2 Tɛsalonians

2 Bɔt, wi brɔda dɛn, as fɔ di tɛm we wi Masta Jizɔs Krays go de wit wi ɛn we wi ɔl go de togɛda wit am, wi de beg una 2 lɛ una nɔ alaw ɛnibɔdi fɔ kɔnfyuz di we aw una de tink kwik kwik wan ɔ wɔri bikɔs una gɛt mɛsej we tan lɛk se na frɔm Gɔd i kɔmɔt ɔ bikɔs dɛn gi una mɛsej ɔ bikɔs una gɛt lɛta we tan lɛk se na wi sɛn am, we de se Jiova* in de dɔn kam.

3 Lɛ nɔbɔdi nɔ ful una ɛnikayn we, bikɔs da de de nɔ go kam, pas di wan we dɔn tɔn agens Gɔd kam fɔs ɛn di man we nɔ de obe lɔ sho insɛf, we na di man we dɛn go dɔnawe wit. 4 In na ɛnimi ɛn i de put insɛf oba ɔl di wan dɛn we pipul dɛn de kɔl gɔd ɔ di tin dɛn we dɛn de wɔship, ɛn dat mek i sidɔm na Gɔd in tɛmpul ɛn de sho insɛf to ɔlman se in na gɔd. 5 Una nɔ mɛmba se di tɛm we a bin stil de wit una, a bin de tɛl una dɛn tin ya?

6 Ɛn naw una no wetin de blɔk am, so dat i go sho insɛf we di rayt tɛm rich. 7 Fɔ tru, dis man we nɔ de obe lɔ ɛn we nɔbɔdi nɔ no yet, dɔn ɔlrɛdi bigin du in wok; bɔt in wok nɔ go kɔmɔt na do, pas te di wan we de blɔk am rayt naw nɔ de igen. 8 Na da tɛm de di man we nɔ de obe lɔ go sho insɛf. Masta Jizɔs go yuz di briz* we de kɔmɔt na in mɔt fɔ pul am kɔmɔt ɛn mek i nɔ de igen di tɛm we i go sho se i de wit wi. 9 Bɔt na di tin dɛn we Setan de du mek di man we nɔ de obe lɔ de ɛn na in de mek i du ɔlkayn pawaful tin ɛn pafɔm sayn dɛn ɛn du wɔndaful tin dɛn fɔ ful pipul dɛn 10 ɛn mek dɛn de yuz ɔlkayn we we nɔ rayt fɔ ful di wan dɛn we de day. Di day we dɛn de day na pɔnishmɛnt fɔ dɛn bikɔs dɛn nɔ bin biliv di tru ɛn lɛk am, so dat dɛn go sev. 11 Na dat mek Gɔd alaw lɛ dɛn ful dɛn wit lay lay tichin so dat dɛn go biliv di tin we na lay, 12 we go mek dɛn jɔj dɛn bikɔs dɛn nɔ biliv di tru, bɔt dɛn gladi fɔ du wetin nɔ rayt.

13 Bɔt wi brɔda dɛn we Jiova* lɛk, wi rili nid fɔ tɛl Gɔd tɛnki ɔltɛm fɔ una bikɔs frɔm di biginin Gɔd dɔn pik una fɔ sev bay we i yuz in spirit fɔ mek una oli ɛn bikɔs una gɛt fet pan di tru. 14 I yuz di gud nyuz we wi de prich fɔ kɔl una fɔ sev, so dat una go gɛt di glori we wi Masta Jizɔs Krays gɛt. 15 So wi brɔda dɛn, una tinap tranga wan ɛn kɔntinyu fɔ biliv di tin dɛn we wi dɔn tich una, ilɛksɛf na mɛsej wi sɛn to una ɔ na lɛta wi rayt. 16 Pantap dat, lɛ wi Masta Jizɔs Krays insɛf ɛn Gɔd, we na wi Papa, we lɛk wi, we dɔn gi wi kɔrej we go de sote go, ɛn we dɔn gi wi wɔndaful op tru in spɛshal gudnɛs,* 17 kɔrej una ɛn mek una tinap tranga wan so dat una go de tɔk ɛn du gud tin dɛn ɔltɛm.