Matyu

23 Dɔn Jizɔs tɛl di krawd ɛn in disaypul dɛn se: 2 “Di Lɔ ticha dɛn ɛn di Faresi dɛn dɔn sidɔm na Mozis in sidɔmples we nɔbɔdi nɔ tɛl dɛn fɔ du dat. 3 So una du ɔl wetin dɛn tɛl una, bɔt una nɔ du wetin dɛn de du, bikɔs dɛn de tɔk, bɔt dɛn nɔ de du wetin dɛn de tɔk. 4 Dɛn de tay ebi lod dɛn ɛn put dɛn na pipul dɛn sholda, bɔt dɛn nɔ want fɔ tɔch am wit dɛn finga. 5 Ɛnitin we dɛn de du, na fɔ lɛ mɔtalman si dɛn. Di bɔks we gɛt skripchɔ dɛn insay, we dɛn kin wɛr fɔ protɛkt dɛnsɛf, dɛn de mek am lɛ i big, ɛn dɛn kin mek di ɛj pat pan dɛn klos lɔng. 6 Dɛn lɛk fɔ sidɔm na di bɛst ples we dɛn kin go it ivintɛm it, ɛn dɛn lɛk di frɔnt* sit dɛn na di sinagɔg* dɛn, 7 ɛn we pipul dɛn de grit dɛn na makit ɛn kɔl dɛn Ticha.* 8 Bɔt una nɔ mek pipul dɛn kɔl una Ticha,* bikɔs na wangren Ticha una gɛt, ɛn una ɔl na brɔda dɛn. 9 Pantap dat, una nɔ kɔl ɛnibɔdi papa na dis wɔl, bikɔs na wangren Papa una gɛt, dat na di Wan we de na ɛvin. 10 Ɛn una nɔ mek pipul dɛn kɔl una lida, bikɔs na wangren Lida una gɛt, we na Krays. 11 Di wan we impɔtant pas una ɔl fɔ bi una savant. 12 Ɛnibɔdi we es insɛf ɔp, Gɔd go put am dɔŋ, bɔt ɛnibɔdi we put insɛf dɔŋ, Gɔd go es am ɔp.

13 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de lɔk di Kiŋdɔm we de na ɛvin bifo pipul dɛn. Una nɔ de go insay, ɛn una nɔ de alaw di wan dɛn we want fɔ go insay fɔ go de. 14 *——

15 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de travul na si ɛn land fɔ mek wan pɔsin jɔyn di Ju rilijɔn, ɛn we i jɔyn am, una de mek i pɔsibul fɔ lɛ i go na Gɛɛna,* ɛn i go du mɔ bad pas una.

16 “Bad tin go apin to una we blayn bɔt want fɔ sho ɔda pipul dɛn di rod. Una de se, ‘If ɛnibɔdi swɛ to di tɛmpul, i nɔ min natin; bɔt if ɛnibɔdi swɛ to di gold na di tɛmpul, i fɔ du wetin i dɔn swɛ se i go du.’ 17 Una ful ɛn blayn! Uswan impɔtant mɔ, di gold ɔ di tɛmpul we dɔn mek di gold oli? 18 Pantap dat, una tɔk bak se, ‘If ɛnibɔdi swɛ to di ɔlta, i nɔ min natin; bɔt if ɛnibɔdi swɛ to di gift we de pan di ɔlta, i fɔ du wetin i dɔn swɛ se i go du.’ 19 Una blayn! Uswan impɔtant mɔ, di gift ɔ di ɔlta we de mek di gift oli? 20 So ɛnibɔdi we swɛ to di ɔlta de swɛ to di ɔlta ɛn ɔltin we de pan am; 21 ɛn ɛnibɔdi we swɛ to di tɛmpul de swɛ to di tɛmpul ɛn di Wan we de na di tɛmpul; 22 ɛn ɛnibɔdi we swɛ to ɛvin de swɛ to Gɔd in tron ɛn to di Wan we sidɔm pan am.

23 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de sheb di mint, dil, ɛn kumin to tɛn pat ɛn gi wan pat, bɔt una nɔ de pe atɛnshɔn to di tin dɛn we rili impɔtant na di Lɔ, we na, fɔ du tin tret, fɔ gɛt sɔri-at, ɛn fɔ fetful. I impɔtant fɔ gi una kɔntribyushɔn, bɔt una nɔ fɔ lɛf fɔ du di ɔda tin dɛn. 24 Una blayn, bɔt una want fɔ sho ɔda pipul dɛn di rod. Una de shifta di mutmut, bɔt una de swɛla di kamɛl!

25 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de klin di biɛn pat pan kɔp ɛn plet, bɔt na soso want want de insay una at, ɛn una nɔ ebul fɔ kɔntrol unasɛf. 26 Una dɛn Faresi dɛn, una blayn. Una fɔ klin insay di kɔp ɛn plet fɔs so dat di bak sɛf go klin.

27 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una fiba dɛn grev we dɛn waytwɔsh, we kin luk fayn na do bɔt insay ful-ɔp wit dayman bon dɛn ɛn ɔlkayn tin we nɔ klin. 28 Semweso, we ɛnibɔdi si una, i tan lɛk se una de du wetin rayt, bɔt insay una at, una na ipokrit dɛn ɛn una nɔ de obe lɔ.

29 “Bad tin go apin to una, dɛn Lɔ ticha ɛn Faresi dɛn. Una na ipokrit dɛn! bikɔs una de bil di prɔfɛt dɛn grev ɛn una de mek di grev we dɛn bɛr di wan dɛn we du wetin rayt luk fayn, 30 ɛn una de se, ‘If wi bin de insay wi gret gret granpa dɛn tɛm, wi nɔ fɔ dɔn jɔyn dɛn fɔ kil di prɔfɛt dɛn.’ 31 So na unasɛf sɛf de tɔk se na di wan dɛn we kil di prɔfɛt dɛn bɔn una. 32 So una kɔmplit di wok dɛn we una gret gret granpa dɛn bin dɔn bigin.

33 “Snek dɛn, vaypa* pikin dɛn, aw una go avɔyd di jɔjmɛnt na Gɛɛna?* 34 Na dis mek a de sɛn prɔfɛt dɛn, sɛnsman dɛn, ɛn pipul dɛn we de tich na pɔblik to una. Una go kil sɔm ɛn ɛng dɛn pan tik, una go bit* sɔm na una sinagɔg* dɛn, ɛn una go mek dɛn sɔfa na difrɛn siti dɛn, 35 so dat ɔl di wan dɛn we du wetin rayt we dɛn kil na di wɔl, dɛn blɔd go de na una ed. Frɔm Ebɛl, we du wetin rayt, to Zakaraya we na Bɛrɛkaya in pikin we una kil bitwin di tɛmpul ɛn di ɔlta, dɛn ɔl blɔd go de na una ed. 36 Fɔ tru, a de tɛl una se ɔl dɛn tin ya go apin to dis jɛnɛreshɔn.

37 “Una we de na Jerusɛlɛm, we de kil di prɔfɛt dɛn ɛn ston di wan dɛn we dɛn sɛn to una—bɔku tɛm a bin want fɔ gɛda una di we aw kombra fɔl kin gɛda in pikin dɛn ɔnda in fɛda! Bɔt una nɔ bin want dat. 38 Gɔd dɔn lɛf una os gi una.* 39 A de tɛl una se una nɔ go si mi igen te una se, ‘Blɛsin de pan di wan we de kam tinap fɔ Jiova* in nem!’”