Sam

107 Tɛl Jiova tɛnki bikɔs i gud;

In lɔv we nɔ de chenj go de sote go.

 2 Lɛ di wan dɛn we Jiova dɔn sev tɔk dis,

Di wan dɛn we i dɔn pul na dɛn ɛnimi in an,

 3 Di wan dɛn we i dɔn gɛda na di land dɛn,

Frɔm di ist ɛn frɔm di wɛst,*

Frɔm di nɔt ɛn frɔm di sawt.

 4 Dɛn bin de waka waka na di wildanɛs,* na di dɛzat;

Dɛn nɔ bin ebul fɔ fɛn rod fɔ go na siti usay dɛn go de.

 5 Dɛn bin angri ɛn tɔsti;

Dɛn bin wik te i lɛf smɔl fɔ lɛ dɛn fent, bikɔs dɛn bin rili taya.

 6 Dɛn kɔntinyu fɔ kray to Jiova di tɛm we dɛn gɛt trɔbul;

I sev dɛn frɔm di bad tin dɛn we de apin to dɛn.

 7 I mek dɛn waka na di rayt rod

So dat dɛn go go na di siti usay dɛn go de.

 8 Lɛ pipul dɛn tɛl Jiova tɛnki fɔ in lɔv we nɔ de chenj

Ɛn fɔ di wɔndaful tin dɛn we i dɔn du fɔ mɔtalman.

 9 I dɔn satisfay di wan dɛn we tɔsti,

Ɛn i dɔn mek di wan dɛn we angri bɛlful wit gud tin dɛn.

10 Sɔm bin de na tik tik daknɛs,

Dɛn na bin prizina dɛn we de sɔfa bikɔs dɛn chen dɛn.

11 Dɛn tɔn dɛn bak pan Gɔd in wɔd;

Dɛn nɔ pe atɛnshɔn to di advays we di Wan We De Pantap Ɔlman gi dɛn.

12 So i alaw dɛn fɔ mek dɛn sɔfa so dat dɛn go ɔmbul;

Dɛn fɔdɔm ɛn nɔbɔdi nɔ bin de fɔ ɛp dɛn.

13 Dɛn kɔl Jiova fɔ ɛp dɛn di tɛm we dɛn gɛt trɔbul.

I sev dɛn frɔm di bad tin we bin de apin to dɛn.

14 I pul dɛn na tik tik daknɛs,

Ɛn i pwɛl pwɛl dɛn chen dɛn.

15 Lɛ pipul dɛn tɛl Jiova tɛnki fɔ in lɔv we nɔ de chenj

Ɛn fɔ di wɔndaful tin dɛn we i dɔn du fɔ mɔtalman.

16 I dɔn brok brok di domɔt dɛn we dɛn mek wit kɔpa,

Ɛn i dɔn kɔt kɔt di ayɛn ba dɛn.

17 Dɛn bin fulish, ɛn dɛn sɔfa bad bad wan

Bikɔs ɔf dɛn sin dɛn ɛn mistek dɛn.

18 Dɛn nɔ bin gɛt apitayt fɔ it ɛnitin igen;

Dɛn bin de nia di domɔt fɔ go usay dayman dɛn de.

19 Dɛn kin kɔl Jiova di tɛm we dɛn gɛt trɔbul;

I kin sev dɛn frɔm di bad tin dɛn we de apin to dɛn.

20 I kin sɛn in wɔd ɛn mɛn dɛn,

Ɛn i bin sev dɛn frɔm di ol dɛn usay dɛn dɔn fɔdɔm.

21 Lɛ pipul dɛn tɛl Jiova tɛnki fɔ in lɔv we nɔ de chenj

Ɛn fɔ di wɔndaful tin dɛn we i dɔn du fɔ mɔtalman.

22 Lɛ dɛn mek sakrifays dɛn fɔ tɛl am tɛnki

Ɛn tɔk bɔt di tin dɛn we i dɔn du wit gladi-at.

23 Di wan dɛn we de travul na si insay ship dɛn,

Di wan dɛn we de travul na big wata dɛn fɔ go du biznɛs,

24 Dɛn dɔn si di tin dɛn we Jiova dɔn du

Ɛn di wɔndaful tin dɛn we i mek we de na di si.

25 Dɛn dɔn si aw we i tɔk, big big briz de blo na di si

We de mek di swɛlin dɛn go ɔp.

26 Dɛn de go ɔp na di skay,

Dɔn dɛn kam dɔŋ na di si.

27 Dɛn staga ɛn fɔdɔm lɛk drɔnkɔman,

Ɛn ɔl wetin dɛn sabi nɔ gɛt wan yus.

28 Dɔn dɛn kɔl Jiova di tɛm we dɛn gɛt trɔbul,

Ɛn i sev dɛn frɔm di bad tin we bin de apin to dɛn.

29 I mek di big big briz lɛf fɔ blo;

I stɔp di swɛlin na di si.

30 Dɛn gladi we dɛn tin dɛn ya stɔp,

Ɛn i kɛr dɛn go usay dɛn bin want fɔ go.

31 Lɛ pipul dɛn tɛl Jiova tɛnki fɔ in lɔv we nɔ de chenj

Ɛn fɔ di wɔndaful tin dɛn we i dɔn du fɔ mɔtalman.

32 Lɛ dɛn prez am usay bɔku bɔku pipul dɛn de,

Ɛn lɛ dɛn prez am usay di bigman dɛn de.

33 I de tɔn riva dɛn to dɛzat,

Ɛn i de mek usay spriŋ wata dɛn* de kɔmɔt tɔn dray dray grɔn.

34 I de tɔn land we de bia bɔku frut dɛn to ɛmti land we gɛt sɔl,

Bikɔs di wan dɛn we de de, de du wikɛd tin dɛn.

35 I de tɔn dɛzat to say we gɛt wata ɛn plant dɛn,

Ɛn i de tɔn dray land to land we gɛt spriŋ wata dɛn.*

36 I de mek di wan dɛn we angri de de,

So dat dɛn go mek wan siti usay dɛn go de.

37 Dɛn mek fam dɛn ɛn plant vayn gadin dɛn

We de bia bɔku bɔku frut dɛn.

38 I blɛs dɛn ɛn mek dɛn bɔku pasmak;

I nɔ alaw mek dɛn kaw dɛn ridyus.

39 Bɔt dɛn smɔl bak ɛn dɛn disgres

Bikɔs ɔf trɔbul, pwɛlat, ɛn di sɔprɛs we dɛn de sɔprɛs dɛn.

40 I vɛks bad bad wan pan di wan dɛn we impɔtant,

Ɛn i mek dɛn waka waka na ɛmti land we nɔ gɛt rod.

41 Bɔt i de protɛkt di po wan dɛn fɔ mek dɛn nɔ sɔprɛs dɛn,

Ɛn i de mek dɛn famili dɛn bɔku lɛk ship dɛn.

42 Di wan dɛn we de du wetin rayt go si dis, ɛn dɛn go gladi;

Bɔt ɔl di wan dɛn we nɔ de du wetin rayt go sɛt dɛn mɔt.

43 Ɛnibɔdi we gɛt sɛns go si dɛn tin dɛn ya,

Ɛn i go tek tɛm tink bɔt di tin dɛn we Jiova dɔn du fɔ sho in lɔv we nɔ de chenj.