Jɔn

20 Di fɔs de insay di wik, Meri Magdalin kam na di grev* we dɛn mek insay rɔk, na mɔnin we di ples bin stil dak, ɛn i si se dɛn dɔn pul di ston na di grev* we dɛn mek insay rɔk. 2 So i rɔn go mit Saymɔn Pita ɛn di ɔda disaypul we Jizɔs rili lɛk ɛn tɛl dɛn se: “Dɛn dɔn pul di Masta kɔmɔt insay di grev, ɛn wi nɔ no usay dɛn dɔn le am.”

3 Dɔn Pita ɛn di ɔda disaypul lɛf fɔ go na di grev. 4 Dɛn tu bigin fɔ rɔn togɛda, bɔt di ɔda disaypul rɔn fast pas Pita, ɛn na in fɔs rich na di grev. 5 I butu ɛn luk insay ɛn si di linin klos ledɔm de, bɔt i nɔ go insay. 6 Dɔn Saymɔn Pita we bin de biɛn am, insɛf kam ɛn go insay di grev. Ɛn i si di linin klos ledɔm de. 7 Di klos we bin de na in ed nɔ bin de wit di ɔda klos dɛn we dɛn bin rap am wit, bɔt i bin fol ɛn de wansay. 8 Dɔn di ɔda disaypul we fɔs rich na di grev insɛf go insay, ɛn i si ɛn biliv. 9 Bɔt dɛn nɔ ɔndastand yet se di skripchɔ bin se i fɔ rayz frɔm di grev. 10 So di disaypul dɛn go bak na dɛn os dɛn.

11 Bɔt Meri bin tinap na do nia di grev de kray. We i de kray, i butu fɔ luk insay di grev, 12 na de i si tu enjɛl dɛn we wɛr wayt klos sidɔm usay Jizɔs in bɔdi bin de; wan bin sidɔm na in edsay, ɛn di ɔda wan bin sidɔm na in futsay. 13 Dɔn dɛn aks Meri se: “Uman, wetin mek yu de kray?” I tɛl dɛn se: “Dɛn dɔn kɛr mi Masta go, ɛn a nɔ no usay dɛn dɔn le am.” 14 Afta i tɔk dɛn tin ya, i tɔn rawnd ɛn si Jizɔs tinap de, bɔt i nɔ no se na Jizɔs. 15 Jizɔs aks am se: “Uman, wetin mek yu de kray? Udat yu de luk fɔ?” Meri tink se na di man we de kia fɔ di gadin, so i tɛl am se: “If na yu dɔn kɛr am go, tɛl mi usay yu le am sa, ɛn a go go tek am de.” 16 Jizɔs tɛl am se: “Meri!” We Meri tɔn rawnd, i tɔk to am insay Ibru se: “Raboni!” (we min “Ticha!”) 17 Jizɔs tɛl am se: “Lɛf fɔ grip mi, bikɔs a nɔ go ɔp to di Papa yet. Bɔt go to mi brɔda dɛn ɛn tɛl dɛn se, ‘A de go ɔp to mi Papa ɛn una Papa ɛn to mi Gɔd ɛn una Gɔd.’” 18 Meri Magdalin kam ɛn briŋ di nyuz to di disaypul dɛn. I tɛl dɛn se: “A dɔn si di Masta!” Ɛn i tɛl dɛn wetin Jizɔs tɛl am.

19 We ivintɛm kam da sem de de, we na di fɔs de insay di wik, ɛn di domɔt usay di disaypul dɛn bin de bin lɔk bikɔs dɛn bin de fred di Ju dɛn, Jizɔs kam ɛn tinap midul dɛn ɛn tɛl dɛn se: “Mek una gɛt pis!” 20 Afta i tɔk dɛn tin ya, i sho dɛn in an dɛn ɛn in sayd. Dɔn di disaypul dɛn gladi we dɛn si di Masta. 21 Jizɔs tɛl dɛn bak se: “Mek una gɛt pis. Jɔs lɛk aw di Papa sɛn mi, misɛf de sɛn una.” 22 Afta i tɔk dɛn tin ya i blo pan dɛn ɛn tɛl dɛn se: “A gi una oli spirit. 23 If una fɔgiv ɛnibɔdi we dɔn sin, Gɔd dɔn ɔlrɛdi fɔgiv am; if una nɔ fɔgiv ɛnibɔdi we dɔn sin, Gɔd nɔ fɔgiv am.”

24 Bɔt Tɔmɔs we na wan pan di 12 apɔsul dɛn ɛn we dɛn de kɔl Twin, nɔ bin de wit dɛn we Jizɔs kam. 25 So di ɔda disaypul dɛn bin de tɛl am se: “Wi dɔn si di Masta!” Bɔt i tɛl dɛn se: “If a nɔ si di nel in mak na in an dɛn ɛn put mi finga na di nel in mak, ɛn a put mi an na in sayd, a nɔ go ɛva biliv.”

26 Afta et dez, di disaypul dɛn bin de bak insay os, ɛn Tɔmɔs bin de wit dɛn. Pan ɔl we di domɔt dɛn bin lɔk, Jizɔs kam ɛn tinap midul dɛn ɛn tɔk se: “Mek una gɛt pis.” 27 Afta dat i tɛl Tɔmɔs se: “Put yu finga ya ɛn luk mi an dɛn, dɔn tek yu an ɛn put am na mi sayd, ɛn lɛf fɔ dawt bɔt biliv.” 28 Tɔmɔs tɛl am se: “Mi Masta ɛn mi Gɔd!” 29 Jizɔs tɛl am se: “Bikɔs yu dɔn si mi, yu dɔn biliv naw? Di wan dɛn we biliv, pan ɔl we dɛn nɔ si gɛt gladi-at.”

30 Fɔ tru, Jizɔs pafɔm bɔku ɔda sayn dɛn bifo in disaypul dɛn we nɔ rayt na dis skrol. 31 Bɔt dɛn rayt dɛn tin ya so dat una go biliv se Jizɔs na di Krays we na Gɔd in Pikin; ɛn bikɔs una biliv, in nem go mek una gɛt layf.