Rɛvɛleshɔn

1 Dis na di tin dɛn we Gɔd sho Jizɔs Krays fɔ sho in slev dɛn di tin dɛn we go apin jisnɔ. Ɛn Jizɔs sɛn in enjɛl ɛn mek i yuz sayn dɛn fɔ sho dɛn tin ya to in slev we na Jɔn, 2 we tɔk bɔt wetin Gɔd tɔk ɛn wetin Jizɔs Krays tɔk, dat na, ɔl di tin dɛn we i si. 3 Di wan we de rid dis prɔfɛsi lawd wan ɛn di wan dɛn we yɛri di wɔd dɛn we de de ɛn we du di tin dɛn we rayt de, gɛt gladi-at, bikɔs di rayt tɛm dɔn nia.

4 Mi, Jɔn, de rayt to di sɛvin kɔngrigeshɔn dɛn we de na Eshia distrikt:

Mek una gɛt spɛshal gudnɛs* ɛn pis frɔm “di Wan we de naw, we bin de, ɛn we de kam,” ɛn frɔm di sɛvin spirit dɛn we de bifo in tron, 5 ɛn frɔm Jizɔs Krays, “di Witnɛs we Fetful,” “di wan we fɔs gɛt layf bak,” ɛn “di Rula fɔ di kiŋ dɛn na di wɔl.”

Mek di wan we lɛk wi ɛn we dɔn yuz in yon blɔd fɔ pul wi pan wi sin dɛn— 6 ɛn i mek wi bi kiŋ dɛn ɛn prist dɛn* to in Gɔd ɛn Papa—mek i gɛt di glori ɛn di pawa sote go. Emɛn.

7 I de kam wit di klawd dɛn, ɛn ɔlman go si am, ivin di wan dɛn we chuk am; ɛn ɔl di trayb dɛn na di wɔl go sho se dɛn rili fil am* bikɔs ɔf am. Dis go mɔs bi. Emɛn.

8 Jiova* Gɔd se, “Na mi na di Alfa ɛn di Omɛga,* di Wan we de naw, we bin de, ɛn we de kam, di Ɔlmayti.”

9 Mi, Jɔn, we na una brɔda, we wi ɔl de sɔfa, we wi ɔl go bi kiŋ, ɛn we wi ɔl de bia bikɔs wi de fala Jizɔs, bin de na di ayland we dɛn de kɔl Patmɔs bikɔs a de tɔk bɔt Gɔd ɛn Jizɔs. 10 Di oli spirit mek a de na di Masta in de, ɛn a yɛri wan lawd vɔys biɛn mi we tan lɛk trɔmpɛt, 11 se: “Rayt na wan skrol wetin yu si ɛn sɛn am to di sɛvin kɔngrigeshɔn dɛn: na Ɛfisɔs, na Smana, na Pagamɔm, na Tayatayra, na Sadis, na Filadɛlfia, ɛn na Laodisia.”

12 A tɔn fɔ si udat de tɔk to mi, ɛn we a tɔn, a si sɛvin gold stand dɛn we lamp de pan, 13 sɔmbɔdi we tan lɛk mɔtalman pikin bin de midul di stand dɛn we gɛt lamp. I wɛr wan lɔng klos we rich dɔŋ in fut ɛn wan gold klos bin tay rawnd in chɛst. 14 Pantap dat, in ed ɛn in ia bin wayt lɛk wayt wul, lɛk sno, ɛn in yay dɛn bin tan lɛk faya we de kech, 15 ɛn in fut dɛn bin tan lɛk fayn kɔpa we de shayn insay wam wam faya, ɛn in vɔys bin tan lɛk di sawnd we bɔku bɔku wata de mek. 16 Ɛn sɛvin sta dɛn bin de na in raytan, ɛn wan shap, lɔng sɔd, we gɛt tu ɛj bin de kɔmɔt na in mɔt, ɛn in fes bin tan lɛk di san we i de shayn brayt brayt wan. 17 We a si am, a fɔdɔm na in fut lɛk pɔsin we dɔn day.

Ɛn i le in raytan pan mi ɛn se: “Nɔ fred. Na mi na di Fɔs ɛn di Las, 18 ɛn di wan we de liv, a bin day, bɔt luk! a de liv sote go, ɛn a gɛt di ki fɔ day ɛn fɔ di Grev.* 19 So rayt di tin dɛn we yu bin si, di tin dɛn we de apin naw, ɛn di tin dɛn we go apin afta dɛn wan ya. 20 Dis na di oli sikrit bɔt di sɛvin sta dɛn we yu bin si na mi raytan ɛn di sɛvin gold stand dɛn we gɛt lamp pan dɛn: Di sɛvin sta dɛn min di enjɛl dɛn na di sɛvin kɔngrigeshɔn dɛn, ɛn di sɛvin stand dɛn we gɛt lamp pan dɛn min di sɛvin kɔngrigeshɔn dɛn.