Mak

9 Apat frɔm dat, i tɛl dɛn se: “Fɔ tru, a de tɛl una se sɔm pan di wan dɛn we tinap ya nɔ go day atɔl pas dɛn si Gɔd in Kiŋdɔm na pawa.” 2 Afta siks dez, Jizɔs tek Pita, Jems, ɛn Jɔn ɛn kɛr dɛn go ɔp wan ay mawntin. Na dɛn nɔmɔ bin de de. Dɔn i chenj na dɛn yay; 3 di klos we i wɛr pantap bigin fɔ shayn. In klos bin wayt pas ɛni klos we pɔsin go bruk klin wan na dis wɔl. 4 Dɔn Ilayja ɛn Mozis apia to dɛn ɛn bigin tɔk wit Jizɔs. 5 Dɔn Pita tɛl Jizɔs se: “Ticha,* i go fayn fɔ mek wi de ya. So lɛ wi bil tri bafa.* Wan fɔ yu, wan fɔ Mozis, ɛn wan fɔ Ilayja.” 6 I nɔ bin no wetin fɔ du, bikɔs dɛn bin de fred bad. 7 Dɔn klawd kɔba dɛn, ɛn dɛn yɛri wan vɔys insay di klawd we tɔk se: “Na mi Pikin dis, di wan we a rili lɛk. Una lisin to am.” 8 We dɛn luk rawnd dɛn, dɛn nɔ si ɛnibɔdi pas Jizɔs.

9 We dɛn de kam dɔŋ di mawntin, i wɔn dɛn siriɔs wan mek dɛn nɔ tɛl ɛnibɔdi wetin dɛn si pas te mɔtalman Pikin gɛt layf bak. 10 So dɛn disayd nɔ fɔ tɛl ɛnibɔdi,* bɔt dɛn bin de tɔk to dɛnsɛf wetin Jizɔs min we i se i go gɛt layf bak. 11 Dɔn dɛn aks am se: “Wetin mek di Lɔ ticha dɛn se Ilayja fɔ kam fɔs?” 12 I tɛl dɛn se: “Na Ilayja de kam fɔs ɛn rɛdi ɔltin; bɔt wetin mek dɛn rayt se mɔtalman Pikin go rili sɔfa, ɛn dɛn nɔ go tek am mek natin? 13 A de tɛl una se Ilayja dɔn kam, ɛn dɛn trit am di we aw dɛn want, jɔs lɛk aw dɛn bin dɔn rayt bɔt am.”

14 We dɛn kam mit di ɔda disaypul dɛn, dɛn si se bɔku bɔku pipul dɛn gɛda rawnd dɛn, ɛn di Lɔ ticha dɛn bin de agyu wit dɛn. 15 Bɔt as di pipul dɛn si am so, dɛn sɔprayz ɛn rɔn go mit am fɔ grit am. 16 So i aks dɛn se: “Wetin una de agyu bɔt?” 17 Wan pɔsin na di krawd tɛl am se: “Ticha, a kam wit mi bɔypikin to yu bikɔs i gɛt dimɔn we dɔn mek i nɔ ebul fɔ tɔk. 18 Ɛnitɛm we di dimɔn ol am, i kin ib am na grɔn, frɔsh kin kɔmɔt na in mɔt, i kin gren in tit, ɛn i nɔ kin gɛt trɛnk. A tɛl yu disaypul dɛn fɔ pul di dimɔn, bɔt dɛn nɔ ebul.” 19 Na de i tɛl dɛn se: “E jɛnɛreshɔn we nɔ gɛt fet, aw lɔng a go de wit una? Aw lɔng a go kɔntinyu fɔ bia wit una? Una briŋ am to mi.” 20 So dɛn briŋ di bɔbɔ to am, bɔt we di dimɔn si Jizɔs, i mek di bɔbɔ bigin kɔnvɔls.* Di bɔbɔ fɔdɔm na grɔn, i bigin rol rol ɛn pul frɔsh na in mɔt. 21 Dɔn Jizɔs aks di bɔbɔ in papa se: “Aw lɔng dis dɔn de apin to am?” Di man se: “Frɔm we i smɔl. 22 Bɔku tɛm i kin ib am na faya ɛn insay wata fɔ kil am. Bɔt if yu ebul du ɛnitin, sɔri fɔ wi ɛn ɛp wi.” 23 Jizɔs tɛl am se: “Wetin mek yu se, ‘If yu ebul’? Ɔltin pɔsibul fɔ di wan we gɛt fet.” 24 Di bɔbɔ in papa ala wantɛm wantɛm se: “A gɛt fet! Ɛp mi mek a gɛt mɔ fet!”

