Galeshians

5 Na fɔ da kayn fridɔm de Krays fri wi. So una fɔ tinap tranga wan, ɛn una nɔ gri lɛ dɛn mek una slev igen.

2 Mi, Pɔl, de tɛl una se if una mek dɛn sakɔmsayz una, Krays nɔ go bɛnifit una atɔl. 3 A de tɛl una bak se ɛnibɔdi we mek dɛn sakɔmsayz am fɔ obe di wan ol Lɔ. 4 Una we de tray fɔ mek Gɔd tɔk se una de du wetin rayt bikɔs una de du wetin lɔ se, una nɔ de wit Krays igen; una dɔn tɔn una bak pan in spɛshal gudnɛs.* 5 As fɔ wi, wi de rili wet fɔ di tɛm we wi go de du wetin rayt na Gɔd in yay di we we na di spirit nɔmɔ ɛn wi fet go mek dat pɔsibul. 6 Fɔ sakɔmsayz ɔ nɔ fɔ sakɔmsayz nɔ impɔtant to di wan dɛn we gɛt wanwɔd wit Krays Jizɔs, di tin we impɔtant na fet we de mek pɔsin sho lɔv.

7 Una bin de rɔn fayn. Udat dɔn mek una nɔ de kɔntinyu fɔ obe di trut? 8 Di Wan we de kɔl una nɔ de tɔk dis kayn we fɔ mek una biliv. 9 Na smɔl yist de mek ɔl di flawa we dɛn dɔn miks rayz. 10 A biliv se una we gɛt wanwɔd wit di Masta nɔ go tink ɔda kayn we; bɔt di wan we de kam wit prɔblɛm fɔ una go gɛt di jɔjmɛnt we i fɔ gɛt, ilɛk udat i bi. 11 As fɔ mi, mi brɔda dɛn, if a stil de prich se pɔsin fɔ sakɔmsayz, wetin mek dɛn stil de mek a sɔfa? If na so a de du, dat min se di tik we Jizɔs sɔfa pan* nɔ de ɔfɛn pipul dɛn igen. 12 A wish se di man dɛn we de tray fɔ kɔz trɔbul fɔ una go kastret dɛnsɛf.*

13 Mi brɔda dɛn, dɛn kɔl una fɔ gɛt fridɔm; bɔt una nɔ yuz dis fridɔm as chans fɔ du* di tin dɛn we di bɔdi want, bifo dat, lɛ lɔv mek una bi slev fɔ una kɔmpin dɛn. 14 Di wan ol Lɔ de insay wan lɔ we se: “Yu fɔ lɛk yu neba lɛk aw yu lɛk yusɛf.” 15 If una kɔntinyu fɔ bɛt ɛn swɛla una kɔmpin dɛn, una tek tɛm mek una nɔ kil unasɛf.

16 Bɔt a de tɛl una se, Una kɔntinyu fɔ waka aw di spirit want ɛn una nɔ go du ɛnitin we di bɔdi want. 17 Di bɔdi de agens di spirit we i kam pan wetin i want, ɛn di spirit de agens di bɔdi; dɛn ɔl tu de agens dɛnsɛf, so dis de mek una nɔ de du di tin dɛn we una want fɔ du. 18 Pantap dat, if na di spirit de gayd una, una nɔ de fala lɔ.

19 Di tin dɛn we di bɔdi want nɔ at fɔ si, ɛn dɛn tin ya na mami ɛn dadi biznɛs di we aw Gɔd nɔ want,* dɔti layf, tin dɛn we de sho se pɔsin nɔ gɛt wan shem ɛn rɛspɛkt,* 20 fɔ wɔship aydɔl, fɔ put an pan juju biznɛs, fɔ bi ɛnimi to pɔsin, fɔ mek plaba, fɔ jɛlɔs, fɔ vɛks pasmak, fɔ agyu, fɔ mek wanwɔd nɔ de, fɔ mek grup dɛn we de fala wetin mɔtalman de tich, 21 fɔ milɛ, fɔ chak, wayl pati, ɛn tin dɛn lɛk dɛn wan ya. A de wɔn una bifo tɛm bɔt dɛn tin ya, di sem we aw a bin dɔn ɔlrɛdi wɔn una se, di wan dɛn we de du dɛn tin ya nɔ go gɛt Gɔd in Kiŋdɔm.

22 Bɔt di kwaliti* dɛn we di spirit de mek pɔsin gɛt na lɔv, gladi-at, pis, peshɛnt, i de mek pɔsin du gud, gɛt gudat, fet, 23 tek tɛm du tin, ebul kɔntrol insɛf. No lɔ nɔ de we de agens dɛn tin ya. 24 Pantap dat, di wan dɛn we na Krays Jizɔs in yon dɔn nel di bɔdi na di tik wit di tin dɛn we di bɔdi kin rili fil fɔ du ɛn want.

25 If wi de alaw di spirit fɔ gayd wi, lɛ wi kɔntinyu fɔ waka di kɔrɛkt we aw di spirit want. 26 Lɛ wi nɔ mek prawd, lɛ wi nɔ mek kɔmpitishɔn wit wi kɔmpin dɛn, ɛn mek wi nɔ milɛ wi kɔmpin dɛn.