2 Jɔn

1 Mi we na man we dɔn ol* de rayt to di ledi we Gɔd pik ɛn to in pikin dɛn, we a rili lɛk, bɔt nɔto mi nɔmɔ lɛk una, ɔl di wan dɛn we dɔn no di trut lɛk una, 2 bikɔs ɔf di trut we de insay wi ɛn we go de wit wi sote go. 3 Gɔd we na di Papa ɛn Jizɔs Krays, we na di Papa in Pikin, go mek dɛn spɛshal gudnɛs* de pan wi, dɛn go sɔri fɔ wi, ɛn gi wi pis wit trut ɛn lɔv.

4 A gladi pasmak bikɔs a dɔn si se sɔm pan yu pikin dɛn de na di trut,* jɔs lɛk aw di Papa dɔn gi wi lɔ. 5 So ledi, naw a de beg yu fɔ mek wi lɛk wi kɔmpin dɛn. (Nɔto nyu lɔ a de rayt to yu, na wan we wi bin dɔn gɛt frɔm di biginin.) 6 Ɛn fɔ gɛt lɔv min se wi fɔ kɔntinyu fɔ obe in lɔ dɛn. Na dis na di lɔ, jɔs lɛk aw una bin dɔn yɛri frɔm di biginin, se una fɔ kɔntinyu fɔ obe am. 7 Bɔku pipul dɛn we de ful ɔda pipul dɛn de na di wɔl, dat na, di wan dɛn we nɔ gri se Jizɔs Krays kam na di wɔl as mɔtalman. Dis na di pɔsin we de ful pipul dɛn ɛn we de agens Krays.

8 Una tek tɛm so dat una nɔ go lɔs di tin dɛn we wi dɔn wok fɔ gɛt, dɔn una go gɛt di ful bɛnifit. 9 Ɛnibɔdi we de tich tin we nɔ kɔrɛkt ɛn we nɔ de fala Krays in tichin nɔ gɛt wanwɔd wit Gɔd. Di wan we de fala dis tichin na in gɛt wanwɔd wit di Papa ɛn di Pikin. 10 If ɛnibɔdi kam to una ɛn i nɔ kam wit dis tichin, una nɔ wɛlkɔm am na una os dɛn ɔ grit am. 11 Bikɔs di wan we grit am dɔn jɔyn am pan di wikɛd tin dɛn we i de du.

12 Pan ɔl we a gɛt bɔku tin fɔ rayt to una, a nɔ want fɔ du am wit pepa ɛn ink, bɔt a de op fɔ kam to una ɛn tɔk wit una fes-to-fes, so dat una go rili gladi.

13 Yu sista, we Gɔd dɔn pik, in pikin dɛn de grit yu.