks kwik, ɛn i rili gɛt lɔv we nɔ de chenj.

 9 I nɔ go de fɛn fɔlt ɔltɛm,

Ɛn i nɔ go kɔntinyu fɔ vɛks sote go.

10 I nɔ dil wit wi akɔdin to wi sin dɛn;

I nɔ pɔnish wi lɛk aw i fit fɔ pɔnish wi fɔ wi mistek dɛn.

11 Jɔs lɛk aw di ɛvin ay pas di wɔl,

Na so i de rili sho in lɔv we nɔ de chenj to di wan dɛn we de fred am.

12 Jɔs lɛk aw di say we di san de kɔmɔt

De fa frɔm di say we di san de go dɔŋ,

13 Jɔs lɛk aw papa de sho sɔri-at to in pikin dɛn,

Na so Jiova dɔn sho sɔri-at to di wan dɛn we de fred am.

14 I rili sabi aw i mek wi,

I de mɛmba se wi na dɔti.

15 As fɔ mɔtalman, in layf tan lɛk gras.

I de frɛsh lɛk flawa.

16 Bɔt we briz blo, i nɔ go de igen,

I go tan lɛk se i nɔ bin ɛva de de.*

17 Jiova in lɔv we nɔ de chenj

We i de sho to di wan dɛn we nɔ de kɔmɔt biɛn am, go de sote go.

I de du wetin rayt to dɛn pikin dɛn yon pikin dɛn.

18 To di wan dɛn we de kip in agrimɛnt,

To di wan dɛn we de tek tɛm du wetin i kɔmand dɛn.

19 Jiova dɔn mek in tron tinap tranga wan na ɛvin;

In na Kiŋ we de rul oba ɔltin.

20 Una prez Jiova, ɔl una we na in enjɛl dɛn we pawaful,

We de du wetin i se, ɛn we de obe in vɔys.

21 Una prez Jiova, ɔl una we na in sojaman dɛn,

Di wan dɛn we de wok fɔ am ɛn we de du wetin i want.

22 Prez Jiova, ɔl di tin dɛn we i mek,

Na ɔl di ples dɛn usay i de rul.