Rɛvɛleshɔn

22 Ɛn i sho mi wan riva we gɛt wata we de gi layf, we klia lɛk glas, ɛn we de kɔmɔt frɔm Gɔd ɛn di Yɔŋ Ship dɛn tron 2 te go midul di men strit. Tik dɛn we de gi layf bin de gro na di tu say dɛn na di riva. Dɛn tik ya de bia frut dɛn 12 tɛm ɛvri ia, dɛn de bia frut ɛvri mɔnt. Ɛn di lif dɛn na dɛn tik ya na fɔ mɛn di neshɔn dɛn.

3 Ɛn no swɛ nɔ go de igen. Bɔt Gɔd ɛn di Yɔŋ Ship dɛn tron go de insay di siti, ɛn in slev dɛn go wɔship am; 4 ɛn dɛn go si in fes, ɛn in nem go de na dɛn fɔɛd. 5 Ɛn nɛt nɔ go de igen, ɛn dɛn nɔ go nid lamp ɔ san fɔ shayn de, bikɔs Jiova* Gɔd go shayn layt pan dɛn, ɛn dɛn go rul as kiŋ dɛn sote go.

6 I tɛl mi se: “Dɛn wɔd ya na tru ɛn pɔsin kin abop pan am; Jiova,* di Gɔd we de sho in prɔfɛt dɛn wetin fɔ tɔk, dɔn sɛn in enjɛl fɔ sho in slev dɛn di tin dɛn we go apin jisnɔ. 7 Luk! A de kam kwik kwik wan. Ɛnibɔdi we de du di tin dɛn we de na di prɔfɛsi we de insay dis skrol gɛt gladi-at.”

8 Na mi, Jɔn, bin de yɛri ɛn si dɛn tin ya. We a yɛri ɛn si dɛn, a butu na di enjɛl in fut fɔ wɔship am, dat na, di enjɛl we bin de sho mi dɛn tin ya. 9 Bɔt i tɛl mi se: “Tek tɛm! Nɔ du dat! Mi na jɔs slev lɛk yu ɛn yu brɔda dɛn we na prɔfɛt dɛn ɛn di wan dɛn we de du di tin dɛn we de na dis skrol. Wɔship Gɔd.”

10 I tɛl mi bak se: “Nɔ sil di wɔd dɛn na di prɔfɛsi we de insay dis skrol, bikɔs di rayt tɛm dɔn kam nia. 11 Mek di wan we de du wetin nɔ rayt kɔntinyu fɔ de du wetin nɔ rayt, ɛn mek di wan we de du dɔti tin dɛn kɔntinyu fɔ du dɔti tin dɛn; bɔt mek di wan we de du wetin rayt kɔntinyu fɔ du wetin rayt, ɛn mek di wan we oli kɔntinyu fɔ bi oli.

12 “‘Luk! A de kam kwik kwik wan, ɛn di pe we a de gi de wit mi, a go pe ɛnibɔdi akɔdin to wetin i du. 13 Na mi na di Alfa ɛn di Omɛga,* di fɔs ɛn di las, di biginin ɛn di ɛnd. 14 Di wan dɛn we dɔn was dɛn lɔng klos dɛn so dat dɛn go gɛt rayt fɔ go na di tik dɛn we de gi layf ɛn pas na di get dɛn fɔ go insay di siti, gɛt gladi-at. 15 Na do di dɔg* dɛn de ɛn di wan dɛn we de pan juju biznɛs, di wan dɛn we de du mami ɛn dadi biznɛs di we aw Gɔd nɔ want,* di wan dɛn we de kil pɔsin, di wan dɛn we de wɔship aydɔl, ɛn ɔl di wan dɛn we lɛk fɔ de lay.’

16 “‘Na mi, Jizɔs, sɛn mi enjɛl fɔ tɛl una bɔt dɛn tin ya fɔ di kɔngrigeshɔn dɛn. Na mi na Devid in rut ɛn in pikin ɛn di brayt mɔnin sta.’”

17 Ɛn di spirit ɛn di yawo kɔn- tinyu fɔ se, “Kam!” ɛn mek ɛnibɔdi we de yɛri se, “Kam!” ɛn mek ɛnibɔdi we tɔsti kam; mek ɛnibɔdi we want, tek di wata we de gi layf, fɔ fri.

18 “A de tɛl ɔlman we yɛri di wɔd dɛn na di prɔfɛsi we de na dis skrol se: If ɛnibɔdi ad pan dɛn tin ya, Gɔd go ad to am di bad tin dɛn we dɛn rayt na dis skrol; 19 ɛn if ɛnibɔdi pul ɛnitin pan di wɔd dɛn na di skrol we gɛt dis prɔfɛsi, Gɔd go pul wetin i fɔ gɛt na di tik dɛn we de gi layf ɛn na di oli siti, tin dɛn we dɛn rayt bɔt na dis skrol.

20 “Di wan we de tɔk dɛn tin ya se: ‘A de kam kwik kwik wan.’”

“Emɛn! Kam, Masta Jizɔs.”

21 Mek Masta Jizɔs in spɛshal gudnɛs* de wit di oli wan dɛn.