Akt

16 I rich na Dabi ɛn Listra. Ɛn wan disaypul we nem Timoti bin de de. In mama na bin Ju ɛn na bin disaypul, bɔt in papa na bin Grik. 2 Di brɔda dɛn na Listra ɛn Aykoniɔm bin de tɔk fayn bɔt am. 3 Pɔl tɔk se i want mek Timoti fala am, so i tek am ɛn sakɔmsayz am, bikɔs ɔf di Ju dɛn we bin de na dɛn ples dɛn de; dɛn ɔl bin no se in papa na Grik. 4 As dɛn bin de travul na di siti dɛn, dɛn bin de tɛl di brɔda dɛn di tin dɛn we di apɔsul dɛn ɛn di ɛlda dɛn na Jerusɛlɛm dɔn disayd, so dat dɛn go du am. 5 So di kɔngrigeshɔn dɛn kɔntinyu fɔ gɛt fet mɔ ɛn mɔ ɛn bɔku pipul dɛn bin de jɔyn dɛn ɛvride.

6 Pantap dat, dɛn pas na Frijia ɛn di eria nia Galeshya, bikɔs di oli spirit nɔ alaw dɛn fɔ tɔk bɔt Gɔd in wɔd na Eshia distrikt. 7 We dɛn kam dɔŋ na Misia, dɛn tray fɔ go na Bitinia, bɔt Jizɔs in spirit nɔ alaw dɛn. 8 So dɛn pas bay* Misia ɛn kam dɔŋ na Troas. 9 Na nɛt, Pɔl si wan vishɔn. Insay di vishɔn, wan Masidonian man bin tinap de beg am se: “Kam na Masidonia ɛn ɛp wi.” 10 As i dɔn fɔ si di vishɔn so, wi tray fɔ go na Masidonia. Wi si am se na Gɔd dɔn kɔl wi fɔ go tɔk bɔt di gud nyuz to dɛn.

11 So wi tek bot na Troas ɛn go stret na Samotres, ɛn di ɔda de, wi go na Niapolis; 12 dɔn wi kɔmɔt de ɛn go na Filipay we na Roman siti. Na di siti we bin impɔtant pas ɔl di ɔda siti dɛn na Masidonia distrikt. Wi de na dis siti fɔ sɔm dez. 13 Di Sabat de, wi kɔmɔt na di siti ɛn go nia wan riva usay wi tink se ples de fɔ pre, ɛn wi sidɔm ɛn bigin fɔ tɔk to di uman dɛn we bin dɔn gɛda. 14 Wan uman we nem Lidia, we kɔmɔt na di siti na Tayatayra ɛn we de sɛl pɔpul* bin de lisin. Na uman we bin de wɔship Gɔd, ɛn Jiova* ɛp am fɔ pe atɛnshɔn to di tin dɛn we Pɔl bin de tɔk. 15 We in ɛn di wan dɛn na in os baptayz, i beg wi se: “If una dɔn tek mi as pɔsin we fetful to Jiova,* una kam de na mi os.” Ɛn i mek wi go de.

16 Wan de we wi de go na di ples fɔ pre, wan savant gal we gɛt dimɔn mit wi. Di dimɔn bin de mek i ebul tɔk wetin gɛt fɔ apin bambay. Di gal bin de mek in masta dɛn gɛt bɔku prɔfit we i de tɔk bɔt wetin gɛt fɔ apin bambay. 17 Dis gal bin de fala wi ɛn Pɔl, ɛn i bin de tɔk lawd wan se: “Dɛn man ya na slev dɛn fɔ di Gɔd we De Pantap Ɔlman, ɛn dɛn de tɛl una bɔt aw una go sev.” 18 I kɔntinyu fɔ du dis fɔ sɔm dez. Wan de Pɔl taya wit am, na de i tɔn ɛn tɛl di dimɔn se: “A de yuz Jizɔs Krays in nem fɔ tɛl yu fɔ kɔmɔt insay am.” I kɔmɔt insay am da sem tɛm de.

