Ibruz

9 Di agrimɛnt we bin de trade gɛt lɔ dɛn fɔ di oli wok ɛn fɔ in oli ples we de na di wɔl. 2 Di fɔs pat pan di tɛnt we dɛn mek bin gɛt di stand we di lamp de pan, di tebul ɛn di bred dɛn we dɛn put bifo Gɔd; ɛn dɛn bin de kɔl de di Ples we Oli. 3 Bɔt biɛn di sɛkɔn kɔtin wan pat bin de na di tɛnt we dɛn de kɔl di Ples we Oli Pas Ɔl. 4 Di kɔntena we dɛn mek wit gold fɔ bɔn insɛns ɛn di agrimɛnt bɔks we dɛn kɔba ɔlsay wit gold bin de de. Di gold jɔg we bin gɛt mana insay, Erɔn in tik we flawa gro pan, ɛn di ston tablɛt dɛn fɔ di agrimɛnt bin de insay di agrimɛnt bɔks; 5 ɛn di wɔndaful chɛrɔb* dɛn bin de pantap am ɛn dɛn shado bin de pan di kɔba we de mek pipul dɛn gɛt pis wit Gɔd. Bɔt naw nɔto di tɛm fɔ tɔk mɔ bɔt dɛn tin ya.

6 Afta dɛn dɔn mek dɛn tin ya dis we, di prist dɛn kin go insay di fɔs pat na di tɛnt ɔltɛm fɔ du di oli wok dɛn; 7 bɔt na di ay prist in wan kin go na di sɛkɔn pat wan tɛm pan ia, ɛn i nɔ de go de if i nɔ go wit blɔd, we i go gi fɔ insɛf ɛn fɔ di sin dɛn we di pipul dɛn kin sin we dɛn nɔ no. 8 So di oli spirit sho klia wan se dɛn nɔ bin dɔn sho ɛnibɔdi yet di rod fɔ go na di oli ples we di fɔs tɛnt bin de. 9 Dis tɛnt na ɛgzampul we de sho wetin de naw, ɛn akɔdin to dis arenjmɛnt, dɛn de gi gift dɛn ɛn mek sakrifays dɛn. Bɔt dɛn tin ya nɔ ebul mek di man we de du oli wok in kɔnshɛns pafɛkt. 10 Dɛn tin ya jɔs gɛt fɔ du wit fud dɛn, drink dɛn, ɛn difrɛn we dɛn fɔ was* lɛk aw di Lɔ se. Na bin lɔ dɛn we gɛt fɔ du wit di bɔdi, ɛn dɛn bin put dɛn te di rayt tɛm rich fɔ sɛtul tin dɛn di rayt we.

11 Bɔt we Krays kam as ay prist fɔ di gud tin dɛn we dɔn ɔlrɛdi apin, i pas na di tɛnt we mɔ impɔtant ɛn we pafɛkt pas di fɔs wan, ɛn na tɛnt we dɛn nɔ mek wit an, dat na, tɛnt we dɛn nɔ mek na dis wɔl. 12 We i go insay di oli ples, i nɔ go wit got dɛn blɔd ɛn yɔŋ man kaw dɛn blɔd, bɔt i go wit in yon blɔd; na wan tɛm nɔmɔ i du am, ɛn i dɔn mek wi fri sote go. 13 If got dɛn blɔd ɛn man kaw dɛn blɔd ɛn yɔŋ kaw in ashis we dɛn bin de sɛn sɛn pan di pipul dɛn we dɔti bin de mek dɛn klin, 14 wetin wi go se bɔt Krays in blɔd, we tru di spirit we go de sote go i gi insɛf as sakrifays we nɔ gɛt wan bɔt to Gɔd, ɛn mek wi gɛt klin kɔnshɛns ɛn pul an pan tin dɛn we nɔ gɛt wan bɛnifit so dat wi go wɔship di Gɔd we de alayv?

15 Na dat mek in na midulman fɔ wan nyu agrimɛnt. I bi midulman so dat di wan dɛn we Gɔd kɔl go gɛt di blɛsin dɛn we i prɔmis we go de sote go. Ɔl dis pɔsibul bikɔs i day fɔ pe di prayz fɔ fri dɛn frɔm dɛn sin dɛn we dɛn gɛt we dɛn bin de pan di agrimɛnt we bin de trade. 16 We dɛn mek agrimɛnt, di mɔtalman we mek di agrimɛnt nid fɔ day, 17 bikɔs agrimɛnt nɔ go ol wata pas pɔsin day, i nɔ go gɛt pawa as lɔng as di mɔtalman we mek am de alayv. 18 So ivin di agrimɛnt we bin de trade, na blɔd mek i bigin wok. 19 We Mozis tɛl ɔl di pipul dɛn bɔt ɔl di lɔ dɛn, i tek di yɔŋ man kaw dɛn blɔd ɛn di got dɛn blɔd, wit wata, brayt rɛd wul, ɛn isɔp* ɛn sɛn sɛn dɛn pan di buk* ɛn pan ɔl di pipul dɛn, 20 ɛn i tɔk se: “Dis na di blɔd we mek di agrimɛnt ol wata we Gɔd dɔn tɛl una fɔ kip to.” 21 Dɔn i sɛn sɛn di blɔd pan di tɛnt ɛn ɔl di kɔntena dɛn fɔ di oli wok.* 22 Akɔdin to di Lɔ, blɔd de klin ɔlmost ɔltin, ɛn if dɛn nɔ tɔn blɔd Gɔd nɔ de fɔgiv sin.

23 So nid bin de fɔ mek di tin dɛn we tinap fɔ di tin dɛn na ɛvin klin dis kayn we, bɔt di tin dɛn we de na ɛvin nid sakrifays dɛn we bɛtɛ fa fawe. 24 Krays nɔ ɛnta na oli ples we dɛn mek wit an, we tan lɛk di rial wan, bɔt na insay ɛvin i go, ɛn apia naw bifo Gɔd* fɔ wi sek. 25 I nɔ du dis fɔ gi insɛf igen ɛn igen, lɛk we di ay prist kin go insay di oli ples ɛni ia wit blɔd we nɔto in yon. 26 If nɔto dat, i bin fɔ dɔn sɔfa bɔku tɛm frɔm we di wɔl bigin. Bɔt naw i dɔn sho insɛf wan tɛm nɔmɔ we di difrɛn tɛm* dɛn want fɔ dɔn, so dat i go yuz di sakrifays we i dɔn sakrifays insɛf fɔ pul sin kɔmɔt. 27 Jɔs lɛk we mɔtalman nɔ de balans day ɛn na wan tɛm nɔmɔ pɔsin de day, dɔn afta dat dɛn jɔj am, 28 na so bak di Krays gi insɛf wan tɛm nɔmɔ fɔ tek bɔku pipul dɛn sin dɛn; ɛn di sɛkɔn tɛm we i go apia, i nɔ go gɛt ɛnitin fɔ du wit sin, ɛn na di wan dɛn we de luk fɔ am wit ɔl dɛn at fɔ mek dɛn sev, na dɛn go si am.