Mak

11 We dɛn de kam nia Jerusɛlɛm, dɛn rich na Mawnt Ɔliv usay Bɛtfeji ɛn Bɛtani de. Dɔn Jizɔs tɛl tu pan in disaypul dɛn se: 2 “Una go na di vilej we de bifo una. Ɛn as una rich de so, una go si wan dɔnki pikin we dɛn tay we nɔbɔdi nɔ sidɔm pan yet. Una lus am ɛn briŋ am na ya. 3 If ɛnibɔdi aks una se, ‘Wetin mek una de lus am?’ una tɛl am se, ‘Di Masta nid am, ɛn i go sɛn am bak as i dɔn wit am so.’” 4 So dɛn go, ɛn dɛn mit di dɔnki pikin tay na wan domɔt we de bay di strit ɛn dɛn lus am. 5 Bɔt sɔm pan di wan dɛn we tinap de aks dɛn se: “Wetin mek una de lus di dɔnki pikin?” 6 Dɛn tɛl di pipul dɛn wetin Jizɔs tɛl dɛn, ɛn di pipul dɛn gri fɔ lɛ dɛn kɛr am go.

7 We dɛn briŋ di dɔnki pikin to Jizɔs, dɛn prɛd dɛn klos* pan am, ɛn i sidɔm pantap am. 8 Dɔn bɔku pipul dɛn prɛd dɛn klos* na di rod ɛn ɔda wan dɛn kɔt branch dɛn pan tik dɛn we de nia di rod. 9 Di wan dɛn we bin de bifo ɛn di wan dɛn we bin de biɛn bin de ala se: “Gɔd, wi de pre mek yu sev am! Blɛsin de pan di wan we de kam tinap fɔ Jiova* in nem! 10 Blɛsin de pan di Kiŋdɔm we de kam we na wi papa Devid in yon! Gɔd we de na ɛvin, wi de pre mek yu sev am!”* 11 We i rich na Jerusɛlɛm, i go na di tɛmpul ɛn luk ɔltin, bɔt bikɔs tɛm bin dɔn go, i go na Bɛtani wit in 12 apɔsul dɛn.

12 Di ɔda de we dɛn de kɔmɔt na Bɛtani, i angri. 13 We i de fa, i si wan fig tik we bin gɛt lif dɛn, so i go nia am fɔ si if i gɛt frut. Bɔt we i go nia am, i nɔ si natin na lif dɛn nɔmɔ i si, bikɔs nɔto bin fig sizin. 14 So i tɛl di tik se: “Nɔbɔdi nɔ go ɛva it yu frut igen.” In disaypul dɛn bin de lisin.

15 We dɛn rich na Jerusɛlɛm, i go insay di tɛmpul ɛn bigin fɔ drɛb di wan dɛn we de sɛl ɛn bay na di tɛmpul. I tɔnoba di tebul dɛn we pipul dɛn de chenj mɔni pan ɛn di bɛnch dɛn we di wan dɛn we de sɛl dɔv de yuz, 16 ɛn i nɔ alaw ɛnibɔdi fɔ pas wit ɛnitin na di tɛmpul. 17 I bin de tich ɛn tɛl dɛn se: “Dɛn nɔ bin dɔn rayt se, ‘Dɛn go kɔl mi os, prea os fɔ pipul dɛn na ɔl di neshɔn dɛn’? Bɔt una dɔn tɔn am to ples we tifman dɛn de ayd.” 18 Di edman dɛn fɔ di prist dɛn ɛn di Lɔ ticha dɛn yɛri bɔt dis, so dɛn bigin fɛn we fɔ kil am, bikɔs dɛn bin de fred am, ɛn ɔl di pipul dɛn bin de kɔle di we aw i de tich.

19 We ivintɛm kam, dɛn kɔmɔt na di siti. 20 Ali mɔnin we dɛn de tɔn bak, dɛn si se di fig tik dɔn wida frɔm di rut te kam ɔp. 21 Pita mɛmba, so i tɛl Jizɔs se: “Ticha,* luk! da fig tik we yu bin swɛ dɔn wida.” 22 Jizɔs tɛl dɛn se: “Una gɛt fet pan Gɔd. 23 Fɔ tru, a de tɛl una se ɛnibɔdi we tɛl dis mawntin se, ‘Kɔmɔt na ya ɛn go fɔdɔm insay di si,’ ɛn i gɛt fet se wetin i tɔk go apin, i nɔ dawt atɔl, wetin i tɔk go apin. 24 Na dat mek a de tɛl una se ɛnitin we una pre fɔ, una jɔs gɛt fet se una dɔn gɛt am, ɛn una go gɛt am. 25 Ɛn we una tinap fɔ pre, una fɔgiv ɛnibɔdi we dɔn du una bad, so dat una Papa we de na ɛvin go fɔgiv una sin dɛn.” 26 *——

27 Dɛn kam bak na Jerusɛlɛm. As i de waka na di tɛmpul, di edman dɛn fɔ di prist dɛn, di Lɔ ticha dɛn, ɛn di lida dɛn kam 28 aks am se: “Us rayt yu gɛt fɔ du dɛn tin ya? Udat gi yu di rayt fɔ du dɛn tin ya?” 29 Jizɔs tɛl dɛn se: “A go aks una wan kwɛstyɔn. If una ansa mi, a go tɛl una wetin mek a gɛt rayt fɔ du dɛn tin ya. 30 Udat bin sɛn Jɔn fɔ baptayz pipul dɛn, na Gɔd we de na ɛvin ɔ na mɔtalman? Una ansa mi.” 31 Dɛn bigin fɔ tɔk to dɛn kɔmpin dɛn se: “If wi se, ‘Na Gɔd we de na ɛvin,’ i go se, ‘Wetin mek, naw, una nɔ bin biliv am?’ 32 Bɔt wi nɔ gɛt maynd se, ‘Na mɔtalman.’” Dɛn bin de fred di pipul dɛn, bikɔs ɔl di pipul dɛn biliv se Jɔn na tru tru prɔfɛt. 33 So dɛn tɛl Jizɔs se: “Wi nɔ no.” Jizɔs tɛl dɛn se: “Misɛf nɔ go tɛl una wetin mek a gɛt rayt fɔ du dɛn tin ya.”