19 We in masta dɛn si se dɛn dɔn lɔs di tin we de mek dɛn gɛt prɔfit, dɛn ol Pɔl ɛn Saylas ɛn drɛg dɛn go na di makit to di rula dɛn. 20 Dɛn kɛr dɛn go to di sivul majistret dɛn ɛn tɛl dɛn se: “Dɛn man ya de rili ambɔg wi siti. Dɛn na Ju dɛn, 21 ɛn dɛn de tɔk bɔt tin dɛn we wi lɔ se wi nɔ fɔ du, bikɔs wi na Roman dɛn.” 22 Na de ɔlman na di krawd tɔk to dɛn wit wamat, ɛn di sivul majistret dɛn chɛr dɛn klos, dɔn dɛn mek dɛn bit dɛn wit tik dɛn. 23 Afta dɛn wap wap dɛn, dɛn put dɛn na prizin ɛn tɛl di pɔsin we de gayd di jelman dɛn fɔ gayd dɛn gud gud wan. 24 Bikɔs na dat dɛn tɛl am fɔ du, i put dɛn na di sɛl we de rayt insay di prizin ɛn lɔk dɛn fut dɛn midul ebi bod dɛn we gɛt ol fɔ put fut.

25 Bɔt midulnɛt, Pɔl ɛn Saylas bin de pre ɛn siŋ fɔ prez Gɔd, ɛn di prizina dɛn bin de lisin to dɛn. 26 Wantɛm wantɛm big big atkwek apin, we mek di jel in fawndeshɔn shek. Pantap dat, ɔl di domɔt dɛn opin wantɛm wantɛm, ɛn ɔlman in chen lus. 27 We di pɔsin we de gayd di jelman dɛn wek ɛn si se di prizin domɔt dɛn dɔn opin, i tink se di prizina dɛn dɔn rɔnawe, so i pul in sɔd ɛn i bin want fɔ kil insɛf. 28 Bɔt Pɔl tɔk lawd wan se: “Nɔ du bad tin to yusɛf, wi ɔl de na ya!” 29 So i aks fɔ mek dɛn gi am layt dɛn, ɛn i rɔn go insay. I bin de trimbul, ɛn i fɔdɔm bifo Pɔl ɛn Saylas. 30 I briŋ dɛn na do ɛn se: “Wetin a fɔ du fɔ mek a sev?” 31 Dɛn tɛl am se: “Biliv pan Masta Jizɔs, dɔn yu ɛn di wan dɛn we de na yu os go sev.” 32 Dɔn dɛn tɔk bɔt Jiova* in wɔd to in ɛn ɔl di wan dɛn we de na in os. 33 Ɛn i kɛr dɛn go da sem nɛt de ɛn was dɛn wund dɛn. Dɔn in ɛn ɔlman na in os baptayz; dɛn nɔ westɛm atɔl. 34 I briŋ dɛn kam na in os ɛn gi dɛn tin fɔ it, dɔn in ɛn ɔl di wan dɛn we bin de na in os bin rili gladi we i dɔn biliv Gɔd.

35 We doklin, di sivul majistret dɛn sɛn di ɔfisa dɛn fɔ tɔk se: “Fri dɛn man dɛn.” 36 Di pɔsin we de gayd di jelman dɛn tɛl Pɔl se: “Di sivul majistret dɛn dɔn sɛn man dɛn fɔ fri una tu. So una kam na do ɛn go saful.” 37 Bɔt Pɔl tɛl dɛn se: “Dɛn bit wi na pɔblik, we dɛn nɔ luk insay wi kes ɛn put wi na prizin, we i bi se wi na Roman dɛn. Ɛn naw, dɛn want fɔ pul wi sikrit wan? Nɔ-o! Mek dɛnsɛf sɛf kam pul wi na do.” 38 Di ɔfisa dɛn tɛl di sivul majistret dɛn bɔt dɛn tin ya. Dɛn fred we dɛn yɛri se di man dɛn na Roman dɛn. 39 So dɛn kam ɛn beg dɛn, ɛn afta dɛn pul dɛn na do, dɛn beg dɛn fɔ kɔmɔt na di siti. 40 Dɛn kɔmɔt na di prizin ɛn go na Lidia in os, ɛn we dɛn si di brɔda dɛn, dɛn ɛnkɔrej dɛn ɛn go.