Mak

13 We i de kɔmɔt insay di tɛmpul, wan pan in disaypul dɛn tɛl am se: “Ticha, luk we di bildin dɛn ɛn ston dɛn fayn!” 2 Bɔt Jizɔs tɛl am se: “Yu de si dɛn big bildin dɛn ya, nɔto so? Wan ston nɔ go lɛf pantap in kɔmpin ston we nɔ go fɔdɔm na grɔn.”

3 We i bin sidɔm na Mawnt Ɔliv usay i de si di tɛmpul, Pita, Jems, Jɔn, ɛn Andru kam mit am. Na dɛn nɔmɔ bin de de, ɛn dɛn aks am se: 4 “Tɛl wi, ustɛm dɛn tin ya go bi, ɛn us sayn go sho se ɔl dɛn tin ya de kam dɔn?” 5 So Jizɔs bigin fɔ tɛl dɛn se: “Una tek tɛm mek nɔbɔdi nɔ ful una. 6 Bɔku pipul dɛn go yuz mi nem ɛn tɔk se, ‘Na mi dis,’ ɛn dɛn go ful bɔku pipul dɛn. 7 Pantap dat, we una yɛri we dɛn de fɛt wɔ ɛn yɛri nyuz bɔt wɔ, una nɔ fred bikɔs dɛn tin ya gɛt fɔ apin, bɔt di ɛnd nɔ kam yet.

8 “Wan neshɔn go fɛt ɔda neshɔn ɛn wan kiŋdɔm go fɛt ɔda kiŋdɔm; na difrɛn ples dɛn, atkwek go apin ɛn tin fɔ it go shɔtin. Dɛn tin ya na lɛk we pen de bigin.*

9 “Una fɔ tek tɛm. Pipul dɛn go kɛr una go na kɔt dɛn, ɛn dɛn go bit una na sinagɔg* dɛn, dɛn go kɛr una go bifo gɔvnɔ ɛn kiŋ dɛn fɔ mi sek, ɛn una go prich to dɛn. 10 Ɛn dɛn go prich di gud nyuz na ɔl di neshɔn dɛn fɔs. 11 We dɛn de kɛr una go na kɔt, una nɔ wɔri bɔt wetin una go se; una tɔk wetin Gɔd tɛl una fɔ tɔk da tɛm de, bikɔs nɔto una go tɔk, na di oli spirit go tɔk. 12 Apat frɔm dat, brɔda go mek dɛn kil in brɔda, papa go mek dɛn kil in pikin, ɛn pikin dɛn go tɔn agens dɛn mama ɛn papa ɛn dɛn go mek dɛn kil dɛn. 13 Ɛn ɔlman go et una bikɔs ɔf mi nem, bɔt di wan we dɔn bia* te di ɛnd na in go sev.

14 “Bɔt we una si di dɔti tin we de pwɛl tin dɛn tinap usay i nɔ fɔ de (lɛ di wan we de rid tink gud wan fɔ ɔndastand dis), lɛ di wan dɛn we de na Judia bigin rɔn go na di mawntin dɛn. 15 Lɛ di man we de ɔntɔp di os nɔ kam dɔŋ ɔ go insay in os fɔ tek ɛnitin; 16 ɛn lɛ di man we de na fam nɔ tɔn bak fɔ tek in klos we i kin wɛr pantap. 17 Dɛn tɛm dɛn de, bad tin go apin to dɛn bɛlɛ-uman dɛn ɛn di uman dɛn we de gi pikin bɔbi! 18 Una go de pre mek i nɔ bi kol sizin; 19 bikɔs dɛn tɛm dɛn de trɔbul go bi we nɔ wande apin frɔm we Gɔd mek di wɔl te da tɛm de, ɛn i nɔ go ɛva apin igen. 20 Infakt, if Jiova nɔ bin ridyus di tɛm, nɔbɔdi nɔ go sev. Bɔt i dɔn ridyus di tɛm bikɔs ɔf di wan dɛn we i dɔn pik.

21 “Dɔn if ɛnibɔdi tɛl una se: ‘Luk di Krays na ya,’ ɔ, ‘Luk am yanda!’ una nɔ biliv am, 22 bikɔs lay lay Krays dɛn ɛn lay lay prɔfɛt dɛn go kam, ɛn dɛn go pafɔm sayn dɛn ɛn du wɔndaful tin dɛn so dat, if i pɔsibul, dɛn go ful di wan dɛn we Gɔd dɔn pik. 23 So una go de wach. A dɔn tɛl una ɔl dɛn tin ya bifo dɛn apin.

24 “Bɔt dɛn tɛm dɛn de, afta da trɔbul apin, di san go dak, di mun nɔ go shayn igen, 25 di sta dɛn go kɔmɔt na ɛvin ɛn fɔdɔm, ɛn di pawaful tin dɛn na ɛvin go shek. 26 Ɛn pipul dɛn go si mɔtalman Pikin de kam insay di klawd wit pawa ɛn glori. 27 I go sɛn in enjɛl dɛn, ɛn dɛn go gɛda di wan dɛn we Gɔd dɔn pik frɔm di ist, wɛst, nɔt, ɛn sawt;* frɔm di wɔl ɛn di ɛvin.

28 “Una lan frɔm dis ɛgzampul bɔt di fig tik: As in branch dɛn bigin kɔmɔt ɛn yɔŋ lif dɛn bigin gro, una de no se di sizin we plant kin gro dɔn nia. 29 Semweso, we una si dɛn tin ya de apin, una no se i de nia di domɔt. 30 Fɔ tru, a de tɛl una se dis jɛnɛreshɔn nɔ go day te ɔl dɛn tin ya apin. 31 Ɛvin ɛn di wɔl nɔ go de igen, bɔt wetin a tɔk go mɔs bi.

32 “Bɔt nɔbɔdi nɔ no di de ɔ di awa, di enjɛl dɛn na ɛvin nɔ no ɛn di Pikin nɔ no, na di Papa wangren no. 33 Una go de luk, una nɔ slip, bikɔs una nɔ no di tɛm we Gɔd dɔn pik. 34 I jɔs tan lɛk wan man we de travul go na ɔda kɔntri we lɛf in os na in slev dɛn an fɔ lɛ dɛn tek kia ɔf am. I gi ɔlman in yon wok. Dɔn i tɛl di getman fɔ de wach. 35 So una go de wach, bikɔs una nɔ no di tɛm we di masta fɔ di os de kam; una nɔ no if na ivintɛm, midulnɛt, we fɔl de kro, ɔ ali mɔnin, 36 so dat we i kam di tɛm we una nɔ de ɛkspɛkt, i nɔ go mit una de slip. 37 Wetin a de tɛl una, na in a de tɛl ɔlman: Una go de wach.”