25 Jizɔs notis se di krawd de rɔsh fɔ kam to dɛn, so i tɔk pan di dimɔn se: “Yu dimɔn we dɔn mek di bɔbɔ dɛf ɛn nɔ ebul fɔ tɔk, kɔmɔt insay am ɛn nɔ go insay am igen!” 26 We di dimɔn dɔn mek di bɔbɔ ala ɛn kɔnvɔls* fɔ sɔm tɛm, i kɔmɔt insay am, ɛn i bin tan lɛk se di bɔbɔ dɔn day. So bɔku pipul dɛn bigin fɔ tɔk se: “I dɔn day!” 27 Bɔt Jizɔs ol in an ɛn es am ɔp, dɔn i tinap. 28 So we Jizɔs go insay wan os wit in disaypul dɛn, in disaypul dɛn aks am se: “Wetin mek wi nɔ ebul fɔ pul di dimɔn?” 29 I tɛl dɛn se: “Dis kayn dimɔn ya na prea nɔmɔ de pul am.”

30 Dɛn kɔmɔt de ɛn pas na Galili, bɔt i nɔ bin want mek ɛnibɔdi no. 31 I bin de tich in disaypul dɛn ɛn tɛl dɛn se: “Pɔsin go ɛp pipul dɛn fɔ arɛst mɔtalman Pikin, ɛn dɛn go kil am, bɔt i go gɛt layf bak di tɔd de.”* 32 Bɔt dɛn nɔ ɔndastand wetin i min, ɛn dɛn bin de fred fɔ aks am kwɛstyɔn.

33 We dɛn kam na Kepanyɔm, dɛn go insay wan os. Dɔn Jizɔs aks dɛn se: “Wetin una bin de agyu bɔt na rod?” 34 Dɛn nɔ tɔk natin, bikɔs dɛn bin de kam ɛn agyu bɔt udat impɔtant pas dɛn ɔl. 35 So i sidɔm ɛn kɔl di 12 apɔsul dɛn ɛn tɛl dɛn se: “If ɛnibɔdi want fɔ de bifo, i fɔ put insɛf dɔŋ pas ɔlman ɛn bi ɔlman in savant.” 36 I tek wan smɔl pikin ɛn mek i tinap bifo dɛn, dɔn i put in an rawnd am ɛn tɛl dɛn se: 37 “Ɛnibɔdi we wɛlkɔm smɔl pikin lɛk dis bikɔs ɔf mi nem dɔn wɛlkɔm mi; ɛn ɛnibɔdi we wɛlkɔm mi nɔ jɔs de wɛlkɔm mi, bɔt i de wɛlkɔm di Wan we sɛn mi.”

38 Jɔn tɛl am se: “Ticha, wi si sɔmbɔdi de yuz yu nem fɔ pul dimɔn dɛn, ɛn wi tray fɔ stɔp am, bikɔs i nɔ de fala wi.” 39 Bɔt Jizɔs se: “Una nɔ tray fɔ stɔp am bikɔs ɛnibɔdi we yuz mi nem fɔ du pawaful tin nɔ go ebul fɔ tɔk bad tin bɔt mi kwik kwik wan. 40 Ɛnibɔdi we nɔ de agens wi de fɔ wi. 41 Fɔ tru, a de tɛl una se ɛnibɔdi we gi una wan kɔp wata bikɔs na Krays gɛt una, natin nɔ go mek i nɔ gɛt in blɛsin. 42 Bifo ɛnibɔdi mek wan pan dɛn smɔl wan ya we gɛt fet sin, i go bɛtɛ lɛ dɛn ɛng grenin ston* na in nɛk ɛn ib am na di si.

43 “If yu an de mek yu sin, kɔt am kɔmɔt. I bɛtɛ lɛ yu sev pan ɔl we pat pan yu bɔdi damej pas fɔ gɛt tu an ɛn go na Gɛɛna,* insay da faya we nɔ de ɔt. 44 *—— 45 If yu fut de mek yu sin, kɔt am kɔmɔt. I bɛtɛ lɛ yu sev pan ɔl we yu nɔ ebul fɔ waka fayn pas fɔ lɛ yu gɛt tu fut ɛn dɛn trowe yu na Gɛɛna.* 46 *—— 47 If yu yay de mek yu sin, trowe am. I bɛtɛ lɛ yu go insay Gɔd in Kiŋdɔm wit wan yay pas fɔ mek dɛn trowe yu na Gɛɛna* wit tu yay, 48 usay di tumbu dɛn nɔ de day ɛn di faya nɔ de ɔt.

49 “Faya go mɔs kam pan dɛn pipul ya, jɔs lɛk we pɔsin de tɔn sɔl pan it. 50 Sɔl fayn, bɔt if di sɔl nɔ gɛt tes igen, wetin yu go yuz fɔ mek i gɛt in tes bak? Una fɔ tan lɛk sɔl, ɛn una go gɛt wanwɔd.”